PAOCHA 4

Peter'le John Yakhune Yama-krungei Maibongra Myungkur.

1Peter'le John yakhuntane thimi rapnung heisi shunmatubi louleiyeinung, Suipi purap thale, Pukhrumna cheem kngaak upale heirou Sadducee rapkhi yaileinara wa'tlungkur. 2Heirouri yai ukningra beimakne malungkhanikur, ngamri paocha thimi ya napung-khni heine Jesu'ne khirouwei ringthutkur, heitoubi heiyei ngamni khi thimi rapkhi khringchaan phananungei ringthuroume toubi loumarnopikur. 3Heitounei ngamrou yane ya napung-khniya manbi, heithangei tlainirou kulrilla chalphopkur. 4Heiya lhangaiyei paolaaya mayekloukur thimirap kounak chungne uklumkur; heirouri thimishing heiri napawa'thilkhi lishing phanga ka'tlungkur.

5Heithangei tlainirou Jehudi rapbei ruipipu raple, upa raple heirou Tloulam marnopi pu rapne pulne Jerusalem'ra lokpane kartilbi, 6heitoubi yane Suipipu Annas'le, Caiaphas, John, Alexander heirou Suipipuyei cheemkhurrei thimirap deiyakhi murilkur. 7Heitoubi yane Paocha thimi rapya yai maibongra mayungyerbi heirou yanungei tlou kngai, “Heinaksi lhouya nane kousitoubi toukurro? Kounaksi mantrangya nane phakurro nimanung nane huiminya yrengchawo?”

8Heirou Peter'ne Lhawai Khyingne thimmurbi, heirou ane yanung loumallangkur, “Thimi rapya ruipi purap heirou uparap, 9nane angtu hodeek napawa heiwanungei kane lhangai lhou toupiwurbi aya raiyerwurnei ngamrou kanungei tlou kngai hoiyanungri, 10na nammane mubom thuklei, heirou Israel thimirap nammakhi mubom thuklei touri nai maibongra mayungbi klei napawa ari Nazareth'rei Jesu Christa- nane manyarhatkur heirou Dunpune khirouwei ringthutyerkur heiwayei minra mantrangne thimbi leilei. 11#Laa 118.22. Heirou Jesuei ngamrou Khyingei lailikni atoubi yunpikhou leilei, heiri: ‘Cheemsa thimirap nane holthutdurkhou thlung heiwari nam'rouwei lilkhoi thlung khat hoiyura.’ 12Ralthutpina bom heiri Airouweitom pharou, tlaipangpal arou kaya kalpinanungei Dunpune thimidei huiyei minrakhi mantrang pikhoumak.”

13Yama-Krung rapne Peter'le John yakhune yai maibongra krakne mayungbi leikurya, heirou yari koukhi lailik heimak thimi rapme toubi munarouri beimakne ngakur. Heirouri yakhunta heikhi Jesukou pulne leimalnakhou thimi rapme toubi ningmukur. 14Heiya heiyei tlainirouri yane koutlou khatkhi yunchangmakur, ngamri yane hodeekya raiyerpikur napawa heiri Peter'le Johnyei pongra mayungbi klei heiri yanekhi kmu. 15Heisitounei yane yakhuntaya Yama-Krungei omna cheem bomtho heirouwei wathukkurnanung shunbine, heitoubi yadikni tlou kartongrilkur. 16“Kane ya napung-khni heiya kousi touserouwo?” toubi ngaikril. “Jerusalem'rei klei thimi napung kantangne, thimi deine touchangmak lhou rapya yane touthutkur heiwaya muwurchila, heirou kanekhi heirapya yamakri manemaklei. 17Heiya heinaksi lhou rapya thimi rapnung duine mutyermaknanungei, heirou hanui kallengne Jesuei minra heinaksiya thimi hukhatnungkhi shunpinung yamakrou toubi thimi rapya chinanungei tlousher pilakase,” toubi darilkur.

18Heitounei yane yakhuntaya hanui unglhakbi, thimi hukhatnungkhi Jesuei minra koukhatkhi shunpinungei yamakrou, heitoubi marnopinungkhi yamakrou toubi tlousher pikur. 19Heiya Peter'le John'ne yanung loumallangkur, “Naitamni yuk'khalthilak - Dunpuei maibongra kouni chimrou - naiyei kyunya hil chanthungserouwo, nimanung Dunpuei shunya hilthungserou? 20Ngamri kaiyei mukur heirou mayeklhakur heirapya yunthutpimakne dongchangmak.” 21Heitounei Yama-Krung rapne yaya duine chinanungei tlou kalne tlousherwurbi heitoubi malhetkur. Heirou yanekhi kmu touri kouniroukhi yayari tanti pichangmakrou, ngamri thukkur lhou heinung'tlim thimi namyerwane Dunpuya mathangkur. 22Kngakei lhou khoine kna raikur napawa heiwari kheen heinung ai'mshaei kum somli tlungura.

