PAOCHA 17

Thessalonica'ra Wa'tlung

1Heitoubi Paul'le Silas yakhuntane Amphipolis'le Apollonia ramra heiraalbi Thessalonica'ra wa'tlungkur, heitoubi bi heirou Jehudia rapbei Pukhrumna Cheem khat louklei. 2Paul'ne aiyei youkna khoine Pukhrumna cheemra wachangkur. Heitoubi ane bi heirou thimi rapkou kalhonne Mathrilna Tlaini khyumbuibil tlungne leikhoubi, 3Khyingei Laiklikya sherthutpibi thimi rapnung tlourap heiya khminni yunpikur, touri Messiahni klah-knang doukhoubi hiyeirou, heitoubi hanui khirouwei ringthutthurou. Heirou Paul'ne kyun, “Keine nanungei yunthutpikur awari Jesuyame, A heiri Messiah hakme.” 4Heisitoubi thimirap thayari yane manelwurbi heirou Paulle Silasyei hil chanthungkur: heinakrimne Greek rapne kartilbi thrai khrumnarei ruipipu napuiya rapkhi chungwane yaothungkur.

5Heiya Jehudi rapne hortheewurbi, yane khullamrei lhangaimak thimirap thaya ungmarkumloubine rulkhat sheemkur. Heitoubi yane khukarthil namma karyoune hou lungyerkur, heitoubi Jason toubi ung napawa khatdei cheemya nambaiwurbi Paulle Silas yakhuntaya manbi heirou khulbungei maibongra urthutnanungei raphakur. 6Heiya yane ya napung-khniya rapha mumakurnarou, Jasonle heirou uklum thimirap dei thaya manlouheibi yane khukarthillei lhou'urpu rapbei maibongra urthutbi ungraochane kyun, “Thimirap ane bi kantangrou hou toulungurbi asinungri kaiyei khukarthil aroukhi wachangura. 7Heitoubi Jason'ne yayari aicheemra louleikyer. Heitoubi yane krungei chay rapya toubaiwurbi heirou ‘arou Krung laikhat leileime, Aiyei minri Jesu toubi ung,’ toubine yane yunlei.” 8Heinaksi tlou rapya mayeknarouri, yane thimichung raple heirou khukarthillei lhou'urpu rapya beimakne ungraoyerkur. 9Heitoubi lhou'urpu rapne Jason'le thimi deiya lhukthutnanungei tuy tha piyerbine heitoubi yaya shaalyerkur.

Bereara Wa'tlung

10Heirouri masa yenmehkurle tallengne yane Paul'le Silas'ya Berea'ranung heimalhetkur. Bi heirou yane wa'tlungbi Pukhrumna cheemra wachangkur. 11Bi heiyei thimi rapri Thessalonica'yei thimi rapya duine ukning lhangai. Yane Pao-laa heiya ukningra beimakne mu'knile kalhonne loukning, heirou tlainiserrei yane Khyingei Lailikya marnobi, Paul'yei kyun tlourap heiri tanghakni chimleiko toubi raphakur. 12Heirou yaihangrei thimi chungwane uklumkur; heitoubi choune rikrai khrumkna napuiya rapkhi heirou napawa rapkhi chungwane uklumkur. 13Heiya Thessalonica'rei Jehudia rapne Paul'ne Berea'rakhi Dunpuei Pao-laa shunthutdurlame toubi pao mayeknarouri, yane bi heirou wabine khukarthil heiyakhi karyoune hou lungyerkur. 14Heitounei uklum thimi rapne tallengne Paul'ya samadru ruiyei ramranung hilkur; heiya Silas'le Timothy yakhuntari Berea'ra leithungkur. 15Paul'ya ruiloukhei thimi rapne akou kalhonbi Athens'bil yukhoubi heirou yane hanui Bereara yenkallengeinung Paul'ne, Silas'le Timothy yakhuntaya aiyei leinara khrangni wayernanungei toubi shunthungkur.

Athens'ra Yutlung

16Paul'ne Athens'ra Silas'le Timothy yakhuntaya loukarngeibi leiyeinung, bi heirou thrailha rapne thimbi leikur heiwaya ane mulhakurnarouri aiyei ukningra beimakne nungwaimakura. 17Heisi tounarouri ane Pukhrumna cheemra changbi, bi heirou Dunpuya khrumbi klei Jehudia raple Gentile rapkou ommalnabi tlou yeetrilkur, heirou keithil tlairakhi thimi rapne kyongle-kale karwaichabi leina birakhi tlainiserrei ane shunmatupikur. 18Heitoubi bi heirou Epicuria'yei napawa khatnekhi heirou Stoic'rei pu rapnekhi akou tlou yeetrilkur. Heirouri ya thane kngai, “Koukhi mu'tlungmakne aitam yunkanthang napawa heiwane kouya yunleiyo?”

