PAOCHA 19

Paul'ne Yuiluppi John'yei Ruishik Rapya Ephesus'ra Murilkur

1Apollos'ne Corinth'ra louleiyeinung, Paul'ne khobungei khalu-lhangra yenchaheibi Ephesus'ra wa'tlungkur. Bi heirou ane ruishikrap tha murilkur, 2#1 Sa 3.7. heirou ane yanungei kngai, “Nane uklum thimirap hoikur heirouweiri Lhawai Khyingya phayerlako?”

“Kari Lhawai Khying klei touri mayekkhi mayekmakhui,” toubi yane loumallangkur.

3“Heiyanungri lhangaiya, nane kounaksi yui klupya louwurla?” toubi Paul'ne yanungei ngaithithu.

“Kane Johnyei yui klup heiwaya phawurla,” toubi yane loukyun.

4 # Mt 3.11; Mk 1.4,7-8; Lk 3.4,16; Jn 1.26-27. Heirou Paul'ne yanung shun, “John'yei yui luppikur heiwari borh'rouwei ukning hungkur thimi rapnungtom khoime: heirou ane Israellei thimi rapnung, heirou aihilla hungrou kyou Pu touri-Jesuya uklumnanungei yunthutkhoupi.”

5Heirou yane kyun heiya mayekbine Pu Jesuei minra yui lupkur. 6#Pao 2.4. Heirou Paul'ne yaidoura aihut khangbaangpikur heirouri yaidoura Lhawai Khying yongpikur, heirouri thimi deine yunchangmak tlou limlimkhi yane yunmanekur. 7Bi heirou thimi napung chiple khnibil loukyao.

8 # Pao 17.2; 18.4; 1.3; 28.23. Paul'ne bi heirou tangla tlun'khyum leikhouweinung ane Pukhrumna cheemra changbi krakne yunbine thimi rapnung shunmatupikur. Heirou yakou tlou yunrilbi, Dunpuei Krungramei ngamrou yanungkhi shunmatupibi lhangaine mulhakyernanungei toukur. 9#Pao 9.2; 19.23; 22.4; 24.14. Heiya yaihangrei thimi thaneri napal tangnei ngamrou aiyei kyun heiwaya malungampimak, heirou yane thimi rapbei maibongra Puwei khring chaan lamyei ngamrou beimakne yunborhkur. Heitounei ngamrou Paul'ne uklum thimi rapya ruilouheibi yayari lakurkhou, heitoubi tlainiser ane kartukna cheemtang Tyrannius toubi ung bi heirou wachangbi thimi rapkou neirilmalomni shunmatupikur. 10Heisitoubi kum-khni rekpa leikhoubi shunmatupinarou, Asia'yei khokulrei klei thimi'rap nammane, Jehudiarap, heirou Gentile'rap lhuimakne Dunpuei tlouya mayekphakur.

Scevayei Chanapawarap

11 # Mk 16.20. Dunpune Paul'yei ngamni bongei louyounamak miyei touchangmak kngakei lhourap kounakyakhi touwurkhou. 12#Pao 5.15. Ane yrengchabi klei phirul-phishamb nimanung hutrutna puntumchayakhi kna thimi rapnung urlouheibi pilanungkhi yai kna rapya hulthutkur mane, heirou lhangaimak lhawai rapkhi yairouwei trukthutkur. 13Yenkuichabi lhangaimak lhawai rapya yenhulthutkhei Jehudia'rap thanekhi Pu Jesuei minya yrengchabi heinaksi lhou rapya tounanungei yane martamchakhou. Heitoubi yane lhangaimak lhawai rapnung, “Keine Paullei shunthutbi klei Jesuei minra neiya chay pilei,” toubine shun. 14Jehudia rapbei Suipipu Upawa Scevayei chanapawa'rap teinao napung eninekhi heinaksi lhouya martamchakhou.

15Heiya lhangaimak lhawaine yanungei kyun, “Keine Jesuya mulei, heirou keine Paul'yei ngamroukhi mulei; heiya nari huwo?”

16Heirouri lhangaimak lhawaine tungkur napawa heine yaidoura chunmarapbi yaya manewurbi klah dayerkur. Heirouri yai sharungra msei knaini hemkur, heitoubi yai phirul-phishamb rapkhi cheetdurchibi aicheemrei trukthutkur. 17#Lk 1.65; 7.16. Ephesia'rei klei Jehudia'rap heirou Gentile'rap nammanekhi pao heiya mayeknarouri beimakne chirilkur; heirou Pu Jesuei minya chouduine rikrai khrumrilkur. 18#Mt 3.6. Uklum thimirap chungne wakar'umbi, khulbung kulyomyei maibongra yai toukur lhourap nammaya sherthutpikur. 19Thui sherbine thimi rapbei maibongra kngakei lhou toukhou thimirap nammanekhi yaiyei lailik rapya urthutbine khulbungei maibongra meira hongkur. Heirou lailik rapbei man heiwaya yane tuy khoine teklanungri lapa lishing somngayeimal ka'tlung. 20#Pao 6.7; 12.24; Rom 16.23; Col 4.10. Heisitoubi Dunpuei tlou heiri heinakei mantrang lamra shunthutdurbi tangdui-chouduiyerkur.

Ephesus'ra Kngaal Thukrilkur

21Lhouthukrap heiyei hillouri Paul'ne Macedonia'le Achaia ramra yenraalbi heirou Jerusalem'ra kallengnanungei aiyei ukningra ningchabi, “Keine heiyei bi rapra changkhoubi, heitoubi Rome rakhi wabi thirou dalei,” toubi ane kyun. 22Heisitoubi ane aya trungpi thimirap Timothy'le Erastus ya napung-khniya Macedonia'ra heimalhetdurbi heirou ane Asia'yei khokulra kheen bei tlane leiwurkhou.

