RAPHA HIQWA LAK 12

Shiikeawe Raq Abram Heato

1 Tatiwe raq Abram ma nguto, “Ümhiqshong, ümta ümwii ta-nyang seno thun, kiimaq ümwe jamkun kra baiqthü laq. Laüta Ngi raq ümniima mung ashi mitiichhi kuqha kiina laüholaq. 2Ngi raq ümniima ümsaü ümsetiim ka pahea mikuq kang. Kiimaq tsangshiq ka maiq mung jonghea ashi miishe mija wan. Ngi raq ümniika mishman kuqha. Lata ümmang ka jonghea ratsa ikha mitiijongha. Krai mren ümniika shiiman kaü ashi ma mija wan haü.

3Jurwa ümnaq shiimantlaq kriiti ka

Ngi raq mishmanha,

Shatmaq jurwa ümniima mansontlaq kriiti ka Ngi raq misonha.

Kiimaq ümnaq lümaq Ngi raq

mangjong maiqse kunli mishmanha.”

4Ümtiikiiwa Abram ka arawii wiiroq miishi ri wiibiingi she riitaq, Tatiwe raq apaiq ma chongtaq kra phan phan, apaiq ka Haran hiq wa laüho phato. Kiimaq Lot ka apaiq laüho damto. 5Abram raq tsang-nyung Sarai, ase lam Lot, kiimaq atsiiq anyam thun wiita kiimaq Haran hiq maq alap atsiiq tum nai adisekong thun kra kunli apaiq rai tsuqho raüta, Kanan mung na laüho she kihoto.

Ümtiikiiwa tsangshiq ka Kanan mung niishe saütaq, 6Abram ka kra mung hamli maq kihoto raüta Shekhem chela na asii pechong More hiq na sitlaq kiijaq saüli kito. (Kra akhing na Kanannok ka kra mung na sishat li riito.) 7Tatiwe ka Abram phana dongkito. Raüta apaiq ma akha nguto, “Armung ara Ngi raq ümsaü ümsetiim miishe mikuqha.” Kiijiishe Abram raq Tatiwe apaiq phana dongkitaq kriiba kiijaq berong-wacha ashi haito. 8Kra jai maq, apaiq ka shemai nü wang na ku akin tonglong binjü na Bethel chela maq shedong nü nü binjü niishe kihoto. Raüta Bethel chela ka shenyap nü na kiimaq Ai chela ka shedong nü na kra chela wiinai heawea liipan kiijaq apaiq piitiip ka teito. Kiijiimin apaiq raq berong-wacha ka ashi hali hai nongto. Raüta Tatiwe ka shomnoqto. 9Kriimiishe hali apaiq ka bashi na shonghoho maq laühoto. Raüta Kanan mung maq shemai nü nü mung kiiniishe laühoto.

Abram Nai Sarai Ka Ejip Mung Na

10Shatmaq Kanan mung na ramdongto. Kra ramdong ka henghea kha maq Abram ka shemai nü mung na alu lin na, Ejip mung na heashi sikai nguta kihoto. 11Riita apaiq ka Ejip mung hiq rai tho niishe saüho raüta, apaiq raq tsang-nyung Sarai ma akha nguto, “Ümniika sham hea wiq nyung. 12Kiimaq Ejip mungti raq ümniika chhi raüla, tsangshiq raq ümniika ijamti nyung nguta mitiima. Kiimaq tsangshiq raq ngi ka atsea mirbaiq. Shatmaq ümniika atra mitiisi. 13Riita tsangshiq ma ümniika ishea nyung nguta chonglaq. Kra riihaüla, ümnaq miitu tsangshiq raq ngi ka atra mithü kiimaq tsangshiq raq ngi ka aheawiq miliikuq.” 14Kiimaq ümtiikiiwa apaiq raq hiqrai ka jinho raüta Ejip mung niishe saühotaq, Ejip mungti raq tsang-nyung ka shamheawiq nyung nguta dea liito. 15Kiimaq hokham rung na ngati maiq wiijamti raq apaiq ka chhito. Raüta hokhamwe ma kra nyung ka shamheawiq nguta tsakito. Kiimaq apaiq ka hokhamwe jam niishe shea wanto. 16Kra nyung ningkhan hokhamwe raq Abram ka aheawiq shiili liito. Kiimaq apaiq ma sku kong nai chhechhi kong, minsaü kong, kumtoq kong, kiimaq disetiim kiimaq kumtsong kong kuqto.

17Shatmaq hokhamwe raq Sarai ka tsang-nyung ma nguta shea wan kha na, Tatiwe raq akhum na nai ahokham jam na sitibi maiq thun khu thaq na phiiptsi chang thatsi henghea tiisaüto. 18Kiijiishe hokhamwe raq Abram ka tiiheakito. Raüta apaiq ma akhiishe waito, “Ümniiraq ngi ma ara jamlai wa riilaü? Ümniiraq ngi ma apaiq ka ümjamti-nyung nguta jam nguto chongmaü riilaü? 19Ümniiraq ngi ma apaiq ka ümshea nyung nguta jaram wa ngulaü, ngi ma apaiq ka ichak ma nguta ijam na tiishea wan laü? Ümchaü min arjaq ara ümchak. Apaiq ka shea wan laq. Laüta tiibintlo laq!” 20Kiimaq hokhamwe raq asenginok ma aming kuqto. Kiimaq tsangshiq raq Abram ka sheahoto. Raüta apaiq ka kra mung wa tiiwabaiqto. Tsang-nyung rai kiimaq ahup asam kunli nong nong kra mung wa tiiwa baiqto.

Currently Selected:

RAPHA HIQWA LAK 12: TANGSBSI

Highlight

Copy