PAOCHA 7

Stephenyei Tlou Kyun

1Suipipu Upawane Stephennung tlou kngai, “Yai kyun heiri chimleiko?” 2#Laa 29.3; Kan 11.31; 15.7. Heirou Stephen'ne loumallangkur, “Keiyei teinaorap heirou pa thukrap, keiyei kyun awaya louningpilak! Kai patar Abraham'ne Haranra kabi paalbongnung, Mesopotamia ramra Dunpuei thang'alne anungei mutpiwurbi, 3#Kan 12.1. heirou anungei loushunpikur, ‘Neiyei bommai'le, neiyei ramya lakurkhoubi, heitoubi Keine neinungei shunmandopirou kyou ram heirounung nangne chawalo!’ 4#Kan 11.31; 15.7; 12.5. Heitounei ngamrou aya pukna ramya lakurkhoubi Haran'ra paalnungei toubi chakur. Heisitoubi Abrahamei pa hiwurhillou, Dunpune aya chayerbine, asiyei naiyei paalna ram arou aya loupaalyerkur. 5#Kan 12.7,13,15; 15.18; 17.8. Heitoubi Dunpune Abraham'nung ram heiri aitamei ram hoinanungei toubi harcha khatyakhi heirou thongkhat pakchayakhi pikhoumak, heiya Dunpune ram namma heiri anungei heirou aiyei yuwa-chawa rapnungei hoiyeroume toubi kantompikur. Dunpune tlou heiwaya kantom'piyeinung Abrahamri chanao pukmakhui. 6Dunpune anungei shunkhou tlouri asitoulei: ‘Neiyei yu-cha rapne yenpuichabi miramra ram taangbi leiheirou, heitoubi heisi leiyeinung yane mideiyei shok khoine lhou tourou, heitoubi yayari kum macha phali mini kulchalbi thuithine mareknapirou. 7#Kan 15.13-14. Heiya yai watlhou toupibi klei thimi rapbei doura Keine pichar toupiheirou, heitoubi hillouri yane ram heirouwei thukwurbi heirou bi arou yane Keiya khrumheirou.’#Hoy 3.12. 8#Kan 17.10-14; 21.2-4; 25.26; 29.31-35; 30.1-24; 35.16-18,23-26. Heisitoubi Dunpune Abrahamya mardingkril khoine murdinnei lhouya touyerkur. Heitoubi Abraham'ne Isaacya pukbi, tlaini chotnirou aya murdinnei lhou toupikur; heitoubi Isaac'nekhi aiyei chanapawa Jacobya murdinpikur, heirou Jacob'nekhi aiyei chanapawarap napung chiple-khniya murdinpikur. Ya heirapne kaiyei minchabi klei patar'rap heiriya.”

9 # Kan 37.11,28; 39.2,21. “Jacobei chanao rapne yai naowa Josephya hortheewurbi heirou aya Egyptra shok hoinanungei yorlhakpikur. Heiya Dunpune aya kalhonpikur, 10#Kan 41.39-41. heingammei ayari klah-knang kounakrei ralthutpiwurbi Egypt ramra urlhakbi Josephni Egypt Krungei maibongra mayungeinung Dunpune anungei kringpile, shingkheiyei ukningya piwurnei ngamrou, heirou Krungni Josephya airam nammaei doura, heirou aiyei Krungbomya thikulnanungei toubi Rampu khoine bom lhakpikur. 11#Kan 42.1-2. Heirouri Egypt ramle heirou Canaan ramrakhi purvi-purcham#7.11: purvi-purcham: Chaaktaang thukbi koukhi chamu-maimumakur. thukkurbi beimakne mrimkur. 12Heirou Jacobni Egypt'rari shaang#7.12: shaang: cha. kleime toubi pao mayeknarou, ane aiyei chanao rapya, touri kai patar rapya lamkri khoine ram heirou yukyilkur. 13#Kan 45.1,16. Heirou yane ram heirouei khnui tlungne yuyei kalnungri Josephni aiyei teinao rapnung a heiri yai naowame toubi ahakpane yanungei shak muyerkur, heirouri Egyptbei Krung heinekhi Josephbei cheemmai-bommairei thimi raypa mumanrerilkur. 14#Kan 45.9-10,17-18; 46.27. Heitounei Josephni aiyei pawa Jacob'nung pao malhetbi, anungle heirou aiyei bommairei thimi rapnung, Egyptra yunanungei shunthungkur. Heinungri yai bommairei thimirap nammane napung somretle-phangabil tlung. 15#Kan 46.1-7; 49.33. Heisitoubi Jacobni Egypt ramra yupaalkur, ram heirou akhi heirou aiyei chanao rapkhi hikur. 16#Kan 23.3-16; 33.19; 50.7-13; Jos 24.32. Heitoubi yai khi'lhungrap heiri, Abraham'ne Hamor'yei cheemkhurnung kulshan-tuy pibine lokhou ram, Shechem'ra lhan sheembine phumkur.

