PAOCHA 6

Lhou Churtrungpi Thimi Napung-eni

1Kheen beiyei hillouri, ruishik rapbei mshing katchungduikur, heirouri yaihangra Greek tlou kyun Jehudi raple heirou ram heiyei Jehudi rapne ngaalkur. Greek tlou kyun Jehudi rapne yaidoura nungwaimaknei ngamrou tlou makatkur, ngamri yailhangrei trulmei rapnung tlainiserrei tuy, phirul-phishamb heirou chaanung-mainungei yerrillei kalnung lhou hoipimakne yerkarkulkur. 2Heitounei ngamrou ruishik napung chiple khnine uklum thimirul nammaya lokpa ungmartilbine shun, “Kane sina-lapa, chaanung-mainungtom phananungei chanchanarou, Dunpuei tlouya shunthutnara lhou hoipimakuri chimmakrou. 3Heiyanungri keiyei teinaorap, naihangrei Lhawai Khyingne thimbi heirou shingkhei napawa napung-eniya nane khalthutlaka, heirou kane yaya heinaksi lhoubomra thikulpinanungei lhou lhakpirou. 4Heitoubi kanekhi kai mane leiyei'mkhei kheenserrou shunchanara heirou Dunpuei tlouya shunthutnara kheen kaithutpirou.”

5Heirouri thimi nammane Paocha rapbei urbaangkur tloubom heirouei yanekur, heitounei ngamrou yane Stephen'le, uklumni bilthim heirou Lhawai Khyingne thimkur napawarap Philip, Prochorus, Nicanor, Timon, Parmenas, heitoubi Antioch'rei Jehudia holkur Gentile napawa Nicolas, ya nammaya khalthutkur. 6Yaithral heine Paocha rapnung pilhakbi heirou yane yaidoura hut khoupibi Dunpunung shunchapikur.

7Heisi toubi Dunpuei tlou heiri karyomne shunthutpikur. Heingammei Jerusalem'ra ruishik rapbei thimi mshing duine chunglhakur, heirou Suipipu rapkhi chungwane uklumbi wachangkur.

Stephenya Kman

8Dunpune phor pikur heirou toumanekhi bil-klei napawa Stephen'ne thimi rapbei maibongra thimi deine toumanemak kngakei lhou rapya tangni touwurkhou. 9Heiya Syrene'le Alexandria'rei Jehudia'rap, heirou tuyni lobi shok hoiyerna'rouwei malhetthutkur thimi rapbei ‘Freedmen’ toubi mu'kna Pucheemrei thimi rapne Silisia'rei heirou Asia'rei Jehudi raple shunkantlangrilbi Stephen'ya yanimakne thourilbi ngalnanungei wairangkur. 10Heiya ya hukhatnekhi Stephen'nung Lhawai Khyingei pikur shingkhei heile kalhonne ane tlou yunyeinungri yane aiyei tlouya louyeetchangmakur. 11Heitounei ngamrou yane thimirap thaya tuy pilhakurbi, “Ane Moses'le Dunpuya karhane tlou kyun heiri kane mayekthung,” toubine yaya tlou yunyerkur. 12Heisitoubi yane thimi rapya, upa rapya, heirou Tloulam marnopi pu rapya ukning thouplangbi malungkhayerkur. 13Heitoubi yane thimi tha unglhakbi aingamrou Yama-krung rapbei maibongra mandallei tlouya yunyerkur. Heirou yane kyun, “Napawa ane kaiyei Pukhrumna Cheemmei ngamrou, heitoubi Moses'yei Tloulamyei ngamroukhi karyomne karhayei tlouya yunbithil klei. 14Aiyei yunnarou kai mayekthungri, Nazareth'rei Jesu'ne Pukhrumna Cheem heiwaya thresundawurbi heirou Mosesrei yensundakur kai Jehudi rapbei youkna nammaya martlengyerrou toubine kyun!” 15Heirouri Yama-krungei bomra ombi klei thimirap nammane yaiyei mithril heiri Stephen'yatom thimanthrambi leiwurnarou, heirou aiyei mairung heiwari Thangringei mairungnakne albine leikurya yane mukur.

Currently Selected:

PAOCHA 6: MARIBSI

Highlight

Copy