Uklum Thimi Rapne Krakne Leinanungei Shunchapi

23Heirou Peter'le John yakhuntaya malhetthutkur hillouri, yane khrangni yenkallengbi heirou Suipipu raple upa rapne yanungei kouya kyunno toubi yai thimi rapnung pao hungtamkur. 24#Hoy 20.11; Neh 9.6; Laa 146.6. Uklum thimi rapne pao heiya loumayeknarou, ya namma lokpane kartilbi Dunpunung shunchakur: “Thangmun, Tlaipang heirou Samadru'ya heirou heiyei rilla ringbi klei chiwirap namyerwaya sheempi-sapi Pu! 25Nangne Lhawai Khyingei ngamrou Neiyei shik, kai patar David'nung shunthutkhoupi heiwaya ane atoubi yunkhoulei: ‘Kousiyabi Gentile rapne heinak thuithikurro; thimi rapne koutounei heinakei karsukmak lhou rapya theibaangnanungei wairangkurrawo? 26#Laa 2.1-2. Tlaipangpallei Krung rapne yaitamtom wairangbi, heirou lhou'urpu rapne pulne kartilbi Pu heirou Messiah heiya karhourilnei lhouya toubine leilei.’ 27#Mt 27.1-2; Mk 15.1; Lk 23.1-7,11; Jn 18.28-29. Ngamri Herodle Pontius Pilate'ne murilbi, yane krungkul arou Gentile raple Israellei thimi rapya markhulbi, heirou Neiyei Messiah hoiyerkur, Neiyei khying Shik Jesuya yanimakne kartilkur. 28Heitoubi Neiyei mane heirou Neiyei kningei hilthungne hungthukyerrou kyou lhourap namma heiya tounanungei yane bi arou kartilkur. 29Heirou asinungri, Dunpu, yane kaya chinanungei lhou toupikur heiwaya mupilak, heitoubi Neiyei shikrap kaya yapibi, Neiyei Pao-laaya krakne shunthutyerpilak. 30Kna thimiya raiyernanungei Neiyei hut malamthutpilak, heirou Neiyei Shik Jesuei minra kngakei lhou rapya heirou mideine toumanemak lhou rapya toumaneyerpilak,” toubi shunchabine mathangkur.

31Heirou yane shuncha luilhakur heirouri, yai kartilna bi heiwari kanthingkur. Heitoubi ya namyerwa heiri Lhawai Khyingne thimmurbi, heirou Dunpuei Pao-laaya krakne shunthutpi waiyoukur.

Uklum Thimi Rapni Yaiyaiyei Klei Namyerwa Khatle Khat Yerrilkur.

32 # Pao 2.44-45. Uklum thimi rul khatne yai lhawaikhi heirou ukningkhi khatsi khoine leikur. Heirou ya hukhatnekhi ai'aiyei klei putchei rapya minung-minungei toukhi naimakne, yane khatle khat yerrilkur. 33Paocha thimi rapne krakne mantrang kyaone Pu Jesuei ringthutnei ngamrou tlou mayungpi thimirap hoikur. Heirou Dunpune ya namyerwaei doura kwat naimak phorya shungsundapikur. 34Heitoubi yaihang heirouri thimi hukhatkhi kwatsam toukhi naimakne leikur. Huhune lou-yekul klei thimi rapne, nimanung cheem-kei klei thimi rapne heirapya yorwurbine, heitoubi yai phakur tuyrap heiri pulne heimartilkur. 35Heitoubi tuyrap heiya paocha thimi rapbei hutra heipilhakkur; heitoubi tuy heiri ya thimi napung kantangnung ai'aiyei changbom thuk hilthungne yerrilkur.

36Heisi tounarouri, Syprusrei klei Lev bommairei pukbine, paocha thimi rapne Barnabas#4.36: Barnabas: Miyei ukningya thoubaangpi thimi touya mu'kna. toubi ung Joseph'nekhi, 37aiyei yekul khat yorwurbine, heitoubi tuy heiri paocha thimi rapbei hutra heipilhakur.

Currently Selected:

PAOCHA 4: MARIBSI

Highlight

Copy