HOYOUNA 25

Pucheemra Malamput Makatnei Lammitrap:

1 # Hoy 35—40. Heirouri Umpune Moses'nung shun: 2#Hoy 35.4-9. “Israellei thimi rapnungei asitoubi shunpilak, touri yani Keinungei khrumna put makatlaksu; heirou yaiyei ukningra pi'knile kalhonni Keinungei makatbini pithutkur putcheirap heiri nangni loulhakkhoulak. 3Heitoubi nangni yairouwei thraibaangnungei makat putrap heiri: Sina, lapathir, heirou kulshanthir. 4Heirou phaikhring phi kim khmongdup, nungthou kim, heirou hee kim, heirou phaikhringei phiyeng, heirou tlang'khmulkhi markumbaanglak. 5Heirou mrao'kim sangphangkur yao'un rapkhi, nunghog'un rapkhi heirou Shittim heengkhi khumbaanglak. 6Mei waarnungei shirekkhi, mnuina shirek shumnungei hei lungrap, heirou khrim muiknam iknungei mroh kunkhi markumlak. 7Onyx thlungkwaar, heirou thlung kwaar deideikhi markumbini, linglikchul heiyei malungpak doura thruibangnungei markumlhaklak. 8Heitoubi yaihanga Keiyei leinanungei yaya Pucheem khat sabangyerlak. 9Keine neinungei shunmatupikur Pucheem Tabernacle sanei lammitrap tlungni sabangyerlak; heitoubi heiyei rilla khounungei shungyang putlamrap mshing tlungni sabini marshiklaksu.”

Mardingrilna Theengkung

10 # Hoy 37.1-9. “Heitoubi yani Shittim heengni Mardingrilna Theengkung khat, heiyei dungrani thong khnile lhang'khat shaangni, heirou heiyei homrani thong khatle lhang'khat paakni, heirou chourani thong khatle lhang'khat chouni salaksu. 11Heitoubi nangni Theengkung heiwari rillakhi heirou baorakhi sina khyingni lupbangrou da; heitoubi nangni heiwaya doura karhilni sinani kum sheembini mansambanglak. 12Heirou nangni sinani hutshi phalitam koolbini, Theengkung heiyei ho phalitamra hempoplak; hutshi khintamni khat lhangra hempoplak, heirou khintamni khat lhangra hempoplak. 13Heitoubi nangni Shittim heengni putpu khintam sheembini, heitoubi heirapya sina lupbanglak. 14Heitoubi nangni putpu rapya Mardingrilna Theengkung heiwaya chungcha yananungei, mnakrei hempopkur sina hutshi rilla thunringlak. 15Putpurap heiri Theengkungei hutshi rapbei rilla ronlhakbi, tekkhi phuithutmakni khourou da. 16Heitoubi Keine neinungei pirou'kyou Kantomrilnei hutlha heiri Theengkung rilla khoulak. 17Heirou nangni sina khyingni Kringpi'kheiyei Omna khat, heiyei dungrani thong khnile lhang'khat shaangni, heirou homrani thong khatle lhang'khat paakni sheemlak. 18Heitoubi nangni sinayei Cherubim'rap sabini, heirou heirapya hutsa karbilni chalbini, kringpi'kheiyei Omna msur thyoi-thyara mansambaangbini khoulak. 19Heitoubi Cherubim khatni khatlhangei msurra, heirou cherubim khatni khatlhangei msurra khoubini, heitoubi Cherubim rapbei msur thyoi-thya heiri kringpikheiyei Omna msur khintamra karchurilyerrou da. 20Heirou Cherubim rapbei sharap heiri doura taangmherbi, yaiyai sharap heine kringpi'kheiyei Omna doura hupkhalyerrou da; heitoubi yai maikhi khatle-khat kallukrilbi, kringpi kheiyei omna lhangra kalleklhakyerrou da. 21Heirou nangni kringpi kheiyei omna heiri Mardingrilna Theengkung doura khangbangbi khourou da; heitoubi Keine neinungei pirou kyou kantomrilnei hutlha heiri Mardingrilna Theengkung rilla khourou da. 22Heitoubi bi heirouwei Keine neiya yongmurillou; heirou Mardingrilna Theengkung doura dunbi klei Cherubimni hupkhalkhou kringpikheiyei omnara leibini, Israellei thimi rapnung chay pinungei tloubomrap namma Keine neinungei yukshunpirou.

