PAOCHA 13

Barnabas'le Saul Yakhuntaya Khalthutbi Paochananungei Malhetkur

1Antioch Churchyei hangra thimkhui thale heirou marnopipu thakhi leikhou: ya heirapri Barnabas, Simeon (ayari khmongwa toubikhi mu'kna), Syrene'rei Lucius, Mana-en (ayari Krung Herod'ne yukbaangkhou), heirou Saul. 2Yane chamainung murchak ngeibine heirou Puya watlhou toubine khrumbi leiyeinung, Lhawai Khyingne yanungei loushunpi, “Keine yaya churyerkni lhouya churnanungei Barnabas'le Saul yakhuntaya hilthutpilaklo.”

3Heisi toubi yane chamainung murchak ngeibine, heirou yaidoura hut khaangbaangbi shunchapikur, heitoubi yakhuntaya watlhou churyernanungei hilthutkur.

Barnabas'le Saul Yakhuntane Cyprus'ra Yu'tlungkur

4Heisitoubi Lhawai Khyingne malhetpibi, Barnabas'le Saul yakhune Seleucia lhangra chawurbine heitoubi bi heirouweine malikhat tunglouheibi Cyprus'yei ramra wa'tlungkur. 5Heitoubi yane Salami'yei ramra wa'tlungurbi, heirou yane Pukhrumna Cheemra wachangbi Dunpuei Pao-laa shunthutpikur. John Mark'yakhi yane ruichabine yailhoura churtrungyerkur.

6Heitoubi yane ram heiya heisi heitladuiwurbi Samadru tlairei klei Paphos ramra wa'tlungeinung, Jehudi'yei Bar-Jesu toubi ung napawa khat aitamne thimkhuime toubi yunthutkna chimmakkei thuiya yrengchabi klei thimkhui khatya yane karthangkur. 7A heiri ram heiyei Krung Sergia Paulus'yei paluikhi hoikhou, heirou ari beimak shingkhei napawa khatkhi khoi. Heirou Krung heiwane Barnabas'le Saul yakhuntaya aiyei Krungbomra ungbaangkur, ngamri ane yakhurei Dunpuei paolaa ningnikur. 8Heiya (Greek tloura) Elymas toubi ung napawa, chimmak thui'ur heiwaneri yakhuntaya wayernimak, ngamri krungni Dunpuya uklumbi klei ukning heiya toudongnanungei ane wairangkhou. 9Heirouri Paul toubikhi mu'kna Saul heine Lhawai Khyingne thimmurbi, lhangaimak thui-ur napawa heiwaya thimanthrambi shunkur, 10#Hos 14.9. “Kraowei chanapawa! Nangri lhangai lhou touna kantangrou karhoubi lhoutou thimi. Neinungeiri lhangaimakei ukningne thimlei, heirou nangne Dunpuei chim tlouya lehyernanungdik wairanglei! 11Heiniri asinungri Dunpuei hut heiri neidoura yuklaamsundarou; heirouri neiya mitlung deoyerbi kheen beicha kwaarya muyermakrou.”

Heisi tounarouri Elymas'ne aiyei mitlungra kounaksi kmehyei ker khatne mallebi khalkurnakne ane mayekthungkur, heirouri ane thimi hukhatya aiyei hutbangra churbi taangchayernanungei r'malphabi karwaichakur. 12Krung heiwane thukkur lhou heiya muwurnarouri, akhi uklumkur; ngamri Dunpuei ngamrou marnopikur tloubom heirou beimakne ngakkur.

Pisidia'yei Antioch'ra Ka'tlungkur

13Heirou Paulle aiyei paluini Paphos'rouweine mali tungloubine Pamphyliayei khukarthil Perga toubi ung, heirou John Markni yaya lakkurkhoubi Jerusalem'ra kallengurna bi heirou wa'tlungkur. 14Heitoubi yane Perga'rouwei chawurthubi heitoubi Pisidiayei Antioch'ra kalhungkur, heirou Mathrilna Tlainirou yane Pukhrumna Cheemra wachangbi omkur. 15Heitoubi yane Moses'yei Tloulam lailik'le heirou Thimkhui rapbei lailikreikhi tha sherthutkur hillouri, Pukhrumna Cheemmei lhou'urpu rapne yanungei paokhat heimalhetbine shun, “Teinaowarap, nane thimi rapya ukning thoubaang'pinanungei kounaksi lhangaiyei paolaa leiyanungri, kane naya yaihangra tlou yunyernileime.” 16Heitounei Paul'ne loukanthoubi aihutne martubi tlou yunyoukur:

