PAOCHA 20

Macedonia'le Achaia'ranung Chakur

1 # 1 Tm 1.3. Thimi rapbei houklung luikur hillouri Paul'ne uklum thimi rapya lokpane ungkartilkur, heitoubi ane yanungei ukning thoubaangpinei tlou rapya yunkhoupile kalhonne karkhainei tloukhi shaamkhoupi. Heitoubi ane yaya lakkurkhoubi Macedonia'ranung chakur. 2Heitoubi ane khokulrap heirou karyoune karwaichabine thimi rapya lhangaiyei paolaa kounakle kalhonne shunthutpibi ukning thoubaangpikur. Heitoubi ane Achaia'ra#20.2: Greece. yukur. 3#2 Co 11.26. Heitoubi ane ram heirou tangla tlun-khyum leiwurkhou. Ram heirou klei Jehudi rapne aya yanimakurame touri ane muwurla, heirouri ane Syria'ra kallengurthunung marshikkur, heitoubi ane Macedonia'yei ram'lhangra raalbi yenshalnanungei ningchakur. 4#Pao 19.29; 16.1; Eph 6.21; 2 Tm 4.20. Beroea'rei Pyrrhus'yei chanapawa Sopater'khi heirou Thessalonica'rei Aristarchus'le Secundus'khi; Derbe'rei Gaiuskhi, heirou Asia lhangrei Tychicus'le Trophimus, heirou Timothy'khi akou kalhonbine shaalkur. 5#2 Tm 4.13. Yane maibongra loulamrikur heitoubi Troas'ra kaya ngaakbine louleikur. 6#Hoy 12.14,15; 2 Tm 4.13. Heitoubi kane phri yaomak mumtollei Kneitlun tlainiyei hillou Philippi'rouwei mali tungbine shaalkur, heitoubi tlaini phanganiyei hillou yaya Troas'ra wamurilkur, heitoubi bi heirou kane hapta khat leiwurkhou.

Paul'ne Hillou Troas'ranung Wakur

7 # 1 Co 16.2; Pao 2.42,46; 20.11. Mathrilniyei rawainung kane pulne chamaina'nungei kartilkur. Heirou thangei tlainirouri shaalkarkhairou younei ngamrou Paul'ne thimi rapnung masa yantrim phane tlou yunpikur. 8Kai kartilna cheem dourei bomthora shirek meisharkhi chungne manshokbi waaryerkur. 9Heirou Eutychus toubi ung kartlang douwa khatne khamput pongra ombine heiklei, heirou Paul'ne tlou yunbi leiyeinung Eutychus'ri ipkni kanshaichabi heileinarou, hillouri ane lhangaine iplhakurbi mayekthungmakne cheem dourei khyumtam'tlung shangkai'rouwei thleira yendakur. Heirouri yane yongchumbi aya khulkanthouwei kaalnungri louhiyura. 10#Mt 9.23,24. Heiya Paul'ne thleira yongchumbi heirou ane kunlhakbi kna heiya pomkanthoubi kyun, “Na koukhi lhawai lahbi houlungurmak, kartlang douwa ari ringleihui!” 11Heirouri ane shangkairei bomthora hanui kallengbaangurbi mumtol threlchaalbi yane shaimalnakur. Ane yakou ningshun kinni kathuk phane tlou yunrilkhoubi, Paul'ne shaalkur. 12Yane kartlang douwa heiyei kna lhangaiyerbine heirou beimakne malungkhrahne cheemra'nungei ruilouheibi shaalkur.

Troas'rouweine Miletus'ranung Yukur

13Kane malira loulamriwurbi heirou Assos'ranung louchakur, heitoubi kane Paullei shunmatupikur hilthungne, bi heirou aya louropikur, ngamri ari holamra chawurbi bi heirou kakou rorilkur. 14Heisitoubi kane aya Assos'ra murilbi heirou kane aya malira lhaklouheibi Mitylene'ranung chakur. 15Kane bi heirouweine mali tunglouheibi thangei tlainirou Chios'ra yu'tlungkur. Heitoubi nungkhatnuiyei hillou kane Samos'ra yu'tlungurbi heirou thangei tlainirouri Melitus'ra wa'tlungkur. 16Paul'neri mali heiri Ephesus kraalne tunglouheibi, Asia'yei khokulra tlane leikhoumakne shaallurnanung ningchakhou. Heisitoubi ane maneleiyenri Pentecost'yei tlainirou Jerusalem'ra hungtlungna'nungei toubi beimakne khnotne hungkur.

