PAOCHA 8

1 # Pao 11.19. Heisitoubi Saul'nekhi yapiwurbi Stephenya hatkur.

Saul'ne Churchyei Thimi rapya Marhotpikur

Heinirouwei waiyoubi Jerusalem'rei klei Churchya yunchangmakkei klah-mrimni marhotpikur. Paocha thimirap nimakne dei uklum thimirap namyerwari Judea'le Samaria'yei ramra trukchekwurchi. 2Uklumbi Dunpunung makatkur thimirap thane Stephen'ya khiruibi, heirou anung'tlim beimakne kanrilne ungraobi chapkur.

3 # Pao 22.4-5; 26.9-11. Heiya Saul'neri churchya mangyernanungei wairangkur; ane cheem khatrouweine cheem khatra yenchangheibi, uklum thimi rapya, napuiyarap heirou napawarap naimakne cheemrei taangthutloubine heitoubi yaya kulrilla chalphopkur.

Samaria'rakhi Lhangaiyei Pao-laaya Shunthutpikur

4Trukchekkur uklum thimi rapne yai yenchaheina bi kantangrou lhangai paolaaya yenshunthutpikur. 5Heirou Philip'ne Samaria'yei khukarthilra wachangbi thimi rapnung Messiah'yei ngamrou shunthutpikur. 6Heirou thimi rapne pokarsilbi Philipbei shunthutkur tlou rapya wanengkur, heirou ane thimi deine toumanemak kngakei lhou rapya touthutkur heikhi yane mukur. 7Heitoubi lhangaimak lhawaikhi chungwane thimi raprouwei ungraobi trukthutkur, heitoubi mnaak paangkhat khi'thimi rapkhi heirou hodeek thimi rapkhi chungwane kna raikur. 8Heingammei Khukarthil heirou hakrao-nungkngaini thimkur.

9Simon toubi ung napawa khat bi heirou louklei, kheen khatrou ane Samaria'yei thimi rapnung aiyei kngak thui sherbi yaya mit mahyerbi beimakne ngakyerkur. A heiri tang thimi khatme toubi aitamne kanyerchakhou, 10heirou khukarthil heiyei thimi rapne, cheemkhur tangkhi-mandikhi naimakne nammane aiyei toukur lhou rapya ukning kyaone thibi leikhou. A heiri ‘Tangdui Mane-mantrang’ toubi ung Dunpuei mantrang heirime toubi yane yunrilkur. 11Yane aiyei lhouya thininei ngamri kheen kounakyei maibongrei waiyoubi aiyei thui heiwine mit mahyernei lhouya toubine yaya ngakyerkhou. 12Heiya Philip'rouwei yane Dunpuei Krung'rammei ngamle heirou Jesu Christaei ngamroukhi lhangai paolaaya mayeknarou uklumbine, yaihangra napuiyakhi napawakhi pulne yui lupkur. 13Heirou Simon ahakpakhi uklumkur; heitoubi akhi yui lupburbi, ane Philipbei pongra karnakbi leikur, heirouri kngakei lhou raple mini toumanemak lhou rapya toukur heiwaya munarouri ane beimakne ngakkur.

14Paocha thimi rapne Jerusalem'ra leiyeinung pao loumayekkur touri Samaria'rei thimi rapkhi Dunpuei tlouya loulhakurlame tounei ngamrou, yane Peter'le John'ya yaileinara katmalhetkur. 15Heitoubi yakhuntane bi heirou ka'tlungbi, uklum thimi rapya Lhawai Khying phayernanungei shunchapikur. 16Ngamri ya hukhatchayei dourakhi Lhawai Khying heiri yongpimakhui; yari Pu Jesuei minra yuitom lupkhouhui. 17Heitoubi Peter'le John'ne yaidoura hut khaangpibi shunchapinarouri yane Lhawai Khying phakur.

18Paocha thimi rapne yaidoura hut khangbi shunchapinarou uklum thimi rapbei doura Lhawai Khying yongchumpikur heiwaya Simon'ne munarouri, heirou ane Peter'le John yakhunung tuy makatbine, 19heirou ane kyun, “Anaksi mantrang ari keinungkhi pilaklo, heiyanungri huhuwei doura keihut khaangbi shunchapiyeinung anekhi Lhawai Khying pharou.”

20Heiya Peter'ne anung loumallangkur, “Nangle neiyei tuy heiri khiya ramra changlakasu, koungameiyo toulanungri neiyei khalkur heiri Dunpuei hutthulya tuyni lochangrou marbukurako? 21#Laa 78.37. Kaiyei toubi klei lhou arouri neiyei yaothungbom shiruk koukhatkhi mak, ngamri neiyei ukning heiri Dunpuei maibongra chimmaklei. 22Heiyanungri, neiyei ningchabi klei ukningrei lhangaimak heiwaya shunthutbine neiukning hunglak, heirou neiyei ningchakhou lhangaimak heiwaya kukpi phananungei Dunpunung shunchalak. 23#Isa 58.6. Kouweiyo toulanungri, neiyei ukningra miya horthitang heirou borhrei kulrilla leileihui touri keine mulei.”

