HOYOUNA 26

Tabernacle Yarkhalna Phaikhring Phirap:

1 # Hoy 36.8-19. “Heiyakhi duinara, nangni Pucheem khat sabini, heile kalhonni kim khmongmukle mraosan heirou mrao phaikhringya lhangaini mharbini, yarkhalna phiyeng chiptam khatkhi lhangaini yeklak; heitoubi heirapya nangni Cherubim raple kalhonni hutsa'khei thimiya karbilni marchalyerbi sayerrou da. 2Yarkhalna phiyeng khat-khat heiri thong somnile chot shaangyerlak, heirou homrani thong phali-phali paakni hoiyerrou da, heitoubi phiyengrap namma heiri dungkhyang heirou homrakhi khatnakthilni hoiyerrou da. 3Heitoubi phiyeng phangatam heiri khatle-khat thruiphoprillou da; heitoubi phangatam khatri laini thruiphoprillou da. 4Heirou thruiphoprilkur phiyengrap heiyei msurra khmongmuk kimyei hut churna ruifret suimandokrou da; heitoubi khintam tlung thruiphoprilkur phiyengrap heiyei msurrakhi hut churna ruifretrap thruimandokrou da. 5Phiyengrap heiyei msurra nangni hutshi somnga thruibangrou da; heitoubi khintam tlung phiyengrap heiyei msurrakhi heinakrimni hutshi somnga nangni thruibangthurou da; hutshirap heiri khatle-khatle mai kallukrilni thruibangrou da. 6Heisitoubi nangni sinayei kangkui somnga khatkhi sheemrou da; heitoubi thruimaryomrilkur phiyengrap khintam heiyei hutshi rapra kangkui rapni kutbini maryomrilyerou da; heiyanungri phiyengrap heiri manphoprilbi Pucheem Tabernacle khat khoini sabangkur yarou.

Tlang'khmullei Yarkhalna Phiyengrap:

7“Heitoubi nangni Pucheem doura yukmakhupnungei tlang'khmullei phiyeng rapkhi sarou da; nangni heinaksi tlang khmullei phiyeng chiple khat sarou da. 8Phiyeng khat-khat heiri dungrani thong somthum shaangyerrou da; heitoubi homrani thong phali-phali pakyerrou da; heirou phiyeng chiple khat heiwari dungrakhi shaang malknani, heirou homrakhi pak malknani hoiyerrou da. 9Heirou nangni phiyeng phangatam heiwari khatle-khat thruiphoprillou da; heitoubi phiyengrap thruktam heiwakhi laini khatle-khatle thrui'maryomrillou da; heitoubi thruktam tlung phiyeng heiwari khnui thukni thiklhepbi Pucheemyei maibong lhangra yarsundabini khoulak. 10Heirou lamkri thruiphoprilkur phiyengrap heiyei msurra karhilni hutshi somnga msuibanglak; heirou khintam tlung thruiphoprilkur phiyengrap heiyei msurrakhi karhilni heinakrimni hutshi somnga msuibanglak.

11“Heitoubi nangni kulshanyei kangkui somngakhi sheemlak; heitoubi kangkuirap heine hutshira kutphoprilbini phiyengrap heiwaya manphopyerrou da; heitoubi heirapya khatsi hoiyerrou da. 12Heirou phiyeng rapbei dungra shaangni maleithungkur heiwari, maleikur msurrap heiri khinglhepbini Pucheemyei hil lhangra manyarsundayerou da. 13Heitoubi khuiluphiyei Pucheem heiwaya yarkhalna phiyengrap heiri khatlhangei msurrakhi, heirou khatlhangei msurrakhi thong khat-khat shaangduiyerbi, heitoubi Pucheem heiyei mnak thyoi-thyara yarhoibini makhubphoprou da. 14Heitoubi nangni Khuiluphiyei Pucheem doura khupkhalnanungei kim mraoyerkur yao'unrap, heirou hal'un rapya loubini sheemrou da.

