HOYOUNA 16

Umpune Manna'le Phaimlung Waa Yenpikur:

1Heirouri yani Elim'rouwei lamtla hoyoubini, Israellei chanaorap nammani, Egypt ram'rouwei shaalthutkur hillei tlun'khni tlung tanglayei tlaini chiple phanganirou, yani Elim'le Sinai tlakrei klei Sin'yei ramhangra wa'tlungkur. 2Heirouri Israellei chanao rapbei kulyom nammani ramhangra leiyeinungri Moses'le Aaron'ya malungkhabi kansopikur. 3#Hoy 14.12; 17.3. Heirou Israellei chanao rapni yanungei shun, “Nane kulyomrap nammaya ramhangra ruithutloubini chak msulni manroubi hikurnung'tlimri, kani Egyptbei ramra ukthotul chamaibini leiyeinung Umpuei hutra hiyerkurni duini lhangairou.”

4 # Jn 6.31. Heirouri Umpune Mosesnung shun, “Thilak, Keine Thangwanrei nanungei mumtol rosundayerpirou; heitoubi thimi rapni wathukbini nungkhatnuiniyei ronanungei tlainiser markumlhakrou da; heisi toubine Keine yaya marshakbini thirou.” 5Heirouri asitoubi hungthukrou touri, tlaini thruknirouri yaiyei khumlhakur putchei rapya marshalyei kheen heirouri, yani tlainiserrei markumlhakbi khoukurya duini siruk khni-khni louduilhakrou. 6Heirouri Moses'le Aaron'ne Israellei thimirap nammanung shun, “Naya Egypt ramrei ruithutpikur heiwari Umpume touri nani rawainung murouwa. 7Heitoubi ningshunyei kheenrou Umpuei thang'alya mupharou, kouweiyo toulanungri, nani Anungei karhani kansopikur heiwari Ane loumayekurla; heirou kawo touri koukhi nimakme, kanungei kansopibi koutounarouwo?”

Umpune Phaimlung Waa Yenmalhetpikur:

8Heirouri Moses'ne shun, “Asitoubine hungthukheirou, touri Umpune rawainung nai mainungei phaimlung waa yenmalhetpirou, heirou ningshunnangri nani ukthoni chamainungei mannakhi yongdayerpirou; kouweiyo toulanungri, nani Umpuya kansopikur heiwari Ane loumayekurla; heirou kawo touri kounaksi thimiyo? Heirou nani kaya kansopikur heiwari kaya nimakme, heiya Umpuya kansopikurme.”

9Heirouri Moses'ne Aaron'ya shun, “Israellei kulyomrap nammanungei shunpilak, ‘Wawalo, heitoubi Umpuei maibongra wachangalo; ngamri naiyei kansokur heiwari Ane mayekpiwurla.’ ” 10Heirouri Aaron'ne Israellei kulyomnungei asitoubi shunpiyei kheenrouri asitoubine thukkura, touri yani ramhangra thrilthiyei kheenrouri thilak, Umpuei thang'alni ramei doura yuk'albine muyerpikur. 11Heirou Umpune Moses'nung shunbini asitoubi kyun: 12“Israel chanao rapbei kansokur heiwari Keine loumayekurla; yanungei asitoubi shunpilaka, ‘Nane rawainangri waa-an mairouwa, heitoubi ningshunnungri nani manna chamairou; heirouri nani murouwa touri Umpuri naiyei Dunpu.’ ”

13Heisi toubine rawainangri asitoubi hungthukkura, touri phai'mlung waa heitraithutbi, heitoubi yaiyei rungbomyei cheem karhilni thimni wachukur; heitoubi ningshunyei kheenrouri cheem karhilni thleimai karyouni rdaini dakhalbini louklei. 14Heirou ningshun rdai yenheepkur kheenrouri, thilak, ramhangra thleimai doura chyuncha pumnaksi lhangaini, heirou thurdang kmalni ngoubang taarphopbini putkhat thleimai doura karkangbi leithungkur. 15Heirouri Israel rapni heiwaya muyei kheenrou yani khatle khat ngairilbi, “Awaya kouwo?” toubine yunrilkur. Ngamri yani heirapri kouweiyo touri hunikhi mukhoumak. Heirouri Moses'ne yanungei shun, “Awari nai chamainungei Umpuei yukpisundakur mumtol. 16Umpune asitoubi chay piwurla, ‘Thimi napung kantangni ai'aiyei chamaikro hilthungni khumlhaklaksu; heitoubi thimi kantangni ai'aiyei cheemmai-bommai thimi mshing hilthungni, napung khatkhatnungei krungkok khatsol holmarkhebini loulaksu.’ ” 17Heirou Israellei thimi rapni kyun heinakrimni, thimi thaneri chungwani, heirou thimi thaneri thathacha khumlhakur. 18#2 Co 8.15. Heirou yani krungkok khatsolsol holmarkhebi mallonglhaknarou, chungwani klou thiminekhi maleimak, heirou thathacha klou thimi rapnekhi charomak toukhi naimak; heisitoubi thimi kantangni mimiyei charonanungei khumlhakrilkur. 19Heirou Mosesne yanungei shun, “Thimi hukhatnikhi ningshun ramphani chaktham khoini maleiyermakniyasu.” 20Heiya yani Mosesyei shunya ninglhakmakni, heirou ya thimi thaneri maleiyerbi ningshun rampha tham hoiyerkur; heiya heirapbei doura khlung changurbini, chulkhrimkhi namkur; heitounei ngamrou Mosesne yaidoura beimakni malungkhakur. 21Heisitoubi thimi napung kantangni ningshunserrei, mimiyei cha'kro-maikroni markumlhakur, heiya ningshunyei kheenrouri Kinnine katchouwanungri cha'kmai putrap heiri louyasundabi kanchaikur.

