PAOCHA 16

Timothy'ne Paul'le Silas Yakhuntakou Kalhonbi Chakur

1Paul'ne Derbele Lystra'khi wa'tlungkur, bi heiraprou Jehudia Christen napuiya khatdei chanapawa Timothykhi louklei, heirou aiyei pawari Greek. 2Heirou Lystra'le Iconium'rei klei uklum thimirap nammane Timothy'ei ngamrou lhangaime toubi beimakne mathangrilkur. 3Heitounei Paul'ne Timothy'ari akou kalhonne chananungei ruiloukhei, heitoubi ane Timothya ruilouheibi murdinnei lhoukhi toupikur. Ane Timothya murdinnei lhouya toupikur, ngamri ram heirou klei thimi rapne Timothy'ei pawari Greekme toubi tlengwane kmu. 4Heirou yane khukarthil kantangra yenkarwaichabi, uklum thimi rapnung Paocha raple Jerusalemei upa rapne yarilbine darilkur tloulam rapya yenshunthutbi heirapya hil chanthungnanungei marnopikur. 5Heisi toubine Churchrap heiri uklumyei lhoura mantrangyerkur, heirou tlainiserrei uklum thimi rapkhi katchungduikur.

Paul'ne Troasra Leiyeinung Kar'anbi Mukur

6Yane Asia'yei khokul rapra chayeinung Lhawai Khyingne yaya Pao-laa shunthut'yermakurnarou, yane Phrygia'le Galatia'yei ramra karyoune yenkarwaichakur. 7Yane Mysia'yei ram rikarchunnara wa'tlungbi, heitoubi Bithyniayei ramra changnanungei wairangkur, heiya Jesuei Lhawaine yaya yapimakurbi bi heirou changmakura. 8Heisi tounarouri yane Mysia'yei ramra heiralwurbi heitoubi Troasra wachangkur. 9Heiniyei masanung Paul'ne kar'anyeinung Macedonia'yei napawa khatne aiyei maibongra mayungbine anungei asitoubi: “Macedonia'ra wabine heitoubi kaya bei trungpilaklo!” toubi buchakur ane loukmu. 10Heirou heinaksi kar'anbi mukur heirouri tallengne kane Macedonia'ra chananungei hoyoukur, ngamri Dunpune kaya bi heirou klei thimi rapnungei Lhangai Pao-laa shunthutna'nungei yapimakurame toubi kane yarilbi darilkur.

Philippira: Lydia'yei Ukning Hung

11Kane Troas'rouweine Mali tungbi Samothra'yei ramra heiraalkur, heitoubi thangei tlaini'rouri Neopolisra wa'tlungkur. 12Heitoubi bi heirouweine kane Macedonia khokulyei lamkri khukarthil Philippira wa'tlungkur; ram heikhi Romia thimi rapbei yuldana bi khat. Heitoubi bi heirou kane tlaini bei leiwurkhou. 13Heirou Mathrilna Tlainirou kane khukarthillei pura wathukbi, kungruira Jehudia rapne thrai khrumnanungei kartilna bi khat louleiroume toubi ningchabi heipuithutkur. Heirouri bi heirou kartilbi louklei napuiya rapkou ommalnabi kane tlou kallangrilkur. 14Bi heirou kaiyei tlou kyunya ningbi klei thimi rapbei hangra Thyatira ramrei Lydia toubi ung napuiya khat loukyao, a heiri manklu phaikhringei phirul-phishamb yorbi lalhol napuiya, heitoubi Dunpuyakhi khrumbi klei napuiya khat, heirouri Dunpune aiyei ukningya laatpiwurbi Paul'yei kyun tlou rapya lhangaine ninglhakur. 15Heirou ale aiyei bommaiyei thimi rapne uklumnei yui lupkur hillouri, ane kaya, “Nane kei akhi Dunpura chimmei uklum thimi khatme toubi loupilanungri, keiyei cheemra wabi nane yarekpilaklo,” toubi yunbine ane kaya unglouheikur.

Philippira Kulchalphopbi Leinarei Thukkur Lhou

16Nungkhatnui kane shunchana bi'ranung wayeinung, lhangaimak lhawaine changbi hillei hungthukrou kyou lhou rapyakhi yunthutmane shok-nangaka khatpini kaya lourorilkur. Ane minungei meirui thibi aiyei cheempu rapnung tuy chung-chungne yenlanglhakpi. 17Ane Paulle kaiyei hilla ungraochabine, “Napawarap ari Namrouwei Choudui Dunpuei shik rapme! Heirou yane nanungei kalpi phayernei lamya shunthutpilei!” toubi yunbine heichanthungkur. 18Ane heinakya kounakbui touwurbine, Paul'ya tamungyernanungei mareknakur, heirouri Paul'ne loukallekthibi lhangaimak lhawaiya sammurpi, “Napuiya heirouwei thukkurnanungei keine neiya Jesu Christaei minra chay pilei!” Heisi tounarouri tallengne lhawai heine napuiya heirouwei trukthutkur.

