HOYOUNA 34

Hanuikhi Chaylam Thlungpak Khintam Piwurthu:

1Heirouri Umpune Moses'nung shun, “Lamkriyei thlungpak naksini thlungpak khintam danmarkhethulak; heitoubi Keine heirapbei doura haallei neiyei khingchalkur thlungpak rapra myekhou heinakrimni hanuikhi mayepithurou. 2Heineri ninga ningshun Sinai Lhungdoura kakabini, heitoubi lhungbunghakra nei'mshani Keiyei maibongra kamayungrou da. 3Heirou nangle kalhonni thimi hukhatkhi kakanungei yamakrou; heirou lhungdou heirouri thimi hukhatyakhi muthungyermakrou da; heitoubi lhungdou heiwairouri yaorul ramphakhi silbini namh pishainungkhi yamakrou.” 4Heisi toubine Moses'ne lamkriyei thlungpak naksini thlungpak khintam danbini marshikthu; heitoubi ani ningshun manma kanthoubini, heitoubi Sinai Lhungdoura kakakur; heirou Umpune anungei shunpikur heinakrimni, thlungpak heiri aihutra shinloubini kakakur. 5Heirouri Umpune ramei doura yongchumbini, heitoubi bi heitamrou Mosesyei pongra kalhonni mayungbini Umpune Aiyei minya paothutkur. 6#Msh 14.18; Neh 9.17; Laa 86.15; 103.8; 145.8; Jon 4.2. Heitoubi Umpune Mosesyei maibongra yentlaralbi, heitoubi paobini kyun, “Umpu, Umpu Dunpuri kringpikhei, malungshipi khei, malungkhatermak, kanthrampikhei, trim naimak-kham naimak lhangai malungamkna heirou tharmu chimmei Pu Umpu; 7thimi lishing lishingya klui naimakni malungshipi Pu, heirou khril lhangaimakei lhouya, shun ningmak lhouyakhi heirou klalya heirou borhyakhi kukpi Pume; heisiya hoiyanungkhi mral klei thimi rapyari Ane kouniroukhi tanti pimakni lakkhoumak, heirou pui-pa rapbei borhnung'tlim yaiyei yu-cha rapbei chaanrou ramphani chaan khyum chaan phali trumphopni tanti pikhou Pume.” 8Heirouri Mosesne khnotni thleira aiyei lu sikhuplhakbi khrumkur. 9Heitoubi ani kyun, “Kounakpi keine Neiyei mit'thrilnara kringpikheiya phalanungri, O Umpu, keiyei Dunpu, thimi rapni kounak ngakkalya hoiyanungkhi, Dunpune kaihangra kalhonpilaklo toubi shunchaleime; heitoubi kaiyei khril lhangaimakei lhouya, heirou kaiyei borhya hanuitom kukpilaklo; heitoubi kayari Neiyei thimirap khoini loulhakpilaklo.”

Mardingrilnei Tlou Hanuikhi Kantomrilthu:

10Heirouri Ane shun, “Thilak, Keine tlou mardingril khat khourouwa; neiyei thimirap nammaei maibongra, tlaipangpal namyerrei dourakhi heirou lim rapbei maibongrakhi tekkhi thukkhoumak kngakei lhou rapya touthutrouwa; heirouri nangni leimalnabi klei thimirap nammanikhi Umpuei lhouya mupharouwa; kouweiyo toulanungri, Keine naihangra touthutrou kyou lhou heiwari kngak khatdei chi'kna lhoukhat hoiroume.

11“Angtutou tlainirou Keine neinungei pirou kyou chaytlou heiwari mukheine chanthunglak; thilak, Keine neiyei maibongrouwei Amoria rapkhi, Canaania rapkhi, Hittia rapkhi, Perizzia rapkhi, Hivia rapkhi heirou Jebusia rapyakhi hulthutrouwa. 12Heirou mukheine toulaklo touri nangni wachangrou kyou ram heirouei paalbi louklei thimi raple nangle yakantlangrilbini tlou kantomrilkhi khounungei yamakrou; kounakpi nangni heinaksiya leirillanungri neinungei hungkarhanarou. 13Heiya nani yaiyei khrahpal rapya toumangurou da; yaiyei thrailha rapkhi umchaallurou da; heitoubi yaiyei Asherim thraibom rapkhi shaat'taakkurou da. 14#Hoy 20.5; 34.7; Khn 4.24; 5.9. (Ngamri, nani thraidei koukhatyakhi khrumnungei yamakrou; ngamri Umpuei minri ‘Horthitang’ toubine ungkur heihakpani tanghakni A heiri horthitang Dunpu)! 15Nangni ram heirouei louleikri thimi raple yakantlangrilbini yaihilla chanthungurmaknung mukheini toulak, heisi nimanungri yaiyei thrailha rapya khrumnara nanikhi khrumthungurbi nanungei hungkarhanarou; heitoubi yaiyei thrailha rapnungei khrumna put makatnarakhi naya malhimlhakbini, nanikhi thuinaput anchum maithungkur yaoweirou. 16Heirou naiyei chanapawa rapni nu-cha phayeinungkhi yaiyei cha napuiya rapya loulhakurkhi yaoweirou; heirou yaicha napuiya rapni yaiyei thrailha rapya khrumnara chorit naimakni khrumnaksini naiyei chanapawa rapyakhi chorit naimakei lhouya touthungyerheirou.

17 # Hoy 20.4. “Heirou nani nai'mshani kulshanyei thrailha rapya shungbi sheemnung yamakrou.

