PAOCHA 15

Jerusalem'ra Yama-Krungrap Kartukkur

1 # Lev 12.3. Judea ramrei thimirap thane Antioch'ra wabi heirou yane uklum thimi rapnung, “Nane Moses'yei Tloulam hilthungne murdinnei lhouya toumanungri, nari kalpi phamakrou,” toubine marnopi youkur. 2Paulle Barnabas yakhune tloubom heiwiyei ngamrou yale beimakne rkalrilkur, heitounei ngamrou Paulle Barnabas'ne Antioch'rei klei thimi dei rapkou kalhonbi Jerusalem'ra yuyerbi upa rapkou murilbi tloubom heiyei ngamrou ngaithinanungei tlou darilkur.

3Heitounei Church'yei thimi rapne yaya heithulthutkur; heirou yane chayeinung Phoenicia'le Samaria ramra heiraalbi chakur, heiroukhi Gentile rapne koutoubi Dunpuei lhangra kalleklhakkurro tounei ngamroukhi yane pao hungshunpikur heirouri heinaksi pao heine uklum thimi rapya beimakne nungwaiyerkur. 4Heitoubi yane Jerusalem'ra hungtlungeinang Church'yei thimi raple Paocha thimirap, heirou upa rapne yaya louropikur, heitoubi yakou kalhonbi Dunpune lhou toupikur heiyei ngamroukhi ya nammanungei pao hungtamkur. 5Heiya yaihangrei lhangai karsa rapnung kalhopni tlou kyun thimirap thane mayungbi, “Gentile rapkhi mur dinrou da, heitoubi yayakhi Moses'yei Tloulamya hil chanthungyerna'nungei shunpirou da,” toubi kyun.

6Heitounei Paocha raple upa rapne pulne kartilbi tloubom heiyei ngamrou kartongrilkur. 7#Pao 10.1-43. Yaihangra beimak tlane rkalrilkur hillouri Peter'ne mayungbi yunkur, “Keiyei teinaorap, nane kmu touri kheen kounakkei maibongrou Dunpune naihangrei keiya khalthutbine Gentile rapnung Lhangaiyei paolaaya shunthutyerbi, heirou yane mayeklhakbi yaya uklum leiyernanungei malhetpikur. 8#Pao 2.4; 10.44. Heirou thimi kantangei ukningya mupibi klei Dunpune yapibi, heirou ane Gentile rapnungkhi kanungei pikurnakne Lhawai Khyingya pikur. 9Heirou Ane yale kai tlakra koukhatkhi karlhikril leiyerpimak; heirou yane uklumnei ngamrou yai borhya kukpikur. 10Heiyanungri, nane kounungei bongei kai nutar-patar rapne heirou kanekhi urkhouchangmak putkhritya uklum thimi rapnungei khangbangbine Dunpuya mallaknakurrawo? 11Heisi tounungei nimakme! Kakhi yanaksi uklumnei ngamrou, Pu Jesuei kringpi heine kayakhi kalpikurme.”

12Barnabas'le Paul'ne, Dunpune yaidoura kalhonpibi Gentile rapbei hangra thimine toumanemak lhou rapya heirou kngakei lhou rapya touwurkhounei ngammei paoya yunpinarouri thimi rapne koutlou khatkhi yunmakne rie louleikur. 13Yane tlou yuncheikur hillouri James'ne kanthoubi, “Keiyei kyunya louningpilak, keiyei teinaorap! 14Simon'ne asinunghak yunpiwurla touri Dunpune koutoubi Gentile rapya lamkrine thilhakbi, heitoubi yaihangrei khalthutbi Aiyei thimirap hoiyerkurro? 15Tlourap heiri Thimkhui rapbei yunthutpikhou tlou raple beimak karchuril leilei touri Khyingei Lailikra atoubi mayekhoulei: 16‘Heihillou Keine yenkallengrou, toubi Puni yunlei, heitoubi David'yei Krungbomya mallenglhakpirou. Aiyei deek-bai thukkurbi maangkur namyerwa heiya Keine hanui sabaangpithurou, heitoubi heirapya Keine hanui mantrangyerthurou. 17Heisi toubine tlaipang thimirap nammane Keinungei hanui yenkallengthurou, Gentilerap nammakhi Keiyei thimirap hoinanungei Keine unglhakpiwurla. 18#Ams 9.11-12; Jer 12.15; Isa 45.21. Tloubom awaya tirrei waiyoubine muyerkur Dunpune yunthutkhoupi.’

19“Keiyei kningri asitoubi leilei.” toubi Jamesni yenkyun, “touyari kane Dunpu'nung hollhakur Gentile rapya heinak marhotpibomri thukmakrou. 20#Hoy 34.15-17; Lev 17.10-16; 18.6-23. Heinung'tlimri kane yanungei lailik mayebine, thrainung makatkur put rapya koukhatkhi chamaimaknung, heirou yai'msha yaitamne lhangaimak napuiya-napawane phitho tilrilbi borhyernei lhou toumaknanungei, heirou sraltang-an, metu-ankhi heirou anheekhi maiphopmaknungei yaya shunmatupini lhangairou. 21Kouweiyo toulanungri Moses'yei Tloulam heiri bongei waiyoubine Pukhrumna Cheemra Mathrilna tlainiserrou sherthutbidik klei, heirou aiyei tloulhangrap heiri khukarthil kantangrakhi shunthutpiwurla.”

