PAOCHA 14

Paul'le Barnabas Yakhunta Iconium'ra Wa'tlung

1Heirou Iconium'rakhi heinakrim thukkur: Paul'le Barnabas yakhune Pukhrumna Cheemra wachangbi heinakrimne shunthutpikur, heirou Jehudi raple Gentile rapkhi chungne uklumkur. 2Heiya uklummak Jehudia rapne Gentile rapya thouplangbi heitoubi yaya uklum thimi rapkou karhourilyerkur. 3Paocha rapne bi heirou kheen tlane leikhoubi, heirou yane Pu Jesuei ngamrou krakne mayungpinei tlou yunpikur. Yane thimi rapnung kngakei lhou rapya heirou thimine touchangmak lhou rapya tounanungei mantrang piyerbi yai shunthutpikur paolaa heiri chimhakme toubi muyerkur. 4Heirouri khukarthil heiyei thimi rapri rulkhni thukne lhang-lhang darilkur: thimi thane Jehudi rapbei lhangra leikur, heirou deine Paocha rapbei lhangra kalhopbi tlou yunkur.

5Heirouri Gentile'rap thale Jehudia'rap thane, yaya ruipipu raple pulne kartilbi, heitoubi yane Paocha rapya manbi thuithine mareknabi heirou thlungni khinghatna'nungei tlou darilkur. 6Paocha rapne heinak paoya mayeknarou yane Lycaonia'rei klei Lystra'le Derbe khukarthil rapra heirou ram heiyei karhillei klei khokul rapra truk-kartleikur, 7heitoubi yane bi heirou Lhangaiyei Pao-laa shunthutpikur.

Lystra'le Derbe'ra Yutlungkur

8Lystra khukarthilla puknarei waiyoubi ho deekurbi tekhi karwaichachangmak napawa khat louklei. 9Ane bi heirou ombine Paul'ne marnopikur tlou rapya ningbi heiklei. Paul'ne ningmukur touri, ane uklummanungri aiyei hodeek heiri lhangaikur manerou, heitounei ane napawa heiwaya thimanthrambine, 10heitoubi hou choune ungraobi kyun, “Neiho heiri katmayung'englak.” Heitounei napawa heine kanthoubi chunchane karhilne karwaichakur. 11Heirou thimi rapne Paul'yei touthutkur lhou rapya muwurnarou yane Lycaoniayei tloune, “Thrai rapne thimirung holbi heirou kaihangra yongchangurame,” toubi ungraobine yunyoukur. 12Heitounei yane Barnabas'ya Zeus, heirou Paul'yari Hermes toubine min thulpikur, ngamri Paul'ne ruibi tlou yunkur. 13Heitoubi khukarthillei purei sabi klei Zeus thraishangei lhou'urpu upawane halpa thale, heirou paarrui riengbine palthungra heithulthutkur, ngamri ane thimi raple kalhonbi Paocha thimi rapnung makatdurbi kna thuinikur.

14Heiya Barnabas'le Paul'ne yai toukur lhou heiya mayeknarouri, yane yai phirulya threlwurbi heitoubi thimi rapbei tlakra ungraochane chanlhakbi shunkur, 15#Hoy 20.11; Laa 146.6. “Thimirap, nane kounungei anakei lhouya toukurrawo? Kakhi na'nakrim tlaipang thimi rapme! Kari bi arou Lhangaiyei Pao-laaya shunthutpinanungei mayungbi kleime, heirou naya anaksi karsukmak lhou rapya toubi leinarei Thangmun-tlaipang, samadruya, heirou heirapbei rilla ringbi klei chiwi nammaya sheempipu Khring Dunpuei lhangra hollhakyernanungei toukurrame. 16Bongei chaanrouwei Dunpune tlaipang thimi nammaya ai'aiyei toukni lhoulamra chayerkhou. 17Heiya Ane lhou kantangra thimi rapnung A leileime toubi lhangaiyei lhou rapya mutkhoupila: Ane nanungei nungthourei nung rosundayerbi, heirou trunwaikhi kumchaan chane pukthutyerbi heikhi heiyerpilei; Ane nanungei chamainung murchak thulpibi naiyei ukningra nungkngaini thimyerpilei.” 18#2 Co 11.25. Bi heirou Paocha rapne heinakya yunpibikhi, thimi rapne yanungei khrumna put makatrou kyou heiya dongyerrouri kluni thukkur.

19Pesidia Khokulyei Antioch khokulrei heirou Iconium khokulrei thimi rulkhatne wabine thimi rapya fyoubine, heitoubi yane Paul'ya manbi thlungni khingtlui-lhakkur; heitoubi aya khokulyei pura taangthutbi, hiyurame toubi khalbine aya lakkurkhou. 20Heiya uklum thimi rapne aya karhilne mayungbi trungpikur heirouri ane kanthoubi khokulra yenkallengthu. Heitoubi thangei tlainirou ale Barnabas yakhu kalhonbi Derbera wachangkur.

Syria'yei Antioch'ra Yenkallengkur

21Heirou Paulle Barnabas yakhune Derbe'rakhi Lhangai Pao-laa shunthutkhoubi, heitoubi yane Pisidia'yei Antioch'ranung kat-kallengeinung Lystra'le Iconium'rakhi katchangkhei. 22Heirou yane uklum thimi rapya chimmei malungamkna thimirap khoine leinanungei ukning thoubaangpiwurkhou. “Kane klah-knang kounakya yendouheibine Dunpuei Krungramra changnanungei tourou da,” toubi yane shunmatupikhou. 23Heitoubi yane Church kantangra uparap khalthutbine, heirou chamainung murchak ngeile kalhonne yane shunchapibi Dunpuei lhoura yaya malungamkna kleini watyilpikur.

24Yane Pisidiayei ram karyoune karwaichakhoubi heirou Pamphylia'ra yongchangkur. 25Heitoubi yane Perga'ra Pao-laa shunthutkhoubi, Attalia'ranung wakur, 26heitoubi bi heirouweine mali tungbi, heirou yaya watyilbi Dunpuei kringpina rilla leibi lhou luilhakurna bi Antioch'ra hanui yenkallengkur.

27Heirouri yane Antioch'ra hungtlungbi, Churchyei thimirap nammaya ungmartilkur, heitoubi yanungei Dunpune kalhonpibi touwurkhou lhou rapbei ngamroule, heirou kousitoubi Gentile rapnung uklumnanungei Dunpune lam laatpikurro tounei ngamroukhi yanungei khminni yunthutpikur. 28Heirou yane bi heirou uklum thimi raple kalhonbi kheen tlane leiwurkhou.

Currently Selected:

PAOCHA 14: MARIBSI

Highlight

Copy