PAOCHA 18

Corinth'ra Wa'tlung

1Heihilouri Paul'ne Athens lakurkhoubi Corinth'ranung wakur.

2Bi heirou ane Aquila toubi ung, Pontus'rei pukkhou napawa khat, aiyei nu Priscilla'le kalhonne Italyrei yu'tlungtirbi louklei ane murilkur, Rome'yei Krung Claudius'ne Jehudia'rap nammane Rome'ya lakurkhoubi shaallakalo toubi chay piwurnei ngamrou yakhu shangramkhi shaalkur, kheen heirou Paul'ne yakhuntaya wamurilkur, 3#Pao 20.34. heitoubi yakou kalhonne leibi ane lhou churmalnakhou, ngamri yane lhou churbi kleinaksi anekhi aiyei ringnanungei toubine khuiluphi sheembi tuy langkhou. 4#Pao 17.2. Ane Mathrilna Tlainiserrou Pukhrumna cheemra wachangbi karyomne tlou yunrilbi, Jehudia raple heirou Greek rapyakhi manel'lhakna'nungei wairangkur.

5 # Pao 18.28. Silas'le Timothy yakhuntane Macedonia'rouwei aiyei leina bira yu'tlungeinung, Paul'ne Jehudia rapnung Jesuri Messiahme toubi yunbine Lhangaiyei Pao-laaya shunthutpibi louklei. 6#Neh 5.13; 2 Sa 1.16. Heirouri yane aya yapimakne, aingamrou lhangaimak tlou rapya yunbaangbi norpiyeinung, ane aiyei phirulrei rahui rapya thingmthaiwurbi heirou ane yanungei kyun, “Nane maanganungri naitamei maangcha'kna. Heinungei'tlim keiri koukhi muphamak. Heini asinung waiyoubine keiri Gentile rapnung charouwa.” 7Heisitoubi ane yaya horkhouwurbi, Pukhrumna cheem pongrei klei aiyei minri Titus Justus toubi ung, thrai khrumbi klei Gentile napawa khatdei cheemra wakur. 8Crispus toubi ung Pukhrumna cheemrei ruipipu hoibi klei napawa heinekhi aiyei bommairei thimi rapkhi kyaone, Dunpuya uklumkur; heirou Corinth'rei thimi dei rapnekhi paolaaya mayekbi uklumkur heitoubi yane uklumnei yui lupkur.

9 # Pao 23.11. Masa khatnung Paul'ne kar'anbi loumunarou Puni anungei atoubi loushunpi, “Nangne koukhi chimakne heirou dongmakne yunpilak, 10#Jer 1.18,19. kouweiyo toulanungri Keine neiya kalhonpilei. Heini thimi hukhatnekhi neiya thuithine touchangmakrou, ngamri khukarthil arou Keiyei thimirap chungne leilei!” 11Heitounei Paul'ne bi heirou kum khatle tangla tlun-thruk leikhoubi heirou thimi rapnung Dunpuei paolaa shunthutpikur.

12Gallio'ya Achaia ramra Rome'yei Krung hoiyerkur heirouri, Jehudia'rap nammane kartilbi Paul'ya mankur, heitoubi aya pichar bomra urthutkur. 13Heirou yane kyun, “Napawa awane thimi rapnung kaiyei tloulamya karhane Dunpuya khrumyernanungei manelbi klei!”

14Heirouri Paul'ne tlou yunthutrou touchayeinung Gallio'ne Jehudia rapnung kyun, “Napawa ane lhangaimak lhou nimanung chimmak lhouya touwurkhou hoiyanungri, keine na Jehudia rapnung'tlim pichar toupikur kya. 15#Pao 23.29. Heiya ari aiyei yunthutkur tloubomrap heirou aiyei tlangthutkur minrap, heirou nai tloulamyei ngammei tloubom hoiyanungri, heiri naihangra naitamni yunrillaka. Heiya keiri heinung'tlim pichar toupi thimi hoichangmakrou!” 16Heisitoubi ane ya nammaya pichar touna cheemrei hulthutkur. 17Heirouri ya nammane Pukhrumna cheemrei lhou'urpu upa Sosthenes heiya manbi, pichar touna cheem maibongra umkur. Heiya Gallio'ne heiyei ngamrou koukhatkhi tlou khoine loupimak.

