RAPHA HIQWA LAK 13

Abram Nai Lot Riipheato

1Abram ka Ejip mung maq shekhu nü nü na Kanan mung maq shemai nü na tsang-nyung nai ahup asam kunli nong nong maq wawanto. Kiimaq Lot kiimin apaiq rai wawanto. 2Abram ka pinthum chiithejong riito. Sku kong, chhechhi kong, kiimaq minsaü kong thun kiimaq ajaq na kampho nai chaq kiimin pahea asi riito. 3Raütiishe apaiq ka kriimaq wawan raüta bashi na siwan wan raüta Bethel chela nü nü niishe wawanto. Raüta apaiq ka Bethel nai Ai chela heawea binjü niishe kongkhuji na apaiq raq piitiip teitaq 4kiimaq berong-wacha ashi haitaq kiijaq saü wanto. Kiijaq apaiq raq Tatiwe ka shomnoqto.

5Lot jaq niimin, sku kong, chhechhi kong, kiimaq minsaü kong kiimaq ajamtitiim nai ajaqshi setiim kong ka asi riito. 6Kriikha na tsangnai wiita adam na simiika nyamse rümchang nyiim lung rü hiq ka hongmak she jakito. Jamkhano ngukla tsangnai jaq na nyamse kong ka pahea lang lang she jakito. 7Kra ningkhan Abram nyamse rümtibi nai Lot nyamse rümtibi liipan na tatso she dongto. (Kra akhing na Kanannok nai Perijaiqnok ka kra mung na sishat asi riito.)

8Kiijiishe Abram raq Lot ma nguto, “Nanai ka tashiti. Kiimaq ümsengibi nai isengibi liipan na ta riitsoruq ka maimak. 9Kra ningkhan nanai ka arphea she rii i. Armung arwa ümniiraq aroro hiqshong rahai ka tsealaq. Ümniika konü na kilaq. Raüla ngi ka konü na mikiha.”

10Kiimaq Lot raq hiq ka tro tri liito. Raüta Jordan rai Tan kra chhito, Joar hiq shong na saüli, kham ka chamtraq, Tatiwe sonruk ikha, riimakla Ejip mung ikha chhito. (Arka Tatiwe raq Sodom nai Gommora chela ka mitiithenbaiq shaq na riito.) 11Krai mren Lot raq Jordan rai Tan ka tlotli apaiq miitu tseato. Raüta apaiq ka shedong nü wang kiiniishe laühoto. Tsangnai liipan na akha riiphea wanto. 12Abram ka Kanan mung na shongto. Kiimaq Lot ka hiq thung tan wang na chela thun asi kiijaq shong wanto kiimaq Sodom chela tho na apiitiip ka teito. 13Kiijaq sitinok ka abi kiimaq Tatiwe makki na ngarai kloti riito.

Abram Ka Hebron Hiq Na Laü Wanto

14Lot laü wan jai she, Tatiwe raq Abram ma nguto, “Ümnaq ümbano chaptlaü, kriimaq aheawiq barap binrii nü na nyi laüta tro tri liilaq. 15Ümniiraq ümmak maq aham ham hiq ara ümchuwa chhitlaü thun kra, Ngi raq ümniima nai ümsaü ümsetiim ma wiita mikuqha. Kiimaq armung ka pattup pat-sa miitu ümniiriishe miraq. 16Ngi raq ümsaü ümsetiim phong ka pahea pahea she mitiipuchi wanha. Tsangshiq ka jurmin weawon lot mak miraq. Kra nam miika hiqraikhü wa botkhulai kra weawon riiwe ka aje lin miraq! 17Riita ümchaü min, kilaq, Laüta armung ara tlotli binhot jühot khum kikiq. Jamkhano ngukla armung ara kunli, Ngi raq ümniimiishe mikuqha.” 18Kiimaq Abram raq apiitiip ka tiisot wanto. Raüta Hebron chela wa maiqwe amang Mamre ngutlaq kriiraq achhi asii pero tho na apiitiip ka tei raüta shongto. Kiimaq apaiq raq kiijaq Tatiwe ma berong-wacha ashi haito.

Currently Selected:

RAPHA HIQWA LAK 13: TANGSBSI

Highlight

Copy