“Bi arou Dunpuya khrumbi klei keiyei palui Israel'rap heirou Gentile'rap, nane keiyei kyunya louningpilak! 17#Hoy 1.7; 6.1,6; 12.51. Israel rapbei Dunpune kai patar rapya khalthutdurbi heirou yane Egypt ramra mirammei thiminakne rampal pibi paalkhouweinung, yaya tangkur limkhat hoiyerkhou. Dunpune yaya Aiyei thang'allei mantrang heine Egypt'rouwei ruithutpikhou. 18#Msh 14.34; Khn 1.31. Heitoubi kum somlibil yaya ramthingra Ane thikulpikhou. 19#Khn 7.1; Jos 14.1. Ane Canaan ramrei louklei Thimilim enitamya maangyerwurbi heirou Aiyei thimi rapya ram heiyei pu hoiyerkur. 20#Pic 2.16; 1 Sa 3.20. Namma heiya thukyerkur heiri kum somngayei mal changkur.

“Heihillouri Ane yanungei thimkhui Samuelyei chaan phane pichar pu rapya yenmalhetpikur. 21#1 Sa 8.5; 10.21. Heirouri yane Krung khat pinanungei buchanarouri, yanung kum somlibil krung hoiyerna'nungei toubi, Benjamin phungh'rouwei Kish'yei chanapawa Saulya Dunpune yanungei pikur. 22#1 Sa 13.14; 16.12; Laa 89.20; Isa 44.28. Heirou aya krungbom'rouwei louthutkur hillouri Dunpune David'ya yaiyei krung hoiyerwurthu. Asitoubi Dunpune aingamrou yunthutdurkhou klei: ‘Jesse'yei chanapawa Davidri, keiyei pamthimi khat khoine, heirou keiyei touyerkniya toupirou thimikhat khoine, Keine aya phayerwurla.’ 23Heisitoubi aiyei tlou kantompikur heinakne, David'yei yu-charei yenranbi Dunpune Jesuya Israel thimi rapbei Kalpipu hoiyerkhou. 24#Mk 1.1-4; Lk 3.3. Jesu'ne lhou churyoubongnang John'ne Israellei thimi rapnung, yane yai borh lhourouwei kallekthutbi yui lupnanungei shunthutpikur. 25#Mt 3.11; Mk 1.7; Lk 3.16; Jn 1.20,27. Heirou John'ne aiyei lhou luiwairou ane thimi rapnung yunkhoupi, ‘Naneri kei ari huwo toubi ningchaleiyo? Keiri nai karngeibi klei thimi heihakri nimak, heiya louningpilak! Nai karngeibi klei thimi heiri keihilla hungeirouhui, heirou keiri Aihorei khorkhangya lhukpiyakhi kallonamak.’

26 # Laa 107.20. “Bi arou Dunpuya khrumbi klei, Abrahamyei yu-cha keiyei palui Israelrap heirou Gentilerap, na nammakhi: angtu kalpinei paolaa ari kanungei yenpiwurlame! 27Kouweiyo toulanungri Jerusalem'rei klei thimi rapkhi heirou yaya ruipipu rapnekhi, A heiri Kalpipume touri mukhoumak, heirou Mathrilna Tlainiserrou sherthutbi klei thimkhui rapbei tlourap heikhi mu'tlungkhoumak. Heiya hoiyanungkhi yane Jesuya klah dayerkur heiwane thimkhui rapbei yunthutkhou tlourap heiya chimni hungtlungyerkur. 28#Mt 27.22-23; Mk 15.13-14; Lk 23.21-23; Jn 19.15. Heitoubi yane Aidoura hatkur kyayei klal koukhatkhi phamanungkhi, yane Pilate'ya shunbi, aya hatnanungei tlou dayerkur. 29#Mt 27.57-61; Mk 15.42-47; Lk 23.50-56; Jn 19.38-42. Heirou yane Khyingei Lailikrei Aiyei ngamrou yunthutkhou namma heiya touwurchi hillouri, yane aya heeng karbakrouwei lousundawurbi heitoubi lhanrilla phumkur. 30Heiya Dunpune Aya khirouwei ringthutyerkur, 31#Pao 1.3. heitoubi Ane Galilee'rouweine Jerusalembil, Akou pulne chamalna thimi rapnungei muyerkur. Yari asinung Israellei thimi rapnung tlou mayungpi thimirap khoine leileihui. 32Heini kari bi arou nanungei Lhangai Pao-laaya shunthutpina'nungei mayungpilei: Dunpuei tounung lhouya kai patar rapnung tlou kantomkhoupi heiso, 33#Laa 2.7. asinung Ane yai yu-charap kanungei Jesu'ne khring chaanra ringthutbi lhou toupiwurla. Laa lailik bom khintamrou mayekurnakne: ‘Nangri keiyei Chanapawame; angturi kei neiyei Pa hoiyura.’ 34#Isa 55.3. Heirou ayari kouniroukhi lhanrilla churyermakne, khirouwei ringthutyernei ngamrou Dunpune atoubi yunkhou: ‘Keine David'nung khyingne heirou chimni tlou kantompikhou phor heiri keine neinungei yulmakne piheirou.’ 35#Laa 16.10. Heirou ane Laa lailik bi khatrakhi atoubi yunthutkhou: ‘Khyingei makatkur Neiyei shok heiyari nangne lhanrilla chulyermakrou!’ 36Kouweiyo toulanungri, David'ne aiyei chaanrou Dunpuei kningyadik toukhou, heitoubi ari hiyura heirou ayari aiyei patar raple pulne phumkur, heirou aiyei sharung heiri lhanrilla chulmaangkur. 37Heiya heinaksiri Dunpune khirouwei ringthutyerkur heiwayei dourari thukkhoumak. 38Keiyei palui Israellei thimirap, kane naya muyerkni touri, kane nanungei shunthutpikur borhya kukpinei paolaa ari Jesuei ngamthilme; 39heineri huhune aya uklum thimi kantangya, Moses'yei Tloulamni kukpichangmak borhkhi kukpiwurbi chimyerpikur. 40Heiyanungri, thimkhui rapbei yunthutkhou tlou heiri naidoura damaknanungei nane mukheine toulaklo: 41#Hab 1.5. ‘Thilak, lhou hoimak thimirap! Nari chimathunnura, heitoubi himaangura!’ Kouweiyo toulanungri angtu keine nanungei kounaksi lhoukhat toupibikhi heirou thimi hukhatnekhi lhou heiya nanungei yunpibikhi nane uklumpimakrou!”

