PAOCHA 12
12
Marhotbi Klah-knang Duine Pikur
1Kheen heirouri Krung Herod Agrippa'ne Churchyei thimi rapya marhotbi klah-knang piyoukur. 2Ane John'yei naowa James'yakhi manbi shon'ne shaat'hatkur. 3Aitoukur lhou heirou Jehudia rapne mathangpileime toubi munarouri ane Peter'yakhi mannanungei chakur. (Lhou heiri phri yaomak mumtol shainei Knei tlainirou thukkur.) 4#Hoy 12.1-27. Heirouri Peter'ya manbine kulrilla chalphopkur, heitoubi thimi napung phali-phalini pulbi ya raalluirap rul phaliyei hutra pilhakbine ngaakyerkur. Knei tlunnei tlaini hillouri aya urthutbi khulpam maibongra tlou darnanungei wairaangkur. 5Heisitoubi Peter'ya kulla chalphopbine khoukur, heiya Church'yei uklum thimi rapne anung'tlim Dunpunung krakne shunchapikur.
Peterya Kullouwei Malhetthutpikur
6Heirou Herod'ne aya thimi rapbei maibongra urthutrou touniyei masanung, Peter heiri aya ngaakbi klei raalluirap napung-khniyei tlakra ipbi klei. Heirou ayari thirrui khintamni msuiphopkhou, heitoubi kullei shumtrumra raallui rapne kngaak. 7Tallengne Dunpuei Thangring khatne shumtrumra mayungbi, heirou kulrilla kwaar khatne alyerkur. Thangring heine Peterya lhabangra umbine heifyoukur, heirou atoubi shun, “Khrangni kanthouwa!” Heirouri tallengne Peterrei hutrumrei thirrui msuiphopbi klei heiwari lupsundakur. 8Heitoubi Thangringne shun, “Neiyei shintlakrui raakbine heirou khorkhangkhi tunglhaklaka.” Peter'ne shunkur heinakrim loutoukur, heirouri Thangringne hanui shunthu, “Neiyei linglikchul nalhakbine keihilla heichanthunga.” 9Heirou Peter'ne kullei pura wathukkurbi, Thangringei toukur heiri kouwo toukhi mukanremakne aihilla heichanthungkur; heirou aneri rmong-chamaya mukurrasane toubi ningchakhou. 10Yane lamkriyei shumtrumkhi, heirou khintamtlung shumtrumkhi heiraallurbi, heirou watong khukarthil lhangrei thirrei thungkhaibi klei shumtrum heisibil wathukkura. Heirouri shumtrum heikhi yanungei aitam loulaatkur, heirouri yane pura wathukkur. Heitoubi yane khullamra heisi yuthukkur heirouri tallengne Thangring heine Peterya lakurkhou.
11Heirouri Peter'ne anungei thukkur heiya ningmuwurbi, ane kyun, “Asinungri keine mula touri, awari chimhak hoiyura! Dunpune aiyei Thangringya yenmalhetpibi keiya Herodei hutrouwei heirou Jehudia rapbei kning lhourouwei kalthutnanungei hoikurralei.”
12Anaksi trum arou ane lhangaine ningthutdurbi, heitoubi Mark toubikhi ung Johnyei pui Maryei cheemra, thimirap chungwane kartilbi anung'tlim shunchabi louleina bi heitamrou ane wachangkur. 13Peter'ne maishukrei cheemkharya umbi heiungnarou, aiyei minri Rhoda toubi ung shok nangaka heiwine aiyei heiungya lourulkur. 14Heirou ane Peter'yei houya louyekmanrenarou ane haraowurbi cheemkharkhi laatpimakne hanui chankallengurthubi, ane ‘Peter'ri cheemkhar pura mayungbi leileime’ toubi hungshunpikur. 15“Nangri moknachu napuiya hoikurraleime!” toubi yane aya loushunkur. Heiya ane ‘Tanghakme’ toubine loumallangkur. Heitounei yane loukyun, “Heiri aiyei thralwang hoikurraroume.”
16Kheen heinungri Peter'ne cheemkhar umbi heiklei. Hillouri yane cheemkhar loulaatpikur heirou yane aya loumunarouri beimakne ngakkur. 17Heitoubi ane yaya mulleiyalo toubi aihutne heimartukur, heirou ane kousitoubi Dunpune kullouwei ruithutpikurro toubi yanungei khminni yunpikur. “Thukkur lhou aya Jerusalemle heirou uklum thimirap nammanungkhi shunpilaklo,” toubi kyun; heitoubi ane yaya lakkurkhoubine bi deiranungei chutkur.
18Heirou ningshun nung katwaarkur heirouri, raallui rapbei hangra ‘Peter'nung kouya thukkurrawo?’ toubi bibalkhi naimakne tamungbi leirilkur. 19Heirouri Herodni Peterya raphananungei chay pikur, heiya yane aya rapha mumakkur. Heitounei ngamrou ane raallui rapnung tlou darbi heirou yaya hatnanungei chay pikur.
Heirouri ane Judea ram lakkurkhoubi heirou ane Caesarea ramra kheen beicha leiwurkhou.
Herod Hikur
20Kheen heirouri Herodni Tyre'le Sidon'yei thimi rapya beimakne malungkhakur, heitounei ngamrou yane rulkhat khoine bungbine aya murilnanungei wakur. Lamkrine, Krungkullei kngaakpu hoibi klei Blastus'ya manelbine, yaya trungpinanungei buchakur. Heitoubi yane Herod'nung wabi, heirou aya yingnanungei buchakur, ngamri yairam heiri chamainung murchak namma Krungei bom'rouwei phabine klei. 21Heirou Herodni tlainikhat khalthutbi, heirou aiyei Krungei shambya mansambine, heitoubi Krungbom doura ombine thimi rapnung ane khulpaokhat chaikur. 22“Kyun ari thimi nimak, heiya thraiyei tloume,” toubi thimi rapne ungraobi kyun. 23Heirouri tallengne Dunpuei Thangringne Herod'ya umtluilhakkur, koungameiyo toulanungri ane Dunpuya rikrai khrumpimak. Heirou aya khlungne shaiwurbi hikur.
24Heiyei kheenroukhi Dunpuei Tlou heiya karholne shunthutbi heirou duine tangbaangkur.
25Heirou Barnabas'le Saul'ne yai Paochanei lhouya churchibi heirou John Mark'ya ruilouheibi Jerusalem'ra yenkallengkur.
Currently Selected:
PAOCHA 12: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
