KANTHOUNA 24

Isaacyei Nu Kngai

1Heirou Abrahamri kum katchungurnei ngamrou beimakni tarwura; heirou Umpune Abrahamya lhou touna kantangrou phor piwurkhou. 2Heirou Abraham'ne aicheemrei klei putchei nammaya thikulpi shok upawaya ungloubini shun, “Neihut heiri keiyei pheikhnang doura heikhoulak. 3Heitoubi keine neiyari thangmun heirou Tlaipangei Pu Umpu Dunpuei minra tlou kantomyerrou, touri nangni keicha napawaei nu heiri keine paalmalnabi klei Canaan'yei thimi rapbei cha' nyul rapyari loubaangpimakrou da. 4Heiya nangni, keiya pukna ramra wabini, keiyei teinao rapbei cha nyul raprei khatya keiyei chanapawa Isaac'nungei nu khoini loubaangpirou da.” 5Heirouri shok heini anungei loukyun, “Kounakpi nangaka heiwini ram asibil hungtlungni keihilla chanthungni'manungri, neicha napawaya neiyei katwaiyouna ramra ruiloukur yarouko?” 6Heirou Abraham'ne anungei loushun, “Mukheini toulak, touri nangni keicha napawaya ram heirouwei ruilou'nungeiri yamakrou. 7Heirou kai pawaei cheemrei ungthutbi, heitoubi keiya pukna ramya lakkhouyerbi, keinungei tlou kantombi, touri ‘Neiyei yu-cha rapnungei ram heiya piroume’ toubi yunpikhou Thangmunrei Umpu, Dunpune Aiyei Thangring khat neiyei maibongra yenyilpirou; heitoubi nangni ram heirouwei keiyei chanapawa heinungei nu khat loubaangpirou da. 8Heitoubi heiramphani napuiya heiwini neihilla chanthungbi hungnimakanungri, neiyei keinungei kantomkhou tlou heini neiyari phonphopbini khoumakrou; heiyanungkhi keicha napawa heiyatomri ram heirouri hanui ruimallengmakrou da.” 9Heisi toubine shok heini Abrahamei pheikhnang doura aihut heikhoubi heirou tloubom heiyei ngamrou minlhangbini tlou kantomkur.

10Heirouri shok heini aiyei cheempuyei Ut raprei ut chiptam khalthutbi, heirou aiyei cheempurei hutthulput lhangai-lhangaiya khalthutloubini, heitoubi heirapya urlouheibi ani Nahoryei khukarthil Mesopotamia'ra wakur. 11Heirou rawaiyei kheen heirouri napuiya rapne yui shukrou wathuklumnang, khukarthil heiyei purei klei yuiso pongra aiyei ut rapya ani nei'karngayerbi khoukur. 12Heitoubi ani shunchabini kyun, “O Umpu, keiyei cheempu Abrahamei Dunpu; keine khrumchalei, angtutou tlaini arou keiya likarsui lhangai hoiyerpilaklo; heitoubi keiyei cheempu Abraham'nung Neiyei chut naimakei malungshipi heiya mutpilaklo! 13Yukthipilak, keine yuisopong arouwei mayungbini leiyeinang, khukarthil heiyei chanapuiya rapne yui shukrou wathuklei. 14Yui shukrou wathukkur nangaka khatya, ‘Neiyei yuikhangcha mathrumbini keinungei yui thacha pimonglaklo’ toubi keine loubuyeinang, heirou ani, ‘Monglaklo, heitoubi neiyei ut rapyakhi namyer keine yui pimongeise’ toubine louyunrou kyou nangaka heihakya Neiyei shikrui Isaacyei nu'nungei hoiyerpilaklo. Heiyanungri Nangni keiyei cheempuya malungshikhei mutpiwurlame toubi keine murou.”