17“Dunpune Abraham'nung kantomkhoupi trum yenkarnakkur heirouri, Egypt ramra klei kai thimi rapbei mshing katchungduikur. 18#Hoy 1.7-8. Hillouri Joseph'ya shak mupimak Krung khatne Egypt ramya kulchalbi palyoukur. 19#Hoy 1.10-11,22. Heitoubi ane kaiyei nutar-patar rapya thuithine marhotyoukur, heirou yane chanao pukbikhi, ane naoshun-naopar rapya yaiyei cheemra leiyermakne hulthutdurbi hiyerkur. 20#Hoy 2.2. Heinaksi trum heirou beimakne lhangai naoshun - Moses'ya pukkur. Ayari tangla tlun'khyumbil cheemra munne pomtangkhou, 21#Hoy 2.3-10. heirou aya cheem'rouwei khingthutkur heirouri, Krungei chawine aya khulbine, heitoubi aiyei yukpuk'hak chanapawa'nakne yukthutkur. 22Heitoubi ayari Egyptbei shingkheiyei lhouram namma marnopikur, heisitoubi tlou yunna-yaina kounakroukhi heirou lhou tounarakhi nam'rouwei toumane tang thimi khat hunghoikur.

23“Moses'ne ai'mshaei kum somli ka'tlungkur heirouri, aiyei thimi Israel rapya thuithine mareknapikur heiwaya thikulnanungei aitamei ukningra ningchayoukur. 24Nungkhatnuiri Egyptbei napawa napung khatne aithimi khatya thuithine toupikur heiwaya ane muthungkur, heirouri ane aithimi heiwaya kalpiwurbi heirou Egyptbei napawa heiwayari hatkur. 25(Heirou aiyei ukningrari, Dunpune aya yrengchabi aiyei thimi rapya shok hoibi leina bom'rouwei malhetthutyerrou toubine aiyei thimi rapne mupirou toubine ningchakhou, heiya yaneri aiyei ningchakhou heiwaya mupimakur.) 26Heithangei tlainiroukhi Israel thimi napung-khnine ngalbi louklei ane muthungkur, heirouri ane yakhuntaya kngal toudongbi chamrilyernanung wairangbi shunkur, ‘Louninglak, keiyei teinaorap, nari Israellei teinaodik; heine kousiyabi nakhuri heisi ngalkurawo?’ 27Heiya napung khatpaya thuithine toupikur napawa heiwane Moses'ya khatlhang mnakra namtheiwurbi loukyun, ‘Arou hune neiya pu hoiyerbi kaidoura pichar toukyer? 28Angiyei nangne Egyptbei napawa khatya hatkurnakne, angtukhi nangne kayakhi hatkniko?’ 29#Hoy 2.11-15. Heitoubi loukyun heiwaya Moses'ne mayeknarouri, ane Egypt ram'rouwei trukwurbi Midia ramra wapaalkur. Ram heirou ane chanapawa napung-khni pukkhou.” #Hoy 18.3-4.

