HOYOUNA 27

Kulshan Khrahpal

(Hoy 38.1-7)

1 # Hoy 38.1-7. “Heirou nangni Shittim heengni khrahpal khat, dungrani thong phanga shaangni, heirou homrakhi thong phanga paakni salak; khrahpal heiwari dungrakhi homrakhi khatnakdik malknani hoiyerrou da; heitoubi heiyei chouri thong khyum hoiyerrou da. 2Heirou nangni heiyei dourei chikokna phalitamra chee khatsol sheembini mandokrou da; heirou aiyei cheerap heiri khatnakdikni hoiyerrou da; heitoubi cheerap heiri nangni kulshan lupbangrou da. 3Heitoubi nangni khrahpal heirouwei ud'rahui loudongna'nungei kulpak khatkhi, heirou ud thutnanungei markut khatkhi, heirou kul'lhing rapkhi, heirou anchum bulthutna'nungei chaiche rapkhi, heirou meihal shukna'nungei kulhar rapkhi sarou da; putcheirap namma heiwaya nangni kulshannithil sarou da. 4Heirou khrahpalla lhaknungei kulshanyei khrai khatkhi nangni salak, heitoubi nangni kulshanyei hutshi phalitam koolbini, khrai heiyei chithek phalitamra khatsol msuibanglak. 5Heitoubi nangni khrai heiwari daakra khoubini, khrahpallei tlakra thiklhepbanglak; heiyanungri khrai heiri khrahpallei yailam kapharou. 6Heirou nangni khrahpal heiwaya chungnanungei Shittim heengni putpu sheemlak; heitoubi heirapya kulshan lupbanglak. 7Heitoubi heiyei putpurap heiri hutshi rilla thunringlhaklak, heiyanungri khrahpal heiwaya chungchayeinung putpurap heiri mnak thyoi-thyara khoubini chungnarou da. 8Nangni khrahpal heiwaya heengpikni sayeinung tlailamra maryani putyerrou da; neinungei Lhungdoura mutpikur heinakrimni, khrahpal heiwaya sarou da.

Pucheem Yungtlangmai:

9 # Hoy 38.9-20. “Heirou nangni Pucheemyei yuntlangmai sheemrou da; yuntlangmai heiyei khate lhangra yarnungei, pangkhat-khatra thong macha shaangni phaikhringei phaila khintamtam manlehbi, phiyengrap lhangaini yekyerrou da. 10Heitoubi bunnungei yungbak somni khatkhi sabi, heitoubi heirapya tomnanungei ho rapkhi somnikhat kulshanni sheemrou da; heirou yungbak ha raple, heirouwei huklhakna chingkin rapkhi lapa thirni sheemrou da. 11Heitoubi khalu lhangrakhi heinakrim chapmalknani, phiyengrap dungrani thong macha shaangni yarkhallou da; heitoubi bunnungei yungbak somni khatkhi, heirou tomnanungei kulshanni ho rapkhi somni kyaoni, heirou huklhakna chingkinkhi lapa thirni sheemrou da. 12Heitoubi kulrel lhangei hyetlaira yarkhalnanungei phiyeng heiri thong somnga pakyerrou da; heirou heiraple kalhonni yungbak chiptamle, heitoubi heirapya tomnanungei ho rapkhi chiptam sheemrou da. 13Heitoubi kulkung lhangrei hyetlairi thong somnga pakyerrou da. 14Shumtrum khatlhang mnakrei yarsundanungei phiyeng heiri thong chiple phanga shaangyerrou da; heitoubi heiwaya mardounanungei yungbak khyumtamle, heitoubi heirapya tomnanungei ho rapkhi khyumtam sheemrou da. 15Heirou shumtrum khatlhang mnakrei yarsundanungeikhi phiyengrap heikhi thong chiple phanga shaangyerrou da, heitoubi heirapya mardounanungei yungbakkhi khyumtam, heile kalhonni heirapya tomnanungei ho rapkhi khyumtam sheemrou da. 16Heirou maishukrei shumtrumra thong somni shang phiyeng khatni yarkhallou da; phiyeng heiyei kimri khmongduple mraosot heirou mraoni hoirou da; phiyeng heiwari phaikhringni phaila'khni-khni manlehbi, hutsa'khei thimini karbilni yekrou da; heile kalhonni mardouna'nungei yungbak phalitamle, tomnanungei ho rapkhi phalitam kyaoni sheemrou da. 17Heirou yuntlangmai karhilni bunnungei yungbakrap heiri kulshanni namma mansambangrou da; heile kalhonni heirapbei kutpalna chingkin rapkhi kulshanni sheemrou da; heitoubi yungcheirap tomnanungei ho rapkhi lapa thirni sheemrou da. 18Yungtlangmai heiyei dungri thong machakhat shaangyerrou da; heirou heiyei homri thong somnga pakyerrou da; heirou heiyei lipri thong phanga chouyerrou da; heitoubi heiwaya phaikhringei phiyengni karhilni yarkhallou da; heirou heiyei tomnanungei ho rapri lapa thirni hoiyerrou da. 19Pucheem heiyei watlhoura yrengnungei shungyangrap, phuwanrap nammale, heirou hemphopnungei chuk rapkhi, heirou yuntlangmaira bunnungei chukrap namma heiri lapa thirnidik sheemrou da.

20 # Lev 24.1-4. “Heitoubi nangni Israel douwa rapya chay pibini shunrou da, touri meishar mit'naimakni warbini khounungei yaya Olive shirek-khying urthutyerlak. 21Kulyom kartilna Khuiluphiyei Pucheem rilra, Mardingrilna Theengkungya yarkhalna maibong lhangei pura, Aaron'le aiyei chanao rapni ningshun-rawai koulhuimakni Umpuei watlhouya toubine leirou da; kyun tlou awari Israel chanao rapbei chathit-yuthit kantangrou lakkhounungei yamak Puwatlhouei lammit hoiyerrou da.

Currently Selected:

HOYOUNA 27: MARIBSI

Highlight

Copy