KANTHOUNA 38

Judah'le Tamar

1Heitoubi kheen heirouri asitoubi hungthukkura, touri Judah'ne aiyei teinao raprouwei Adullam khukarthilla yubini, Hirah toubi ung napawa khatnung wa'tlungbi leimalnakur. 2Heirouri Judah'ne bi heirou leiyeinang Canaan'yei napawa min Shuah toubi ung napawa khatdei chanapuiya khatya mulhakkurla; heirouri nangaka heiwiya ani loukur. 3Heirouri napuiya heiwini nao urbi, chanapawa khat pukwurla; heirou ani chanapawa heiyei min Er toubi thulkur. 4Heirou ani hanuikhi nao urthubi, chanapawa khatkhi pukwurthula; heirouri aiyei min Onan toubine thulpikur. 5Heitoubi hanuikhi ani nao urthubi, chanapawa khatkhi pukwurthu; heirou aiyei minri Shela toubi thulpikur; heirou aiyei nuwini nao heichaya pukyei kaalnung ari Chezib'ra louklei. 6Heirouri Judah'ne aiyei chanapawa samran Er'nungei nu khat loubaangpikur, heirou aiyei nuyei minri Tamar toubine ung. 7Heiya Judah'yei chanapawa upa Er heiri Umpuei mit'thrilnarari khril lhangaimak napawa khat hoikhou; heitounei ngammei Umpune ayari hiyerkur. 8Heirouri Judah'ne Onan'ya shun, “Nangni neiyei teiwiyei leinara changbini, aiyei naowa khat khoini akou rkhum-phitho tilrillaka, heitoubi neiyei teiyei shullam mitmaknanungei chanao raanyerlak.” 9Heisi tounarouri Onan'ne pukrou kyou chanaorap heiri aiyei hoimakroume toubi ningmukur heirouri, ani aiyei teiwile rkhum-phitho tilrilyeinang aiyei bo heiri thleira maryonthutkur, ngamri ani aiyei teinung'tlim yu-cha raanyernimaknei heinaksi touwurkhou. 10Heirou aiyei touwurkhou lhou heiri Umpunungri pilmakura; heingammei Umpune ayakhi hiyerwurthula. 11Heirouri Judah'ne aiyei mouwi Tamar'nung shun, “Keiyei chanapawa dongwani kartlang thukbongyenri, nangni trulmei khoini neipawaei cheemra kallengbi leiriyalo.” Ngamri Shela'khi aiyei teiya rapbei hikurnaksini hiwurthuleiko toubi Judah'ne ningchiwurbi heinaksi yunkur. Heisitounei Tamar'ni aiyei pawaei cheemra kallengbini leikur.

12Kum heiyei hillouri Shuah'yei chanapuiya, Judahyei nu heiwiri hiyura; heirou Judah'ne aiyei nu hiwurnei khi-kanril luiwurbi, heirou ani aiyei palui Adullamia Hirah'le kalhonni Timnah'ra aiyei yaokhmul ngou thimi rapbei leinaranung kakur. 13Kheen heirouri thimi hukhatni Tamar'nung, “Thilak, neiyei mrangri Timnah'ra, aiyei yaokhmul ngounungei kaleituei,” toubine paotambi shunpikur. 14Heirouri ani trulmei hoinei shamb baangbi louklei heiya lhaiwurkhoubi, lukhumna phisuireini aiyei mairungya yarkhalbi kansambini, chorit naimak napuiya khat khoini, Timnah'ra kana lampaalla Enaim lamsora aitamtom ombini louleikur. Ngamri Shela'ri kartlang katphawa, heiya ayari nu khoini loubaang'pinimakme touri Tamarni muwurla. 15Heirouri Judah'ne aya mulhakyei kheenrou, a heiwiri chorit naimak napuiya toubine ningchakur, ngamri Tamarni aiyei mairungya khumkhalbini ombi louklei. 16Heirouri lampalla ombini louklei Tamaryei pongra wachangbi ani kyun, “Soh, cheemwaira louchangalo, keine nangkou kalhonni ipkhouweise.” Kouweiyo toulanungri, Judah'ne napuiya heiwiri aiyei mouwime touri mumak. Heirouri ani loukngai, “Nangni keikou kalhonni ipkhoume toubi munanungei keinungei kou pikhourouwo?” 17Heirouri ani loukyun, “Keine neinungei yaorul hangrei yaoshuncha khat heipithungrou.” Heitounei ani loukyun, “Heiyanungri nangni keinungei yaoshuncha khat heimanthun'bongyen tloumayung hoinanungei putshak khat lakkhou manirouko?” 18Heirouri ani loukyun, “Kouputya keine neinungei lakkhouserou?” Heisi tounarou ani loubukur, “Neiyei hutsile, neiyei shintlak kaina phi, heirou neihutrei shincha shungkrok heirapya keinungei horkhoulak.” Heisitoubi putchei rapya anungei silnawurbini, aiyei leinara wachangbi akou rkhum-phitho iptilwurkhou; heirouri Tamarni aiyei nao urkur. 19Heirouri Tamar kanthoubi shaalkur, heitoubi aiyei lukhumrei lhaiwurbi, heitoubi aiyei trulmei hoinei shamb rapya baangbini leiwurthu.

