RAPHA HIQWA LAK 20

Abraham Nai Abimelekh

1Kiimaq Abraham ka Mamre hiq maq Kanan mung shemai nü wang niishe laühoto. Raüta Kadesh hiq nai Shur kumtsaiphii binjü niishe shonghoto. Kra jai maq apaiq ka Gerar hiq na sichoji na, 2apaiq raq tsang-nyung Sara ka ano ashea-nyung nguta tiichongto. Kra ningkhan Gerar chela Hokhamwe Abimelekh, raq Sara ka apaiq jam na tiisheakito. 3Rawashi Shiikeawe ka apaiq phana rawa ma maq tiichhikito. Raüta akha nguto, “Ümniika atsai she mirhaü. Jamkhano ngukla ümniiraq arnyung ara lam wan laü. Apaiq ka maiq ma awa wishe, maiq-nyung.”

4Shatmaq Abimelekh ka kriinyung tho na wamak shaqli riito. Kiimaq apaiq raq akha nguto, “Tatiwe, ngi ka maiqsang! Riita ümniiraq ngi nai isenginok ka mitiithen baiq haü shea? 5Abraham apaiq riili kriinyung ka ashea nyung nguta ngutaq ihata. Kiimaq kriinyung riimin kiikhiisii ngutaq ihata. Ngi raq apaiq ijam na tiisheaki kang kriika itsan tsii siirai rai maq klokang. Ngi riika jamlai min ashut klomang dea.”

6Shiikeawe raq rawa ma maq treto, “Riikhaqli, Ngi riimin ümniiraq tiima tsantsii asii maq klo laü nguta asapha. Kra ningkhan Ngi raq ümniika Ngi imakki na ngarai tiitang mang riikang. Kiimaq apaiq dü na ümjaq maq tiisham mang riikang. 7Shatmaq ümchaü maiq nyung ka tsangwe miishe jangkuqlaq. Apaiq ka shammiwe. Kiimaq apaiq raq ümnaq miitu achu mijaü kuq. Kra riihaüla ümniika tsaimaü mirhaü. Shatmaq ümniiraq kriinyung ka apaiq ma jangkuq maü riihaüla, Ngi raq ümniima hon lam bom chongtiikang, ümniika mitsai haü, ümnaq nai ümsenginok ka mijiimhan.”

8Kriimaq nap jai na ranap chumiili Abimelekh raq asengi ajong alabi thun ka tiiheakito. Raüta jamlai mra wa pintaq kriishe tsangshiq ma chongto. Kiimaq tsangshiq ka phiip raq tsaito. 9Raütiishe Abimelekh raq Abraham ka heato. Raüta akha waito, “Ümniiraq naishiq ma jamlai wa riilaü? Riita ngi raq ümniima jamlai wa riikang, ümniiraq ikhuthaq na nai imungtan thaq na atinkhan tiithen baiqli chang mra tiisaü wan miika? Ümniiraq ngi ma jamlai wa kiimung laü kriika juwe riimin kiimung mak chang kiimung laü. 10Jamlai nguto ümniiraq akhiika klo laü?”

11Kiijiishe Abraham raq treto, “Ngi riika arjiika Shiikeawe shrengti maiq ka ahü sham nguta tiima kang. Kra ningkhan tsangshiq raq ichak kra nyeaho kham ma ngi ka atsea mirbaiq sham nguta tiimakang. 12Riikhaqli miika apaiq ka ishea nyung ino dea na. Apaiq ka iwe ma ase dea. Shatmaq inyung ma ase ka riimak. Krai mren ngi raq apaiq ka lamkang. 13Kra ningkhan ümtiikiiwa Shiikeawe raq ngi ka iwe jam mong wa pong mung niishe tiiki baiqtaq, ngi raq apaiq ma, ‘Ümniiraq ngi ka ümtinkhan wa lung wiitlaü kriika, nanok maiq wiitarü ma ngi ka ümphu nguta chong lili laüta tiichhilaq,’ ” nguta chongkang.

14Kiijiishe Abimelekh raq Sara ka Abraham ma jangkuqto. Kiimaq kriithaq niimin, apaiq raq Abraham miika sku kong, minsaü kong, kiimaq disetiim kuqto. 15Raüta apaiq raq Abraham ma nguto, “Ara imungtan ara ümkhaki na asi; ümriibaniiwa siro tlaü kiijaq silaq.” 16Raüta apaiq raq Sara ma nguto, “Ngi raq ümphu ma kampho ngam phu ka hingshi kuq tiikang. Arka ümniirai maiq ümchuwa sitlaq kra makki na ümniika maiqsang dea nguta kuqtiikang. Maiq tarü raq ümniika jamshut ahü maiqsang dea nguta misap.”

17-18Sara, Abraham tanyung ma jamlai mra wa pintaq kriikha na, Tatiwe raq Abimelekh hokham jamti anyung re jechak re ma ase humlot mak she tiija baiqto. Kra ningkhan, Abraham raq Abimelekh miitu achu jaü kuqto. Kiimaq Shiikeawe raq apaiq khum ka tiihea kuqto. Kiimaq Tatiwe raq Abimelekh tanyung khum kiimin tiihea kuqto. Kiimaq apaiq disetiim jechak setiim khum kra tiihea kuqto. Krai mren tsangshiq raq asetiim humto.

Currently Selected:

RAPHA HIQWA LAK 20: TANGSBSI

Highlight

Copy