MIJAHEI 15
15
Inthoina Dânhei
1 Rōngpu’n Moses hneng 2hiva chôndânhei hi Israelhei apek sik hei ram shunga antanit sik a aleipek hei. 3Sehratche, kemōngche, a-emak leh keche inkhat romanvâm inthoina a-emak leh intepna huitlungna sik inthoina a-emak leh bing rachama tōksōtna a-emak leh beklanga angaia tōksōtna heia tōkthei hei kae. Hiva thlai inthoina marim hi Rōngpu tlaina kae. 4-5Tu achang inum Rōngpu hneng kemōng a-emak leh ke inkhat romanvâm inthoina tōksōt khan thlai inthoina sik olive thai leh inhei jâmdi kilograme inkhat leh vomhrui theitui litre inkhat ahei choisa sik kae. 6Kemōngche inkhat ahei tōk pha olive thai litre khat leh aher inhei jâmdi kilograme 2 thlai tōksōt sik 7vomhrui theitui litre inkhat leh aṭim leh inṭhōia atōk sik kae. Hiva inthoina marim hi Rōngpu tlaina kae. 8Sehratche inkhat ro-inthoina a-emak leh intepna huitlungna inthoina a-emak leh inlôikhômna inthoina atōk pha 9thlai inthoina olive thai litre 2 leh inhei jâmdi kilograme 3, 10ju litre 2 leh atōk sik hei kae. Hiva inthoina marim hi Rōngpu tlaina kae.
11Khahei seng kha sehratche, kemōngche, kemōnghei a-emak leh kehei leh tōksa sik hei kae. 12Ran inkhat kakhea a’ntōk pha kahnung kajui tōksa hei kha’m in-anghrep a anṭhei sik hei. 13Ramsha Israel rakip in thlai inthoina antōk pha Rōngpu tlaina marim hi, antatōksa sik kae. 14Khan chu phâkhat a nankâra ramlak mi pha bongkhat sik a-emak leh pha kasôttak sik a aka-om jo khan Rōngpu tlaina marim, thlai inthoina atōk inchu hiva chôndân mama hi antajui sik kae. 15A’n-anghrep dân hin nangni leh nankâra aka-om ramlak mihei chunga aheitik a akhit sik chei kae! Rōngpu hmit-hmua chu nangni leh anmani kha thakhat chei kae; 16dân leh chôndânhei kha nangni leh anmani chunga thakhat a hmang sik kae.#Lev 24.22
17 Rōngpu’n Moses hneng 18chôndânhei hi Israel mipui he’n apek sik hei ram shunga antajui sik a aleipek. 19Khana khan thlaisâk heikhat, ram shunga akasōk kha nansâk pha, ṭhahrep chu ahlopdet a Rōngpu hneng pekna sik ṭhensōt sik kae. 20Buhlom nansyem pha, sathera a’nsyem buhlom hma inkeipen kha, Rōngpu hneng ahlopdet a pekna nei sik kae. Hivahi nangni’n ahma kakei sâng nanvōk pha ahlopdet pekna nantasyem kapōa tlosōt sik kae. 21Akahong sik pha rakip a, nanbuhlom syema inphut ahlopdet kutchoi hi Rōngpu hneng pek ṭhak sik kae.
22Tâk, tekhing inkhat a Rōngpu’n Moses hneng dân aleipek hei kha tu mo inkhat in amahngia ṭhahrep asukṭhe jo. 23Khan chu Rōngpu’n Moses hneng ṭong aleipek rakip kha hnunga chu vaipui in tlotet mak jo hei. 24Khava ṭhena kha vaipui manhret mak jâra achang inchu, Rōngpu tlaina marim mankhut sik a seche inkhat romanvâm inthoina leh hmuchi leh vomhrui ju inthoina tōk sik kae. Hiva chunga, set-inthoina keche inkhat tōksa sik kae. 25Thempu’n vaipui sik a suk manthengna ṭōn atlosōt sik, khan rangei mandam sik hei kae, ajârchu manhret loa sukṭhena achang jâra set-inthoina kha thlai inthoina inkhat a Rōngpu hneng anta heichoi jo kae. 26Israel pumpui leh ankâra ka-om ramlak mihei kha rangei mandam sik hei kae, ajârchu ankhenga ṭhena kha antlo et a kae.
27Mi inkhat in manhret loa setna atlo’nchu, ama’n kum khat katluk jo ke rala inkhat set-inthoina atōk sik kae.#Lev 4.27-31 28Maichâma thempu’n aset inthengna sik a beklanga rōi atlopek sik, khan ama rangei mandam sik kae. 29Israel ram mi achanga, ramlak mi achanga, manhret loa setna katlo rakip chunga dân hi hmang sik kae.
30Tâk-kha tu inkhat manhret pum a set katlo kha, ram mi achanga, ramlak mi achanga Rōngpu kha heia asakmak jâra that sik kae, 31ajârchu ama’n Rōngpu ṭongpek kha lomak khana amanhret pum a ṭongpek-hei kâra inkhat asuk khōia kae. Athina rahno kha ama’n a’nrôn kae.
Châmhngat kani Kasuk khōipa
32Pha khat a, Israel he’n ram thōia anleiom lai, Châmhngat kani ning thing avakachom mipa inkhat anhmusōt jo. 33Ama kha Moses, Aaron, khana vaipui hneng anheiṭhōia, 34ama kha anhngâk a anda, ajârchu heimo manlo sik la’nchên mak a kae. 35Khava sōa Rōngpu’n Moses hneng ati, “Mipa hi that nger sik kae; mipui in rephōr kur vângting hlung vâng denghlon sik kae.” 36Khava jâra mipui in Rōngpu ṭongpek dungjuia, rephōr vângting anṭhōisōt a anvadeng hlon jo.
Tukpâr Chungchânga Dân
37 Rōngpu’n Moses hneng ṭong aleipek, 38Israel mipui hnenga ahri sik kha: “Nanpōn nander hmor heia tukpâr syem ruh, tukpâr rakip a rahmurei pat-hrui manton ruh. Hivahi pha rakip a nantatlo ṭhak sik kae.#Dân 22.12 39Tukpâr hi mandonsōtna kachang sik, nanhmusōt pha leh kaṭong pek nanmandonsōt sik khana nanjui sik; keia inphut sesōt mak tin chei khana madu leh rangeina hlam kha juimak tin chei. 40Tukpâr hei hin kaṭong pek rakip juina sik mandonsōtna apek sik chei. 41Kei Rōngpu nan-Pathen eng kha kae; nan-Pathen changna sik Egypt ram a inphut kaheiṭhōisōt chei kae. Kei Rōngpu eng kae.”
Currently Selected:
MIJAHEI 15: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