Heirou thane loumallangkur, “A heiri miramei shakmumak thraiyei ngamrou yunleime.” Yane heitoubi kyun heiri Paul'ne Jesuei ngamle heirou Aiyei ringthutnei ngamya shunmatupinei yunkur. 19Heitounei yane Paul'ya manbi khukarthillei Yama-krungbom Are-opagus'ra heiruilhakbi kyun, “Nangne kanungei shunmatupikur tlou heiri kouwo toubi kane munilei? 20Neiyei yunthutnarou tloubomrap thaneri kanungei kngak'khat hoilei, heitoubi tlou heiri kouwei ngammo toukhi kane munilei.” 21(Kouweiyo toulanungri Athens'rei thimi raple heirou miramrei thimi rapkhi khukarthil arou tlouthuk ranranya yunrilbine, heirou yane kheenserrou ninglhakbidik leikni.)

22Heirou Paul'ne khukarthillei Yama-krung rapbei maibongra mayungbi kyun, “Athens'rei thimirap, nari lhoubom kantangrou tharmu klei thimi rapme touri keinekhi mulei. 23Ngamri keine nai khukarthil arou yenkarwaichabi, keine naiyei thrai khrumna bi-bira yenthiheinung, khrahpal khatdei doura atoubi mayebi louklei keine karthangkur, touri ‘Shakrung muphamak Dunpunung’ toubi mayebine leilei. Heiyanungri nai khrumbi klei heiri nane shakrung muphamanungkhi asiyei keine nanungei shunthutbi klei awarime. 24Dunpuri tlaipangpal, heirou heiyei dourei ringbi klei namyerwaya sheempipu- Thangmun-tlaipang khintamrekei Pume. A heiri thimiyei hutne sabaangkur thraishangra klei nimak. 25#1 Kr 8.27; Isa 42.5; Pao 7.48. Heirou A heiri kane koukouya churthutbi makatpikur heiwaya madubi klei nimak, ngamri Ane namanungei khringei nilya sholhakpibi ringyerlei, heirou thimi nammanung changbom thuk nammaya pibine leilei. 26Thimi napung khatrouwei Ane tlaipang thimilim kounakya sheemthutbine heitoubi tlaipangpal karyoune paalyerlei. Heitoubi Ahakpane yanungei kheenya lamkrine kartinpibi heirou yai palnanungei ramyakhi ri-karchunna mokmei naiyerbi yaya paalyerkhou. 27#Rom 1.20; Jer 23.23,24. Ane heinaksiya sheempiwurkhou heiri yane Aya thiphayei kaalnung, heirou Anungei wachangnanungei raphayeinung, Aya phananungei toupikurme. Heiyanungkhi Dunpuri ka hukhat'rouweikhi tlatrilne leiwurmak. 28Hukhatne atoubi yunkhou leilei, ‘Anungei kane ringbi leilei, kanchekchabi leilei, heirou paalbi leilei.’ Awari naiyei laa kanyer thimirap thaei kyunnakne, ‘Kakhi Aiyei yu-cha rapme.’ 29Kari Dunpuei yu-charap toubine, Dunpuya thimiyei hutsa kheine sabaangbi-mallobaangkur sina-lapayei, nimanung thlungei thrailha'nakne khalbomri thukmak. 30Thimi rapne kheenserrou Dunpuya mupimakne leiyei kaalnung, Ane yayari thihoiwurpi, heiya asinungri ya nammaya yaiyaiyei borhyei lam'rouwei kallekthutna'nungei Ane chay piwurla. 31#Laa 9.8; 96.13; 98.9; Rom 3.25. Ngamri Ane tlaipang nammaya Aiyei thimi khat khoine khalthutbi chimmei pichar touyerna'nungei tlaini heiri kartinbi khouwurla. Lhou heiya Ane Aiyei khalthutkur thimi heiwaya ringthutyerbi thimi rapnungei muyerwurla!”

32Heirou Paul'ne, khirouwei ringthutnei ngamrou yenkyun heiya yane mayekbi, ya thane aya khremknane loukyun, heiya ya thaneri, “Kane tloubom heiyei ngamrou neiyei kyunya hanuikhi ningnithulei,” toubine kyun. 33Heisitoubi Paul'ne thimichung kartilya lakkurkhoubine shaalkur. 34Heirouri thimirap thane uklumbi akou chanthungkur, heirou yaihangrei napung khatri Are-opagus'yei Yama-krung Dionysius; heitoubi bi heirou Damaris toubi ung napuiya khatkhi, heirou thimi deikhi aihilla chanthungkur.

Currently Selected:

PAOCHA 17: MARIBSI

Highlight

Copy