HOYOUNA 38

Tabernacle Pucheem Sabaangnei Lhou Luilhakur:

1 # Hoy 27.1-8. Heirouri ani acacia heengni malanput hongbi makatna khrahpal khatkhi sabangkur; heirou khrahpal heiyei dungrani thong phanga shaangni, heirou homrakhi thong phanga paakni, dung shaangle hom paaknarakhi chep malkna; heirou lamrani thong khyum chouni sabaangkur. 2Heitoubi ani khrahpal heiyei doura halchee rapkhi chikokna phalitam sheembini bunkur; heirou halcheerap heiri khrahpallei mshale khatdik khoini soupoprilbini, heitoubi heirapya kulshanni doura lhopbaangkur. 3Heitoubi ani khrahpal doura yrengchanungei shungyangrap touri phuwan, chaakpang-kaikam, chukhrung-anthlei, kul'lhingkhi heirou an-chumshuk rapkhi, heirou meihal chumthutna shuk rapkhi namma kulshanni sakur. 4Heitoubi ani kulshanyei khrai khatkhi khrahpal kum'rouweini yailambil yongdani manyarsundani sheemkur. 5Heirou ani kulshanyei khrai chikokna phalitamra hutshi phalitam koolbini shipbaangkur, heitoubi heirapya putpu thunlhaknanungei sheemkur. 6Heirou ani acacia heengni putpu rapkhi sathutkur, heitoubi heirapya kulshan lupbaangkur. 7Heitoubi ani putpurap heiri khrahpal mnakrei hutshi rapbei kulrilla thunringbini, khrahpalya khangchanakur. Heirou ani khrahpal heiwari heengpik rapbei rilla pur maryani touputbini chalkur.

8 # Hoy 30.18. Heitoubi ani kulshanni lhingtang khatkhi sheemthutkur; heitoubi heiwaya dunkhouna yungphu ho rapkhi kulshanni sakur. Heitoubi lhingtangwa heiri Khulbung Kartilna Pucheemyei shumtrumra Puwatlhou toubine klei napuiya khatpini makatkur lhiem mu'kya kulshan rapni sheemthutkur.

9 # Hoy 27.9-19. Heitoubi ani yuntlangmaikhi sheemkur; heirou heiyei khate lhangra yarkhalna mankhainungei phiyengrap heiwakhi phaikhringni manlehbi, thong machakhat shaangni lhangaidui yekmarshikkur. 10Heitoubi heirapya yarkhalnanung yungcheikhi somnikhi sabi, heitoubi heirapya dunbaangna'nungei ho rapkhi kulshanni somni sathutkur, heirou yungbak rapkhi, heirou heiyei phonphopna ruifret rapkhi lapa thirni sheemthutkur. 11Heitoubi khalu lhangra yarkhalnanungei phiyeng rapkhi thong machakhat shaangni yekmarshikkur; heitoubi heirapya yarnanungei yungchei rapkhi somni sathutbi, heirapya dunbaangnanungei ho rapkhi somni kulshanni sathutkur; heitoubi yungchei rapbei yungbak rapkhi, heirou heirapya phonphopnanungei ruifret rapkhi lapa thirni sheemthutkur. 12Heirou kulrel lhangei mnakra yarkhalnanungei phiyengrap thong somnga shaangni yekmarshikkur; heitoubi heiwaya yarnanungei yungchei rapkhi chiptam heirou yungchei tomna ho rapkhi chiptam sabini, heirapbei yungbaak raple, manphopna ruifret rapkhi lapa thirni sheemthutkur. 13Heitoubi kulkung lhangra yarkhalnanungei phiyengkhi thong somnga shaangni yekmarshikkur. 14Heitoubi maishuk shumtrumra yarnungei phiyengri khatlhangra thong chiple phanga shaangni yekbi, heitoubi heile kalhonni yungcheikhi khyumtam, heirou dunbaangnanungei ho rapkhi khyumtam sakur. 15Heinakrimni mangkhal-shumtrum khatlhang mnakrei'nungkhi sheemthutkur. Heisitoubi mangkhal-shumtrum thyoi-thyara yarkhalnungei phiyengrap thong chiple phanga'nga yekbini, heitoubi heirapya yarnanungei yungchei raple heirapya dunbaangna ho rapkhi khyumtamsol sathutkur. 16Heirou mangkhalla karhilni yarkhalna'nungei phiyengrap namma heiri phaikhringni lhangaidui yekthutkur phiyengthil. 17Heirou yungcheirap dunbaangna'nungei ho rapkhi namma kulshanni sheemkur, heirou yungbak ha raple, heirapya phonphopna'nungei ruirap namma heiri lapa thirni sheemthutkur; heirou yuntlangmairei bunnungei yungcheirap nammakhi lapa thirni rui sheembini msuibangkur. 18Heirou shumtrumra yarkhalna phiyengrap heikhi phaikhring khmongduple, mraosotle heirou mraoni lhangaidui manlehbini yekthutkur phiyengthil. Heirou phiyengrap heiri yuntlangmai heiyei dung-hom marya hilthungni dungrani thong somni shaangni, heirou homrani thong phanga paakni heirou choura thong phanga yekbini sheemkur. 19Heitoubi yaiyei yungchei phalitam heile, dunbaangna ho rapkhi phalitam heiri kulshanni sheemkur; heitoubi yaiyei yungbakrap heiri lapa thirni sheembi, heiyei phonphopna rui rapkhi lapa thirni sheembini, heitoubi heirapbei doura namma lapa thirni lupbangkur. 20Heirou Tabernacle Pucheem heiyei bunnungei chuk rapkhi, heirou heiyei yuntlangmai karhil bunnungei chuk rapkhi namma kulshanni sathutkur.