15Heirou ani tlou yunchibong'chekrou, thilak, Abrahamei naowa Nahor'yei nu Milcah'yei pukkhou Bethuel'yei chanapuiya Rebecah'ni khlabaangra yuikhangcha thungbini yui shukrou yuthukkur. 16Heirou nangaka heiwiri thiyeinang shakrungkhi-shapaalkhi lhangailei, heitoubi msha kimkhi muimunchu, heirou hu napawa khatkoukhi borhkril toukhi makhui. Ane yuiphumra yuchangbini aiyei yuikhangra yui shukthimbi kathukkur. 17Heirouri shok heini aya murilnanungei louchanrobi kyun, “Neiyei yuikhangcharei yui thacha mongeise.” 18Heirou ani loukyun, “Monglaklo, upawa!” Heisitoubi ani khnotni aiyei yuikhangcha mathrumbi, heitoubi anungei yui pimongkur. 19Heirou nangaka heiwini anungei yui pimongkur hillouri ani kyun, “Neiyei utrap nammakhi yuikhat khrahbongyen keine yui shukthutbi yanungeikhi pimongeise.” 20Heisitoubi ani yuikhangcharei heenglhingra shungthutpibi khrangni yuiphumra hanui yui shukthutrou yuchangurthu, heitoubi ani yui shukthutbi shokpaei utrap nammayakhi pimongkur. 21Heisi tounarouri napawa heini aiyei nulampu chanei lhou heiwaya Umpune tanghakpani likarsui lhangaiyerko, nimanung lhangaiyermako toubi ningchabini kou'tloukhi yunmakni mayungbini nangaka heiwiya rie thimallokur.

22Heirou ut rapya yui pimongchikur hillouri, napawa heini shekel lhang'khat khrit sinayei nalhung-par khatle, shekel chiptam khrit sinayei hutrum-shin khintamle louthutbini; 23heitoubi ani nangaka heiwinung tlou heikngai, “Nangya huicha-huinaowo? Keinungei bei yunpilaklo. Neiyei pawaei cheemra kai chaknanungei bomtho leirouko?” 24Heirouri nangaka heiwini anungei loukyun, “Keiri Milcahni Nohornungei pukkhou Bethuelyei chawime.” 25Heitoubi ani hanuikhi yenyunthu, “Kai cheemrari halchaknungei sapulkhi chungwani klei, heiyakhi duinara chaknanungei bomthokhi bil kleime.” 26Heirouri napawa heini aiyei lu sikhuplhakbini Umpuya khrumchakur. 27Heitoubi ani kyun, “Keiyei cheempu Abrahamei Umpu, Dunpuya chouni mathanglei, ngamri Aiyei kringpikhei heile Aiyei tharmuchim heini keiyei cheempuya lakhoumakni kalhonpilei; heirou keine lam tlayeinungkhi Umpune keiyei cheempuei teinaowaei cheemra keiya ruilhakpiwurla.”

28Heirouri nangaka heiwini chankallengurbi, tloubomrap heiyei ngamrou aiyei puiwiyei cheemmai thimi rapnungei pao hungyunpikur. 29Rebecahyei trah khat klei, aiyei minri Laban toubi ung. Heirouri Laban'ne napawa heiyei leinabi yuisoranung chankur. 30Heirouri Laban'ne aiyei charwiyei nalhung-sina parle, hutrum'shin rapya loumubi, heirou aicharwi Rebecahni, “Napawa heiwani keinungei asitoubi kyunme,” toubi hungyunpikur tloulhang rapya loumyeknarouri, ani napawa heiyei leina bira wathikur; heirouri thilak, napawa heini yuisora ut rapbei pongra mayungbini louklei wamukur. 31Heirou ani washun, “Kai cheemra wawalo, Umpune likarsui lhangaiyerkur upawa; kouya tounei neitam daangra mayungbi leirouwo? Ngamri keine neiyei yareknanungei bomtho khat marshikbi leiyurame.” 32Heisitoubi napawa heini cheemwaira wachangkur, heirou Laban'ne aiyei ut rapya putyumrap shutsundapibi, heitoubi halshangrei sapul khingsundabi ut rapya pishaikur, heitoubi napawa heiyale heirou akou chamalkna napawa rapbeikhi hut'ho choumthaina'nungei yuidingkhi shukthutpikur. 33Heitoubi yai maibongra chanung-mainungei murchak mumtolkhi dunthutpikur; heiya ani loukyun, “Keiyei urbi klei pao awaya tambongnang keiri koukhatkhi chamaimakei'roume.” Heirou ani kyun, “Heiyanungri yenyunlak.”