Paul'ne Ephesia'yei upa Rapnung Karkhainei Tlou Yunkhou

17Melitus'rouweine Paul'ne pao malhetdurbi Ephesia Churchyei upa rapnung aya murilna'nungei buchakur. 18#Pao 18.19; 19.1,10; 20.4,16. Heirou upa rapne aiyei leinara wa'tlungnarou ane yanungei loushun, “Keine Asia'yei khokul arou wa'tlungtirrei tlainiyei waiyoubine angtu ramphane kheenserou nakou leimalnakur ari nane kmu. 19Keine ukning marnimle heirou mityui dakurle kalhonne Puwei shik khat khoine, keidoura Jehudia rapne changh thinanungei marhotkur kheenroukhi keiyei lhouya keine toukhoula. 20Nane kmu touri keine heinakyei kheenroukhi tekkhi hil kallengkur toumakne, yaya trungpina'nungei toubine lhangai Pao-laaya shunthutbi, khulpam maibongrakhi heirou naiyei cheem cheemrakhi nanungei shunmatupikhoula. 21#Mk 1.15. Jehudia rapnung heirou Gentile rapnungkhi khatsi khoine, yaya yaiyei borh lhourouwei kallengthutbine Dunpunung changbi, heirou Pu Jesuya uklumna'nungei keine chay piwurkhou. 22#Pao 19.21. Heirou asinungri keine Lhawai Khyingei kyun hilchanthung khoine Jerusalem'ra yongrouwa, heiya bi heirou keinungei kouthukleiyo toukhi mumakhui. 23#Pao 21.4,11. Heiya keiyei kmu khat leilei touri khukarthil kantangrou keinung klah-knang dayernungei heirou kul chalphopburnung marshikbi leilei toubi Lhawai Khyingne keinungei mu'kyer klei. 24#2 Tm 4.7; Gal 1.1. Heiya keine keiyei rongchan ayari keinungei khoine koukhatkhi tungchananungei toubi marbupimaknea; keiyei khul'lhou ayatom luilhakurya heirou Pu Jesu'ne keinungei piwurkhou Dunpuei kringpi heiyei ngamrou lhangai Pao-laaya shunthutna'nungei watyilkur heiyatom luilhakurya keine madulei.”

25“Keine Dunpuei Krungbomya shunthutpibi, na nammaei bira tlungne yenchakhoula. Heirou asinungri na hukhatnekhi keiyari hanui kallengne muphakhoumarou. 26Heini angturi keine nanungei khyingne yunthutkhourou: na hukounakne maanganungri, heinung'tlim keine koukhi klah urpimakrou. 27Kouweiyo toulanungri keine Dunpuei kning namma heiya na nammanung shunthutpinarou hil kallengkur koukhatkhi makhui. 28#1 Co 12.28; Eph 1.7,14; Heb 9.14. Heirou naimsha-naitamni naya thikulpina'nungei Lhawai Khyingne kalhonpibi klei thimi raprei tlatrilmakne leiyalo. Dunpune Aiyei Chanapawaei lhawai makatbi hipiwurnei ngamrou phunbaangurkhou Churchyei Yaosilpu khoine thikulpibi leiniya! 29#Mt 7.15. Keine mulei touri keine lakurkhoubi shaalkur hillouri naihangra beimakne thuithi yekshangrap hungthukbi yaorul rapya konchekheirou. 30Heirou naihangrei thimirap thane mandallei tlouya yunbine uklum thimi rapya yaihilla chanthungyernanungei lhou tounei kheenkhi hungthukeirou. 31Heiyanungri keine kum khyumbil, mityui'le mityui, heirou masa-nunghang naimakne na nammanung marnopikur heirapya ningthutbi krakne leiyalo.”

32“Heirou asinungri keine naya Dunpunung, heirou Aiyei thimi rapnung'tlim naidoura pikur Dunpuei phor, heirou naya sheembaangpi mane Aiyei Kringpinara pilhaklei. 33Keine thimi hukhat'rouweikhi lapa, nimanung sina, nimanung phirulkhi madukhoumak. 34#Pao 18.3. Nahaknikhi kmu touri keine keihut ane keiyei palui rapbei, heirou keiyei changbom thuk rapya ronanungei churthutkhou. 35#Rom 15.1. ‘Klouyari pithut thimine'dui likarsui lhangai’ toubi Pu Jesu'ne yunpikhou heiya ningthutle kalhonbi lhou kalne churbi kanring-kanwai thimi rapya trungpinanungei toubi keine nanungei lhou nammarou muyerwurla.” 36Heirou Paul'ne karkhainei tlou yuncheibi ane khuklu kanthrunchabi Dunpunung shunchakur. 37Heirouri thimi rapne aya rkolphopbi heirou machupbine chaple kalhonne karkhainei tlou karyempikur. 38Kheen heirou yane beimak malungdoune kalthi chapkur, ngamri yane hanui kallengne aya muphamaroume toubine karkhainei tloura yunkur. Heirouri ya nammane ale kalhonne wabi mali khrumnabil aya heithulthutkur.

Currently Selected:

PAOCHA 20: MARIBSI

Highlight

Copy