21Suipipu Aaronyei chanapawa Ithamaryei ruipina daakra, Levia rapni Puwatlhou tounanungei Mosesne chay pikur hilthungni, Mardingrilna Tabernacle Pucheem sabangnara changbomthuk putchei-shungyangrap, tuy heirou sina-lapa namma heiri arapriya. 22Heirouri Umpune Moses'nung shunpikur chaytlourap hilthungni, Judah cheemkhurrei Hurni pukkhou cha napawa Uriyei cha napawa Bezalelni putcheirap heiri namma sathutkur. 23Heirou akou kalhonni lhou pangmalknari, phaikhring khmongduple mraosotle heirou mraole manlehbini limlim yekthutkhei hutsakhei thimi, Dan cheemkhurrei Ahisamachyei cha napawa Oholiabkhi kyao.

24Khyingei Pucheemya sabangnara yrengkur sina namma heiri, thimi deiyei heimakatkur sinarap kyaoni, Pucheemrei khrit holmarkhena hilthungni talent somnile shekel macha enile somthumbil changlei. 25#Hoy 30.11-16. Heitoubi lapa thirkhi kulyomni mishingei urthutbi heimakatkur heiri, Pucheemrei khrit holmarkhekur hilthungni talent macha khatle shekel lishing khatle macha'enile somretle phangabil changlei. 26Kum somnirouwei thakrei upakur napawa mshing sherbi, thimi lakh thrukle, lishing-khyumle, macha phangale somngani, Pucheemrei khrit holmarkhekur hilthungni, thimi napung kantangni lapathir beka khatsol (beka khatri, Pucheemyei shekel lhang khatle malkna) touri shekel lhang'khatsol urthutrilkur. 27Heitoubi lapathir talent macha khatri Pucheem yungcheirap dunbaangna ho raple, phiyeng rapya yarnanungei yungchei ho rapkhi sheemnakur. Heisitoubi lapathir talent khat-khatdei changhni yungchei horap machakhat sheemthutkur. 28Heisitoubi lapathir shekel lishing khatle, macha'enile somretle phangari ani yungchei rapbei yungbak raple, yungbakra phonphopna ruikhi sheemnakur, heitoubi yungchei rapbei dourakhi lupbangkur. 29Heirou kulyomni thraibi heimallongkur kulshanri talent somretle shekel lishing khnile macha phalibil kadakur. 30Heitoubi heirapya yrengbi ani khulbung kartilna khuiluphiyei cheemkhar mayungna horap, heirou kulshanyei khrahpalle, heiyei khraikhi heirou khrahpalla yrengnungei phuwanrap, chukhrung-anthlei nammakhi sheemnakur. 31Heirou kulshan heiwani yuntlangmai karhilni yungcheirap bunbangna ho raple, shumtrum-yungchei dunbaangna horap, heirou Tabernacle Pucheem khuiluphi msuiphopna chuk raple, heiyei yuntlangmai karhilni yemphopnungei chuk rapkhi sheemnakur.

Currently Selected:

HOYOUNA 38: MARIBSI

Highlight

Copy