KANTHOUNA 37

Josephbei Rmong

1Heirou Jacob'ne aiyei pawani ramtaangbi paalkhouna Canaan ramra paalkur. 2Awari Jacobei yu-cha rapbei wari: Joseph'ne ai'mshaei kum chiple'eni tlungeinung, aiyei teiya rapkou yai pawaei yaorulya silkhou. Heirou Joseph'ne aiyei pawaei nukhurap Bilhah'yei chanapawa raple heirou Zilpahyei chanapawa rapkou leiyeinang, aiyei pawanungei yaingamrou lhangaimak pao khat hungtamkur. 3Kheen heirouri Israel'ne aiyei chanapawa dei rapyakhi duini Josephya malungshikhou; ngamri Josephri aiyei tarhillei pukkur chanapawa khat. Heitoubi ani Joseph'nungei linglikchul bungrang khatkhi tubaangpikur. 4Heiya aiyei teiya rapne, yai pawani Joseph'yari aiyei teinaorap deiyakhi duini malungshileime toubi mulhakkur heirouri, yani ayari beimakni machinkur, heirou anungei tloukhi lhangai-kyingni kallangpinimakur.

5Heirouri Joseph'ne rmong khat loukmu; heitoubi ani aiyei teinao rapnungei rmong heiya yunthutpikur, heirouri aiyei teinao rapne ayari duiduini machinknani karhalkur. 6Heirou ani yanungei shun, “Louningpilo, keiyei rmong loumunei wari khat yunpiyeise. 7Thilak, ka nammani phailoura cha'sphal dangbini louklei; heitoubi keiyei cha'sphal heiri kanthoubini mayungkur, heirouri naiyei cha'sphal rapne keiyei cha'sphalya kuikarhilbini mayungkur; heitoubi yani keiyei cha'sphalya sikhuplhakbi khrumkur.” 8Heirouri aiyei teinao rapne anungei loushun, “Nei khalnarari kaidoura nangni Krung khoime touneiko? Nimanung nangni kaidoura pu khoini paalroume touneiko?” Heisitoubi aiyei rmong heiyei ngamroule, aiyei kyuntlou heiya mayeknarouri yani ayari duiduini machinbi karhalkur. 9Heirouri ani rmong khatkhi hanui loumanthu, heirou aiyei teinao rapnungei yunpiwurthu: “Thilak, keine rmong khatkhi loumanthume; keiyei rmong heirouwei kinnikhi, tanglakhi heirou sorwa chiple-khat heirapnekhi keiya khrumbi klei keine loukmume.” 10Heirou aiyei rmong loumannei wari heiya aiyei pawanungkhi heirou aiyei teinao rapnungkhi yunpinarouri, aiyei pawani aya sambini loushun, “Neiyei loukman rmong heiri kouwo? Keile neipuini heirou neiyei teinaorap ka nammanikhi neimaibongra thleira kunlhakbini neiya khrumlaklo touneiyako?” 11#Pao 7.9. Heisi tounarouri aiyei teinao rapne ayari beimakni horthiyura; heiya aiyei pawaneri yunthutkhou tlou heiya ukningra ningchabini thimallokur.