Antioch'ra Yenkalleng

18 # Msh 6.18. Paul'ne Corinth'ra uklum thimi raple tlaini bei leimalnakhou, heitoubi yaya lakurkhoubi Priscilla'le Aquila yakhu shangramkou kalhonbi Syria'ranung mali tungbi shaalkur. Yane Senchrea'rei shaalbongnung, Paul'ne tlou mardingkur hilthungne aiyei lurei sam ngoumathaikur. 19Yane Ephesus'ra hungtlungbi, bi heirou Paul'ne Priscilla'le Aquila yakhuntaya lakurkhou. Heitoubi ane Pukhrumna cheemra wachangbi Jehudia rapkou tlou yunrilkur. 20Heirou thimi rapne aya kheen bei tlane leikhouna'nungei buchakur heiya ane yapimakur. 21Heiyanungkhi ane shaal'malomne yanungei shunkhou, “Dunpune yapiyanungri, keiri naileinara hanui kallengthurou.” Heisitoubi ane Ephesia'rei mali tungloubine shaalkur.

22 # Pao 8.40. Ane Caesarea'ra wa'tlungbi heirou Jerusalem'ra wabine thimi rapya karyemkhoubi Antioch'ranung thunduikur. 23#Gal 1.2. Heitoubi bi heirou kheen bei leikhoubi, heitoubi bi heirouweine shaalwurthubi Galatia'le Phrygia'yei ramthungni yenralbi, uklum thimirap nammaya ukning thoubaangpikur.

Apollos'ne Ephesus'rale Corinth'ra Leiwurkhou

24 # Tit 3.13. Kheen heirou Alexandria ramrei pukkhou, minri Apollos toubi ung Jehudia napawa khatkhi Ephesus'ra wa'tlungkur. Napawa heiri Khyingei lailikya lhangaidui kmu thimi, heirou marnopinarakhi shingkhei thimi khatkhi khoi. 25#Rom 12.11; Pao 19.3. A heiri Puei Khyingei lamra lhangaidui marnoloukur thimi khat, heirou thimi deinungkhi krakne shunthutpibine, heitoubi Jesuyei ngamroukhi chimyadik marnopi thimi khatkhi khoi. Heisiya hoiyanungkhi ai lhangaiyei kmuri Johnyei yui luppinei ngam heitomni. 26Heirouri ane Pukhrumna cheemra krakne shunpiyoukur. Heirou Priscilla'le Aquila yakhu shangramni aiyei kyunya mayekbi, yakhuntane aya yai cheemranung ruilouheibi Dunpuei khring chaan lamyei ngamrou yai'kmu heiwaya louyunpikur. 27#1 Co 3.6. Heisi tounarouri Apollos'ne Achaia'ra wananungei ningchakur, heitoubi Ephesia'rei uklum thimi rapne Achaia'rei uklum thimi rapnung chethi mayepithungbi aya lhangaine louropina'nungei trungpikur. Ane bi heirou wa'tlungkur heirouri Dunpuei kringpinei ngamrou uklumkur thimi rapnung beimakne trungpikur. 28#Pao 9.22; 17.3; 18.5. Ngamri ane khulpamyei maibongrakhi tlou yeetrilyeinung, Khyingei lailikrei chimtlou rapya thibine, ‘Jesuri Messiah hakme’ toubi yunbine Jehudia rapyakhi ane tlou yeetkril manepikur.

Currently Selected:

PAOCHA 18: MARIBSI

Highlight

Copy