Heengpik Raple Heirou Heengpik Chalphopna Rkungrap:

15 # Hoy 36.20-34. “Heirouri nangni Pucheem karhilni mtungbi mayungyernungei Shittim heengpik rapkhi samarshikrou da. 16Heitoubi heengpik khat-khat heiri dungrani thong chip-chip shaangyerrou da; heitoubi homrani thong khatle lhang khat paakni sarou da. 17Heirou heengpik khat-khat heiri msur thyoi-thyara rkung khintamsol utyukbini, heitoubi heengpik khatle-khat marchalphopyerou da; heinakrimni Pucheemyei heengpik namma hei sarou da. 18Heisitoubi nangni Pucheemra lhaknungei heengpik rapya sarou da; khate lhangra lhaknungei heengpikrap somni sarou da. 19Heitoubi nangni heengpik somniyei daakra dunkhounanungei hokhi somli khatkhi lapa thirni sarou da; heirou heengpik khat-khatdei daakra ho khintamsol lhakrou da, heitoubi msurra marchalrilna'nungei 'rkung khintamsol utyukbi marchallhakrou da. 20Heitoubi Pucheemyei khatlhang mnakrei khalu lhangreinungkhi heengpik somni khatkhi sarou da. 21Heitoubi heilhangreikhi heengpik horap somli khatkhi lapa'thirni sarou da; heengpik khat-khatya dunkhouna hokhi khintamsol sarou da; heitoubi khatlhangei msurra dunkhouna ho khintamsol sarou da. 22Heirou Pucheemyei hil'lhangra kulrel lhangra'nungkhi nangni heengpik thruktam khatkhi sarou da. 23Heirou heengpikrap heiri thlei thangnara kokna khintamra lhaknungei heengpik khintamkhi sarou da. 24Heirou heengpikrap heiri thlei thangnara khintam hoiyerbi, heitoubi dourani lamkri hutshira karbobrilyerrou da; heinakrimni heengpikrap heiri koknara lhakrou da. 25Heirou heengpik chottam sabini, lapa'thirni yaiyei ho rapkhi chalphoprou da; ho chiple'thruk chalbini, heengpik khat-khatdei daakra ho khintamsol challhakrou da; heitoubi heengpik khatrakhi heinakrimni chalphoprou da.

26“Heitoubi nangni Shittim heengni hangputpu rapkhi sheemrou da; hangputpu phangatamni Pucheemyei khatlhang mnakrei heengpik rapya loudounanungei hoiyerrou da. 27Heitoubi hangputpu phangatam khatni Pucheemyei khatlhang mnakrei heengpik rapya loumardounanungei hoiyerrou da. 28Heirou heengpik heiyei tlailamei hangputpu heiri msur khatrouweini msur khatra ronkalleirou da. 29Heitoubi nangni heengpikrap heiri namma sina lupbaangrou da; heitoubi hangputpu rapya manphopna khoini sinayei hutshi rapkhi sipbangrou da; heirou nangni hang putpurap heikhi sina lupbangrou da. 30Heitoubi Pucheem heiwari Lhungdoura neinungei mutpikur heinakrimni nangni lammit tlungni sabangrou da.

Manyarsundanung Phiyengrap:

31 # Hoy 36.35-38. “Heirou nangni khmongduple mraosan heirou mrao kimyei phaikhringei phiyengya hutsa karbilni yekyerbi, Cherubim'le kalhonni hutsa'khei thimiya lhangaini sayerrou da. 32Heirou nangni phiyengrap heiwaya sinayei hutshi thruibangbi, lapa thirrei ho phalitamei doura dunbaanglak, heitoubi sina lupbangkur Shittim heeng shutlai rapbei doura manyarkhoulak. 33Heitoubi nangni phiyeng heiri chingkinra mankhaibini yarkhalnalak; heitoubi heiyei kallera Mardingrilna Theengkung khanglhaklak, heirou maikhalphi heiwani nanungei Khyingni bomle Yerrouwei Hyingduina bomthoya yarkhalna hoiyerrou da. 34Heirou nangni Hyingduina bomtho rillei klei Mardingrilna pura turng heiwaya doura Kringpikheiyei Omna dunbaangrou da. 35Heitoubi nangni Pucheemyei khalu lhangra maikhalphi pura turng heiwaya dunkhoulak, heitoubi heiyei mai kallukrilni kulrel lhangrari Meitharl dunkhourou da.

36“Heitoubi nangni Pucheemyei cheemkhar yarkhalna phiyengrap, khmongdup kimle, mraosot kimle heirou mrao kimyei phaikhringni lhangaini hutsa khei thimi rapya thruiyerrou da. 37Heirou nangni Shittim heengni shumtrum phi rapya yarnanungei yungbakrap phangatam sathutrou da; heitoubi heirapya sinani lupbaangrou da; heirou yaya manphopna chingkin rapkhi sinani sarou da; heirou yungbak rapbei mayungnanungei kulshanni ho phangatamkhi sarou da.

Currently Selected:

HOYOUNA 26: MARIBSI

Highlight

Copy