22Kheen heirouri asitoubi hungthukkura, touri tlaini thrukni tlung heirouri, yani haaalleiya siruk khni duini, thimi napung kantangei Krungkok khintamsolsol markumlhakur. Heitoubi khulbungei yama upa rapni wathukbini Moses'nung washunkur.

Mathrilni

23Heirouri ani yanungei loushun, “Umpuei shunpikuri asitoubi leilei: ‘Ningatou tlainirouri Umpunungei khyingei Sabbath#16.23 Sabbath: Mathrilni. markhulnei tlaini dalei, heineri angtu tlainirou mumtol manuibi sheembomthuk heiwari marshiklaka, heitoubi thungminnungei chak-an rapkhi thungminlaka; heitoubi maleithungkur heirapri ninga ningshun thungmarshiknungei khaikhoulaka.’ ” 24Heisitoubi Mosesne yanungei shunmatupikur heinakrimni thangei ningshun hungphani khaithutbini khoukur, heiya heirapri chulkhi chulmaklei, heirou khlungkhi changmakni klei. 25Heirouri Mosesne shun, “Angturi awaya chamailaka, kouweiyo toulanungri, angturi Umpunungei Sabbath markhulnei tlainime; angturi nani heinaksi chamai putri ramhangra raphabi mumakrou. 26Tlaini thrukniyei rilla nani heiwaya markumbini mallonglhakrou da; heitoubi tlaini enini tlung heiwari Sabbath hoirouwa; heininungri koukhatkhi phamakrou.” 27Heirouri asitoubine thukkura, touri thimirap thaneri tlaini eninirou wathukbini heirapya markumnungei raphakur, heiya yani koukhatkhi raphamumakur. 28Heirouri Umpune Moses'nung shun, “Kheen kounak tlani nani Keiyei shunmatukur chaylamyei lammit rapya yanimakni chaeirouwo? 29Thilak! Umpune nanungei mathrilnei tlaini piwurkhoula; heingammei Ane nanungei thrukni tlung tlainirou khnini chamainungei mumtolkhi marshikyerwurla; heineri thimi kantangni ai'aiyei cheemra chutmakni leilakasu, heirou thimi hukhatnikhi enini tlung tlainirou ai'aiyei bi'rouwei chutdurmakni leilaksu.” 30Heisitoubi thimi rapni enini tlung tlainirou mathrilkur.

31Heirou Israellei thimi rapni chamaiput heiwaya Manna toubi min thulbini ungrilkur, heirou put heiwari mroilung kmal, aiyei kimri khngou; heirou heiyei mnikri khuining teiphangbi ngouminkur mumtol naksini mnik. 32Heirouri Moses'ne shun, “Umpuei shunpikur chaylamri awari: ‘Naihillei hungrou kyou yu-cha rapbei chaan phani khounungei nani Manna heiwari krungkok khat holthutbini khoulak, heiyanungri Keine naya kounaksi chamai putya pichakhouwo toubine yani heirouwei hungmuna'nungei nani lhangaini marshikbi khoulaka.’ ” 33Heirou Moses'ne Aaron'ya shun, “Thlungei khang khat loubini, heitoubi heiyei rilla Manna omer#16.33: omer: krungkok khatdei changh. khat holthutbini shunglhakhoulak, heitoubi naiyei hillei hungrou kyou chathun-yuthun ramphani kamuthung'nungei hutlha khoini, Umpuei maibongra dunthutbini khoulaka.” 34Heirou Umpune Moses'nung chay piwurkhou hilthungni, Aaron'ne Umpuei maibongra heiwaya marshikbini dunthutbi khoukur. 35Heisitoubi Israellei chanao rapni, yaiyei paalnanungei ram hungdabongyen, kum somlibil Manna chamaikhou; heirou Canaanyei ram ri karchunna hungda phani yani Manna chamaikhou. 36(Heikaallei krungkok khat heiri ngantam bluk khatdei sirukchip thuknarei siruk khatdeimal khoi.)

Currently Selected:

HOYOUNA 16: MARIBSI

Highlight

Copy