23 # Col 1.8; Pao 9.2. Kheen heirouri Ephesia'ra Dunpuei lammei ngamrou beimakne rkalrilbi hou lungkur. 24Heiyei kheenrou Demetrius toubi ung sina sa napawa khatne aiyei lapayei thirni Artemis thraishang khat sabaangbi, heirou aiyei lhou heine lhouchur thimi rapnungkhi beimak tungcha hoiyerkhou. 25Heisitoubi ane ya namyakhi heirou yai lhou naksi churbi klei thimi dei rapyakhi lokpane ungkartilbi yanungei shun, “Keiyei palui teinaorap, na nammane kmu touri kaiyei tungchana'nungei lhouri anaksi lhoutomngei. 26#Isa 44.10-20. Heine asinungri kai palui Paul'yei kyun tlourap heiri nane mukhi muwurla heirou mayekkhi mayekkurla.” Aneri “Thimiyei hutni sheemthutkur thrairap heiri thrai nimakme” toubi yunthulei, “heirou ane heinakya yunpibi Ephesia'yei ramrale Asia'yei ramrakhi karyou khlangni thimi rapya manelbi manewurla. 27Heiya hoiyanungri kaiyei lhoubom arouri koukhatkhi karsukmakne dongurbi, kai minkhi thuithinanungei bomkhi hoiyura. Heithilkhi nimakne kaiyei Artemis'yei thraishang heikhi koukhi karsukmarou. Heirou Asia'ra heirou tlaipangpal karyoune thimi rapne khrumbi klei thrai heiyei thang'alkhi maangurouwa!”

28Heisitoubi thimi rapne tlourap heiya mayeknarouri yane meithukne malungkhakur, heirou ungraochane yunyoukur, “Ephesia'rei Artemis heiri nam'rouwei tangdui thrai!” 29Ungraochanei hou heiwane khukarthil karyoune lungkur. Heirouri hou lungyerkur thimi rapne Paulkou kalhonne chakhou thimirap touri Macedonia'rei Gaiusle heirou Aristarchus yakhuntaya manbi heitoubi pichar touna cheemtang'ranung yenruiheikur. 30Heirouri Paul ai'mshane thimichung kulyomyei maibongra lamkrine tladuibine loucha'kni, heiya uklum thimi rapne ayari louchayernimak. 31Heirouri khokul rapbei aiyei paluirap lhou'urpu upa rapnekhi aya pichar touna cheemra changmakna'nungei pao manthunbine aya buchakur. 32Kheen heirouri kartil heiwari lepcharou beimakne hou lungkur: thimirap thane kouweikhat yunbine ungraokur, heitoubi dei thaneri kounak khat yunbi ungraochakur, ngamri yaihangrei thimi chungwane yaiyei kartukkur heiri kouwei ngameiyo toukhi mumakne yaothungkur. 33#2 Tm 4.14; Pao 12.17. Heirou ya thane asitoubi kyun, touri lhoubom ari Alexander'ne mubom thukrou, ngamri Jehudi rapne aya maibongra louchabi ruichingna'nungei hilthutkur. Heisi tounarou Alexander'ne aihut tlangbine thimi rapya hou lungmakna'nungei shun, heirou ane thimi rapbei hou lungkur heiya toudongnanung toubi tlou kyun. 34Heiya yane akhi Jehudi thimi khatme toubi muwurnarouri, ya nammane pung'khniyei'mal ungraochabi, “Ephesia'rei Artemis'ne nam'rouwei tangdui thrai!” toubi yunbine leikur.

35Heiya hilluirouri khukarthillei maye thimi heiwane thimi rapya hou klung heiya toudongurbi heirou ane kyun, “Keiyei palui Ephesia'rap! Thimi napung kantangnekhi kmu touri Ephesus'yei khukarthil heiri tangdui Artemis'yei thrai'cheem phunkhouna bi khatme heirou nungthourei yongdapi khyingei thlungkhi bunkhouna bi khat hoilei. 36Tloubomrap heiri hukhatnekhi yamak manemakur. Heiyanungri nane tloubom heiya yanimaknei naitam rikrai mumakne phingbi leikur heiri hou lungmakne leirou dalei. 37Nane kaiyei thraishangrei koukhatkhi muchamak, heirou kai thraiyei ngamrou koukhatkhi karhayei tloukhi yunpimak thimi rapya bi arou heiurlhakurla. 38Heini huhune Demetrius'le heirou aiyei lhou churmalkna thimi rapbei urbaangkur tloubom heiri nainaiyei doura dakur yaowanungri, lhou'ur thimirap kane picharbom laatbi khoulei, tlou yunpi yarou. 39Heiya duinarakhi nane deideiyei ngamroukhi yunkni leiyanungri, khulpam kartuknara luirilnanungei tourou. 40Ngamri koukhi ngam makkei tlouthuk awiyei ngamrou angtu kane khingbaangrilbi yunrillanungri, kaidoura lah'kna hoirou, heitoubi lhoubom akou mrie leirilmakne pangei kartuknei ngamrou kane tlou luilhakpi manemakrou.” 41Heisitoubi ane yunthutpibi, thimichung kartuk heiwaya karkhaiyerbi shaalkur.

Currently Selected:

PAOCHA 19: MARIBSI

Highlight

Copy