42Heitoubi Paul'le Barnabas'ne Pukhrumna cheem horkhoubi shaalkur heirouri, thimi rapne yaya hanui kallengne, thangei Mathrilna Tlainiroukhi kallenglhakbi heinaksi ngammei tlou nammaya marnopinanungei ungthu. 43Thimi rapne kartilnarei karkhaikur hillouri, Paulle Barnabas yakhuntayei hilla Jehudiyei tharmura hollhakkur Gentile raple Jehudirap chungne heichanthungkur. Paocha thimi rapne yaya Dunpuei kringpinara chutmakne leinanungei yaiukning thoubaangpikur.

44Heitoubi thangei Mathrilna Tlaini'roukhi khukarthillei klei thimirap namma yaochilhangni Dunpuei tlouya wanengkur. 45Heirou Jehudia rapne thimi chungne kartilbi klei heiwaya muwurnarou beimakne hortheekur; heitounei ngamrou Paullei tloukyun heiya yane ninglhakpimakkur, heirou yane aya khremkna'nekhi yunpikur. 46Heiya Paul'le Barnabas'ne chikhi naimakne yunbi marnopikur. “Dunpuei tlouri lamkrine nanungei shunthutpibom thuk - Heiya nane kaikyun tlou aya yapimakkurnei heirou naimsha naitamya khring chaanra leinanungei nane lhouhoimaknei ngamrou, kane naya lakkurkhoubi heitoubi Gentile rapnung charouwa. 47#Isa 42.6; 49.6. Kouweiyo toulanungri Dunpune kanungei piwurkhou chayri asitoubi leilei: ‘Keine naya Gentile rapnungei kwaar hoiyerwurla, heiyei ngamni tlaipangpal nammaya kalpi phayerrou!’ ”

48Gentile rapne kyuntlou heiya mayeknarou yane beimakne nungwaiwurbi Dunpuei paolaaya duine mathangpikur; heirouri khringchaanya phananungei khalthutpikur thimirap ya namyerwakhi Dunpuya uklum thimirap hoikur.

49Heisi toubi Dunpuei paolaa heiri ram heiyei lhunglim-daamlim karyoune shunthutkur. 50Heiya Jehudi rapne khukarthil heirou klei lhou'ur laa'urpu rapya, heirou thrai khrumnara choune rikrai khrumrilbi klei Gentile rapbei napuiya rapya hutshimbi, heitoubi yane Paulle Barnabas'ya manbine klah-knang pikur, heitoubi yai ram'rouwei hulthutkur. 51#Mt 10.14; Mk 6.11; Lk 9.5; 10.11. Heitounei Paocha rapne bi heirou klei thimi rapya yanimaknei ngamrou yai homairei rahui makhawurkhou, heitoubi yane Iconium'ranung chakur. 52Heirou Antioch'rei leithungkur uklum thimi rapne beimakne hakraoni heirou Lhawai Khyingne thimbi leikur.

Currently Selected:

PAOCHA 13: MARIBSI

Highlight

Copy