PAOCHA 1

1 # Lk 1.1-4. Malungshi'kna Theophilus:

Keiyei lamkri lailikra Jesuei khul'lhou waiyouna'rouweine Aya Thangmunra loubaangkur bilyei, 2Aiyei touwurkhou heirou shunmatupikhou namyerwaei ngamrou keine mayewurla. Thangmunra loubaangei kalnung Aiyei Lhangai Pao-laaya urnanungei khalthutkur Paocha thimi rapnung Lhawai Khyingei mantrangne shunmatupikur. 3Ngamri Ane klah-mrim kounakya douwurbi hiwurnarei ringthutkur tlaini somliniyei rillou Ane Paocha thimi rapya Ai'mshahak khirouwei ringthutdurame toubine mu'kna hutlharap kounakne yanungei muyerpikur. Heitoubi yane Aya muwurbi heirou Ane Dunpuei Krungramei ngamroukhi yanungei shunmatupikur. 4#Lk 24.49. Heirou yane pulne kartilbi leiyeinung, Ane yanungei chay piwurkhou: “Keine nanungei shunpikur, Pawane piroume toubi kantompikhou hutthul heiya phabongyen, nane Jerusalem'rouwei chutdurmakne louleiyalo. 5#Mk 3.11; Mk 1.8; Lk 3.16; Jn 1.33. Ngamri John'ne yuira lupkhoupi, heiya tlaini bei leibi nayari Lhawai Khyingra lubpiheirou.”

Jesuya Thangmunra Loubaangkur

6Heirou yane Jesukou pulne leiyeinung Anung kngai, “Upawa, Nangne Israel rapbei Krungram heiri asinung mallenglhakyerrouko?”

7Jesu'ne yanungei loushun, “Keiyei Pawayei kningne kartinkur trum heikhi, heirou tlaini heikhi nane mubom thukmak. 8#Mt 28.19; Mk 16.15; Lk 24.47-48. Heiya Lhawai Khyingne naidoura yongeinung nane mantrang pharou, heitoubi nane Jerusalem'ra, Judeayei ram bi kantangrou, Samaria'ra, heirou tlaipangpal wadongnabil phane Keinung'tlim tlou mayungpi thimirap hoipiheirou.” 9#Mk 16.19; Lk 24.50-51. Atoubi yunhillou, yane heisi thimanthrambi leiyeinung, Aya ramei doura Thangmun'ranung loubaangkur, heirouri rameini mallewurbi yane Aya muphamakur.

10Heirou yane aiyei kanthumbangkur heiwaya yaimitne heisi Thangmun lhangra thimanthrambi leiyeinung, khngou shamb mansambine napawa napung-khnine yaipongra mayungbi, 11heirou yanungei heishun, “Galilee'yei thimirap, nane kounungei mayungbi nungthoura thimanthrambi leikurawo? Naihangrei Thangmun'ranung urbaangpikur Jesu'ne Thangmunra kakur heinakrimne hanui yenkallengya nane loumurou.”

Judas'yei Rungkhlangnung Khalthutkur Napawa

12Heirouri Paocha rapne Mathrilna tlaini khatdei lam tlanayei mal tlatrilne klei Olive lhungdou'rouweine Jerusalem'ra yenkallengkur. 13#Mt 10.2-4; Mk 3.16-19; Lk 6.14-16. Heitoubi yane khukarthil rilra hungchangbi, Peter, John, James heirou Andrew, Philip heirou Thomas, Bartholomew heirou Matthew, Alphaeus'yei chanapawa James, Zealot ‘Pukna ramya malungshine lhawai kyaone lhoutou thimi’ toubi ung Simon, heirou Judas'yei chanapawa James ya namyerei louleina cheemmei shangkai dourei bomthora kakakur. 14Ya nammane pulne, napuiya raple Jesuei pui Mary'le heirou aiyei teinao rapne karyom kartilbine shunchabi leikur.

15Heirou tlaini bei leibi, uklum thimirap machale somniyeimal kartilna bi heirou Peter'ne mayungbi kyun, 16“Keiyei teinaorap, ane lamruibi Jesuya manheirou toubi Judas'yei ngamrou Lhawai Khyingne David'nung yunthutkhoupi Khyingei lailikra mayewurkhou heiri chimni hungthukkura. 17Judas heiri kaihangra yaokhou napawa khat, ngamri ayakhi kakou pulne lhou churnanungei khalthutkhou napawa khat.”

18(Judas'ne aiyei lhangaimak lhou toukhounei phakur tuy heine phaikar khat lokhoubi, heitoubi ane phaikar heiyei tlailamra lushidingne uk datrekurbi khrilrang thukbi hikur. 19#Mt 27.3-10. Jerusalem'rei klei thimirap nammane pao heiwaya mayekkur, heitounei ngamrou ram heiya Hebrew tloune ‘Akeldama’ touri ‘Heeyei phaikar’ toubi ungkna.)

20 # Laa 69.25; 109.8. “Kouweiyo toulanungri, Laa lailikra atoubi mayekhoulei, ‘Aiyei cheem heiri hangwalne leiyurasu; heirou thimi hukhatnekhi cheem heirou leimakneyasu.’ Asitoubikhi mayekhou leilei, ‘Thimi napung khatne rungkhlang changbi aibomya loulaksu.’

21“Heiyanungri thimi napung khatne kaihangra yaobi Pu Jesuei ringthutdurnei ngamrou tlou mayungpi thimi hoiniyasu. A'heiri, Pu Jesu'ne kakou kalhonne chabi leikhouwei kheenrou, 22#Mt 3.16; Mk 1.9; 16.19; Lk 3.21; 24.51. heirou John'ne aiyei yui lubpinei paolaaya shunthutpinarei waiyoubine Jesu'ya kaihang'rouwei Thangmunra loubaangkur tlaini phane, kaihangra karyom pulne chanthungcha thimi hoirou da.”

23Heitoubi yane aiyei min Barsabbas#1.23: Barsabbas: ‘Justus’ toubikhi mu'kna. Joseph'yale Matthias yakhuntaya khalbangkur. 24Heitoubi yane Dunpunung, “Dunpu, thimi napung kantangei ukningri Nangne muchilei, heine yakhuntayei tlakra Nangne hukhatya khalthutbine, 25kaya lakkurkhoubi aiyei bomra kallengkur Judas'yei rung'khlang khoine paocha thimi khatdei lhou churyerkniyo kanungei mutpilaklo.” toubine shunchakur. 26Heirouri yane yakhuntayei tlakrouwei hune likarsui lhangai hoileiyo toubi meirui thinarouri, Mattiasya khalthutdurbi, heirou paocha thimirap napung chiple khatdei hangra ayakhi yaoyerkur.

Currently Selected:

PAOCHA 1: MARIBSI

Highlight

Copy