PAOCHA 11

Jerusalemei Church'nung Peter'ne Pao Hungtampi

1Paocha rapnekhi heirou Judeaei ram karyouei klei uklum thimirap deideinekhi Gentile rapnekhi Dunpuei Lhangai Pao-laaya loulhakurlame tounei pao heiri mayekkurla. 2Heirou Peter'ne Jerusalem'ra yongeinung, Gentile rapyakhi mur dinyerkne Jehudi rapne anung tlou yeetbi loukyun, 3“Nangri murdinmak Gentile napawa khatdei cheemra chaklhakkhou mal khat khoine akou chamainung murchakkhi kallunrilkur napawa khatme!” 4Heitounarou Peter'ne yanungei tirrei waiyoubi thukkur lhourapbei ngamrou namma tlungne shunthutpikur.

5“Keine Joppayei khukarthilla leibi shunchayei kaalnung, keinungei kar'anyerbi mu'kyer khat leikhou. Nungthou lhangrei phiyeng khat, chithek phalitamra shinphopbi yukmalansundabi keipongra yongdakur keine loukmu. 6Heirouri keine pongra karsilni wachangbi khminni thinarouri, heiyei rillari cheemrei heirou ramrei yaalim-waalimkhi heirou frullim heirou ukni tulcha limlimkhi loukyao keine mukur. 7Heitoubi houkhatne atoubi yukshunkur keine loumayek, ‘Peter, kanthouwalo; heitoubi yaalim-waalim heirapya hatbi mailaklo!’ 8Heiya keine loumallangkur, ‘Keiri heinakya toumakkeise, Puwo! Ngamri thrailhou tounara kyao yamak, borh heirou hyingmak chamaiput heiri keiyei chaanrou tekchakhi chamaimakhuime.’ 9Heirouri hanuikhi Thangmunrei houkhatne yukshunthu, ‘Dunpune marthingyerkur namma heiri borhme toubi ningchamak.’ 10Heisitoubi khyumbuirek thukkur, heitoubi hillouri put namma heiri Thangmun lhangra hanui taangbaangurthu. 11Trum heihakrou Caesarea'rouwei keiyei leinaranung heimalhetkur napawa napung khyum heine, keine tlungbi klei cheem heirou wa'tlungkur. 12Heirou keine koukhatkhi khalcha'kna makne yakou kalhonbi chananungei Lhawaine keinungei shunpikur. Uklum thimirap ya napung thrukkhi keikou kalhonbi Joppa'rouweine Caesarea'ranung wakur, heitoubi ka nammane Corneliusyei cheemra wachangkur. 13Heirou ane kanungei pao loutampikur touri Thangring khatne aicheemra mayungbi anungei tlou shunpikur, ‘Jopparei klei Simon Peter toubi ung napawa heiya wa'ungnanungei thimi khat heiyillaklo. 14Heirou ane neinungei tlou shunthutpirou, heitoubi aiyei shunthutpikur tloulhangrap heine nai bommai namma kalpi phayerrou.’ 15Heirou keine yanungei tlou heiya yunpi waiyoukurle, haallei kai phakurnakne, yaidourakhi Lhawai Khying yongchumpikur. 16#Pao 1.5. Heirouri keine Dunpuei yunpiwurkhou heiya ningthutkur: ‘John'ne yuira lupkhoupi, heiya nari Lhawai Khyingra lupheirouhui.’ 17#Pao 10.1-48. Lhou ari kandangni muyerpila touri kane Pu Jesu Christaya uklumyeinung Dunpune kanungei piwurkhou Lhawaiyei hutthul heinakrimne Gentile rapnungkhi piwurla. Heiyanungri, Dunpune lhou toupikurya toudongyerrou thimi kei ari huwo?”

18Yane kyun heiya mayeknarouri, yane tlou loukyeet dongurbi heirou Dunpuya mathangkur, heitoubi yane atoubi kyun, “Heiyanungri Dunpune Gentile rapnungkhi tlakcha trum heiya piwurbi yane ukning hungurbi heirou yane ringheirou,” toubi kyun.

Antioch'rei Klei Church

19 # Pao 8.1-4. Stephen'ya hatdei kaallei marhotnarei trukchekkur uklum thimirap thane, Jehudia rapnungtom lhangai paolaa shunthutmalom, Phoenisia, Syprus, heirou Antioch'rakhi chakur. 20Heiya Syprusle Syrene'rouwei uklum thimirap thane Antioch'ra chawurbi, Gentile rapnungkhi lhangai paolaa shunthutpibi, yanungei Pu Jesuei ngamrou Pao lhangaiya shunthutpikur. 21Dunpuei mantrangne yaidoura kalhonpikur, heitounei yane thimi chungne Dunpuei lhangra kalleklhakbi uklumkur.

22Heiyei ngamrou pao heiri Jerusalem'rei klei Church'rakhi hungtlungkur, heitounei yane Barnabas'ya Antioch'ranung katmalhetkur. 23Ane bi heirouri, Dunpune thimi rapnung phor pikur heiwaya munarou, aiyei ukningra beimakne nungwaikur, heirou ane thimi rapya Dunpura malungamkna khoine, heirou yai ukning heiri Dunpura chimni leinanungei toubi shunchakur. 24Barnabas'ri lhangai thimi heirou Lhawai Khyingne thimbi klei uklum thimikhat khoi, heitounei ane thimi kounakya Dunpura ruilhakpikur.

25Heitoubi Barnabas'ne Tarsus'ra Saul'ya rapharou toubi kakur. 26Heitoubi ane Saulya rapha mubi heirou aya Antioch'ra yenruimallengkur, heitoubi heiyei kum yenhol phane yakhune Churchyei thimi rapya murilbi, heirou thimi chung rapnung shunmatupikur. Antioch khukarthil heirouei uklum thimi rapya Christenrap toubi ungyoukur.

27Heiyei kheenrou Thimkhuirap thane Jerusalem'rouwei Antioch'ra kakur. 28#Pao 21.10. Yaihangrei napung khat, aiyei minri Agabus toubi ung napawa heiwane Lhawaiyei mantrangne, tlaipangpal karyoune purvi-purcham#11.28: purvi-purcham: Chaaktaang thukkurbi koukhatkhi chamu-maimumakne leikur. thukeiroume toubi yunthutkhou. (Tlou heiri Claudius'ne Krung hoiyei kaalnung hungthukkur.) 29Heirou ruishik rapne yunrilkur touri thimi kantangne ai'aiyei manecha hilthungne, Judea'ra klei uklum thimi rapnung kleiyei mkhei manthunpina'nungei toubi darilkur. 30Heisi toubi yane tuy markumbi Barnabas'le Saul yakhuntaya malhetbine Church'yei upa rapnung manthunthungkur.

Currently Selected:

PAOCHA 11: MARIBSI

Highlight

Copy