RAPHA HIQWA LAK 22

Shiikeawe Raq Abraham Ma Isak Ka Honglu Na Kuqlaq Nguta Aming Kuqto

1Kra jai maq ashaqpuq sijai na Shiikeawe raq Abraham ka maitaito. Apaiq raq Abraham ka heato, “Abraham!” Kiimaq Abraham raq treto, “O, ngi ka ajiilii!”

2Shiikeawe raq nguto, “Ümse ka shea wanlaq. Ümse sekhuq laq laq se Isak kra, ümniiraq pinthum lungwiitlaü kra. Laüta Moria wang kiina walaq. Kiijaq Ngi raq hiqlam ashi ümniima mitiichhikuq kang. Kiijaq apaiq ka Ngi ma honglu na takuq laq.”

3Kriimaq napjai ranap na ranap chumiili Abraham raq honglu chaq chang chin ka thamto. Raüta akumtoq kaü raikhü na miito. Raüta apaiq rai Isak kiimaq ajaqshise wenai kra shea wanto. Raüta tsangshiq ka apaiq ma Shiikeawe raq chongtaq hiq ba kiiniishe wawanto. 4Ranaiq tsam wajai she Abraham raq kra hiq ba ka aluwiq na chhito. 5Kiijiishe apaiq raq ajaqshi se nai kriima nguto, “Namnai ka arjiili kumtoq kaü krai kheli ronglaq. Nono nainai ka kiina walaita noq waphai. Laita nainai ka arjaq namnai phana mijangkikai.”

6Abraham raq honglu na chaq chang chintei ka Isak ma tiipito. Kiimaq apaiq riika ajaq na jasai ashi kiimaq wathiqtei kriiri wa chaq phaho chang kra pito. Tsangnai ka adam na awarai lam maq, 7Isak raq nguto, “Iwe lei!”

Apaiq raq treto, “Ise lei, jawa?”

Isak raq waito, “Iwe lei, ümjaq niika wathiqtu nai chintei ka asi. Shatmaq honglu na taakechang skuranse ha ümbano?”

8Abraham raq treto, “Shiikeawe apaiq riitiq skuranse ka mikuq.” Kiimaq tsangnai ka adam na wawanto.

9Tsangnai ka Shiikeawe raq chongtaq hiq ba niishe saüto. Kiimaq Abraham raq kiijaq berong-wacha ka haito. Kiimaq chin ka kiijaq aheawiq phongto. Raüta apaiq raq ase ka raü maq khato. Raüta kra berong-wacha na chin phongtaq kriithaq na Isak ka tiibumto. 10Raütiishe apaiq raq Isak ka shukbaiq ma jasai ka tsunhit she riito. 11Shatmaq Tatiwe rase raq ramungtan maq apaiq ma akha riimto, “Abraham, Abraham!”

Apaiq raq treto, “Oi, ngi arjaq lii.”

12“No dü na jaq naq miiqkiq. Kiimaq apaiq dü na naq tiimitsikiq,” nguta apaiq raq nguto. “Ümchaü ngi raq sapkang she, ümniiraq Shiikeawe ka shreng tlaü. Kiimaq Shiikeawe aming ka langtlaü. Jamkhano ngukla ümniiraq ümse sekhuq laq laq se ka khun nü maü maq ngi ma kuqlaü.”

13Kiijiishe Abraham raq apaiq tro na liito. Riikiita skure se nyiimtam rum na arong maq akanrai kra chhito. Kiimaq apaiq ka kiraüta lapkito. Raütiishe ase rii na kra honglu na wiipumtam-chaqtlii takuqto. 14Abraham raq kriiba ka “Tatiwe raq kuqtlo” nguta mangto. Kiimaq ümchaü niitaq maiq raq, “Tatiwe pum niika apaiq raq kuqtlo,” nguta ngutlo.

15Kiimaq Tatiwe rase raq ramungtan maq Abraham ma thongnai ngojashe hali hea nongto, 16“Ngi raq imang chong lata sinkham tiikang, Ngi Tatiwe raq tantan ngutiikang, Ngi raq ümniika pinthum mishmanha. Jamkhano ngukla ümniiraq ara klo laü. Kiimaq ümse sekhuq laq laq se kriimin Ngi ma khunnü maü maq kuq laü. 17Ngi raq kiqkham lata chong tiikang, Ngi raq ümsaü ümsetiim ka ra na raiqsaiq jamkho diimtlaq, kiimaq khamjong chum kii na kumtsai phü na kumtsai riiphongtlaq ikha mipuchiha. Ümsaü ümsetiim phan raq tsangshiq jaqtinok thun ka mitang wan. 18Ngi raq ümsaü ümsetiim shiiman kuq kang kiikha maiq phan wiita raq Ngi ma tsangshiq kiimin shiiman kuqlaq nguta mijaü. Jamkhano ngukla ümniiraq Ngi aming langlaü.” 19Kiimaq Abraham ka ajaqshi se nai phana hali janghoto. Raüta tsangshiq tarü adam maq Beersheba na kihoto, raüta Abraham ka kiijaq shongto.

Nahor Saüsetiim

20Kra jai maq ashaqpuq sijai she, Abraham raq, Mika raq ano Nahor ma asetiim ka tiichat humkuqto nguta tsütsa ka taito. 21Uj ka chhikhuwe, Buj ka anowe, kiimaq Aram ma awe ka Kemuel, 22kiimaq Chesed, Hajo, Pildash, Jidlaph, kiimaq Bethuel, 23Apaiq ka Rebeka ma awe. Milka raq ara asetiim tiichat ara Nahor, Abraham ma anowe ma humkuqto. 24Reuma ka Nahor ma chakliip nyung. Apaiq raq Nahor ma asetiim ka Teba, Gaham, Tahash, kiimaq Maaka humkuqto.

Currently Selected:

RAPHA HIQWA LAK 22: TANGSBSI

Highlight

Copy