RAPHA HIQWA LAK 21

Isak Rawiichhi

1 Tatiwe raq akiq kham kuqtaq kra phan phan Sara ma shiiman kuqto. 2Kiimaq apaiq ka wiihan she riito. Raüta ase maiqwe se ashi Abraham ma tikiija na humkuqto. No ka Shiikeawe raq rawiichhi akhing chongkuqtaq kra akhing riikhaqli na humto. 3Abraham raq no ka Isak nguta mangto. 4Kiimaq Isak ka ratiichat maiq she angu na, Shiikeawe raq aming kuqtaq kra phan phan Abraham raq athohan poi ka klo kuqto. 5Isak rawiichhi akhing na Abraham ka rawii shishi maiq she riito. 6Sara raq nguto, “Shiikeawe raq ngi ma chochi tiisaüto kiimaq atiinai riito. Ara tsütsa ara juro taitlaq kriiti ka ngi rai anai mirdam.” 7Kra ngu raüta apaiq raq tiitsuqsaq nguto, “Abraham ma Sara raq asetiim miboq pum ngutiika juwero ngulot ta? Kra taü miidea min ngi raq apaiq tikiija na ase maiqwe se ashi humkuq kang.”

8Kra no ka chhanchhi wanto. Kiimaq no raq dungsea pha akhing ranaiq na, Abraham raq phaqsea poi jonghea kloto.

Hagar Nai Ase Ishmail Ka Jobaiqto

9Ranaiqshi Sara se Isak ka Abraham tanyung Ejip mung shea Hagar lümaq ahum Ishmail rai atiitsa sea riito. 10Sara raq tsangnai ka chhito. Kiimaq Abraham ma akha nguto, “Ara dinyung nai ase ka ahin na tiikibaiqlaq. Ara dinyung se raq ümtachong hupsam ise Isak rii kriiwa akhiismin lap dam mai mak.” 11Ara ngukiita Abraham ka kai shiweato. Jamkhano ngukla Ishmail kiimin apaiq se sii. 12Shatmaq Shiikeawe raq Abraham ma nguto, “Kra no miitu nai ümdi nyung Hagar miitu ka ümnaq phongno chaparai chang jammin ahü. Sara raq jamlai wa chongtlaq kra tailaq. Jamkhano ngukla Ngi raq ümniima ümlai ümla mikuqha nguta kiqkham kuq kang kriika Isak lummiitiq mikuqha. 13Kiimaq Ngi riika di nyung se kra miimin asetiim ka pahea mikuqha. Krai mren tsangshiq kiimin maiq mung ashi ma mijawan. Apaiq kiimin la ümse sii kata.”

14Kriimaq napjai ranap chu maq Abraham raq Hagar ma phaq nai sea wiijam kuqto. Kiimaq kham ka ngamkhii tsabum shi kuqto. Raüta apaiq raq no ka anyung raikhü na tiiboqto. Raüta apaiq ka jamwa tiiki baiqto. Kriinyung ka kihoto. Raütiishe Beersheba kumtsaiphii wang binjü niishe momiihoto. 15Ümtiikiiwa kham ka wiita thumkitaq, apaiq raq no ka nyiimtam chong se tiiwong na baiqthüto. 16Raüta kriimaq mitar shishi tin khan loq na ngakito. Raüta apaiq nai apaiq ka akha tiingoto, “Ngi raq ise tsai wan ka liilot mang.” Raüta apaiq ka kiijaq nga raüta aho she riihoto.

17Shiikeawe raq no horai ka taito. Kiimaq ramungtan maq Shiikeawe rase raq Hagar rai riibomto, “Hagar lei, ümniika jamlai mo chapa tlaü? Naqhaikiq. Shiikeawe raq no horaitlaq kra taito she. 18Tiidolaq. Laüta no ka ümjaq na dolaq. Laüta apaiq ka tlinlaq. Ngi raq apaiq lai ala phan kiiwa maiq phan jonghea ashi mitiijaha.” 19Raütiishe Shiikeawe raq apaiq mak ka tiipiiq kuqto. Kiimaq apaiq raq khappong ashi chhito. Kiimaq apaiq ka kihoto raüta ngamkhü tsabum na kham ka mali tiimato. Raüta nono ma kham ka wiijam tiinyangto. 20Shiikeawe ka kra nonose krai asi riito. Kiimaq apaiq ka chhanchhi wanto. Raüta apaiq ka paran kumtsaiphii binjü na shongto. Kiimaq apaiq ka ngamhiip laqkong jong miishe jawanto. 21Anyung raq apaiq miitu Ejip mungti shea nyungshi lamkuqto.

Abraham Nai Abimelekh Liipan Na Tongshongto

22Kra akhing na Abimelekh ka apaiq phentu jongwe pinthum Phikol rai kiraüta, Abraham ma nguto, “Ümniiraq phanrap jaqsham tlaü na Shiikeawe ka ümniirai asi. 23Kra ningkhan ümchaü ümniiraq Shiikeawe man na, ümniiraq ngi ka kiimaq isetiim ka, kiimaq isaütiim thun kra laolii maü mirhaü nguta sinkhamlaq. Ngi ka ümniirai silu riija ramkhap toshat maq siwan kang. Kiimaq ümniiriimin silu riija ramkhap ka ngi ma thüshat silaü kiimaq ümchaü ümnaq sitlaü armung arma toshat mithüha nguta kiqkhamlaq.”

24Kiijiishe Abraham raq treto, “Ngi raq khamkuq tiikang.”

25Kiimaq Abraham raq Abimelekh ma khappong ashi ka apaiq sengi raq nyeahoto nguta shokto. 26Abimelekh raq treto, “Kriika jurwa klota ngi raq sap mang. Ümniiriimin ngi ma chong maü dea. Kiimaq ngi riika ümchaütiq taitiikang.” 27Kiijiishe Abraham raq Abimelekh ma sku kong wiijam kiimaq minsaü kong wiijam kuqto. Raüta tsangnai wenai raq tsangnai liipan na tongshong kiqkham raüpot she khato. 28Abraham raq anyamse kong phong wa sku aransetiim miishi ka pong na tseato. 29Kiijiishe Abimelekh raq apaiq ma waito, “Arka jamlai riimo tseatlaü?”

30Abraham raq treto, “Ümniiraq ara sku ransetiim miishi ara taolaq. Ara tao laüta, ara khappong arka ngi Abraham riidea thukang nguta tri ka shat laq.” 31Kra ningkhan kra hiqshong ka Beersheba ngutiishe mangto. Jamkhano ngukla kra hiq shong ba maq tsangnai liipan na sinkham raüpot ka shatto.

32Tsangshiq raq ara Beersheba hiqshong maq silu riija sinkham raüpot kra shatthü lot raütiishe, Abimelekh nai Phikol ka tsangshiq Philistain mung niishe hali jang wanto. 33Raütiishe Abraham raq kra Beersheba hiq shong na Tamarisk pechong se ashi chhito. Kiimaq Tatiwe, Pattup Pat-sa Shiikeawe kra shomnoqto. 34Abraham ka Philistain mung na rawii luhea shongthüto.

Currently Selected:

RAPHA HIQWA LAK 21: TANGSBSI

Highlight

Copy