KANTHOUNA 25

Abrahamei Yu-cha Deideirap

1Heirouri Abraham'ne hanuikhi nu khatkhi louthula, heirou aiyei nuyei minri Keturah toubi ung. 2Heirou ani Abraham'nung chanaorap Zimran'le Jokshan, heirou Medan, heirou Midian, Ishbak heirou Shuah ya'rapya pukkhou. 3Heitoubi yarapri: Jokshan'ne Sheba'le Dedanya pukkhou. Heirou Dedan'yei chanapawa rapri Asshurim, Letushim heirou Le-ummim. 4Heirou Midian'yei chanapawa rapri: Ephahle Epher, heirou Hanoch, Abida heirou Eldaah. Yarap namma heiri Keturahyei yenraankur chanaothil. 5Heirou Abraham'ne aiyei dunbi klei lalthumrap namyerwa Isaac'nung piwurkhoula. 6Heiya Abraham'ne aiyei nukhu rapbei chanapawa rapyari hutthul putrap malanpibi, heitoubi ani ringei kaalnung yayari aiyei chanapawa Isaac'rouwei toukarkhaiwurbi, heirou yai rammei kulkung lhangra malhetkur.

Abraham Hiwurbi Aya Khi Krui

7Heirou Abraham'ne kum machale somretle phanga pulchini paalkhou. 8Heirouri ani kumchaan tlani, tarkengkeng phani paalkhoubi, heirou aiyei roshukni hungtlungeinung hiwurbi aiyei patar rapya chanbi chakur. 9Heirou aiyei chanaorap Isaac'le Ishmael yarukhnine, Mamre'yei kulkung lhangrei klei Hittia napawa Zohar'yei chanapawa Ephronyei phailou rillei klei Machpela thlungkhur rilla utkur lhanra Abrahamya phumkur. 10Ram heiri Abraham'ne Hittia raprei lobi khoukur ram. Bi heitamrou Abrahamya heirou aiyei nu Sarah'yakhi kanthrinni phumkur. 11Heirou Abraham hikur hillouri, Abrahamei chanapawa Isaacya Dunpune phor piwurbi, heirou Isaacne Beer-Lahai-Roi yuiso pongra paalkur.

Ishmaellei Yu-charap

12Yarap heiri Abraham'nung Egyptrei napuiya Hagar, Sarahyei shok-napuiyawini pukkhou chanapawa Ishmaelyei yu-charap. 13#1 Ch 1.29-31. Heirou yaiyei yu-cha rapbei minlam thangsil knai hilthungni, Ishmaelyei cha samranwaei minri Nebajoth, heithangrou Kedar, heirou Adbeel, heirou Mibsam. 14Heirou Mishma, Dumah, heirou Massa. 15Hadar, heirou Tema, Jetur, Naphish, heirou Kedamah. 16Yarap heiri Ishmael'yei chanaothil, heirou yai yenpaalheina yulmin rapkhi loubini thulkur; heirou yaiyei limkhi chiple khni khaithutbini, heitoubi napung chiple khnine Krung khoini paalkhou. 17Heirou arapri Ishmaelyei chaanrou paalkhou kum, ani kum macha khatle somthumle eni pulchini paalkhoubi; heirou aiyei roshukni tambi aiyei patar rapya channi chakur(hikur). 18Heirou yani Havila'rouweini Egyptbei kulkung lhangra Shur waphani yuldabi paalkur; heitoubi yani Assyria'rakhi paalkur; heirou ani aiyei teinaorap nammaya murilkhoubi yaimaibongra hikur.

19Yarap heiri Abrahamei chanapawa Isaac'yei yu-charap; Abraham'ne Isaac'ya pukkhou. 20Padanaram'ra paalbi klei Syria limyei Bethuel'ni pukkhou chanapuiya, Syria'yei Laban'yei charwi Rebecah'ya nu khoini louyeikaalnung Isaacri kum somli tlungura. 21Heirou Isaac'ne Dunpunung khrumbini shunchakur, ngamri aiyei nu heiwiri chanao pukkhoumak; heirou Umpune aiyei shunchakurya ninglhakpibi, heirou Rebecah nao hung'uryoukur. 22Heirouri aiyei ukrilla nao khintam karpanchawura; heirou ani kyun, “Awaya asithil hoiyanungri, keine ringbi kouya touweirou?” Heingammei ani Umpuei kning kouweiyo toubine kar'anyerbi kandang'yernanung chakur. 23Heirouri Umpune anung loushunpikur: “Neiyei naokao rilla thimi Lim khintam leiyura, heirou neiyei shullamrei yongthukrou kyou thimi Lim khintam heiri karyarilmakni Lim khni thukni karkhairou; heirou thimi khatpani khatpaya duini mantrangrou; heirou upawane naowaya watlhou touweirou.” 24Heirou aiyei naokhounei kheen hungtlungei kaallouri, thilak, aiukrei nao khintam heiri kanfir khoini hungpukwurla. 25Heirou lamkriyei yongthuk nao heiri mrao, heirou aiyei sharung karyouni yaamulphi'naksini khmul puk. Heitounei ngamrou yani aiyei min Esau(touri hak'khmul chung) toubine thulpikur. 26Heitoubi heihillouri aiyei naowa yongthuk; heirou naowa heini Esauwei hokhungra churchabini yongthuk; heitounei ngamrou aiyei minri Jacob#25.26: hokhungra churchathung. toubine thulpikur. Isaac'ri aiyei nuni yaya pukyei kaalnungri kum somruk tlungura.

Esaune Aiyei Pipa Bomya Yorchakur

27Heirou douwarap heiri kattangura; heirou Esau'ri yaa channara beimakni sirei'khei ramhangrei thimi khoini leikhou; heiya Jacobri ukningcham thimi khoini ani cheemra klei. 28Heitoubi Isaacneri Esau'ya beimakni malungshikhou, ngamri aiyei yenmankhei yaa rapya ani loukmai; heiya Rebecah'neri Jacobya malungshikhou.

29Heirouri Jacobne chak-an thungbini louleiyeinung, Esaune ramra chabini beimak msullurbi kanelkhup'khup yenkallengkur. 30Heirouri Esau'ne Jacob'nung hungshunchakur, “Nangni mrao thungminbi khoukur chak-an heiri keinungei bei pichalaklo, kouweiyo toulanungri, keiri chak msulni hiwurleiya!” (Heingammei aiyei min heiya ‘Edom’#25.30: Mrao. toubine mu'kna). 31Heirou Jacobne loukyun, “Heiyanungri angturi neiyei Pipabom heiri keinungei yerpilaka.” 32Heirou Esaune loumallangkur, “Thilak, keiri hiwurleiya, pipabom awane keinungei kouya tounarouwo?” 33Heirou Jacobne loukyun, “Heiyanungri nangni lamkrini keinungei tlou kantomkhoulak.” Heisitoubi Esaune tlou kantomwurbi, aiyei Pipabom heiya Jacob'nungei yorlhakkur. 34Heisitoubi Jacobne Esau'nung mumtol'le, anna-louna thungminbi khoukur anya shumthutpikur; heirou ani chamailoubi, heirou kanthoubini shaalkur. Heisi toubine Esaune aiyei Pipa bomya yormangkur.

Currently Selected:

KANTHOUNA 25: MARIBSI

Highlight

Copy