KANTHOUNA 41

Pharaoh'yei Rmong Kman

1Heirouri kum'khni yenralkur hillouri asitoubine hungthukkura, Egyptbei Krung Pharaoh'ne rmong khat loumanbi, rmong heirouri ani Nile Kungruira mayungbini louklei. 2Heirouri thilak, Nile Kungrui heirouwei halpui lhangaini marnam enitam wathukbini bi heitamrou yani namh shaibini louklei. 3Heirouri thilak, halpui rapbei hilla Nile Kungruira beimakni shulkur halpui enitamkhi wathuk, heitoubi yani kungpalla halpui marnam rapbei hilla wamayungkur. 4Heitoubi shulkur halpui enitam heirapne marnam halpui enitamya mdulloukur. Heisi loumukur hillouri Pharaoh ipnarei mitrak kathukkur. 5Heitoubi Pharaoh'ne hanuikhi iplhakurbi, heirou ani rmong khatkhi hanui loumanthu; heirouri thilak, cha'trung khatrou chahui enitam kathukbi, chahuirap heiri shang tlungbilbil heibini lhangaidui mraobi minkur loukmu. 6Heirouri thilak, chahui rapbei hilla, kulkung lhangrei martheeni norwurbi yumakkur chahui enitamkhi kathukthu. 7Heirouri yumakkur chahuirap enitamni manbobni lhangaidui heibi klei chahui rapya mdulloukur heiya ani loukmu. Heirouri Pharaoh mitrak kathukkura, heirouri thilak, aiyei mukur heiri nammani rmongthil. 8Heirouri ningshunnungri aiyei lhawai lahwura, heitoubi ani thimi malhetbini, Egyptbei mukhei thim rapya heirou shingkhei thimi rapya ungyerbi, heitoubi Pharaoh'ne yai maibongra aiyei rmong rapya yunpikur; heiya yaihangra aiyei rmong heiwaya anungei artha mallengthutpi mani thimiri hukhatkhi yaomakura.

9Heirouri tulkep malan wattouwa upa heiwani Pharaohnung heiyunthutkur, “Angturi keiyei klal khatri neiyei maibongra yunthutdeise(keiyei klal rapya keine ningthutlei). 10Pharaoh'ne shok rapbei doura malungkhayei kheenrou, keile mumtol sheem wattouwa upawa kasiya raallui upawaei cheemra kul chalphopbi khouyeinang; 11heiyei kheenrou masa khatnungri karukhni'rekpani rmong khatsol loukman, heitoubi rmongrap heiyei arthakhi lailaini loukhoi. 12Heirouri kakhuntakou pulni kulrilla Egypt raallui upawaei shokme toubi Hebrewa kartlang douwa khatkhi leimalkna; heirouri kaiyei rmongrap heiya anungei yunpinarouri, ani kasiyei rmongrap heiya ai'aiyei arthakhi lailaini chimni mallengthutpikur. 13Heirouri asitoubi hungthukkura, ani kaiyei rmongrap heiya kanungei artha mallengthutpikur heinakrimni, keiyari keiyei tirrei watlhou bomra kallenglhakyerthu, heitoubi ayari manyarhatkur.”

14Heisi tounarouri Josephya wa'ungyernanungei Pharaoh'ne thimi heimalhetkur, heirouri yani khnotni wabini Josephya kul chalkhounarei yenruiheikur; heirouri Joseph'ne aiyei murkhmul ngoumathaikur, heitoubi aiyei phirulkhi martlengurbini Pharaohyei maibongra wachangkur. 15Heirouri Pharaoh'ne Josephnung loushun, “Keine rmong khat loukmu, heiya keiyei rmong heiri hunikhi artha mallengthutchang yaomakura; heirou mine neiyei ngamrou yunkril heiri keine mayekurla; nangri rmongei wari louningthibi, heiyei arthakhi mallengthut manileime toubine yunrillei.” 16Heirouri Joseph'ne Pharaohnung mallangbi loukyun, “Rmong heiyei artha mallengthutnei maniri keinungei makme, heisiya hoiyanungkhi Pharaohyei pilnanungeiri Dunpune artha mallengthutpirou tomngei.” 17Heirouri Pharaoh'ne Josephnung shun, “Louningthilak, keiyei rmongra asitoubine loukmu, Keine Nile Kungruira mayungbini louklei; 18heirouri thilak, kungrui heirouwei halpui khmul karbiltlilni marnam enitam wathukbini namh shaibini louklei. 19Heirouri thilak, halpui shulkhrem enitam khatkhi yaiyei hilla wathukthu; heinaksi shulkur hal rapri keine Egyptra tekkhi muthimakhui. 20Heirouri shulkur halpui enitam heini marnam halpuirap enitamya mdulloukur. 21Heirou yani halpui marnam rapya mdulwurlame toukhi hunikhi mumak, ngamri madulloukur hilloukhi haalleinakni heisi shulkhrem taarbini klei. Heisi loumubi hillouri keiri mitrak kathukkur. 22Heitoubi keine rmong khatkhi hanui loumanthu; heirouri thilak, cha'trung khatra chahui enitam kathukbi, shaang tlungbilbil lhangaidui heibini louklei. 23Heirouri thilak, yaihilla kulkung lhangrei martheene shataarkur tsai yumak chahui enitamkhi kathukbi heikur loukmu. 24Heitoubi taarkur chahui enitam heirapne lhangai chahui enitamya mdulloukur; heisitoubi keine keiyei rmong awaya thuikhei thim rapnungei yunpikur, heiya ya hukhatnikhi keiyei rmong heiwaya keinungei artha mallengthutpi mani yaomakura.”

