KANTHOUNA 44

Krungei Daarkok Maangkur

1Heirou Joseph'ne aicheemrei watlhou silpu upa heinung shun, “Napawa rapbei cha phitungkarap heiri mimiyei ur'kroni put sheempilaka, heitoubi yai tuy rapkhi ai'aiyei cha phitungka rilla lhakbini phonphoplaka. 2Heitoubi keiyei lapa thirrei daarkok heiri yai naodongwayei cha phitungkara, aiyei cha man tuykhi kyaoni phonphopburlak.” Heisitoubi napawa heini Josephbei shunmtukur hilthungni marshikpikur. 3Heirouri nung katwaarkurle ningshun manma napawa rapya yai gadha raple kalhonni shaalyerkur. 4Heirouri yani yultlai heirouwei shaalthutkurle, tlatni shaalbongnang, Joseph'ne aiyei watlhousil upawa heinungei shun, “Khrangtoulak, napawa rapya heichanthunglaka, nangni yaya chanphalanungri asitoubi washunlak, ‘Nanungei lhangai toupiwurnarou lhangaimak lhouya mallengpikhou heiri youknako? Koutounei nani keiyei cheempuwei daarkokya muloukuro? 5Heiri pu aiyei yui'mongna daarkok nimakka? Heiyaduinara heirouwei ani Dunpu'nungei watlhou touna put nimakka? Heiya nai muloukur heiri beimak ukning lhangaimakei lhouso!’ ”

6Heisitoubi ani yaya heichanphanarou yunmatupikur heinakrimni ani yanungei washunkur. 7Heirou yani anungei loushunchakur, “Upawa, kounungei heinaksi tlou rapya kanungei yunkurrawo? Neiyei shokrap kani heinaksi lhouya tourouri Dunpune yamakme. 8Thilak, kaiyei chaman tuy ramphani kaiyei cha phitungka rilla louyaonarou, kani hanui kallengni Canaan ram'rouwei bi arou heipithulei; heiyanungri koutoubi neiyei shokrap kani neiyei cheempuwei cheemrei sina nimanung lapaya mulouheirouwo? 9Yukthiphalak, kounakpi put heini kaihangra hukounak khatnungei louyaothangkur hoiyanungri, ayari hatlaka, heitoubi kayakhi neiyei shok hoiyerwurlaksu.” 10Heirou ani kyun, “Heiyanungri naikyun tlou rapbei hilthungni hoilakasu: Put hei loukyao thimi heiri keiyei shok hoiyerrou dawa, heitoubi na deiyari klal dayerpimakrou.” 11Heirouri yani mimiyei put rapya khnotni thleira loumathrumkur, heitoubi ai'aiyei cha phitungka phonya shutyerkur. 12Heirouri ani upa'rouwei waiyoubini naodongwaei put ramphani waiknaini phorthikur. Heirouri daarkok heiri Benjaminyei cha phitungkayei rilla loukyao karthangurla. 13Heisi tounarouri yani ai'aiyei linglik threlwurbi, heirou yaiyei putyum rapya gadha doura seobaangbini khukarthilla hanui heikallengkur.

14Heirou Judahle aiyei teinao rapne Josephbei cheemra wachangei kheenrou Josephkhi louklei. Heirouri yani aiyei maibongra thleira sikhuplhakbi khrumbini rochakur. 15Heirouri Joseph'ne yanungei loushun, “Nai toukur heiri kouwo? Keinak napawa khatni kar'anbi manime touri nani mumakko?” 16Heirou Judah'ne loumallangbi kyun, “Keiyei Upawayei bomra kani koutoubi pao tamserouwo? Kane kouya yunserou? Tloubom awaya koutoubi kani yunhyingserouwo? Dunpune neiyei shokrap kaiyei mralya raphathutkur awariyame, thilak, ka nammani, daarkokya loukyao thimi heikhi kyaoni neiyei shok hoikur ariyame,” 17Heirou ani kyun, “Heihakpari keine toumakrou, Dunpune yamak, heiya daarkok loukyao thimi heiyatom keiyei shok hoiyerrou; heitoubi na deirapri kyingni shaalbi, nai pawayei leinara hunglaka.”

