HOYOUNA 35

Mathrilniyei Chanungei Lammitrap:

1Heirouri Moses'ne Israel thimi rapbei kulyom nammaya ungkartilbini, heitoubi yanungei shun, Umpuei shunmatupikur naiyei tounungei lammit rapri asitoubi leilei: 2#Hoy 23.12; 31.12-17; 34.21; Khn 5.12-15. “Tlaini thrukniri nani lhouchur-lhoupaang yarou; heiya enini tlung tlainirouri nani karngabi, Umpunungei khyingni mathrilnei tlaini hoiyerrou da; heiyei tlaininungri thimi hukounak khatni koukou lhouya chur-paanglanungri, ayari hinei tanti pirou#35.2: tanti pirou: hatrou. da. 3Heitoubi nani mathrilnei tlaini heirouri naiyei cheembom kantangra meibom lukpopmakrou da.”

4 # Hoy 25.1-9. Heirouri Moses'ne Israellei thimirap nammanung shunbi kyun, “Umpuei chaytlouni asitoubi shunthutpilei: 5Naihangrei Umpunungei makatnungei ruiput urthutlak; huhuni ukning khyingni Umpunungei pi'kni leiyanungri, ani sinale, kulshan heirou lapa thirya pithutlaksu. 6Heirou khmongdup, mraosot heirou mrao phaikhringei phiyeng rapkhi, yao'khmulkhi; 7heirou mrao kimni siman sangbangkur yao'unkhi, tlang'unkhi heirou acacia heengkhi; 8heirou mei warnungei shirek, heirou teiphangnungei shirek shumna mroilung rapkhi, heirou khrim muiknam mrohkun rapkhi; 9heirou Ephodle, malungpak'khang sanara changnungei manklu Onyx thlungril mar'emkhi heirou thlungril deideikhi urthutlaksu.”

Pucheem Sabaangnei Lammitrap:

10“Heitoubi naihangrei hutsa khei thimi rapni wathuklaksu, heitoubi Umpuei shunmatukur putlamrap nammaya sheemthutlaksu. 11Tabernacle Pucheem khat sabaangna'nungei heengro-shungyang rapri: Doura yukmakhup'nungei khuiluphi, heitoubi mnakra thungkhalna putlamrap, thleira yemphopnungei chukrap, heitoubi heiyei heengpik rapkhi, heirou heiyei homphei heengrap, heiyei yungchei rapkhi; heitoubi heirapya dunbaangna'nungei phampak ho rapkhi sathutlaksu. 12Heitoubi Mardingrilna Theengkung, heitoubi heiwaya chungna'nungei putpu rapkhi; Kringpi kheiyei Omnakhi, heirou heiwaya yarkhalna phiyengkhi; 13heitoubi heiyei turng khatle, heiyei putpu rapkhi; heitoubi heiyei changbom thuk phuwan-shungyang rapkhi, chukhrung-anthlei nammakhi, heirou Phoryei mumtol rapkhi marshiklaksu; 14heitoubi shirek meishar dunbaangna meitharlkhi, heiyei changbom thuk putchei rapkhi, heirou warnungei meisharle, shirekkhi marshiklaksu; 15heirou mroh iknanungei khrahpal heirou heiyei putpu rapkhi, heirou mnuina'nungei shirekle, khrim ikmuinamyerna mrohkhi; heirou Pucheem#35.15: Pucheem: Tabernacle. shumtrum yarkhalnanungei phiyeng rapkhi marshiklaksu. 16Heitoubi meihongna khrahpal khatkhi, heirou chumshuk-thirmsuikhi, heirou putpu rapkhi, heirou heiyei phuwan raple, kul'lhingtangle heiwaya dunbaangna thiryungphukhi salaksu. 17Heitoubi yuntlangmaira mankhai'nungei phiyengkhi, heitoubi heiyei yungchei rapkhi, heirou heirapya bunphopna bi rapkhi; heitoubi mangkhal-shumtrumra yarkhalna phiyeng rapkhi yeklaksu. 18Heirou Pucheem khuiluphi yemphopna chuk rapkhi, heirou yuntlangmaile mangkhalla yemphopna chuk rapkhi salaksu; 19heirou Aaron'le aiyei cha napawa rapni suipi purap khoini khyingei bomra Puwatlhou tounungei wachangeinung yrengnungei phaikhringei shamb rapkhi lhangaini yekmarshiklaksu.”