19Heirouri aya yukpi cheempu rapne yaiyei tuy langnanungei makkurame toubi ningmuwurbi, yane Paulle Silas yakhuntaya manbine keithil tlaira khulpamei maibongra heitaangheibi lhou'urpu rapnung pilhakur. 20Heitoubi yane Romia phringki rapbei maibongra heiruilhakbi kyun, “Napawarap ari Jehudia, heirou yane kaiyei khukarthil awaya hou toulungbi klei. 21Yane kaiyei tloulamkou karhourilnanungei youkna lammitya marnopibi leilei; heiya kari Romia ramra paalbi klei thimi; heine kari yai marnopikur youkna tlourap heiri loulhakchangmakrou, heirou chanthungkhi chanthungpimakrou.” 22Heisitoubi khulpamnikhi yanungei kalhopbi Paulle Silasya yapimakkur.

Heitoubi phringki rapne Paul'le Silas yakhuntayei phirul rapya thiklhukbi threlwurpi heitoubi yaya umnungei chay pikur. 23#2 Co 11.25. Yaya beimakne umpikur hillouri kulrilla malhetlhakur, heitoubi kul kngaak thimi rapnung shunbine, kul cheemkhar hang chetne rotphopyerkur. 24Heirouri kul kngaak raalluine heinaksi chay phayerwurnei ngamrou, ane yaya kulrillei bomthora urlhakurbi heitoubi yai hut-horap heiri heeng mtum tang khintamyei tlakra ronlhakyerbi hang chalphopbi khoukur.

25Heirou masa yantrim kaallou, Paul'le Silas yakhuntane Dunpunung shunchabi heirou mathangna laaya sabine leiyeinung, kulrilla chalphopbi klei thimi dei rapne yakhuwei houya ningbi heiklei. 26Heirouri mathunrek khoine linglang khngaakurbi, kullei cheem nammaya kanthingyerkur. Heisitoubi tallengne kullei cheemkhar heikhi namyerwa laatdurchi, heitoubi kulrillei klei thimirap nammaei hut-ho matphopbi klei thirrui rapkhi lupsundawurchi. 27Heirou kul kngaak raallui heiwane ipnarei fyouwei kaalnungri, kul cheemkhar namma laatbine loukleiya kamuwurnarou, kulrillei chalphopbi klei thimi rapri trukbi yullurchiarou toubi ane ningchakur; heitounei ane aiyei shonkhyang phuithutbine aitam thunhatnanungei wairaangkur. 28Heiya Paul'ne aihou kallei'mkhei heiungraobi shunkur, “Neitamya thunhatnamaklo! Ka nammari bi arou leileihuime!”

29Heitounei kul kngaak raallui heiwane meishar bulouheibi khrangne wachangbi Paul'le Silas'yei ho pongra chi-kanchunle kalhonne kanelhakur. 30Heirou ane yaya ruithutloubine kyun, “Marnopi purap, keiri kalpi phananungei kouya touserouwo?”

31Heirou yane loumallang, “Pu Jesuya uklumlak, heitoulanungri nangle neiyei bommai'yei thimi rapkhi namyerya kalpirou.” 32Heirouri yane aiyei cheemra wachangbi anungkhi heirou aiyei cheemrei klei thimi deinungkhi Dunpuei tlouya shunthutpikur. 33Heirou heineyei masahakrou kul kngaak raallui heiwane yaya ruilhakbi heitoubi yai'msharei umhemmurna cheibi rapya mchampikur; heirou cheempu heile aiyei nu-cha nammakhi heinehakrou uklumyei yui lupkur. 34Heitoubi ane Paulle Silas yakhuntaya aicheemra mathrilyerbi, yanungei chamainungei marshikpikur. Heirouri ale aiyei cheemmairei thimirap nammane beimakne nungwaikur, ngamri yane asinungri Dunpuya uklummura.

35Thangei ningshunnung Romia lhou'urpu rapne raallui upa rapnung chay pibine, “Thimirap namma heiri shaallakasu,” toubi wamalhetnanungei heiyilkur.

36Heitounei kul kngaak raallui heiwane Paul'nung shun, “Lhou'urpu upa rapne Silas nakhuntaya malhetnanungei chay heipithunglei. Heine nakhuntari shaalkur yawarou, heiyanung nane kyingne shaallaka!”

37Heiya Paul'ne raallui Upawanung loushunkur, “Kayari kouklal khatkhi raphathutmakne, kakhi Rome'yei thimirap hoiyanungkhi, yane khulbungei maibongra umbine kulla chalphopburbi, heirou asinungri yane kayari munne malhetkur pamleinu! Heiri yamakrou! Romia upa rapne yai'msha rungrungni bi arou wabine, heitoubi kaya malhetthutpilaksu.” 38Raallui upa rapne tlou heiwaya Romia Lhou'urpu upa rapnung hungshunpikur, heirou Paulle Silas yakhuntakhi Rome'yei thimi rapme toubi loumayeknarouri, yari beimakne chiwura. 39Heitounei yane wabi yai maibongra malungkha'maknanung wabuchakur, heitoubi yaya kulrei ruithutloubine khukarthil heirouwei shaallaka toubi shunbine malhetkur. 40Heirou Paul'le Silasne kullouwei shaallurbi heirou Lydia'yei cheemra wachangkur. Bi heirou yane uklum thimi rapya murilkur, heirou yaya ukning thoubaangnei tlouya yunkhoubi shaalkur.

Currently Selected:

PAOCHA 16: MARIBSI

Highlight

Copy