HOYOUNA 36

Tabernacle Pucheem Sabaangkur:

1Asinungri Khyingei Pucheemya sabaangnara changbomthuk lammitrap nammaya mulhak maninanungei heirou hutsakhei thimi hoinanungei Umpune shingheineri khyal-roushing lhakpikur thimi raple Bezalel, heirou Oholiab yarapni, Umpuei shunmatupikur hilthungni lhou namma churyourouwa.

2Heirouri Moses'ne Bezalel heirou Oholiab yarukhniya, heirou Umpune hutsa heineri khyal-roushingya lhakpikur thimi napung kantangya, heirou Puwatlhoura ukning thoubangpikur thimirap nammaya ungthutpikur. 3Heitoubi Khyingei Pucheemya sabaangnanungei toubine Israellei thimi rapbei ruiput rapya khumbangbini mallongkur putcheirap namma heiri Mosesyei hutrouwei yani louthutkur. Heitoubi thimi rapni yai ukningrei pi'kni pi'knine makatkur putchei rapya Mosesyei hutra ningshunser karyomni heipilhakur. 4Heisitoubi hutsakhei thimirap nammani wathukbini, Khyingei Pucheem sabangnara ai'aiyei churkhei-pangkhei hilthungni mimiyei churmani lhou rapya churtrung-pangtrungrilkur. 5Heirou yani Moses'nung shun, “Thimi rapni Pucheem sabangnara changbomthuk putcheirap heiwari Umpuei shunkuryakhi duini heipilhakwurla.” 6Heitounei ngammei Moses'ne chay khat pithutbi, heirou ani khulpao chayerbini rungbomyei cheem kantangra shunkur, “Napawa rapnikhi heirou napuiya rapnikhi Pucheem sabangnanungei ruiput heimakatkur heiwari kan'nganbi dongkhairilaksu.” Heisitoubi thimi rapni ruiput heipilhaknarei bei dongkhaikur. 7Kouweiyo toulanungri, yaiyei heipilhakrilkur putcheirap heiwari Pucheem sabangnara changbom thukyakhi duini marpeilhakur.

Tabernacle Pucheem Sabaangnei Lhouchur Waikyou:

8 # Hoy 26.1-14. Heirouri hutsakhei lhouchur thimirap nammaei hangra namyerouwei hutsa heidui thimi rapni Pucheemya sabaangnanungei yarkhalna phiyengrap chiptamkhi yekthutkur; heirou phiyengrap heiri khmongdup kimle, mraosot kim heirou mrao kimyei phaikhringni manlehbini hutsa karbilni yekbini, heitoubi Cherubim lhale kalhonni lhangaini yekthutkur. 9Heitoubi yarkhalna phiyengrap heiri khat-khatrou dungrani thong somnile chot-chot shaang, heirou homrani thong phali-phali paakni yekbini, phiyengrap heiri nammani dungrakhi-homrakhi chepmalknani yekkur.

10Heitoubi ani phiyengrap phangatam khatni mnak lhang khatreinung khatle-khat thruimaryombi, heirou phiyeng phangatam khatni mnak lhang khatreinung khatle-khat thruimaryomkur. 11Heitoubi ani lamkriyei thruimaryomkur yarkhalna phiyeng rapbei ruitongna msurra khmongdup phaini khna rapkhi thruibaangkur; heirou ani khintam tlung thruimaryomkur phiyengei ruitongrakhi msurra heinakrimni khnarap thruibaangkur. 12Heisitoubi ani yarkhalna phiyengrap pangkhatra khnarap somnga thruibaangkur, heirou ani khintam tlung phiyengrakhi khnarap somnga thruibaangkur; heitoubi khnarap heiri thyoi-thya mai kallukrilni thruibaangkur. 13Heirou ani chingkin somnga sheembini, heitoubi yarkhalna phiyengrap heiri chingkinra khatle khat kutkalleirilkur; heisitoubi Tabernacle Pucheem khat khoini sabangkur.

