HOYOUNA 17

Lungthilla Yui Wathukyerkur:

1Heirouri Israellei chanao rapbei kulyom nammani Sin ramhang'rouwei thangknaini lamtla yenchaheibini, Umpuei chaytlou hilthungni yani Rephidim'ra cheem sabini leikur, heiya bi heirouri thimi rapbei mongnungei yuiri tekkhi phamakur. 2Heitounei ngamrou thimi rapni Moses'ya, “Kanungei yui mongnung pilak,” toubi yunbini ngaalpikur. Heitounei ngammei Moses'ne yanungei loukyun, “Koutounei nani keiya ngaalpibi, Umpuya marshakthikurawo?” 3#Hoy 14.12; 16.3. Heiya thimi rapni bi heitamrou leiyeinung beimakni yuikhat douwurkhou; heitounei ngammei yani Mosesya malungkhani kansopibi kyun, “Koutounei nangni kayari Egypt ram'rouwei ruithutloubi, kaiyei chanao raple, kaiyei ui-waa rapkhi nammaya bi arou yuikhatni manrouhatnungei toukurawo?” 4Heitounei ngamrou Mosesne Umpunung chapni shunchabi kyun, “Keine thimirap heinungei kouya toupichangrouwo? Beileibi yani keiyari thlungni nanghatnungei manrangkurame.” 5Heirouri Umpune Mosesnung shun, “Nangni thimi rapbei maibongra Israellei upa rapya heiruiheibini walaka, heitoubi Nile kungra neiyei yrengchakhou cheishu heiwaya neihutra shinlouheibini walaka. 6Heirouri thilak, Keine neimaibongra Horebra thlung doura mayungbini louleirou; heirouri nangni thlung heiwaya cheishuni hei'umyeinung, thlung heirouwei tuysir wathukrou; heitoubi thimi rapni yui mongpharou.” Heisitoubi Mosesne Israellei upa rapbei maibongra shunpikur tlou hilthungni heinakrimni loutoukur. 7Heitoubi bi heiyei minri ani Massah#17.7: Massah: martambi chim-chimmak thi., heirou Meribah#17.7: Meribah: rkalkril. toubine thulpikur; ngamri Israellei thimi rapni malungkhabi kansobidik leiwurkhou, heirou yani Umpuya marshakthibi, “Umpuri kaihangra leileiko, nimanung leimakleiko?” toubine yunbidik leiwurkhou.

Amalek Rapbei Doura Raal Manekur:

8Heirouri Amalek rapni Israel rapbei doura raal youbini Rephidimra raal kardourilkur. 9Heitounei Mosesne Joshuaya shun, “Kaihangrei napawa tha khalthutlaka, heitoubi wathukbini Amalek raple raal kardourillaka. Ninga tlainirou keiyei hutra Dunpuei cheishuya shinbini Keine Lhungdoura kakabi mayungbini leirouwa.” 10Heirouri Joshua'ne Mosesyei shunkur hilthungni thimi rapya khalthutbi, heitoubi Amalek rapya kardourilkur; heirouri Moses'le Aaron heirou Hur yakhyumni Lhungdoura kakabi mayungbi leikur. 11Heirouri asitoubi thukkura, touri Moses'ne aiyei hutbang khangbaangbi khoulanungri Israel rapni raal heitonlhakkur, heirou ani aihut laksundaei kheenrouri Amalek rapni raal heitonlhakkur. 12Heiya Moses'yei hutbangri masewura. Heirouri yani thlungtum khat khaangloubini aiyei hutbang daakra loukhoubini katmardoupikur; heitoubi Aaron'le Hur yarukhnine napung'khatni khatlhang mnakra, heirou napung'khatni khatlhang mnakra mayungbini aiyei hutbangya mardoubaangbi trungpikur. Heisitoubi aiyei hutbang heiri masemakni Kinni yongchipbongyen khangbaangbi khoupikur. 13Heisitoubi Joshua'ne Amalek'le aiyei thimi rapya kardourilbi raal manekur.

14 # Khn 25.17-19; 1 Sa 15.2-9. Heirouri Umpune Moses'nung shun, “Hilloukhi hungningthutna lhoubom khoini awaya lailikra mayekhoulak, heitoubi Joshua'yei khnara mayeknungei sherthutpilak, touri Amalek rapya hunikhi ningthutmaknungei Keine tlaipangpal arouwei toumitrouwa.” 15Heirouri Moses'ne khrahpal khat sabaangkur, heitoubi heiwaya ‘Jehovah-Nissi’ touri ‘Umpuri keiyei phral’ toubine min thulkur. 16Heirouri ani kyun, “Ngamri Umpuei phral doura hut khoubini tlou kantomwurla, touri thimi chaanserrou Umpune Amalek rapya raal kardourou.”

Currently Selected:

HOYOUNA 17: MARIBSI

Highlight

Copy