24Heirou Simon'ne Peter'le John yakhunung shun, “Kringpibi keinung'tlim Dunpunung bei shunchapilak, heitoulanungri naiyei shunthutkur tlourap heiri keidoura damakneyasu.”

25Peter'le John yakhune yaichaanrou thukkur lhourap heirou Dunpuei paolaa shunthutpikur hillouri, yakhune Jerusalem'ra hanui yenkallengkur. Yakhune yenkallengeinung lamrakhi Samaria'yei yulthung kounakrakhi Lhangai Pao-laaya yenshunthutkur.

Philip Heirou Ethiopia'yei Lhou'urpu

26Dunpuei Thangring khatne Philipnung loushun, “Kanthoubine marshiklaka, heitoubi Jerusalem'rei Gaza'ra yuna lamyei khate lhangra yuwalo.” (Lam heiri lamkhman hoinei ngamrou asinungri hunekhi charilmakura.) 27Heisi toubi Philip'ne marshikloubine yukur. Heirouri msha holkur Ethiopia napawa khat, Ethiopia Krungnu Candace'yei cheemra lilkhoi lal panabi klei napawa heine Jerusalem'ra thrai kakhrumkhoubi heitoubi sapuk kaari tungbi cheemranung yenkalleng. 28Heirou ane sapuk kaari doura ombine heisi tungmalom Thimkhui Isaiah'yei lailik laatbine pabine louklei. 29Heirou Lhawai Khyingne Philip'nung shun, “Sapuk karidoura kakabi aiyei pongra ka'ommalo.” 30Heitounei Philip'ne khrangni kakawurbi heirou napawa heine Thimkhui Isaiahyei lailikya pabine loukleiya ane mayekkur. Heirou Philip'ne anungei kngai, “Neiyei pabi klei heiri nangne muchangleiko?”

31Lhou'urpu heiwane loumallangkur, “Thimi khatne keinungei shunpimanungri, keine koutoubi muchangrouwo?” Heitounei ngamrou ane Philipya sapuk kaari rilla unglhakbi aiyei pongra akou kalhonne omyerkur. 32Heirou aiyei pabi louklei lailikyei bi heiri: “Hatnungei urthutloukur yaoshun'nakne Upawaya urthutlouheila, yao heiya puni khmul ngounungei namphopbeinung koukhi hou thukmaknakne, Ane koutlou khatkhi yunmaklei. 33#Isa 53.7-8. Aya kringpikhei naimakne kchim heine ayari yapimakkura, heirou aiyei puirie-parieyei chaanlamya shutpirouri hukhatkhi maklei, ngamri aiyei tlaipang rongchan heiri hungdongura.”

34Lhou'urpu heiwane Philip'nung kngai, “Keinung bei yunpilak, thimkhuiyei kyunri huwei ngammo? Aitamei ngamya kyunko nimanung thimi napung khatdei ngamrou yunkhouweiko?” 35Heirouri Philip'ne Isaiah'yei lailik heirouwei yunyoubi, ane napawa heiwanung Jesuei ngamrou lhangaiyei Pao-laaya yunpikur. 36Heirou yakhune heisi chayeinung, lamruira yui leina bi khatrou wa'tlungkur, heirouri lhou'urpu heiwane kyun, “Bi arou yui bei leilei. Keiya yui luppila'nungri kou lehkna hoirouwo?” 37Heirouri Philip'ne anung loushun, “Nangne neiukning namma kyaone uklummanungri yui luppikurkhi kya.” Heirou ane, “Keine Jesu Christa heiri Dunpuei Chanapawame toubi keiyei ukningra uklum leiyame,” toubi loumallangkur.

38Heirouri lhou'urpu heiwane sapuk kaari mathrumyerbi, heirou Philip yakhune yuiwaira yuchumbi, heirou Philip'ne aya yui luppikur. 39Heitoubi yakhune yuiwairei kathukkurbi, tallengne Dunpuei Lhawaine Philip'ya urlouheila. Heirouri lhou'urpu heiwane Philipya hanui kallengne mumakura, heiya ane nungkngaine shaalkur. 40Philip'ne Azotus'ra wa'tlungbi; heitoubi ane Caesarea'ra wachangkur, heirou ane chayeinung khukarthil kantangra Lhangaiyei Pao-laa shunthutpikur.

Currently Selected:

PAOCHA 8: MARIBSI

Highlight

Copy