PAOCHA 2

Lhawai Khying Kyong

1 # Lev 23.15-21; Khn 16.9-11. Pentecost'yei tlaini#2.1: Pentecost: Jesu'ne Thangmunra kanthumbangkur hillei Tlaini somnga tlungnerou Lhawai Khying yongpi. hungtlungkur heirouri, uklum thimi nammane bi khatra pulne lokpa kartilkur. 2Heirouri tallengne nungthourei lhimnungei hounakne katfyoubi, heirou yai kartilbi leina cheemwai heiwari houni bil thimkur. 3Heirouri meithlan kmal maleini kanchekchabi heitoubi thimi napung kantangya yenthirkur yane loukmu. 4Heirouri ya namyerwa heiri Lhawai Khyingne thimwurbi heirou Lhawaine yaya yunyerkur hilthungne yane tlou limlim yun'manekur.

5Heirou tlaipang khobung kantangrei klei limlimyei thimi kounak, heirou Jehudia tharmura lhuk thimirap kounak rapkhi Jerusalem'ra kartilbine louklei. 6Heirou yane hou heiwaya mayeknarouri, thimi chungne kartilkur. Ya nammane beimakne ngakkur, ngamri uklum thimi napung kantangne yaiyaiyei tloura kallangrilbi leikur heiya yane mayekkur. 7Yane khatle khat kngakne yunkril, “Atoubi yunrilkur thimirap heiri Galilee'rei nimakeiko? 8Heiyanungri, kanekhi yai yunkril heiwaya kaikaiyei tloura mayekkur awari koutouneiwo? 9Kari Parthia, Media heirou Elamrei; Mesopotamia, Judea heirou Cappadocia, Pontus heirou Asia'rei. 10Phrygiya heirou Pamphylia, Egyptrei heirou Syrene pongrei klei Libya khokul raprei klei thimi rapme, heirou ka thaneri Rome'rei. 11Heirou Jehudia raple Gentile rapkhi, heirou Crete ramle Arabia'rei thimirap hoiyanungkhi, ka nammane Dunpuei touthutkur lhoutang heiyei ngamrou yaiyaiyei tloune yunkril heiwaya mayekphalei!” 12Heirou yane bisokhi naimakne khatle khat ngaikril, “Awaya kouya mu'knawo?” 13Heiya thimidei thaneri uklum thimi rapya laonabi, “Ya namma heiri tul malipburchiyame!”

Peter'ne Lhangai Pao-laa Sunthutpi

14Heirouri Peter'ne paocha thimidei napung chiple khatle kalhonne mayungbi heirou ane kartilbi klei thimichung heinungei hou choune kyun, “Jehudia paluirap heirou Jerusalem'rei klei thimirap na nammane keiyei kyunya louningpilak, heirou keine lhouthuk ari kouweiyo touri nanungei yunpiyeise. 15Nane thimi rapya tul malipkur marbuni ningchakur heiri nimakme; asinungri ningshun pungtako dalumhui, heine koutoubi yane tul maliprou? 16Heinung'tlimri Thimkhui Joelni yunkhou heiri anakei ngamyame: 17‘Luiniyei tlainirou keiyei tourou kyou lhouri arime’ toubi Dunpune yunlei; Keine thimi kantangnung Keiyei Lhawai shungsundapirou. Naiyei chanapawarap heirou chanapuiya rapne Keiyei paolaaya shunthutdeirou; nai douwa rapne kar'anbi mitmai warrou, heitoubi nai tara rulni rmong manrou. 18Moi, heiyei tlainirap heirouri Keiyei shik rapnung, napawa-napuiya lhuimakne, Keine yaidoura Keiyei Lhawaiya shungsundapirou, heitoubi yane Keiyei paolaaya shunthutrou. 19Keine nungthoura mini toumanemak lhou rapya touthutrou, heirou tlaipangra kngakei lhou rapkhi muyerpirou. Bi heirou hee darillou, meikhi kangrou, heirou meikhu karhukrou; 20heirouri kinnikhi katmehrou, heitoubi tanglakhi hee'nakne mraorou, lhourap heiri Dunpuei tangdui thang'alle houklumei tlaini hungbongnung thukkeirou. 21#Jol 2.28-32. Heirouri hukounak khatne trungpinanungei Dunpuya unglanungri kalpirou.”

22“Israellei palui-teinaorap, kyun tlourap aya louningpilak! Nazareth'rei Jesu heiri naihangra Aiyei ngamrou khyingei mane-mantrangne, mini touchangmak lhouni heirou kngakei lhou rapne mutpikur thimi heirime. Nanekhi lhourap heiya kmu, ngamri lhourap namma heiri naihangra thukbine leiyura. 23#Mt 27.35; Mk 15.24; Lk 23.33; Jn 19.18. Aitamei kning hilthungne Dunpune yapiwurbi touri Jesu'ya naihutra pilhakurbi, heirou nane Aya borh thimi rapya hillhakbi manyarhatyerkur. 24#Mt 28.5-6; Mk 16.6; Lk 24.5. Heiya Dunpune Ayari khirouwei ringthutyerwurbi, khiyei mantrangrei malhetthutpikur, ngamri khiyei mantrangne Aya kul chalphopchangmak. 25Kouweiyo toulanungri David'ne Aiyei ngamrou atoubi yunthutkhou: ‘Keine Dunpuya keiyei maibongra karyomne mubine klei; Ari keipongra klei, heitounei keiri kouniroukhi ukningra klah'toukhi leikhoumak. 26Heitounei ngamrou keiyei lhawaira nungkngaini thimmura, heirou keiyei tloulhanng rapkhi hakraowei tloudiklei. Heirou keiyei sharung ane trimkurya hoiyanungkhi, keiyei ukningne trim naimakei malungam leilei; 27ngamri Nangne keiyei lhawai aya khiya ramra malhetlhakmarou; ngamri Neiyei malungamkna shok heiyari lhanrilla chulyermarou. 28#Laa 16.8-11. Nangne keinungei khringei lamya mutpiwurla, Neiyei kalhonpi heine keiya nungkngaini bil thimyerrou.’