Thimi Rapni Umpunung Makatnungei Put Heilhak:

20Heirouri Israellei thimirap nammani Moses'yei birouwei shalkarkhaikur. 21Heitoubi ukningra thoubangkurya phakur thimi kantangni lhawai kyaoni Umpuei ruiput khoini, Khulbung Kartilna Khuiluphiyei Cheem sabaangnanungei putchei-shungyangrap, heirou heiyei changbomthuk heengro rapkhi, heirou khyingei Puwatlhoura yrengnungei shamb rapya sananungeikhi heipilhakrilkur. 22Heisitoubi yani, napuiya heirou napawa lhuimakni, lhawai kyaoni ai'aiyei sina hutshirap, khnabil sinapar, hutrumshinrap, heirou shinmin rapkhi urthutrilbini heilhakbi Umpu'nungei ruiput khoini heimakatkur. 23Heirou napawa rapnikhi, thimi kantangni ai'aiyei klei putcheirap, phaikhringei phi khmongdup, mraosot heirou phimrao rapkhi urthutrilbi, heirou tlangkhmul, tlang'un heirou mrao kim siman sangphangkur yao'un rapkhi urthutrilbini heipilhakur. 24Heitoubi thimi kantangni ai'aiyei siruk urthutmani thimi rapni kulshan, heirou lapa thirkhi urthutrilbini Umpuei ruiput khoini makatkur; heirou thimi hukounakni acacia heeng urthutmani thimi rapni Puwatlhoura changbomthuk putcheirap sananungei makatrilkur. 25Heitoubi hutsakhei napuiya rapnikhi ai'aiyei hutni muiphai shinbini phaikhringei khmongdup'le, mraosot heirou phaimrao rmolphi rapkhi urthutrilbini makatkur. 26Heirou ukning thoubangkur lhawai kyao napuiyarap nammanikhi tlang khmullei muiphai shinbi phi yekbini urthutrilbi makatkur. 27Heirou ruipipu rapnikhi ephod linglik yeknara, heirou malungpak khang sanara thruibangnungei thlungkwaar Onyx heirou deidei thlungkwaar rapkhi urthutrilni makatkur. 28Heirou khrim muiknam mroh lungrap, warnungei shirek, heirou teinungei shirekkhi heirou muiknam iknungei mroh kunkhi urthutbini makatkur. 29Heisitoubi Israellei thimirap nammani, ukningra thoubaangkur napawarap heirou napuiya rapni, Umpune Moses'nung shunmatupikur Puwatlhou churbaangnanungei changbomthuk putchei-shungyangrap namyerwaya koukhi leiwangmakni#35.29: leiwangmak: ‘mansermakni’ nimanung ‘pamumakni’. manlhangni urthutrilbini Umpunungei makatkur.

Bezalel Heirou Oholiab Yakhuntaei Hutsakhei Watlhou:

30 # Hoy 31.1-6. Heirouri Moses'ne Israellei thimi rapnungei shun, “Thilak, Umpune Judahyei cheemkhurrei Huryei cha napawa Uri'ne pukkhou cha napawa Bezalel'ya mintlangbini ungpiwurla. 31Heitoubi Umpune ayari Dunpuei Lhawaini thimyerbi shingkheiyei khyal-roushingya pibini hutsakhei thimi khat hoiyerwurla. 32Heirou ani sinayei, kulshan heirou lapathir sheemthimi lhangsa khat khoini lhou tourouwa; 33heitoubi ani thlungkwaar rapkhi dinbini marchalkhei thimi hoirouwa; heirou heeng marchalkhei thimikhi khoini heengchurnei lhoukhi limlim churrouwa. 34Heirou Umpune Bezalel, heirou Dan cheemkhurrei Ahisamach'yei chanapawa Oholiab yakhuntaya marnopikhei thimi hoinei ukningkhi lhakpiwurla. 35Heisitoubi Umpune yayari thlung yemkhei thimirap, heeng churkhei thimirap, hutsakhei yayek thimirap, phaikhring khmongdup, mraosot, heirou phaimrao manlehbini yayek khei thimi rapnakni lhoulim kantangei hutsakhei thimirap hoiyerwurla.”

Currently Selected:

HOYOUNA 35: MARIBSI

Highlight

Copy