HOYOUNA 15
15
Moses'le Israel Rapbei Kanyernei Shei:
1Heirouri Moses'le Israellei douwa rapni Umpunung kanyernei laaya asitoubi shakur: “Keine Umpunungei laa shabini, heirou Aya chouni mathangrou; kouweiyo toulanungri, Aiyei thang'alle kalhonni raal maniwurla, heirou sapuk raple sapuk'tung raallui rapyakhi Ane Samadru tlaira khinglhakpiwurla. 2Umpuri keiyei mantrang, heirou keiyei laa; heirou Ari keiyei Ralthutpina bom hoiyura, heitoubi A heiri keiyei Dunpu; heineri Keine Aya mathangrouwa; Ari keiyei pawaei Dunpu, heineri keine Aya chouni mathangrouwa. 3Umpuri raalbomyei Lhouwa khatme, heirou Umputou heiwari Aiyei minhoume. 4Pharaohyei sapuk kaari raple aiyei raallui rapya Ane Samadrura namma khinglhakurla; heirou aiyei khalthutkur raallui upa rapkhi namma Mrao Samadru'ra martlaoyerwurla. 5Yayari yuilhouni namma makhubphopburla; heirou yari yui yukna rilla thlungtum naksini yendalhakura. 6O Umpu! Neiyei thyarei banrei heiwari mantrangei thang'alni thimleime; O Umpu! Neiyei thyarei banrei heiwari yeekna thimi rapya harhar dani shatchallhakurlame. 7Heirou Neiyei Toumanenei thang'al rilla, Neiya karhani raal kyou yeekna rapya Nangni khingsundawurla; heirou Neiyei meithukei malungkha heiwaya yaidoura yongdayerbini, yaya sapul naksini kaangtlummurla. 8Heirou Neiyei napurrei nilsho hanuitom heisothutnarou yuitang tuywok kallongurlei, heirou kanchekchabi klei yuilhoukhi raapthang namtungkur heinaksini marpeibangurlei; heirou Samadru yuknarei yuilhou rapkhi kanchekmakni riedaini leiwurlei. 9Yeekna thimine kyun, ‘Keine hilla chanthungbi, yaya hulmanrou, heitoubi yaya kul challouwa; Keine yairouwei lalthum rapya lunglouheibi, heirapya yerkhairillouwa; heiwani yaidoura Keiyei malungkhrah hoirouwa; heirou Keine keiyei raalshonya phuithutbi, heitoubi Keihutni yaya hatbini toumaangrouwa.’ 10Nangni marthee kadthiyerbi, heirou Samadruni khubphopyerkur; heirouri yari Samadru rilla misi'thir naksini yendumlhakur.” 11Thrai rapbei hangrari, O Umpu, Nangnaksiri dei hu leileihuiyo? Nangnakri kngak khatdei Khying, chi'knaei shakrung khoini kngakei lhou toumaniri dei hu leileiyo? 12Neiyei thyarei banrei lamthutnaroukhi, thlei taka aangbi yayari madulloukur. 13“Heirou Nangni kalthutpikur thimi rapya Neiyei kringpina rilla ruipiwurla; Neiyei Mane-mantrang heine yayari Neiyei Khying ramra ruilhakpiwurla. 14Limdei rapni heiwaya mayekbi chiwura; heiwani Philistiarei thimi rapya beimakni lhawai lahyerwurla. 15Heirouri Edom'yei Krung rapkhi tounaram makkura. Moabei lhou'urpu rapkhi chiwurbi kanchunrouwa; heirou Canaanra paalbi klei thimi rapkhi lhawai kanwangurchiya. 16Chi'knale heirou kngakni yaidoura dawura; Neiyei toumani hutmantrang heiyei ngamni yari kanchekcha manimakni thlungnakni leirouwa; Neiyei thimi rapri raalthutbongyenri, O Umpu, Neiyei lopikur thimi rapni raalthutbongyenri; 17O Umpu, Neiyei thrungnanungei phunbaangkur Neiyei Lhungdoura, heirou Neihutni sabaangkur Khyingei Pucheemra, yaya Nangni yenruilhakbini phunkanthoupirou. 18Bi heirouri Umpune klui naimak, trim naimakni thrungrouwa.”
19Kouweiyo toulanungri Pharaohyei sapuk raple aiyei sapuk kaari rapkhi heirou aiyei sapuk'tung raallui raple kalhonni Samadru rilla wachangkur; heitoubi Umpune Samadruei yui heiwaya yaidoura yenkallengyerbi dumphopyerkur; heiya Israellei thimi rapneri Samadru rilla thlei taarna doura honi chabi ralthutkur. 20Heirou Aaronyei char thimkhuiwi Miriamni aiyei hutra sengshek shinbini, heirou napuiyarap nammanikhi sengshek shinbi nuybini aihilla heichanthungkur. 21Heirou Miriamni yaya ruibini laa shakur, “Umpunung nani laa shalaklo, kouweiyo toulanungri, Ane maipaakni raal maniwurlame; sapuk raple heiyei raallui rapya Ane Samadru rilla khinglhakurlame.”
Marah'le Elimrei Yui Khakur:
22Heirouri Mosesne Israel rapya Mrao Samadru'rouwei ruithutloubi heitoubi Shuryei ramhangra chakur; heirou yani Ramhangra tlaini khyumnibil lamtlabi chanarouri yui mongmumakura. 23Heirou yani Marah wa'tlungei kheenrouri, Marahyei yui heiwari yani mongchangmakura, ngamri bi heiyei yui heiwari beimakni kha, heitounei ngammei bi heiwaya ‘Marah’ toubine thulkur. 24Heingammei thimi rapni Mosesya yanimakni kansopiwurbi kyun, “Kane kourei yui mongbi leirouwo?” 25Heirouri ani Umpunung chapni shunchakur; heirouri Umpune yanungei heengtrung khat mutpikur; heirou ani heeng heiwaya yuira laklhakei kaallouri yui heiwari ksim tuysir heiholkur.
Bi heitamrou Umpune yanungei chaylam khat piwurbi, heirou Pu'tlouwei lammit khat sheempikur, heitoubi yaya ukning marshakthikur. 26Heitoubi Ane kyun, “Nane ukning changni naiyei Dunpu, Umpuei kyunya ninglhakbi, heirou Aiyei mithrilnara tharmu chimmei lhouya toulanungri, heirou Aiyei chaylam rapya ninglhakbini, heirou Aiyei Pu'tlouwei lammit rapya namma baimakni ngaakbi chalwanungri, Keine Egyptbei thimi rapbei doura dayerkhou thrai kna heiri Keine naidoura khatchatomkhi dayerpimakrou; kouweiyo toulanungri, Keiri naya damyerpi Pu Umpume.”
27Heirouri yani Elim'ra wa'tlungkur; bi heirouri yuiphum bi chiple khni louklei, heirou kangwoi trungkhi somret pukbi louklei.
Currently Selected:
HOYOUNA 15: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
