MIJAHEI 14
14
Mipuihei Inphin
1Jân kathang mipuihei kha kachâmtak a kaṭap jo hei. 2Anmani Moses leh Aaron dōina ṭong anhri, “Egypt ram a a-emak leh hiva ram thōia nithi’nchu leikaṭha det sik! 3Heisik a mo Rōngpu’n khava ram a sik a aṭhōi me? Eini rea kathi sik me, ninuhmei, nisahei ansur sik hei. Egypt langting inle jôk ṭhamak ning mo?” 4Khava jâra anmani khat leh khat inhrina hei, “Hlamkakei inkhat kadei me sona Egypt a inle jo rih!”
5Khan chu Moses leh Aaron kha mipuihei hmaikunga raleia inkun jo hei. 6Khana repa hei kâra Nun sapa Joshua leh Jephunneh sapa Caleb he’n, malung inrengtak a anpōn ankeihler jo 7Khana mipuihei hneng anti, “Kanta va-en ram so ram kaṭha hranghra kae. 8Rōngpu’n nichunga atlai inchu, sōn aṭhōi sik me, heirakip sōkna leh ralei thai omna ram so apek sik me. 9Rōngpu kha dōimak ruh khana sona aka-om mihei so ṭitmak hei ruh. Kabeitak a nitor sik hei. Rōngpu’n eini a-ompui me, ankahrung pathenhei ator jo hei; khava jâra ṭihêr mak ruh.”#He 3.16 10Vaipuihei khan hlung vâng denghlon sik a anmaṭhit jo hei, tâk manhret manloa mipui khan Pōn-inn chunga Rōngpu omna vâr akadi rik-rak kha anhmu jo.
Moses’n Mipuihei sik Ader
11 Rōngpu’n Moses hneng ati, “Hiva mihei hin heituk chenmo antahlonsōt sik eng? Ankâra ṭōn-inlak katamtak katlosōt jo’num, heituk chenmo antataksen mak sik eng. 12Hrise kajōngtir sik kamanram sik hei, tâk nang chu anmani kanek a akatamdet leh ratha kaneidet jât inkhatpa a kasyem sik che!”
13Tâk-kha Moses’n Rōngpu hneng ati, “Hiva mihei hi Egypt ram a inphut naratha neina vânga naheiṭhōisōt hei kae. Egypt he’n namihei chunga naleitlo hi anthei pha,#Sōk 32.11-14 14anmani’n hiva ram a aka-om hei hneng anhri pek sik jo hei. Hiva mihei hinchu Rōngpu nang in kankâra naka-om hi antheisō pet jo, nang sumtuk khan kanchunga a’nhngat pha khana sûn leh sumtuk kacho inkhat a khana jân leh hmei kacho inkhat a anhmating nase pha inthengtak a anhmu jo che. 15Tâk-kha tûn nang in namihei seng nathatsō jo he’nchu, na’nthangna aleikatheisa jât he’n hinga anhongti sik, 16khachu, anmani pek sik a naleitep pek ram shunga naṭhōi tor mak jo hei jâra ram thōia namihei kha nathat jo hei kae. 17Khava jâra Rōngpu, kader che kae, naratha neina kha malâr jo roh khana nale’ntepna kha tlo jo roh, hinga naleihri, 18‘Rōngpu kei hi kahnuk nabeimak, lungset kalen leh taksenthei changna khana setna leh dōina hei rangei mandamna kamalâr. Kha’num, annu anpahei setna jâra antu-ansa khang thum, khang manlihei chunga karâk loa om mak ning.’#Sōk 20.5-6; 34.6-7; Dân 5.9-10; 7.9-10 19Tûnchu Rōngpu inthlengtik kaneimak nalungset kalen vâng khan, Egypt ram anhei dahlon ninga inphut nahei rangei mandam hei kapōa, hiva mihei hi rangei mandam hei roh tia kangek che.”