20Heirou Judah'ne aiyei palui Adullamiaya yaoshun khatcha manthunthungbi heiyilkur, heitoubi napuiya heiwiyei hutrei aiyei lakkurkhou putchei rapya walouyerkur; heiya aiyei palui heineri napuiya heiwiyari rapha'muchangmakur. 21Heirouri ani bi heirou louklei napawa khatnung wakngai, “Bi atamrou lampalla ombini leikhou chorit naimakpi#38.21: thrai'shangra sharung kyor napuiya. napuiya heiri kourangawo?” Heirou yani loumallangbi kyun, “Bi arouri chorit naimak napuiyari hukhatkhi leikhoumakme.” 22Heitounei ani Judahnung yenkallengbi asitoubi hungshun, “Keine napuiya heiyari rapha'muchangmakme, heitoubi bi heitamrou louklei napawa rapnekhi ‘heinaksi chorit naimak napuiyari bi heirouri hukhi makme’ toubine loushunme.” 23Heitounei Judah'ne kyun, “Hutthul putcheirap heiri anungei hoinalakasu, kani heiya heisi raphabi leiyanungri rikrainarou; thilak, keinekhi yaoshun heichaya neinung pithungbini raphayerwurla, heiya nangnikhi ayari rapha'muchangmakura, kouheitourou.”

24Heiya heihillouri asitoubine hungthukkura, tangla tlun'khyumei hillouri Judahnungei paotambi shun, “Nei'mouwi Tamar'ne chorit naimakei lhouya toubine leileime, heirou ai'mshakhi sheramcha urwura toubikhi yunrilleime.” Heirouri Judah'ne kyun, “Ayari khulpamyei maibongra heiurthutlak, heitoubi meini honglaka.” 25Heisitoubi Tamarya khulpamyei maibongra urthutpiyei kaalnungri, aiyei mrangwanungei ani paokhat heishunthungbi kyun, “Keiyei seramcha urkur awari, putchei rapbei pu napawa aiyeime.” Heirouri ani heisi yenkyun, “Keiyei shuncha'kniri, hutsile, shintlak kaina phile heirou shungkrok#38.25: shungkrok: cheishu. arapya huiyei louhoirouwo? Bei lhangaini thimanrepilo.” 26Heirouri Judah'ne putcheirap heiya loumumanrewurbi ani kyun, “Keiyari ani duini tharmu'chim thimi khat hoiyurame, ngamri ayari keine keiyei chanapawa Shelanungei nu khoini loubaangpimakura.” Heiya Judah'ne hillouri hanui kallengni Tamar'le rkhum-phitho tilrilkhoumakura.

27Heirouri ani nao khoulum hungtlungeinung asitoubi thukkura, thilak, aiyei ukwairei nao khintam kanfir khoini leiyura. 28Heirouri asitoubine thukkura, ani naopuk waishangrou touchayeinang, nao khatpani aiyei hutbangya lamkrini yenronthutkur; heirouri naokal napuiyani aihutya louchurloubini, hutrumra phaimrao khat msuibangbi kyun, “Awane yongthukrilei.” 29Heirouri asitoubi hungthukkura, nao heini aiyei hutbang yukphuilhaklouthu, heirouri thilak, aiyei naowani yongthukriwura. Heirouri naokal napuiya heiwini kyun, “Nei'mshaei shullam lamtlaya koutoubi nangni namthatbi toubaikuro?” Heitounei ngammei aiyei minri Perez#38.29: Lam tonthatpa. toubine thulpikur. 30Heihillouri aiyei thangrou hutrumra phaimrao msuibangkur nao heini yongthuk; heirou aiyei minri Zerah toubi thulpikur.

Currently Selected:

KANTHOUNA 38: MARIBSI

Highlight

Copy