Phoryei Mumtol Khouna Turngdou

23 # Hoy 37.10-15. “Heirou nangni Shittim heengni turngdou khat sarou da; turng heiwari dungrani thong khni shaangyerlak, heirou homni thong khat pakyerlak; heitoubi chourani thong khatle lhang'khat chouni salak. 24Heitoubi nangni heiwaya sina khyingni lupbanglak, heitoubi heiyei kumrakhi karhilni sina lupbangbini mansamlak. 25Heirou nangni heiyei rimra hutmainam khatdeimal paakni karhilni kum naiyerlak; heitoubi nangni heiyei rimra karhilni sinani kum sheembini mansamlak. 26Heirou nangni sinayei hutshi phalitam koolbini sheemlak; heitoubi hutshi heiri turng heiyei chithek phalitamra ho khatsolla huklhaklak. 27Hutshirap heiri rim kaphani kat'huklhakbi, turng heiwaya chungnanungei putpu ronlhak yananungei sheemlak. 28Heitoubi nangni Shittim heengni putpu khintam sheembini, heitoubi heirapya sinani lupbanglak; Heiyanungri heirapni turngya chungnarou da. 29Heirou nangni heirouwei yrengchanungei chakpang-kaikam, chukhrung-anthlei, chimailuk khumna, heirou borh mathainanungei yuiding shungkhouna lhingtang rapkhi sheemrou da; nangni heirapya sinani sheemrou da. 30#Hoy 39.36; 40.23; Lev 24.5-9. Heitoubi nangni mumtolrap heiri turngdoura karyomni Keiyei maibongra marpeibini khourou da.

Sinayei Meitharl

(Hoy 37.17-24)

31 # Hoy 37.17-24. “Heirouri nangni sina khyingni meitharl khat sheemrou da. Meitharl heiyei phampakle, heiyei mayungna chei heiri karbilni marchallou da; heirou meitharllei chei'ban rapkhi heirou heiyei msurra meishar dunnanungei par-um naksini kep rapkhi khatsol sheembini khourou da. 32Heirou heiyei mnak thyoi-thyara chei'ban thruktam lamthutyerrou da; meitharllei khatlhang mnakra chei'ban khyumtam rungyerrou da; heitoubi khatlhang mnakrakhi chei'ban khyumtam rungyerrou da. 33Meitharl khatlhangei chei'ban khyumtamei doura almond heengban par-umle nabo kyaonaksi kok khyumtam sabini mansambangrou da; heitoubi meitharl khatlhangrei khyumtam dourakhi almond heengban par-umle nabo kyaonaksi kok khyumtam sabini mansambaangrou da; heisitoubi meitharl chei'ban thruktammei doura kok khatsol sabini mansambaangrou da. 34Heitoubi Meitharl heinungei almond heengban par-umle nabonaksi kok phalitam sheemthutrou da. 35Heitoubi meitharllei chei'ban bak'rungna rmid pu-kantangei daakra khatsol marchal'lhakrou da. 36Heirou chei'ban raple rmid kantangra parkok raple khatnakni karbilni hempoprillou da. Heisitoubi heirapya namma sina khyingnithil sarou da. 37Heitoubi nangni meisharkhi enitam sheembini, meitharl dourei kok rapbei doura warnungei dunbaangrou da; heirou meishar'rap heiya meitharl maibongrei klei nammaya munanungei waaryerrou da. 38Heirou meitharl shupop-shumitna meicheple heenglhing heikhi sina khyingni sarou da. 39Heirouwei changbomthuk putlamrap namma heiri sina khying talent khat loubini sarou da. 40#Pao 7.44; Heb 8.5. Heitoubi heiyei changbomthuk putchei rapbei ngamrou, lhungdoura neinungei shunpikur hilthungni nangni thibini msing tlungni sheemrou da.

Currently Selected:

HOYOUNA 25: MARIBSI

Highlight

Copy