34Heitounei ani kyun, “Keiri Abrahamei shok khatme. 35Umpune keiyei cheempuya tangni phor piwurla; heingammei anungeiri koukhi kwatsam maklei; heirou Ane anungei yaorulkhi, halrulkhi, heirou sinakhi, lapakhi marthumni piwurla; heirou shok napawa heirou napuiya rapkhi, heirou ut rapkhi heirou gadha rapkhi chungni piwurlame. 36Heirou keiyei cheempuwaei nu Sarah'ne anungei chanapawa khat ani tarwairou pukpiwurla; heinakrimni aiyei klei lalthum namma heiri aiyei cha'napawa'nungei silnawurla. 37Heirou keiyei cheempuni keiyari tlou kantomyerbi, ‘Nangni keiyei chanapawaei nu heiri keiyei paalna ram Canaan'rei chanapuiya rapya loubaangpinung yamakrou. 38Heiya nangni keiyei pawaei cheemra wabini, heirou keiyei teinao rapbei chanapuiya raprouwei nu khat loubaangpirou dame,’ toubine shunkur. 39Heirouri keine keiyei cheempunung loukngai, ‘Kounakpi nangaka heiwini keihilla chanthungnimanungri kousi touserou?’ 40Heirou ani keinung shunpikur, ‘Keiyei haallei waiyoubi uklumbi klei Umpune Aiyei Thangringya neinungei yenmalhetpirou; heitoubi neiyei nulampu chanei lhoulamra ani likarsui lhangaiyerrou; heitoubi nangni keicha'napawayei nu heiri, kai pawaei cheemrei, keiyei teinaowei chanapuiya khatya loupirou dame. 41Heiyanungri nangni keiyei teinao rapbei cheemra wabini pao heiya washunpinarou, heirou yani yaiyei chanao khatya loupithungmakur hoiyanungkhi kantomkril tloubom heiri neitoubai nimakme.’

42“Heisitoubi keine angtu yuisora wamayungbi, ‘O Umpu, keiyei cheempu Abrahamei Dunpu, angtuei tlainirou keiyei nulampu chanei lhou awaya Nangni likarsui lhangaiyerpilo,’ toubi shunchanarouri; 43thilak, keiyei mayungna yuiso pongra asitoubi thukkura, touri nangaka khatpini yuiphumra yui lhukthutrou yuchangnarou, keine anungei loubuchakur, ‘Neiyei yuikhangcharei keinungei yui thacha pimonglaklo.’ 44Heirouri ani loukyun, ‘Nangkhi monglaklo, heirou keine neiyei ut rapkhi pimongeise,’ toubine loukyun nangaka heihakya keiyei cheempuei chanapawaei hoiyerpinanungei Umpune khalthutpikur hoiyerpilo toubi ningchakur.”

45“Heirouri keine ukningra khalchibongnung, thilak, Rebecahni aiyei khlabaangra yuikhangcha thungbini yuthukkur; heitoubi yuiphumra yui lhukthutrou yuchangkur; heirou ani yui lhukthutbi kathukyeinung keine anungei loushun, ‘Keinungei yui thacha pimonglaklo,’ 46Heirouri ani khnotni aiyei khlabaangrei yui khangchaya mathrumbi loukyun, ‘Monglaklo, heirou keine neiyei ut rapyakhi pimongeise.’ Heisi toubine keikhi yui mongloukur, heitoubi keiyei ut rapyakhi ani yui pimongkur. 47Heirouri keine anungei ngaithikur, ‘Nangya huicha-huinaowo?’ Heirou ani loumallang, ‘Milcahni Nahor'nungei pukpikhou Bethuelyei chawime.’ Heirouri keine aiyei nalhungra sinapar nabaangpikur, heirou aiyei hutrumra hutrum-shin rapkhi luplhakpikur. 48Heitoubi keine keiyei lu sikhuplhakbi, Umpuya khrumchakur. Heirou keiyei cheempu Abrahamei Dunpu, Umpuya keine mathangkur; ngamri Ane keiyari kei'cheempuei chanapawaei nunungei toubine aiyei teinaowei cheemra lam chimni ruimutpiwurla. 49Heineri asinungri nani keiyei cheempuei yunthungkur tloubom awaya rikrai khrumnabi hoiroume touwanungkhi, nimanung nani manimakroume touwanungkhi keinungei chimni yunthutpilak. Heisi nimanungri keiri thya'lhangra, nimanung thyoi'lhangra mai holbiyanungkhi shaallouwa,”

50Heirouri Laban'le heirou Bethuel'ne mallangbi loukyun, “Tloubom awari Umpuei bomrei hoiyurabini, arouri kani neinungei lhangai toukhi nimanung lhangaimaklei toubikhi yunchangmakrou. 51Thilak, Rebecah'ri neiyei maibongra leiyura, aya ruilouthubi shaallaka; heirou Umpuei shunpikur hilthungni Rebecah'ri neiyei cheempuei chawayei nu hoilakasu.”