Uklum Gentile Rapnung Mayepikur Chethi

22Heisi tounarouri Paocha raple upa rapne Churchyei thimi rapkou kartilbi, yai hangrouwei napawa tha khalthutbine heitoubi Paul'le Barnabas yakhuntakou kalhonne Antioch'ra hilthungnanungei tlou darilkur. Yane yaihangrei uklum thimi rapne choune rikrai khrumkna napawa napung-khni, Barsabbas toubikhi mu'kna Judasle, Silas yakhuntaya khalthutkur. 23Heitoubi daakrei chethi heiwaya yanungei manthunthungkur, “Paocha raple upa rapne, naiyei teinao rapkou kalhonbi, kane Antioch'ra, Syria'ra heirou Cilicia'rei klei keiyei Gentile teinaorap na nammanung karyemnei tlou manthunthunglei. 24Kaihangrei thimirap thane, kaiyei kya tloukhi loumakne, nai leinara wawurbi, naya lehne marnopiwurbi, naya tamungyerlame toubi kane pao loumayekurla. 25Heineri heisi tounarou kane kartukbine thimi tha khalthutbi nai leinara pao malhetdase toubi yarilkur. Heirou yane kaiyei paluirap, 26Pu Jesu Christaei lhoura yai rongchanya makatkur thimirap Barnabas'le Paul yakhuntakou kalhonne naileinara waeirouhui. 27Heisitoubi kane nanungei mayekur chethirei tlourap heiya yai murnekhi nanungei yunpinanungei toubi kane Judasle Silas yakhuntaya nai leinara heiyilpilei. 28Youkna tloulamrap aya duine midei hukhatnekhi naidoura klallei put kharitya khangbaangmaknung toubi Lhawai Khyingle yarilwurla. 29Heirou nane thrainung makatkur putchei rapya chamaimakneya; anchumrei heekhi maiphopmak, sraltang-an, metu-ankhi maimak; heirou naimsha-naitamni lhangaimak napuiya-napawale phitho tilrilbine borhyermak. Anakei lhou rapya toumaknanungei nane mukheine leiyanungri, nanungei lhangai hoirou. Nanungei lhangai-hakrao hoinanungei phoryei tlou shampithunglei.” 30#Gal 2.1-10. Paocha rapya Antioch'ra, uklum thimirap chungne kartilbi louleina bi heirounung malhetdurbi, heitoubi yanungei chethi heiya malanpikur. 31Thimi rapne chethi heiya loupathinarou, yaya ukning thoubaangpinei paolaa heiyei ngamrou yane beimakne haraokur. 32Heirou Judasle Silas yakhuntane, Thimkhuirap khoine kheen tlane yanungei tlou yunpibi yaya ukning thoubaangpiwurbi heirou yaiyei uklum mantranglhakyerkur. 33Yane bi heirou kheen beicha leikhoubi heitoubi uklum thimi rapne yaya hanui kyingne thulthutpiwurbi, heirou yaya heimalhetpikur thimi rapbei leinara hanui hilmallengkur. 34Heiya Silasri bi heirou kheen bei yakou kalhonne leikhounanungei ningchakur.

35Heirou Paulle Barnabas yakhune Antioch'ra leikhoubi, heirou thimi dei rapyakhi Dunpuei Pao-laaya shunthutpibi yanungei marnopikur.

Paul'le Barnabas Yakhu Karkhaikur

36Kheen beiyei hillouri Paul'ne Barnabas'nung shun, “Kane Dunpuei Pao-laa shunthutkhouna khukarthil kantangra kallengbi kaiyei teinao rapya, yane kousi toubi leileiyo toubi bei yenthiheiyase.” 37Heirouri Barnabas'ne John Mark'ya ruikni, 38#Pao 13.13. heiya Paul'neri aya ruiloukur heiri lhangaimakrou toubi ningchakhou, koungameiyo toulanungri, a heiri yakou leimalnamakne, Pamphylia'rouweine yakhuntaya lakkurkhoubi shaalkur. 39Heitounei yakhuntane beimakne yeetrilwurbi karkhaikur: Heirouri Barnabas'ne John Mark'ya ruilouheibi Syprus'ranung mali tungloubine chakur, 40heirou Paul'neri Silasya ruilouheibi, uklum thimi rapne Dunpuei kringpi heiri yaidoura leipinanungei chay pikhoubi shaalkur. 41Ane Syriale Cilicia'ra yenralbine, Church'yei thimi rapya ukning thoubaangpibi mantranglhakyerkur.

Currently Selected:

PAOCHA 15: MARIBSI

Highlight

Copy