30“Kum somli yenralkurle, Thangring khatne Sinai Lhungdoura Moses'nung heengna karbukna khatra meithlan kangyerbi muyerkur. 31Moses'ne heiwaya munarou ngakurbi, heirou ane pongra pokarsilbi lhangaine thimanrebi leiyeinung, Dunpuei hou khatne heikyun ane loumayek: 32‘Keiri nai patarap Abraham, Isaac heirou Jacobei Dunpume.’ Heitounei Moses'ne chiwurbi thiro'ngammakne leikur. 33Heirou Dunpune anungei shun, ‘Neiyei khorkhang yuklhukurlak, ngamri neiyei mayungna bi heiri khyingei bi. 34#Hoy 3.1-10. Keiyei thimi rapne Egypt ramra klah-mrim knang doubi klei heiwaya Keine mupiwurla. Yai klah-nrinei hou heiri Keine mayekkurla, heirou Keine naya bi heirouwei malhetthutpinanungei yongpilei. Asinungri nang hunglaka; Keine neiya Egyptra heimalhetpirou.’

35 # Hoy 2.14. “Moses'yari Israel thimi rapne yapimakur. ‘Huni neiya pu hoiyerbi kaidoura pichar toukyerro?’ toubi yane anungei kngai. A heirime Dunpune yenmalhetpibi thimi rapbei doura paalbi heirou Thangringne meithlan khoine anungei muyerbi, heiyei trungpinei ngamni yaya malhetthutkur. 36#Hoy 7.5; 14.21; Msh 14.33. Ane thimi rapya Egypt ram'rouwei ruithutpikur, heitoubi Egypt rammei ‘Mrao Samadru’ dourakhi heirou Ramthingrakhi kum somli ranchayeinungkhi, mini toumanemak kngakei lhou rapkhi touthutkur. 37#Khn 18.15,18. Mosesme, Israelyei thimi rapnung atoubi yunpikhouri, ‘Dunpune keiya yenmalhetpikur heinakne, Ane nanungei thimkhui khat yenmalhetpiheirou, heirouri Akhi naiyei thimi khat hoirou.’ 38#Hoy 19; Khn 5.1-33. Akhi Israel rapne ramthingra kartillei kalnungkhi kyao; A heikhi kai patar rapkou kalhonkhou, heirou Sinai Lhungdoura tlou yunkhoupi Thangringle kalhonkhou, heitoubi Ane Dunpurei Khringei Pao-laaya phaloubine kanungei loukalunpikhou.

39 # Msh 14.3-4. “Heiya kai patar rapne Aya yapimaknei ngamrou Aihil chanthungpimak; yane Aya thranthutdurbi heirou Egyptra hanui kallengurnungei wairangkur. 40#Hoy 32.1. Heitounei yane Aaron'nung kyun, ‘Kaya ruipinanungei thrailha tha sheempilaklo. Kaya Egypt ram'rouwei ruithutpikur napawa Moses'nungei kouya thukkurro touri kane mumakura’. 41#Hoy 32.2-6. Heisi tounarou yane tlainirap heiyei rilla halshun-lha khat sheemthutkur, heitoubi hal'lha heiwanungei khrumna put makatbine, yaitamyei sheemthutkur hal'lha heiwaya rikrai khrum khoine yane knei khat tlunkur. 42#Jer 19.13; Ams 5.25-27. Heitounei ngamrou Dunpune yairouwei kallengthutbi heirou yanungei nungthourei sorwa rapya khrumyerkur, heirou thimkhui rapbei lailikra atoubi mayekhou klei: ‘O Israel thimirap! Nane ramthingra kum somli leikhouweinung, ui-waa hatbine makatkhou heiri, Keinungei nimak. 43Heirou nane chayeinung chungchakhou heiwari Moloch thraishang, heirou nai sorwa thrai Rephan'yei lha; heirapri nai khrumnungei sheemthutkur thrai rapbei lhadik. Heineri Keine naya raal bomra maitheeyerbi kul chalphopburnung Babylon ramya heiduinara malhetrouwa.’