52Heirouri Abrahamei shokpani yaitlouya mayeknarouri, ani thleira khuklu kanthrunchani kanelhakbi Umpuya khrumchakur. 53Heitoubi shokpani sinale lapayei shamb rapya touri nalhung-par, hutrum-shin, khrulrui, heirou manklu phirul rapkhi louthutbi, heitoubi heirapya Rebecahnung hutthulput khoini malanpikur; heitoubi aiyei trahwanungkhi heirou aiyei puiwinungkhi manklu putchei rapya ani malanpikur. 54Heisitoubi yani chak-an chamaibini, masanung ale heirou akou chamalkna thimi raple pulni yarekkur; heitoubi yani ningshun kanthouyeinung ani kyun, “Keiyari kei'cheempuei bira hanui shaalyerpilakalo.” 55Heirouri aiyei trahwale aiyei puiwini kyun, “Kaiyei chawiri tlaini chipni khatri kakou leithungrilaksu; heitoubi hillou ani shaallasu.” 56Heirouri ani yanung loushun, “Umpune keiyei lamtlanara likarsui lhangaiyerpila, keiyari mankanpimaka; heineri keiyei cheempuwei leinara keiya kallengyerpilaka.” 57Heisi tounarouri yani loukyun, “Heiyanungri kaicha nangakawiya ungbini aiyei murhakrei tlouya ngaithiriyase.” 58Heisitoubi yani Rebecahya ungbini anungei ngaithikur, “Nangni napawa akou kalhonni chanileiko?” Heirouri ani loumallangkur, “Moi, keiri charouwame.” 59Heisitoubi yani yaiyei charwi Rebecahya aiyei shok-napuiyale, Abrahamei shokpale, heirou aiyei chamalkna thimi raple pulni shaalyerkur. 60Heirou yani asi yunbini Rebecah'ya phor shampithungkur, “Nangri kaichar, heirou nangri yu-charap lishing-lishingei pui hoiniyasu. Heitoubi neiyei yu-cha rapne yaya yeekna thimi rapbei doura kulchalbi paalniyasu.” 61Heirouri Rebecah'ni kanthoubi, aiyei shok-napuiyale ut doura tungbaangkur; heitoubi napawayei hilla chanthungkur; heisitoubi shok heini Rebecah'ya ruilouheibini shaalkur.

62Heirou Isaacne Beer-Lahai-Roi yuiso lam lhangrei leibini hungthuk, ngamri aiyei leina ram heiri Negeb lhangra klei. 63Heirou Isaac'ne rawai bei manrenni phailoura thikulnungei toubi wathukkur; heirou ani mangalbi heithiyei kaallouri, thilak, ut rapne lamra lingshaang ringbini yenkallengkur heiya ani loumukur. 64Heirou Rebecah'ni maibonglhangra mangalbi louthinarouri, ani Isaacya mulhakwurla; heitounei ani utdourei yongchumkur. 65Heitoubi ani shokpanung heikngai, “Phailoura kaya murilnungei louchanro thimi heiri kounaksi napawawo?” Heirouri shok heini loukyun, “A heiri keiyei cheempume.” Kyun heiya mayekbi Rebecahni aitam aiyei lura lingkhang phini taangkhalkur. 66Heirouri shok heini aiyei lhou chanarei thukkurkhou warirap namma heiya Isaacnung hungyunpikur. 67Heirou Isaacne Rebecah'ya lourobi, heitoubi aya cheemra yenruilhakbi karngayerkur. Heisitoubi Rebecah heiri Isaac'yei nu hoikur. Isaacne Rebecahya beimakni malungshi. Heisitoubi yani aiyei puiwi hiwurhillou lhangai-karbilni paalthungkur.

Currently Selected:

KANTHOUNA 24: MARIBSI

Highlight

Copy