HOYOUNA 24

Israel Rapni Dunpukou Mardingrilthu

1Heirouri Umpune Moses'nung shun, “Nangni Aaron'le, Nadab'le, Abihu heirou Israellei Yama uparap napung somretle kalhonni Umpunung kabini, tlatnara leibini Aya khrumlak. 2Heitoubi Moses'ri aitamtom Umpuei pongra wachang kya, heiya ya deiri knakni wachangnung yamakrou; heirou akou kalhonni thimi deikhi kakanungei yamakrou.”

3Heirouri Moses'ne yenkallengbi, Umpuei shunpikur tloulhangrap nammale, heirou Aiyei chaylamrap nammakhi thimi rapnung sherthutpikur; heirouri thimi rapni khatsi khoini kantlangni loumallangbi kyun, “Umpuei shunpikur tloulhangrap namyerwa heiya kani hil'chanthungrou!” 4Heirou Moses'ne Umpuei shunpikur tloulhangrap nammaya louninglhakur. Heirouri ani ningshun manma kanthoubi, heitoubi lhungsora khrahpal khat sabangbi, heirou Israellei cheemkhur chiple khniyei min hilthungni shutlai chiple khni bunbangkur. 5Heirouri ani Israellei chanao rapbei hangrei kartlang douwarap malhetbi, heirou yaya khrumnaput hongbini makatyerkur; heitoubi yani Umpunungei kantlangni yarilnei malanput khoini halpadou rapya hongbini makatkur. 6Heirou Moses'ne makatkur heiyei hee lhang'khat khaithutbini heeng lhingra shunglhakur, heitoubi heiyei lhang'khatdei hee heiwari ani loubi khrahpal doura khrephangkur. 7Heirouri ani mardingrilnarei lailikya loubini, heitoubi thimi rapya mayeknanungei ani pathutpikur; heirouri yani loumallangkur, “Umpuei shunpikur namyerwa heiri kani tourou, heirou kani Aiyei kyunya chanthungrou.” 8#Mt 26.28; Mk 14.24; Lk 22.20; 1 Co 11.25; Heb 9.20; 10.29. Heisitoubi Mosesne hee heiwaya loubini thimi rapya khrephangpikur, heitoubi ani shun, “Thilak, hee awari, Umpule nale yarilbini mardingrilkur tloulhang rapbei hutlha khoini khoukur heeme.”

9Heirouri Moses'ne Aaron'le, Nadab heirou Abihu heirou Israel cheemkhurei Yama uparap napung somretle kalhonni lhungdoura kakakur. 10Heirouri yani Israellei Dunpuya mulhakur, heirou Aiyei ho makhanara, saphire thlungkwaar lambini marthingkeo warbi, nungthourei kwaarnakni albine klei heiwaya yani mukur. 11Heiyanungkhi Israellei cheemkhur Yama upa rapbei doura Aiyei hutri loukhangbaangmak; heisitoubi yani Dunpuei mairungya thrilmukur, heitoubi yani bi heirou chamaibi leikur.

Moses'ne Sinai Lhungdoura Kakakur:

12 # 2 Co 3.3. Heirouri Umpune Moses'nung shun, “Lhungdoura keinungei kakabi, bi heitamrou louleilaklo, heirou Keiyei mayelhakur kulyom lammitle Keiyei chaylam rapbei thlungpak rapya Keine neinungei silnapirou, heitoubi nangni heirapya yanungei marnopirou da.” 13Heisitoubi Moses'ne kanthoubi, heirou aiyei putruiwa Joshua'le kalhonni Dunpuei leina Lhungdou'ranung kakakur. 14Heiya Yama upa rapnungei ani shunkhou, “Kane nai leinara yenkallengbongyen nani bi atamrou kaya loungaklaklo. Heirou thilak, Aaron'le Hur yarukhniri nakou kalhonni leithungrou; naihangra huhuni tlouthuk-laathuk leiyanungri, aya yaileinara wachangyerbini pichar touyerlak.”

15Heirouri Moses'ne Lhungdoura kakakur; heirou lhungdou heiwari rameini makhubphopbi mehwura. 16Heirou Umpuei thang'alni Sinai Lhungdoura yongchumpikur, heirouri lhungdou heiwari tlaini thruknibil rameini makhubphopbi leikur; heirou enini tlung tlaini heirouri Ane ramei hangrouwei Mosesya yuk'ungpikur. 17Heirou Israellei thimi rapbei mithrilnarari, Umpuei thang'alni Lhungdou heiyei bunghakra meithlanni kaangbi kleinakni katmukur. 18Heirouri Moses'ne Lhungdoura kakayeinung, ramei hangra heisi wachangkur; heisitoubi Moses'ne lhungdou heirou tlaini somlile masa somlinibil leiwurkhou.

Currently Selected:

HOYOUNA 24: MARIBSI

Highlight

Copy