RAPHA HIQWA LAK 11

Bebilon Kongmong Chong

1Apha na mangjong hiq na siti maiqse tlotli raq bom ka phan shi li bomto. Kiimaq bomtsi thun ka adam siisaq bomto. 2Tsangshiq ka bashi na laühoho shedong mung nü na kihoto. Raüta Bebilon mung na hiq thung tan bashi niishe saühoto kiimaq kiijaq shonghoto. 3Kiimaq tsangshiq liipan na bom ka akha riichongto, “Warong ra! Nashiq raq kiitelong klo rong i. Laita watum na shu rong i atiitsin ma.” Krai mren tsangshiq raq lairap hai ma kiitelong kloto. Kiimaq kriithun ka tiipha lochang kaichangtai kloto. 4Raüta tsangshiq raq nguto, “Ümchaü nashiq raq chela ashi tei rong i. Laita kra chela na kongmong chong ashi ratsan na saüli hai rong i. Kra laita nashiq maiqmii mang ka tiijong rong i. Kra riihaila nashiq ka mangjong hiqraikhü na riinyinki mai miraq.”

5Kiijiishe Tatiwe ka chela kra nai tsangshiq raq ahai kongmong chong kra liikai satkito. 6Kiimaq apaiq raq akha nguto, “Riita ümchaü min arnok arka maiq phan phanshili kiimaq tsangshiq raq bom ka phanshili bomtlo. Arka tsangshiq raq phanrap miklo lot kra kiimung pha wan she ahata. Jaqlo liipan niili tsangshiq raq jamlai wa klo rotlaq kriika wiita miklo lot she! 7Nashiq ka satki rong i. Laita tsangshiq bom ka triishot baiqki rong i. Raüla tsangshiq liipan na bom ka weshi raq weshi bom ka taimak she miraq.” 8Krai mren Tatiwe raq tsangshiq ka mangjong hiqraikhü tlot li na nyinbaiqto. Kiimaq tsangshiq raq chela tei wan ka athaq riibaiqto. 9Kra chela ka Bebilon nguta mangto. Jamkhano ngukla kiijaq Tatiwe raq maiq phan wiita bom ka triishot baiqto. Kiimaq kiiwa apaiq raq tsangshiq ka mangjong hiqraikhü wiita na nyin baiqto.

Shem Saüse Phan

(1 Ka 1.24-27)

10Arthun arka Shem saüse phan. Rathup jüjang jai maq wiinai sijai na, Shem rawii ka 100 she angu na, apaiq raq ase ashi humto. Ase mang ka Arpakhshad. 11Kra jai maq apaiq ka rawii 500 hali sithü nongto. Kiimaq asetiim ka abi ri hali humto.

12Kiimaq Arpakhshad ka arawii 35 she angu na, ase ashi humto. Ase mang ka Shela. 13Kra jai maq, apaiq ka rawii 403 hali sithü nongto. Kiimaq asetiim ka abi ri hali humto.

14Kiimaq Shela ka arawii 30 she angu na, ase ashi humto. Ase mang ka Ebar. 15Kra jai maq, apaiq ka rawii 403 hali sithü nongto. Kiimaq asetiim ka abi ri hali humto.

16Kiimaq Ebar ka arawii 34 she angu na, ase ashi humto. Ase mang ka Peleg. 17Kra jai maq, apaiq ka rawii 430 hali sithü nongto. Kiimaq asetiim ka abi ri hali humto.

18Kiimaq Peleg ka arawii 30 she angu na, ase ashi humto. Ase mang ka Reu. 19Kra jai maq, apaiq ka rawii 209 hali sithü nongto. Kiimaq asetiim ka abi ri hali humto.

20Kiimaq Reu ka arawii 32 she angu na, ase ashi humto. Ase mang ka Serug. 21Kra jai maq, apaiq ka rawii 207 hali sithü nongto. Kiimaq asetiim ka abi ri hali humto.

22Kiimaq Serug ka arawii 30 she angu na, ase ashi humto. Ase mang ka Nahor. 23Kra jai maq, apaiq ka rawii 200 hali sithü nongto. Kiimaq asetiim ka abi ri hali humto.

24Kiimaq Nahor ka arawii 29 she angu na, ase ashi humto. Ase mang ka Tera. 25Kra jai maq, apaiq ka rawii 119 hali sithü nongto. Kiimaq asetiim ka abi ri hali humto.

26Tera ka arawii 70 jai miishe, apaiq raq asetiim Abram, Nahor, kiimaq Haran thun ka humto.

Tera Saüse Phan

27Arthun arka Tera saüse phan. Apaiq ka Abram, Nahor, kiimaq Haran ma awe riito. Haran ka Lot ma awe. 28Kiimaq Haran ka awe asi niili, tsanghiq shongchü Bebilon mung na Ur chela kriimaq tsaito. 29Abram raq Sarai lamto. Kiimaq Nahor riika Milka, Haranse lamto. Kiimaq Haran ka Iska miimin awe riito. 30Sarai ka sehü riito.

31Tera raq ase Abram, kiimaq asaü Lot kra sheahoto, Lot ka Haran ma ase, kiimaq anam-nyung Sarai, Abram tanyung kra apaiq rai sheaho raüta, Bebilon mung wa Ur chela kra baiqthü raüta Kanan mung na laüho nguta kihoto. Tsangshiq ka Haran hiq na saüli laühoto. Raüta kiijaq shongkito. 32Tera ka kiijaq arawii wiishinai ri wiibiingi she angu na tsaito.

Currently Selected:

RAPHA HIQWA LAK 11: TANGSBSI

Highlight

Copy