29“Keiyei teinaorap, keine nanungei khulbung karsilkhou kai patar Krung David'yei ngamrou khminni yunpiyeise. Ari hiwurbi Aya phumkur, heine Aiyei lhan heiri angtu ramphane kaipongra leileihui. 30#Laa 132.11; 2 Sa 7.12-13. A heiri thimkhui khatkhi hoikhou; heitounei ngamrou Ane, Dunpune Anungei kouya kantomkhoupiyo touri kmu: Dunpune mardingpikhou touri David'ne Krung hoikhounakne, Ane David'yei yu-cha rapbei hangrouwei khatya Krung hoiyerheirou. 31#Laa 16.10. Dunpune hillou kouya touheirouwo touri David'ne kmu, heitounei ngamrou aiyei shunthutnara Messiah'yei#2.31: Messiah: Kalpipu Christa. ringthutnei ngamrou ane atoubi yunkhou, ‘Ayari khiya ramra lakkhoumak; Aiyei sharung heikhi lhanrilra chulyermak.’ 32Dunpune Jesu A'hakya khirouwei ringthutyerpi, heirou ka namma ari heiyei ngamnung'tlim mitne muthungbi tlou mayungpi#2.32: tlou mayung: Shakhi. thimirap hoilei. 33Ayari Aiyei Pawa Dunpuei thya lhangra ringbangyerbi, heirou Aiyei kantompikur Lhawai Khying heiya Airouwei phayerwurla. Asiyei kheenrou naiyei muphakur heirou mayekkur heirapri Ane kaidoura shungsundapikur Lhawaiyei hutthul heirime. 34Kouweiyo toulanungri David'ri kheen heinungri Thangmunra kamak, heinungchumri ane atoubi yunkhou, ‘Dunpune keiyei Punung shunkhou, 35#Laa 110.1. Neiya karhouril thimi rapya Keine Neiyei ho makhana hoiyerbongyen Keiyei thya lhangra lou'omriya.’ 36Heiyanungri Israelyei thimirap, na namyerwane mubom thuklei touri, nane heeng karbakra manyarbi hatkur Jesu heiyari Dunpune Kalpipu heirou Messiah hoiyerwurla!”

37Thimi rapne heitoubi kyunya mayeknarouri, yai ukningra beimakne lahwura, heirou Peter'le paocha thimirap deinungei yane kyun, “Kai teinaowa rapbo, heiyanungri kari kou touserouwo?” 38Heirou Peter'ne yanungei loushun, “Na thimi napung kantangne ai'aiyei borh'rouwei ukning hungurbine heirou Jesu Christaei minra nane yui luplanungri, naiyei borhya kukpirou; heitoubi nane Dunpuei hutthul Lhawai Khyingya pharou. 39#Isa 57.19; Jol 2.32. Kouweiyo toulanungri Dunpuei tlou kantomkhoupi heiri nanungei heirou naiyei chanao rapnungei marshikkhoupi, heitoubi tlatnarei klei thimi rapnungkhi- heirou kaiyei upa Dunpune Anungei unglhakpikur thimirap nammanungkhi hoiyerrou.” 40Heirou Peter'ne yanungei deidei tloukhi chungwane yunpibi asitoubi shunchakur, “Yanaksi lhangaimak thimi rapbei doura hungbi klei tanti heirouwei nane kartleinanung toulaklo!” 41Thimi chungwane aiyei lhangai paolaaya mayekbi uklumkur, heitoubi yui lupkur, heiyei tlainirou uklumkur thimi rapbei rulla thimi lishing khyumyeimal chungne katduilhakur. 42Yane yaiyei rongchanrap heiri Paocha thimi raprouwei marnobi, heitoubi yane khatle khat pulne kartilbi, heitoubi kantlangne chaamai'malnabi, heirou khatle khat shuncha malnabi leikur.

Uklum Thimi Rapbei Rongchan

43Paocha thimi rapbei ngamrou thimine toumanemak lhourap heirou kngakei lhou rapkhi kounakchungne touwurkhounei ngamrou thimi rapbei ukningra chi'kanchunni leirilkur. 44#Pao 4.32-35. Uklum thimirap nammane lokpane kartilbithil leikur, heitoubi yane yaiyaiyei klei putchei namma khatle-khat yerrilbi trungpirilkur. 45Yane yai'yaiyei putcheirap heirou yekul rapkhi yorwurbine, heitoubi tuy heiri yaihangrei kanring-kanwai thimi rapnung yerpikur. 46Tlainiserrei yane Pukhrumna Cheemra kartilbine murilkur, heirou yane yaiyaiyei cheem-cheemra chamainung murchak marshikbine, khatle khat ukning khyingle kalhonne chaamai'malnakur. 47Heitoubi yane hakraole kalhonne Dunpuya mathangbi, khatle khat haraomalnabi leikur. Heitounei ngamrou kalpi phakur thimi rapya yaihangra tlainiserrei Dunpune chungduiyerkur.

Currently Selected:

PAOCHA 2: MARIBSI

Highlight

Copy