HOYOUNA 37

Pucheem Sabaangnei Lhou Chasundakur:

1 # Hoy 25.10-22. Heirou Bezalel'ne acacia heeng loubini Mardingrilna Theengkung khat sakur; Theengkung heiyei dungri thong khnile lhang'khat shaang, heirou heiyei homrani thong khatle lhang'khat paak; heitoubi heiyei lamri thong khatle lhang'khat choulei; 2heitoubi heiwaya ani rillakhi heirou purakhi sinani lupbaangkur; heitoubi Theengkung heiyei pal karhilni sinani kum mansambaangkur. 3Heitoubi ani Theengkung heiyei ho phalitamra sinayei hutshi khatsol shungphopkur; heitoubi mnak pangkhatra hutshi khintam, heirou khatlhang mnakrakhi hutshi khintam shungphopkur. 4Heitoubi ani acacia heengni putpu rapkhi sheembini, heitoubi heirapya sinani lupbangkur. 5Heitoubi ani putpurap heiri Theengkung hutshirap ronlhakbi Theengkung heiwaya chungnanungei sheemkur. 6Heirouri ani sina khyingni Kringpi'kheiyei Omna khatkhi, dungra thong khnile lhang'khat shaangni, heirou homrani thong khatle lhang'khat paakni sakur. 7Heitoubi ani Cherubim khintamkhat sinani sabini, Kringpikheiyei Omna msur thyoi-thyara shekni yempopbini mansambangkur. 8Heirou Cherub khatri omna msur khatra, heitoubi Cherub khatneri omna msur khatra yempopkur, heitoubi omna msur thyoi-thyarei Cherubim heiri omna heirouei sina'le msha khatnakni yempoprilbi sabangkur. 9Heitoubi Cherubimei sharap heiri doura myerbangbini, yaiyei sharap heiri Kringpi'kheiyei Omna doura yaapkhalbi khoukur; heitoubi yaiyei mairungrap heiri khatle khat kallukrilbi, heirou Kringpi'kheiyei Omna lhangra hol'lhakrilyer.

10 # Hoy 25.23-29. Heitoubi ani acacia heengni turng khat sabini, heitoubi heiyei dungrani thong khni shaangni, heirou homrani thong khat paakni, heitoubi heiyei lamrani thong khatle lhang'khat chouni sakur. 11Heirou ani turng heiwari sina khyingni lupbangkur, heitoubi heiyei rim nammakhi karhilni sinani lukhupnakni shungphopbi mansamkur. 12Heitoubi heiyei rimrakhi karhilni hutmainam khatdeimal paakni kum sheembini, heiyei doura karhilni sinani namma lupbangkur. 13Heitoubi ani sinayei hutshi phalitam shungbini, heitoubi hutshirap heiri turng heiyei chikokna phalitamra khatsol shipbangkur. 14Heitoubi hutshirap heiri turng heiwaya khangchana putpu ronlhaknanungei kum pongra knakni paalbangkur. 15Heirou ani acacia heengni putpu rapkhi sheemthutkur, heitoubi turng chungnanungei putpurap heiri sinani lupbangkur. 16Heitoubi turng doura khoubi yrengnungei sina khyingei putchei-shungyangrap, phuwan, chukhrung-anthleirap, mrohkun iknanungei kaikamrap, chakpang-kaikamrap, heirou kul'lhing raple Puwatlhou touyeinung yuiding bunsundana namtou#37.16: namtou: Mongnungei yui khouna kok. rapkhi sheemthutkur.

17 # Hoy 25.31-39. Heitoubi ani sina khyingni Meitharlkhi sheemthutkur, Ane Meitharl#37.17: Meishar dunbangna ho. heiri tomnanungei hole, heiyei hutbang, heirou heiyei msurra kalleinungei kok rapkhi, par umnaksi heirou heengbo'naksini namma msha khatra shekni waiknaini umpoprilbini sheemkur. 18Heitoubi Meitharl heiyei mnak thyoi-thyara banrei thruktam karphangthutyerkur; heitoubi Meitharl heiyei mnak khatlhangra banrei khyumtam karphangthut, heirou khatlhang mnakrakhi banrei khyumtam karphaangthutkyer. 19Heitoubi Meitharl heiyei mnak thyoi-thyara banrei khyumtamsollei msurra almond par'umnaksini kok khatsol sheembini soupopkur; heisitoubi Meitharl heiri mnak thyoi-thyara banrei thruktam karphangyerkur. 20Meitharl doura baangnungei almond par'um kmal phalitam khatkhi sheemthutkur. 21Heitoubi kok khatri meitharl lamkriyei banrei khintam karphangna balra, heirou kok khatni khintam tlung banrei khintam karphaangna balra, heitoubi kok khatneri khyumtam tlung banrei khintam karphaangna balra lhakbini, meitharl banrap thruktamyei karphangna balrap nammara khuk knaini umpopbini sheemkur. 22Heitoubi Meitharl heiyei ban raple heiyei ban rapbei bal rapra khuk knaiyei umpopkur kok rapkhi namma heiri sina khyingni msha khatnakni shekni umpopbini sheemkur. 23Heitoubi ani Meitharl heiyei meishar raple, heirapya mei sumitna shuk rapkhi, heirou shirek lhakna kok rapkhi khying sinani sheemthutkur. 24Meitharl heile, heiyei changbomthuk putlam touri phuwan-shungyangrap namma heiri ani khying sina talent khat loubini sheemkur.

25 # Hoy 30.1-5. Heirouri ani acacia heengni mrohkun iknanungei khrahpal khatkhi sakur; heitoubi khrahpal heiwari dungrakhi thong khat shaangni, heirou homrakhi thong khat paakni, dungle-homri chep malnayerkur; heitoubi lam chourani thong khni chouni sabini, heiyei halcheekhi msha khatrei sheemthutkur. 26Heitoubi ani khrahpal heiri dourakhi, purei mnakrakhi karhilni, heirou aiyei halcheekhi sina khyingni namma lupbangkur; heitoubi ani heiyei doura paal karhilni sinani rim koolbini sabangkur. 27Heitoubi ani sinayei hutshirap khintamkhi sheembini khrahpal rim koolna daakra mnak thyoi-thyara shipbangkur; heitoubi hutshirap heiri khrahpal khangchana'nungei putpu ronlhaknanungei shipbaangkur. 28Heitoubi ani acacia heengni putpu rapkhi sabini, heitoubi heirapya sinani lupbaangkur.

29Heirou ani khyingei mnuina shirekle, khrim muiknam mrohle heirou khrim muiknam shirek rapkhi marchunbini sheemthutkur.

Currently Selected:

HOYOUNA 37: MARIBSI

Highlight

Copy