44 # Hoy 25.9,40. “Kai patar rapne ramthingra leikhouwei kalnung Dunpuei leina Pucheem khat sabangkhou. Heiwari Dunpune Moses'nung shunthutpikur heinakrimne sheemthutkhou. 45#Jos 3.14-17; Khn 32.49. Heihillouri kai pawa rapne Pucheem heiwaya yai pawarap'rouwei phathungbi heitoubi yane chungchabine Joshua'le kalhonne chabi heirou yai maibongra louleikri lim rapya Dunpune hulthutdurbi ram heirou paalkur. Heitoubi yane David'yei chaan ramphane paalkhou. 46#2 Sa 7.1-16; 1 Ch 17.1-14; Laa 132.1-5. Heirou ane Dunpuei kningya phaloubine, heitoubi ane Jacobei Dunpunungei leina bi khat sabangyernungei Dunpunung buchakur. 47#1 Kr 6; 2 Ch 3.1-17. Heiya Cheem heiri Solomon'ne Anungei sabangpikur.

48“Heiya nam'rouwei choudui Dunpu heiri tlaipang thimiyei hutni sabangkur cheemra leimakrou; thimkhuini yunkhounakne, 49‘Thangmunri Keiyei Krungbom toubi Dunpune yunpilei, heitoubi tlaipangri Keiyei hotrumna bom. Nangne Keinung'tlim kounaksi cheemya sabangrou youleiyo? Keiyari bi kourou leiyerrou youleiyo? 50#Isa 66.1-2. Namyerwa heiya sheemthutpikur heiri Keihak nimako?’

51 # Hoy 33.3,5; Jer 9.26; 6.10; Msh 27.14; Isa 63.10. “Nari napaltha thimirap,” toubi Stephenni yenyunkur, “Heitoubi nai ukningra murdinmak thimi rapkhi khoi, heirou nai khnane Dunpuei Pao-laaya kounakne ningnimakurawo? Nari nai nutar-patar rapbei ukningnakrim hoilei: Nanekhi Lhawai Khyingya karyomne yapimak! 52Heitoubi nai patar rapne marhotkhoumak Thimkhuiri khatchatom karkulthung leileiko? Yane Dunpuei tharmu klei Thimkhui khat hungrou younei ngamrou shunthutpikhou paocha thimi rapyakhi hatdurpi. Heirou asinungkhi nane Ayakhi hanui yorchawurbine hatdurpila. 53Nane Thangring rapbei yenkallunpikur Dunpuei Tloulamya phakur thimirap hoilei - heiya nane Tloulamrap heiyari hil chanthungpimaklei!”

Stephenya Thlungni Khinghatkur

54Yama-krung rapne Stephen'yei kyun heiwaya louningbi, yane aiyei kyun tlou rapya mayeknarou meithukne, mkha chikbi aya malungkhapikur. 55Heiya Stephen'ri Lhawai khyingne thimmurbi, nungthou lhangra mangalbi leiyei kaalnung, Dunpuei thang'alle kalhonne Jesu'ne Dunpuei thya lhangra mayungbi klei ane katmukur. 56Heirou ane kyun, “Thilak, Thangmun laatbi klei keine muwurla, heirou Thimiyei Chanapawane Dunpuei thya lhangra mayungbi klei keine katmulei!”

57Heirouri Yama-krung rapne hutmayungni yai khna tipburbi kalne ungraokur. Heitoubi ya nammane kar-umphapburbi, 58aya khukarthillei pura taangthutdurbi, heitoubi thlungni aya nanghatkur. Heirou thimi rapne yai linglik-phi'up lhukkurbi, heirou mitne muthungbi tlou mayungpi khoine Saul'yei pongra lokpane khingmallongkur. 59Heitoubi yane Stephenya thlungni khingei kaalnung, ane Dunpunung ungbi kyun, “Pu Jesu, keiyei lhawaiya loulhakpilaklo!” 60Heitoubi ane khuklu kanthrunchane kanellhakurbi hou choune ungraothutkur, “Dunpu! Yai toukur borh heinung'tlim yaya khlang lhakpimaklo!” Heirou ane heisi yunkhoubi kat'hikur.

Currently Selected:

PAOCHA 7: MARIBSI

Highlight

Copy