14Heirouri ani Tabernacle Pucheem doura makhupbangnungei tlang khmulni yarkhalna phiyeng rapkhi chiple khatkhi sheemthutkur. 15Heitoubi sheemthutkur yarkhalna tlang khmullei phiyengrap heiri khat-khatrou dungrani thong somthum shaangni, heirou homrari thong phali-phali paakni sheemthutkur; heisitoubi yarkhalna phiyengrap chiple khat heiri dungrakhi heirou homrakhi nammani chapmalkna. 16Heitoubi ani yarkhalna phiyengrap phangatam khatri laini thruikarbobrilkur; heirou thruktam khatri laini khatle khat thruikarbobrilkur. 17Heiyakhi duinara, ani lamkriyei thruikarbobrilkur phiyeng rapbei ruitong msurra phairuini khna somnga suimandokkur; heitoubi ani khintam tlung thruikarbobrilkur phiyengei ruitong msurrakhi khnarap somngasol thruimandokkur. 18Heitoubi Khuiluphiyei Pucheem heiwaya sabangeinang manphoprilnanungei kulshanyei chingkinkhi somnga ani sheemkur. 19Heitoubi ani Pucheem heiyei doura makhupbangnungei mrao kim sangbangkur yao'unle heirou tlang'un rapkhi sheemthutkur. 20#Hoy 26.15-29. Heirouri ani acacia heengni Tabernacle Pucheem karhilni tungkhalnanungei heengpik rapkhi sathutkur. 21Heirou heengpik khat-khatdei dungri thong chip-chip shangkyer; heitoubi heengpik khat-khatdei homrani thong khatle lhang khat-khat pakyer. 22Heitoubi heengpik kantangei msur thyoi-thyara rakung utyukbini, heengpikrap heiri khatle-khatle marchalrilnungei sheemkur; heisitoubi ani Tabernacle Pucheemyei heengpikrap namma marchalrilkur. 23Heirou ani Tabernacle Pucheemra lhaknungei heengpikrap sabini, khate lhangei mnakranung heengpik somni sakur. 24Heitoubi heengpik somniyei daakra dunnanungei phampak ho somli khatkhi kulshanni sheemthutkur; heengpik khat-khatdei msurra rikung khintamsol utyuknara marchalnungei ho rapkhi khintamsol samarshikkur, heirou heengpik dei khatnungeikhi heisibil marshikkur. 25Heitoubi Tabernacle Pucheem khatlhang mnakei khalu lhangranungkhi ani heengpik somni samarshikkur. 26Heitoubi heengpikrap heinungeikhi horap somli kulshanni sathutkur; heitoubi heengpik khat-khatdei hokhi khintamsol, heirou heengpik laikhatnungkhi ho khintamsol sathutkur. 27Heitoubi Tabernacle Pucheem hillei kulrel lhangei mnakreinungkhi ani heengpik thruktam khatkhi sathutkur. 28Heirou ani Tabernacle Pucheem hillhangrei chikoknareinung heengpik khintamsol sathutkur. 29Heitoubi holirari heengpik khintamtam dunmarthobi doura kaphani manthrinbini, heitoubi hutshi khatra ship'kalleirilkur; heisitoubi ani chikokna khintamrekra dunmanthrinbini sheemkur. 30Heitoubi heengpik khat-khatdei daakra ho khintamtam sheembini, heengpik chottam dunnanungei kulshanyei phompak ho chiple thrukkhi sathutkur.

31Heirouri Tabernacle Pucheemyei mnak lhang'khatra heengpik chepmanringnungei acacia heengni hompheikhi phangatam sathutkur. 32Heirou Tabernacle Pucheem mnak lhang'khatreinungeikhi heengpik chebphopnanungei homphei heeng phangatam sathutkur; heitoubi Tabernacle Pucheem hil'lhangei kulkung lhangra heengpik chebphopna homphei heeng phangatamkhi sathutkur. 33Heitoubi heengpik rapbei tlailamei homphei heeng heiwari msur thyoi-thya ronkalleinungei khoini ani sathutkur. 34Heitoubi heengpikrap heiri ani sinani lupbangkur; heirou homphei heengrap ronlhaknanungei heengpik rapra sinayei hutshi rapkhi shipbangkur; heitoubi homphei rapkhi sinani lupbangkur. 35#Hoy 26.31-37. Heiyakhi duinara, ani khmongdup, mraosot, heirou mrao phaikhring manlehbini maikhalphi, heirou Cherubimkhi hutsa karbilni yekbi lhangaini marshikkur. 36Heirou ani acacia heengni heiyei yungchei phangatamkhi sathutkur; heitoubi heirapya sina lupbangbini, heiyei chingkin rapkhi sinani sheemthutkur; heitoubi heirapya dunbaangnanungei kulshanyei ho rapkhi phalitam sheemthutkur. 37Heitoubi ani Khuiluphiyei Pucheem shumtrum yarkhalna phiyeng khatkhi khmongdup, mraosot, heirou mrao phaikhringni manlehbini, hutsakhei thimini lhangaidui yekthutbi sheemkur. 38Heitoubi heirapya yarnanungei yungcheikhi phangatam yungbak kyaoni ani sathutbi, heitoubi heirapbei dou lhangra sinani lupbangkur; heitoubi heirapya phonphopnanungei sinayei ruifretkhi msuibangkur; heiya heirapya dunbaangnanung ho phangatam heiwari kulshan'ne sheemthutkur.

Currently Selected:

HOYOUNA 36: MARIBSI

Highlight

Copy