18Heisi tounarouri Judah'ne aiyei pongra hungkarsilbi shunchakur, “O keiyei upawa, neiyei shok keiya neimaibongra tloulhang khat'khnicha yunyerpilaklo, kouweiyo toulanungri, upawa nangri Pharaoh'naksi bomtang pume. 19Upawane kanungei ‘Nari naipawa leileihuiko? Nimanung naiteinao khatkhi leileihuiko?’ toubine ngaithiyei kaalnung; 20heirou kanikhi upawa neinungei loushunkur, ‘Moi, kai pawari leileihuime, ari tarwurame heirou aiyei tarhillei pukkhou chanapawa douwacha khat leileihuime, heirou aiyei teiri hiyurame; heirou aiyei puiwiyei puknarari aitam'tomngeiya, heitounei ngammei aiyei pawani ayari beimakni kringme.’ 21Heirou upawane kanungei, ‘Aya bi ara keinungei yukruiheilak, keine aya munileime, toubine shunpikur.’ 22Heirou kani upawanung loukyun, ‘Douwa heiri aiyei pawaya horkhouchangmakme, ngamri ani aiyei pawaya horkhoula'nungri, aiyei pawari hiyurou tomngeiyame.’ 23Heirou upawane neiyei shok kanungei, ‘Naiyei naodongwa heiri nakou kalhonni yumanungri, nani keiya murilnungei yamakrou toubine shunpikurme.’ 24Heirou kani neiyei shok kai'pawaei leinara hungtlungbi, upawa neiyei shunthungkur tlou rapya anungei paotamkur. 25Heirouri kai pawani loushun, ‘Nane hanuikhi yubi keiyei chamainungei tsai-an tha yulothuwalo.’ 26Heirou kani loukyun, ‘Kari yuchangmakarou; heitoubi kaiyei naodongwa heiri kakou kalhonbi yuwanungri, kani yuthuweise; koungameiyo toulanungri kaiyei naodongwa heiri kakou kalhonni yumakanungri, kani napawa heiya murilchangmakrou.’ 27Heirouri neiyei shok kai pawani loushun, ‘Keiyei nuni keinungei chanapawa napung'khni pukkhouri nani kmu heiriya. 28Heirou khatri keirouwei chawurnarou, ayari shuimakni humeni threlbi maiwurlarou, ngamri ani keirouwei chakurle tekkhi muphamakura. 29Heirou nani ayakhi keirouwei ruilouheibi, kounakpi aidoura shuikngam thukthuwanungri, truk pukkur tara keiyari nani lhawai klahni lhanra ruilhakkur heinakura,’ toubi kyun. 30Heineri asinung keine neiyei shok kai pawaei bira yenkallengnung, douwa heini kakou kalhonni hungmakurya ani loumurouwa. 31Heitoubi douwa heiri kakou hungmakurame toubi ani loumulanungri, ari lhawai klahni hirouwa; ngamri aiyei chaanrou douwa heichaya malungamni thibidik klei. Heirou trook pukkur neiyei shok kai pawaya kani lhawai lahyerbi hiyerkur darouwa. 32Ngamri neiyei shok keine kaipawaei maibongra kantombi yunwurkhouri, ‘Douwa heichaya keine neileinara yenruiheima'nungri, pawayei maibongra keiyei chaan khatrek heiyei mralya urrouwa.’ 33Ngam heini, Asinungri, keine neinungei bucha maneri, douwa heiyei runghutra, keine upawayei shok khat khoini leithungeise; heitoubi douwa heiyari aiyei teinao raple kalhonni cheemra hunglakasu. 34Kouweiyo toulanungri, keine douwa heiya yenruiheimakni kai pawaei bira koutoubi hungchangrou? Heinimanungri kai pawaei doura darou kyou klah heiri keine thichangmakrou.”

Currently Selected:

KANTHOUNA 44: MARIBSI

Highlight

Copy