PAOCHA 3

Hodeek Napawa Khatya Lhangaikyer

1Nungkhatnui, nunghang kanchaihil pungkhyum dalumnung, Peter'le John'ne shunchana trum hoinei ngamrou Pukhrumna Cheemra wachangkur. 2Heirou ‘Lhangaiyei Shumtrum’ toubi ungna bi heirou, aiyei chaan khatrek khoine hodeekbi leikur napawa napung khat louklei. Tlainiserrei Pukhrumna Cheemra wachang thimi raprei tuy bunanungei toubine aya shumtrum heirou wamathrumkhou. 3Ane Peter'le John yakhuntaei wachangya loumuthungnarouri, anungei koukhat pikhounanungei toubi ane yakhuntanung loubuthungkur. 4Heirouri yane aya thimanthramkur, heirou Peter'ne anungei shun, “Kakhuya heithilak!” 5Heisi tounarouri ane yaya, yairouwei koukhat pharou'nakrimne thimanthramkur. 6Heirou Peter'ne anung shun, “Keiri kou sina-lapa khatkhi yaomak, heiyanungkhi keiyei klei achaya keine neinungei pikhoulei: ‘Nazarethdei Jesu Christaei minra keine neiya kanthoubine karwaichananungei chay pilei!’” 7Heitoubi ane aiyei thyarei hutbangra churloubi taangkanthoupikur. Heirouri tallengne napawa heiyei ho heiyei ramid rapkhi mantranglhakur. 8Heitoubi ane mayungurbi heirou chunchabi karhilne karwaichakur. Heirou ane yalekou kalhonbi pulne Pukhrumna Cheemra wachangkur, heitoubi chunmalamchane karwaichabi Dunpuya mathangkur. 9Bi heirou ane karwaichabine Dunpunya mathangbi klei heiya thimi rapne mukur. 10Heirou a heiri Lhangaiyei Shumtrumra ombine bucha-bumaibi leikhou napawame toubi kanreni mukurrouri, anungei kouya thukkurawo toubi yane beimakne ngakkur.

Peter'ne Pukhrumna cheemwaira Lhangai Pao-laa shunthutpi

11Napawa heine Peter'le John yakhuntaya churphopbi heitoubi ‘Solomon'yei Dangkhupdak’ toubi mu'kna bi heirou heisi leiyeinung, thimi rapne ngakkurbi yaileinara yenchanlhak. 12Heirou Peter'ne thimi rapya loumunarouri ane yanungei loushun, “Keipalui-Israelrap, nari kouya tounei bi arou kaya kngakne thimanthrambi leikurawo? Naiyei ningchanarari, kaiyei toumane heiwane nimanung kane Dunpuei lhangra marthing thimirap hoinei ngamrou napawa heiya karwaicha maneyerkurame toubi marbuko? 13#Hoy 3.15. Abraham, Isaac heirou Jacobei Dunpu, kai nutar-patar rapbei Dunpune, Aiyei shik Jesunung khyingei thang'alya piwurneime. Heiya naneri Aya tlaipangei mane lhou'urpu rapbei hutra pilhakurbi, heirou Pilate'yei maibongrakhi nane Aya yapimakurbi, heiyakhi duinara Pilate'ne aya malhetthutnungei tlou dapikur hillou ramphane nane Aya yapimakkur. 14#Mt 27.15-23; Mk 15.6-14; Lk 23.13-23; Jn 19.12-15. A heiri Khying heirou tharmu chim thimi, heiwaya nane Aya yapimakkur, heinungchumri, nane Pilate'nung shunbine heitoubi naiyei kning hilthungne thimihat napawa heiyari malhetyernikur. 15Naneri khringei chaanra ruilhakpi thimi heiwaya hatkur, heiya Dunpune Ayari khirouwei ringthutyerkur- heirou asinung kari heiyei ngamrou tlou mayungpi thimirap hoilei. 16Ari Aiyei minnei ngamrou toumane heiwane hodeek napawa heiya mantrangyerkur. Naimitne muthungkur heirou naiyei kmu heirapri Aiyei minra uklumnei ngamrou toukurra; heirou awari na nammaei kmunakne, Aiyei minra uklumnei ngamrou aya lhangaiyerkur.

17“Heirou asinungri, keiyei teinaorap, keine mulei touri, nanekhi heirou naya ruipi thimi rapne Jesunungei touwurkhou heiso nane mumaknei ngammei touwurkhou. 18Ari Dunpune bongei youbine Thimkhui rapnung shunthutkhoupi touri Aiyei Messiah heine klah-mrim knang douheirou, heitounei ngamrou Ane heinakya chimni hungtlungyerkur. 19Heiyanungri, nane ukning hollurbine, heitoubi Dunpunung kalleklhaklak, heisi toulanungri Ane naiyei borhya kukpirou. Nane heisi toulanungri, 20Lhawaiyei mantrang heiri Dunpurei yongpina trum hungeirouhui, heirou Ane nanungei lamkriyei khalthutkur Jesu Christaya yenyilpirou. 21Dunpune bongei leikhou Thimkhui rapnung shunthutkhou heinakne, Ane put namyerwaya ran hoiyerchibongyen Thangmunra leiheirou. 22#Khn 18.15-18. Ngamri Moses'ne yunkhou, ‘Naiyei Pu Dunpune, Ane keiya yenmalhetpikur heinakne, nanungei Thimkhui khat yenmalhetpirou, heirou akhi nai thimi khat hoirou. Ane naya touyernanungei shunpikur namyerwa heiya nane chanthungrou da. 23#Khn 18.19; Lev 23.29. Huhune Thimkhui heiwayei shunya chanthungmak thimi heiyari Dunpuei thimi rapbei hangrouwei khaithutdurou, heitoubi aya mangyerrou.’ 24Samuel'nekhi heirou aihillei hungthuk thimkhuirap nammanekhi heinaksi paolaaya shunthutdei kheenrou angtu chaanyei thukbi klei lhourap namyerwa heikhi shunthutbi muyerkhou. 25#Kan 22.18. Dunpuei thimkhui rapnung tlou kantompikhou heiri nanungeime, heirou nai nutar-patar rapnung mardingkhoupi tloubom heirou nanekhi yerrillou. Ane Abraham'nung yunkhoupinakne, ‘Naiyei yu-cha rapbei ngamrou, Keine tlaipangpallei thimirap nammanung phor pirou.’ 26Heitounei Dunpune Aiyei shik heiwaya khalthutbi heirou lamkrine Aya nanungei yenmalhetpikur, heirou Ane thimi napung kantangya, ai'aiyei borhrei lam'rouwei kallekthutyerbi phor pinanungei toume.”

Currently Selected:

PAOCHA 3: MARIBSI

Highlight

Copy