18 # Hoy 12.15-20. “Phri sikmak mumtol shaibi nani Kneitang markhullou da; ngamri Keine neinungei shunpikur heinakrimni kartinkur Abib tanglarou tlaini eninibil nani phri sikmak mumtol shaibini Kneitang markhullaklo, ngamri nani Abib tanglarou Egypt ram'rouwei shalthutkurme. 19#Hoy 13.2,11-16. Shullam latnarei pukthutkur cha napawarap namma, heirou halshun, yaoshun, heirou tlangshun pukthutkri pa touwei'mkhei heikhi Keiyeithil. 20Heitoubi naiyei gadha pukthutkri charap heiri yaoshunkou karlhengrilbi makatrou da; heirou kounakpi nani karlhengthungmanungri, nangni gadha shun heiri ngak khribdeekkurou da; heirou naiyei pukthutkri chanapawa samranrap nammakhi man pibini lhukrou da; heitoubi Keiyei maibongra yayari hangwalni wachangbini mayungyernung yamakrou.

21 # Hoy 20.8-10; 23.12; 31.12-17; 35.2; Khn 5.12-15. “Heirou nani tlaini thrukni lhouchur-lhoupang yarou, heitoubi enini tlung tlainirouri nani mathrillou da; heirou trunwai khumyei kheenroukhi heiyei tlainirouri nani karngarou da. 22#Hoy 23.14-17; Lev 23.1-44; Khn 16.1-17. Heirou nani Haptayei Kneitang khat gehu trunwai hutlha hei rapya makatbini markhullou da; heitoubi trunwai luk'karkumnei Kneitangkhi markhullou da. 23Heitoubi kum khatrou napawa touwei'mkhei Israellei Dunpu Umpuei maibongra khyumbuirek wachangbini khrumrou da. 24Kouweiyo toulanungri, Keine limrap nammaya nai maibongrouwei hulthutlourou, heitoubi naiyei ram ri karchunna karkumkhi maryayerrou; heirou nani naiyei Dunpu Umpuei maibongra kum khatrou khyumbuirek Lhungdoura kabini khrumyei kalloukhi, nairam heiwari thimi huchakhatnikhi lukloubi kulchalkur manimakrou.

25 # Hoy 23.18; Lev 2.11; Hoy 12.10. “Heirou nani Keinungei khrumna put makatnei heele, phri kyao putle markotnungei yamakrou; heitoubi Ralthutpinei Kneitang markhulnei khrumna putkhi ningshun trumphopni maleiyernung yamakrou. 26#Hoy 23.19; Khn 14.21; 26.2-11. Nangni neiyei lourei trunthutkur trunwai heirap namyerrouwei lhangai hutlha heirap heiri neiyei Dunpu Umpuei Cheemra heilhakbini makatrou da. Nangni yaoshun an heiwaya aiyei puiyei nuyuile pulni butchoknungei yamakrou.”

27Heirouri Umpune Moses'nung shun, “Tloulhangrap heiwaya yukmayelak; kouweiyo toulanungri, tloulhangrap heiyei hilthungni Keine nangle, Israel raple tloubom khat mardingrilwurla.” 28Heisi toubine Moses'ne Umpu'le kalhonni lhungdoura tlaini somlile masa somlibil yarekbi leiwurkhou; kheen heirouri ani mumtolkhi shaimak, heirou yuidingkhi mongmakni leiwurkhou. Heirouri ani mardingrilkur tloulhangrap touri Chaylam chiptam heiwari Thlungpak rapbei doura mayelhakur.

Mosesyei Mairung thangthukni Alkur:

29 # Hoy 23.18; Lev 2.11; Hoy 12.10. Heirouri Moses'ne aiyei hutra Mardingrilkur Chaylam Chiptamei thlungpak khintamya shinbini Sinai Lhungdourei yongchumyei kheenrouri aiyei mairung heiwari Umpukou tlou kallangrilwurnei ngamrou beimakni thangthukni alkur, heiya ai'mshaneri heiwaya ningmukhoumak. 30Heisi tounarouri Aaron'le, Israellei thimirap nammani Mosesya loumuwurla, heirouri thilak, yani aiyei mairung heiwani thangthukni alkurya muwurla, heingammei yani aiyei pongra karsilni wachangamakur. 31Heiya Moses'ne yaya lou'ungkur, heingammei Aaron'le, Israellei ruipipu uparap nammani aiyei pongra loupokarsilkur, heisitoubi ani yanungei tlou kallangrilkur. 32Heihillouri Israellei thimirap nammanikhi aiyei pongra wakarnakur; heirouri Umpune yanungei Sinai Lhungdoura shunpikur Chaylamrap nammaya yanungei shunmatupikur. 33Heitoubi Moses'ne yanungei tlou yunpikur luiwurbini, heihillouri ani aiyei mairungya maikhalphini yarkhalkur. 34Heiya Moses'ne Umpuei maibongra wachangbini Akou tlou kallangrilchibi wathukbongyenri, ani aiyei maikhalphi heiwari latbini leirou, heitoubi ani pura wathukbini Israellei thimi rapnung tlou yunchibi, aiyei lukhumrei heiwari hanuikhi yarkhallurthu. 35Heisitoubi Israellei thimi rapni Moses'yei mairung heiwari thang thukni alkurya muphakur. Heingamei Moses'ne aiyei mairung heiwari, ani Umpukou tlou kallangrilnung wachangbongyen lukhumreini yarkhalbini khoukur.

Currently Selected:

HOYOUNA 34: MARIBSI

Highlight

Copy