KANTHOUNA 42

Josephbei Teinao Rapni Egyptra Chakpharou Kyu

1Asinungri Jacobne Egyptra trunwaiyei lung chungni leileime toubi pao mayekurla, heitounei Jacobne aiyei chanao rapnung shun, “Koutounei nani khatle khat thicharilbi leikurawo?” 2#Pao 7.12. Heirouri ani asitoubi shun, “Thilak, Egyptra trunwaiyei lung chungni kleime touri keine myekurla; heineri nani ram heirou yula toubine, yairouwei tsai-an yulolaklo, heiyanungri kari ringrou, himakrou.” 3Heisi toubine Josephbei teinaorap napung'chipni Egyptra tsai-an lonungei yukur. 4Heiya Jacobneri Josephbei naowa Benjaminyari aiyei teiya raple kalhonni hilthungammakur, ngamri aiyei dourakhi klah dabi suikngam thukkurthuleiko toubi Jacobne ningchikur. 5#Pao 7.11. Heisitoubi Israellei chanao rapkhi tsai-an lorou cha thimi raple kalhonni Egyptra yu'tlungkur; ngamri Canaan'rakhi beimak thuithini butam thukkura.

6Kheen heirouri Joseph'ne ram heiyei pu khoini paalbi louklei; heirou ani ram heirouwei thimi rapnungei tsai-an louyorpikur heirouri Josephbei teinao rapkhi yu'tlungbi, heirou yani aiyei maibongra thleira khuklu kanthrunchani kanellhakbi, yai mai sikhuplhakbini aya khrumkur. 7Heirou Josephneri aiyei teinao rapyari shak loukmu, heiya aniri aiyei shakrungri yanungei muyermakni, yaya mumanremak thimi'naksini, tloukhi kyakni yunbini, “Nari koulhangrei kwa thimiyo?” toubine yaiyei khril'thi khoini loukngai. Heirouri yani loumallang, “Kari Canaanrei thimi rapme, tsai-an lonungei kyume,” toubine loukyun. 8Heirou Joseph'ne aiyei teinao rapyari shak loukmu. Heiya yaniri aya shak mumanremak. 9Heirouri Joseph'ne yaiyei ngamrou muwurkhou rmong heiya ningthutkur, heitoubi ani yanungei shun, “Nari raal'mucha thimi, keiram awaya thikulnanungei wachangkur thimirap.” 10Heirou yani anungei mallangbi loukyun, “Nimakme, Krungwa, heiya neiyei shokrap kari chanung-mainungei tsai-an lonungei kyume. 11Kari pa khatdei chanaothil, heirou kari tharmu chim thimi rapme, neiyei shokrap kari raal'mucha thimi nimakme.” 12Heirouri ani yanungei loushun, “Nimak, nari keiyei ram awaya thikulnanungei yuchangkur thimirap.” 13Heirouri yani loukyun, “Neiyei shokrap kari teinao chiple khni klei, napawa khatdei Canaan'ra pukkhou chanaothil, heitoubi thilak, angturi kaiyei nao dongchari kai pawayei pongra leithungleihui, heiya nao khatpari hiyura.” 14Heirou Joseph'ne yanungei loushun, “Heihakrime, keine naya ‘raal'mucha thimi rapme’ toubi kyunri! 15Heiyanungri na'ari chimmo-chimmakko touri naya tlou darbini thirouwa; heineri Pharaohyei chaytlou hilthungni, naiyei naodongwa heiri bi arou heiruiheibongyen nayari shaalyermakrou. 16Heitoubi naihangrei napung khatya yenmalhetbi, naiyei nao dongwaya yukruiheilaksu; heitoubi na deiyari kulrilla chalphopbini khourou dawa; heirou naikyun tlourap heiri chim-chimmak toubi darthirouwa; darthibi naihangra chimmakur thanganungri, Pharaohyei chaytlou hilthungni nari raal'mucha thimi darou.” 17Heisitoubi ani yayari tlaini khyumnibil kulrilla chalphopbini khoukur.