12Heirouri aiyei teinao rapne Shechemra yai pawayei yao silnungei chawura. 13Heirou Israel'ne Josephnung shun, “Neiyei teinao rapri Shechemra yao sillou chawura nimakko? Hungalo, neiyari keine yaiyei leinara heihilleise.” Heirouri ani aiyei pawanung loushun, “Kouya shunthungkni leileiyo, keine washunpiyeise!” 14Heirou ani Josephnung shun, “Keiyei shunthungkniri, nangni wabini neiyei teinaorap, heirou yaorulrap heiri kousi leileiyo toubine wathilak; heitoubi keinungei pao hungshunlak.” Heisitoubi Israel'ne Josephya Hebron phaikarrouwei heihilkur, heitoubi Joseph'ne Shechemra wa'tlungkur. 15Heirouri ani ramhangra lam kanwaiwurbi karwaichabi louleiyeinung, napawa hukounak khatni aya rorilbi, heirou anungei loukngai, “Nangri kouya raphawo?” 16Heirou ani loumallangbi kyun, “Keiri keiyei teinao rapya thiphame, yari bi koutamrou yao silbini leileiyo? Kringpibi keinungei bei shunpilaklo!” 17Heisi tounarouri napawa heini loushunpikur, “Yari bi arouweiri shaallurame, heitoubi yani, ‘Dothan'ra walakase’ toubine yaitam yunkrilya keine mayekthungme.” Heisitoubi Joseph'ne aiyei teinao rapya hilyunbi heichanthungkur, heitoubi Dothan'ra yaya wamurilkur. 18Heirouri yani tlatnarei aya loumuriwurbi, ani yai pongra wa'tlungbongnang yani yunmaturilbini aya hatnanungei wairangkur. 19Heirouri yani khatle khat yunrilbi, “Thilak, rmong'kman napawa heiri kaileinara waleime. 20Soh! Asinungri kani aya hatdurase, heitoubi khur yukna khatra khinglhakurase; heiyanungri ‘Ayari ram'yaani mailoulame’ toubine kani yunmandalkur yarou. Heirouri aiyei rmongrap heiri kousi hungthukleiyo touri kani murou.” 21Heiya yaiyei yunrilkur heiwaya Reuben'ne mayekthungurbi, ani yaihutrei Josephya kalthungnungei asitoubi kyun, “Kane aiyei lhawai tomchari loupimakase.” 22Heirouri Reuben'ne hanuikhi yanung yunthu, “Heeri touthutmakase; heinung'tlimri ayari ramhangrei khur yukna khatdei rilla khinglhakurlak; kouweiyo toulanungri, kaiyei teinao khatya hutlhakbi hatkuro touri touheimak lhou.” Aiyei heisitoubi kyun heiri Josephya yai teinao rapbei hutrouwei kalthutbi aiyei pawaei bira silnanungei yunkur tlou. 23Heirouri asitoubi hungthukkura, Joseph'ne aiyei teinao rapbei leina bira wa'tlungkurle tallengni yani aiyei phirul rapya loulungkur, heitoubi aiyei heinakhei linglikchul heikhi loulungpikur. 24Heisitoubi yani aya manbini yui makna khur yukna khatra khinglhakur; kheen heirou khur heiri yuikhi ommakni dingni wantlongwa louklei.

25Heirouri yani chaktham chanungei omkarngabi leiyeinung, thilak, Ishmaelia thimi rul khatni yaiyei Ut rapbei doura lal'holnei putcheirap, mrohle, shirek heirou myrrh marpeibaangbini, Gilead'rouweini Egyptra yunanungei wathukkur heiya yani loumuwurla. 26Heirouri Judah'ne aiyei teinao rapnung shun, “Kaiyei naowaya hatbini kanungei kouya tungcharouwo? Heirou aiyei hee heiya kani yulkhoubi kouya tounarouwo? 27Heinung'tlimri hungalo, ayari kani Ishmaelia rapbei hutra yorwurase; heiya kaihutneri ayari hatmakase; ngamri a heikhi kakou pukmalkna teinaohakme, kai'msha rungrungme.” Heisitoubi aiyei kyun heiya aiyei teinao rapnekhi yapiwurla. 28Heisi tounarouri Midian lal'hol thimirap thani yaipongra yu'tlungkur heirouri yani Josephya khurrouwei taangthutbini Ishmael rapbei hutra lapa shekel somninungei louyorkur; heitoubi yani Josephya Egypt'ranung urloukur.

29Heirouri Reubenni thleipurra heikallengbini wathinarouri, Josephri khur heirouwei louleimakura; heingammei ani lhawai lahwurbi aiyei punshel threlkur. 30Heitoubi aiyei teinao rapnung yenkallengbini hungshun, “Douwa heiri bi heirouei louleimakurame, heiyanungri keiri koulhangra chaserouwo?” 31Heirouri yani Josephbei linglikchul heiya loubini, heitoubi tlangshuncha khat hatbini, heiyei heera linglikchul heiya namlupkur. 32Heitoubi yani linglikchul bungrang heiya yai pawayei leinara yenshinheibini pao hungtamkur, “Linglikchul awari heisi dabi louleinarei kani yenkhulkheime, awari neicha napawaei linglikei kouweikhiyo yukthimanrelaklo!” 33Heirouri ani loumu'manrewurbi kyun, “Awari keichawaei linglikleime, ayari humeni mailoukheileime; Josephyari yaani harhar threlbi maiwurlarounu!” 34Heirouri Jacobne aiyei phirulya threlwurbi, heirou aiyei shintlakra phi'mtum yeetphopbi, aiyei chanapawa heinung'tlim tlaini kounakbil khi kanrilbini leiwurkhou. 35Heirouri aiyei chanapawa raple heirou aiyei chanapuiya rapne thourilbini aiyei kanril laasherbi chapkurya manelkur, heiya aneri ninglhakpimakur; heiya ane loukyun, “Keiri keiyei chanapawa heinung'tlim kanrilbi chapnarou Sheol'ra yongchangrouwa(hirouwa).” Heisitoubi aiyei pawani anung'tlim chapni kanrilkur. 36Heirou Midiania rapne aya Egyptra Pharaohyei raallui upawa Potipharyei hutra yorlhakkur.

Currently Selected:

KANTHOUNA 37: MARIBSI

Highlight

Copy