25Heirouri Joseph'ne Pharaohnung shun, “Pharaohyei rmong rapri artha khatnakthillei. Dunpune Pharaohyei tounungei lhouya mutpilei. 26Halpui marnam enitam heile, shaang'tlung chahui enitam heirapkhi kum'eniya munalei. Rmong khintam heiyei arthari khatnakthillei. 27Heirou yaiyei hillei wathukkur halpui shulkhrem enitam heiri hungrou kyou kum'eniya mu'kna; heirou kulkung lhangrei martheeni shataarkur chahui enitam heiri kum'eni butam(chaktang) hungthukrou kyou heiwaya mu'kna. 28Asitoubi keine Pharaoh'nungei yunthutpikur heinakrimni, Dunpune Pharaohya kou touyerkniyo tounei ngamya mutpikur. 29Thilak, Egyptbei ram karyouni kumpar lhangaibi kum'eniri trunwai leraoni luklhakrou. 30Heitoubi heiyei hillouri kum'eniri butam khat hungthukrou; heirouri Egypt rammei trunwai marthumni luklhakhou heirapri malum'rouwa; heitoubi butamkur heini ram heiwaya tlumyerrouwa. 31Heirouri ram heiyei rilla butamnei#41.31: butam: chaktang. ngamrou koukhatkhi leraoni chamu-maimumakrou; heitoubi heihillouri ram heirouri klah-mrimni thim'rouwa. 32Heisitoubi Pharaohnung rmong khatya khintam thukni loumuyerkur heiri Dunpuei muyerkur lhouthil; heirou lhourap heiri Dunpune khrangni hungthukyerrouwa. 33Heineri asinungri Pharaoh'ne malungamna kya shingkhei napawa khat khalthutbini, Egyptbei lhoubomrap nammaei doura thikulpi lhousilla pu khat khoini aya bom lhakpilaksu! 34Heirou Pharaohyei tounungei lhouri, ani ram heiyei watlhou thikulpi purap khalthutlaksu, heitoubi yani thilhakbi kum'eniyei rilla Egypt ramrei marthumni trunthutkur trunwai lungrap heiri siruk phangaei siruk khatri kumserrei khoini mallongyerbi khoulaksu. 35Heitoubi yani kum eniyei rilla lhangai marthumni luklhakkur trunwai rapya marpeibini khoulaksu; heitoubi trunwai lungrap heiri Pharaohyei khukarthil kantangrakhi chapong sheembini marpeibi khouyerrou da; heitoubi lhou'urpu rapne heirapya lhangai-mukheini thikulrou da. 36Heitoubi marpeirou kyou trunwai lungrap heiri Egyptra hungthukrou kyou thuithikur butam heirouwei tholnanungei hoirou; heitoubi butam heiwani ram heiya maangyerrou younarei loukalnanungei hoiyerrou.”