18Heitoubi khyumni tlungkur heirouri Joseph'ne yanungei shun, “Keikhi Dunpuya chi-rikraini klei thimi khat, heineri nani ringniyanungri keiyei kyunya chanthunglak. 19Heirou kounakpi nani tharmu'chim thimirap hoiyanungri, nai teinao rapbei hangrouwei napung khatyari kulrilla phonphopkhoubini, heitoubi na deiri nai cheemra chanung-mainungei tsai-an urbini shaallaka. 20Heiya naiyei naodongwa heiri keileinara heiruiheilak, heisi toulanungri naiyei kyuntlou heiri chimme toubi murou; heiyanungri naya hiyermakrou.” Heirou kyun heinakrim yani lhou loutoukur. 21Heirouri yani khatle khat yunrilkur, “Kane kaiyei naowaei doura touwurkhou lhourap heiri beimak klallei lhoume! Heirou aya kalpinanungei toubi aiyei lhawai klahni kanungei buchawurkhou, heiya kani aiyei houya ninglhakpimakur; heingammei asinungri klahyei lhou heiri kaidoura hungdakurame.” 22Heirouri Reubenni yanungei loumallangbi asitoubi kyun, “Keine nanungei, douwa heiyei doura umphitbi klal toupimakase toubine yunkhoumaka? Heiya naneri keitlouya loupimakur. Heingammei asinungri thilak, aiyei heeyei laltul heiri kaidoura dawurame.” 23Heirou Joseph'neri yaiyei kyun heiya phab daleime touri yani mumak, ngamri ani yanungei shunyeinungri thimi napung khatni tlou mallengthutpikur. 24Heirou ani yairouwei chutdurbini aitam munikhi chapkur; heitoubi hanui hungchangbini yakou tlou kallangrilthu; heirou ani yaihangrei Simeonya ungthutbi heitoubi yaimaibongra aya phonbini khoukur. 25Heitoubi Josephni chay pibi yaiyei cha phitungka namma thim-thimni haalyerkur; heitoubi yaiyei tuy rapkhi ai'aiyei putyum rilla lhakbini phonphopyerkur; heiyakhi duinara yani lamra chamainungei chaktham yumkhi marshikbini pithungyerkur; heisi toubine ani yanungei marshikpikur.

Josephbei Teinao Rapni Canaan'ra Kallengkur

26Heirouri yani gadha doura ai'aiyei cha'phitungka rapya khangbaangbine bi heirouwei shaalkur. 27Heirouri yaihangrei khatpani yai hungchakna cheemra gadha namh pishainungei marshiknarouri, aiyei chaman tuy heiri aiyei cha-phitungka phonphopna murra loukyao karthangkur. 28Heirouri ani aiyei teinao rapnungei shun, “Thilak, keiyei chaman pinungei tuy heiri keiyei cha-phitungka phanphopnara heisiwa louyaoleime.” Heisi tounarouri yani uksawurbi chiwurchiya, heitoubi yani khatle khat yunrilkur, “Dunpune kanungei toupikur awaya kouweiyawo?”

29Heirou yani Canaan ramra yai pawa Jacobei leinara hungtlungbi, yanungei thukkur lhouthuk rapya namma pao hungtambi kyun: 30“Ram heiyei pu upa heiri kanungei beimak thuithini loushunkur, heitoubi kayari raalmucha khoini yairamra muni thikulnanungei wachangkur thimime toubine loumanphopkur. 31Heirouri kani anungei loukyun, ‘Kari ukning khying thimi, raalmucha nimakme. 32Heirou kari kai pawaei puknarari teinao napung chiple khni, heiya khatri hiyura; heitoubi naodongwari asinung kai pawakou Canaan ramra leithungleihui.’ 33Heirouri ram heiyei pu upawa heini kanungei shun, ‘Heiyanungri keine nari ukning khying thimi rapme toubi munanungei, naihangrei napung khatri keikou heileithunglaka, heitoubi deiri nai cheemra chanao rapbei chanung-mainungei cha'phitungka rapya urbini shaallaka. 34Heitoubi naiyei nao dongchaya keinungei heiruiheilak; heiyanungri keine nari raalmucha nimaklei, heirou ukning khying thimi rapleime toubine murouwa. Heiyanungri naiyei teinaowa heiyakhi nanungei loumallengpithurou; heitoubi nani ram arouwei lal holnei lhoukhi chasunda yarou.’ ”

35Heirouri yani mimiyei cha-phitungka rapya hungshutnarouri, thilak, thimi napung kantangei tuy yum heiri ai'aiyei cha-phitungka phonphopna rilla namma loukyao yani muwurla. Heirouri yakhi, heirou yai pawakhi yaiyei tuy yum rapya munarouri beimakni chiwurchiya. 36Heirouri yai pawa Jacob'ne yanungei shun, “Nane keiyari keiyei chanao rapnung'tlim lhawai klahni kanrilyerwurlame; Joseph'khi hiyura, heirou Simeonkhi makkura, heitoubi nani Benjamin'yakhi hanui ruilouthurouwako? Awari keiya manrouhatnei lhouthilme.” 37Heirouri Reuben'ne aiyei pawanung loushun, “Keine aya hanui yenruimallengkur manimaka'nungri, keiyei chanapawa khintam heirapya hatdurlak; heirou ayari keihutra silnapilaklo, keine aya hanui neinungei yenrui'mallengthuroume.” 38Heirouri Jacobne loushun, “Keiyei cha dongwari nakou hilthungmakrou, ngamri aiyei tei upawakhi hiyura, heirou asinungri aitam'tomngeiya; heirou nani yukruiheibi aidoura shuikngam thukthuwanungri, nani truk pukkur keiyari lhawai klahni hiyerrou (Sheol'ra yongchangyerrou) leiyame.”

Currently Selected:

KANTHOUNA 42: MARIBSI

Highlight

Copy