20 Rōngpu’n amasôn, “Naderna dungjuia karangei mandam sik jo hei. 21Tâk-kha kei akahring kachang jâra khana ka-om hin raleichung akahlōsō kachang jâra,#He 3.18 22hiva mi inkhatbek in khava ram kahlut sik a hringmak hei ning tia intep jo eng. Anmani’n Egypt ram a leh ram thōia vâr kadi rik-rak leh ṭōn-inlak katlosōt hei kha anleihmu jo, tâk kade hratna hi ave-avea an-en mansin enga kaṭong jui sik hnōm mak heia kae. 23Anpa anpuhei kaleitep pek hei ram kha anmani hlut hêrmak hei ning. Tu enum kei kapom mak rakip kha hlut hêrmak hei ning. 24Tâk-kha kasōkpa Caleb chu lungri hlop avona kei a-ôi eng, alei-en ram shunga khan kaṭhōi manhlut sik a kae, asōn apâr he’n ram kha anchen sik,#Jos 14.9-12 25tuna Amalek leh Canaanhei omna phaichamhei senga son. Jînga inle una Agaba tui takake khumna langa ramhâng ting son se jo ruh.”
Inphin jâra Rōngpu Karâkna
26 Rōngpu’n Moses leh Aaron hneng aleiti, 27“Heituk chenmo hiva mikaṭhamak-hei hi kei dōina ṭong antalanei hi sik? Anṭongnei katluk a kathei jo! 28Tûn hiva ṭong masôn hi pek hei roh: ‘Kei akahring eng kachang jâra inhâksêr eng, nangni’n nantangek rakip kha katlo pek sik chei. Rōngpu ke’n kahri jo kae. 29Hiva ram thōia hin akathi cheia nankalōng hei a’nte let-hlut sik chei kae. Kei dōina nanle’nphin jâra, kum 20 achungting seng inkhatbek ram kha hlutmak tin chei.#He 3.17 30Khava hmun a man om sik chei tia ale’ntep eng kae, tâk Joshua leh Caleb tei loa, tûte hlutthei mak jo tin chei. 31Nangni’n nansahei mi tasur sik hrep a nanhri, tâk anmani chu nanta madu mak ram shunga kaṭhōi manhlut sik hei, khavakha an-inn kachang sik. 32Nangni chu hiva ram thōia hin akathi sik jo chei kae. 33#Ṭōn 7.36Taksenthei nanchangmak jâra inrengna kha nansa he’n kum 40 ram thōia kalôn sik hei, nankâra hnung kakhôrpen kha athimak kârseng. 34Nanram vathlirna ni 40 kha ni khat leh kum khat mantōk a kum 40 hi nansetna tloman a a’nreng sik chei kae. Nankadōia kaka-om hi heimo kachang ti hi nanmanhret sik jo! 35Kei dōina ale’ntûp mikaṭhamak nangnihei chunga hivahi tlosōt sik a intep eng. Hiva ramhâng thōia hin akathisō pet sik chei kae. Rōngpu ke’n kahri jo kae.’ ”
36-37Moses’n ram ka-en inthlip sik a aleitir hei dikmak ṭong thangkōina khan mipuihei kha Rōngpu chunga amanphin jo hei. Kha achang jâra Rōngpu’n anchunga hrise amanlenga kathi jo hei. 38Repa 12 hei kâra Joshua leh Caleb rōk kahringsōt hei.
Ram kha Re tlona sik Ahma Inkeipen Intlukna
(Dân 1.41–46)
39Moses’n Rōngpu ṭonghri kha Israelhei ahri pek hei pha, malung inrima in-ôi jo hei. 40Ajînga jîngkâra hmatak a tlângrama re katuk sik a inphut jo hei, anmani’n anti, “Tûnchu Rōngpu’n aleihri pekna hmun a akase sik a intluk jo ung. Keini kaset jo ung ti hi kahnōm ung.”
41Tâk-kha Moses’n ati, “Khan chu tûn heisik a mo Rōngpu ṭong nanta juimak? Nangni’n hmesō mak tin chei! 42Semak ruh. Rōngpu’n ompui mak jo chei, nan-inrepui he’n antor sik chei. 43Nangni’n Amalek-hei leh Canaanhei re nantuk pha rehmun a kathi sik chei, Rōngpu’n ompui mak tin chei, ajârchu ama juihnōm mak chei.”
44Achang ravâng Rōngpu Ṭongtep Bôm leh Moses khan rephōr anladahlon mak lai anmani tlângram ting se sik a intluk jo hei, 45Khava sōa khava hmun a leika-om Amalek leh Canaanhei khan anheisō heia antor jo hei, khana Hormah katlunga anleihnong hei.
Currently Selected:
MIJAHEI 14: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