37Heirou kyuntlou heiri Pharaoh'nungle aiyei shok rapnungri beimakni lhangai tloubom khat khoini mulhakwurla. 38#Pao 7.10. Heirouri Pharaoh'ne aiyei shok rapnung kyun, “Anaksi Dunpuei lhawaini kalhonpikur thimiri deira rapha muweirouko?” 39Heirouri Pharaoh'ne Josephya shun, “Dunpune tloubomrap namyerwa heiya neinungei muyerpiwurlari, ram arouri neiya duini shingkhei heirou roushing klei thimiri hukhatkhi makkura. 40Heineri asinungri nangni keiyei bommaiyei doura pu hoirou dawura; heirou keiyei thimirap nammanikhi neiyei kyuntlou rapya hilthungni chanthungrou dawura; heitoubi keiri keiyei Krungbom'ratom Pu khoini thrungbini leirou.” 41Heirouri Pharaoh'ne Joseph'nung shun, “Thilak, keine neiyari Egyptbei ram namyerwaei doura Pu hoinanungei silnawurla.” 42Heisi toubine Pharaoh'ne aiyei hutmayungrei hutsi lhukthutbi, heitoubi Josephbei hutmayungra nabaangpikur; heitoubi ani Josephya phaikhringei shambni mansambaangpibi heirou aiyei ngakhungra sinayei khrul khatkhi huklhakbi nabaangpikur. 43Heisitoubi Pharaoh'ne Josephya khintam tlung sapuk kaariya tungyerkur; heitoubi yani aiyei maibongra ungraochani paobi, “Aya khuklu kanthrunchabi khrumlaklo,” toubi kyun. Heisi toubine ani Josephya Egyptbei ram nammaei doura lhou'urpu upa khat khoini bom lhakpikur. 44Heina douroukhi Pharaoh'ne Joseph'nung shun, “Keiri Pharaoh, heiyanungkhi neitlou yaomakni Egyptbei ram arou thimi hukhatnikhi tlou yun yamakrou.” 45Heisitoubi Pharaoh'ne Josephbei min “Zaphenath-Paneah” toubi thulpikur, heitoubi On yultlaiyei suipipu Potiphera'yei chanapuiya Asenathya Josephbei nu khoini ani loubaangpikur. Heisi toubine Joseph'ne Egyptbei ram karyouni karwaichakur lhousilpu khoini thikulpikur.

46Heirouri Joseph'ne Egyptbei Krung Pharaoh'yei maibongra watlhou churyouwei kaalnungri ai'mshaei kum somthum tlungura. Heirou Joseph'ne Pharaoh'yei maibongrouwei wathukkurbi Egyptbei ram bi kantangrou thikulkur. 47Heisi toubine kum'eniyei rilla ram heiyei trunwai marthumni luklhakbi markumthungkur. 48Heisi toubine Egypt ramrei trunthutkur trunwaiyei lung rapya kum eniyei rilla ani marthumni khumbangyerbi mallonglhakur, heitoubi khukarthil kantangra marpeilhakbi khoukur. Heirou lou kantangrei lukkur trunwaiyei lung rapya khukarthil kantangra lieng chep malknani ani marpeibini khouyerkur. 49Heisitoubi Joseph'ne ram heirouwei trunwai lungrap heiri samadrurei shitnruiyakhi duini chungni mallongbini marpeilhakkur, heirou trunwaiyei lung heiri holmarkhebi dongnarari chungachaknei ngamrou mshingkhi sherchichangmakur.

50Heirouri butam(chaktang) thukbongnung, On yultlaiyei suipipu Potiphera'yei chawi Asenathne Josephnung chanapawa napung'khni pukkur. 51Heirou Joseph'ne aiyei chanapawa samranwaei min Manasseh#41.51: malumkyer. toubine thulpikur. Ngamri ani kyun, “Dunpune keiyei klah-mrimkur heiya mlumyerwurla, heirou kaipawaei bommaiyei klahkhi mlumyerwurla.” 52Heitoubi ani chanapawa khintam'tlung heiyani Ephraim toubi min thulpikur. Ngamri ani kyun, “Dunpune keiyei leinaram arouwei klah'knang'rouweikhi nungwaiyerbi keiyari lung punyerwurla.”

53Heirou Egyptbei ram heirouri trunwaiyei lung marthumni luklhakur heiri kum'eni yentlungura. 54#Pao 7.11. Heirouri Josephbei yunthutdurkhou heinakrimni, kum'eni chaktangnei klah'knang waiyouwura. Heisitoubi ram kantangra butam thukkura, heiya Egyptbei ram karyouneri chamainungei trunwaiyei lungri marthumni klei. 55Heiya hillouri Egyptrakhi chanungei luilhakwurbi butam hungthukyei kheenrou thimi rapne Pharaohnung tsai-an pinanungei shunchakur. Heirouri Pharaoh'ne Egyptbei thimirap namyernung shun, “Nane Josephbei leinara wachangalo, heitoubi naya toulaklo toubi loushunkur lhou rapya nani toulaklo.” 56Heisitoubi tlaipangpal karyouni butam hungthukkura, heirouri Joseph'ne trunwai lung marpeikhou chakei rapya laatbini Egyptbei thimirap nammanungei louyerpikur; ngamri Egyptbei ramrei butamkur heiri yunnungei makni klah-mrimyei trum khat khoini thukkurkhou. 57Heiyakhi duinara, tlaipangpal karyouni butam thukwurnei ngamrou tlaipangpal ram deirei thimi rapnekhi Egyptra wabini Joseph'nung tsai-an walorilkur.

Currently Selected:

KANTHOUNA 41: MARIBSI

Highlight

Copy