MIJAHEI 16
16
Korah, Dathan leh Abiram Dōina
1-2 #
Ṭt 11
Levi phunga Kohath innshung, Izhar sapa Korah hin Moses hlamkeina chunga aleidōi jo. Reuben phunga mi 3 he’n an-inhlop pui, Eliab sapa Dathan leh Abiram, khana Peleth sapa On, khana vaipui talei kadei hei, kaṭha antamanhret jo hlamkakeihei, Israel mi 250 he’num anleijui. 3Anmani Moses leh Aaron hmaikunga intûp heia anti, “Nangni nankhe rei jo! Vaipui mi rakip hei hi Rōngpu tahei kae, khana Rōngpu’n nikhenga a’nṭhōipui me. Kha achang inchu heisa mo Moses nang in Rōngpu mipui chunga nabinga aka-om inshâng che?”
4Moses’n hi athei pha, raleia inlet-hlona derna anei jo. 5Khana ama’n Korah leh akahnung kajuihei hneng ahri, “Ajînga jîngkâra Rōngpu’n tu kha mo ama ta kachang amanhmu sik me; ama ta kachang, atakadei kha maichâma ahnenga amanhlut sik me. 6-7Ajîng jîngkâra nang leh nakajui he’n hmeithleng nanchoi sik, hmeira-ê leh bero achunga nanda sik, khana maichâm chunga nanvada sik. Khava sōa eini’n tu kha mo Rōngpu’n akadei me nihmu sik jo. Akakhe rei kha Levi nangni chei kae!”
8Moses’n Korah hnenga ahrisa. “Rangei ruh, Levihei! 9Israel Pathen in vaipui heia inphut aṭhensōt cheia, ahnenga nansor tor jo, Rōngpu Pōn-inn shunga nanṭōn nantlosōt tor jo, khana vaipuihei ṭōn nantloa nanrajena hei hi akasintek inkhat a nantamandon mo? 10Nangni leh Levi alakseng um hiva kajana hi amanchen chei, khana tûn thempu hmun kha’m chenna sik intluk chei! 11Nangni’n Aaron kadōia nan-inphin pha, khavakha inchêntak a Rōngpu kadōia nang leh nakajui he’n a’nphin chei kae.”
12Khava sōa ama’n Dathan leh Abiram ava manbek hei, tâk anmani’n anti, “Keini hongmak ning! 13Egypt ram thlai ṭhatna inphut hiva ram thōia that sik a naheiṭhōisōt ung hin latluk mak mo? Kanchunga rōngpu kha’m alakachang sik che mo? 14Nang in thlai ṭhatna ram a naṭhōi sik ung changmak khana hleipuk leh vomhrui rahōn napek sik ung changmak, khana tûnchu keini kahōn sik a a’ntluk che kae. Keini hongmak ning!”
15Moses kha ahnuk kana joa Rōngpu hneng ahri, “Hiva mihei inthoina tōkna heite rahlâng mak roh. Anmani inkhatbek hneng ṭhena neimak eng; anmani shakōrtung inkhatbek lopek mak hei eng.”
16Moses’n Korah hneng ahri, “Ajînga nang leh nami 250 chei kha Rōngpu omna Pōn-inna akahong nger sik chei kae; Aaron um khan kahong sik. 17Nangni inkhat et in hmeithleng nanchoi sik, achunga bero nanda sik, khana maichâma nantōk sik.” 18Khava jâra mi rakip in anhmei thleng antachoi et a, Pōn-inn hlutna kot kunga Moses khana Aaron leh kangir jo hei. 19Khana Korah khan vaipui alei mantûp jo hei, Moses leh Aaron kha anhnget heia Pōn-inn hlutna khan leikangir hei. Manhret manloa Rōngpu omna vâr kadi rik-rak khan vaipuihei hnenga ajōngsat hei, 20khana Rōngpu’n Moses leh Aaron hneng aheiti, 21“Hiva miheia inphut kahnungting intet ruh, inrangtak a kasuk manhmang sik jo hei kae.”
22Tâk Moses leh Aaron in raleia anhmai andima anti, “Eh Pathen, nang chu hringkhō rakip sōkna che kae. Mi inkhat in aset pha, vaipui chunga nahnuk akana sik mo?”
23 Rōngpu’n Moses hneng ati, 24“Korah, Dathan leh Abiram hei pōn-inn heia inphut mipuihei kha ansesōtna sik a manthei hei ruh.”
25Khana Moses kha Israel hlamkakei he’n anjuia, Dathan leh Abiram hei hneng vakase. 26Ama’n mipuihei hneng ati, “Hiva mikaṭhamak-hei pōn-inna inphut sesōt ruh, anmani neinâk heikhat bek tônmak ruh. Achangmak inchu anmani setna jâra nangni’m anmani leh a’nhmangsō sik chei kae.” 27Khava jâra Korah, Dathan, leh Abiram hei pōn-inna inphut kasesōt jo hei.
Dathan leh Abiram kha annuhmei ansahei leh anpōn-inn hlutna kot a leikangir hei. 28Moses’n mipuihei hneng ati, “Hiva ṭōn rakip akatlo sik a Rōngpu’n kei ahei tirna eng leh kalei tlosōt rakip hei kha kei bing maduna katlohei changmak ti hi hing’hin nanmanhret sik jo. 29Hiva mihei hi Pathena inphut karâkna ṭhahrep pek loa thi ngaia anthi’nchu, Rōngpu’n kei ahei tir mak a kae. 30Tâk Rōngpu’n nithei phungmak heikhat atloa, anhring pum a kathirama ansena sik ralei in ahong kik-khōi inchu hiva mihei hin Rōngpu andahlon jo ti kha nanmanhret sik jo.”
31Ama’n ṭong kha ahrisō lim leh Dathan leh Abiram omna ralei thōi kha hong kakik khōia 32anmani leh an-innshung hei khana Korah kajuihei seng leh anneinâk hei amade hlonsō jo. 33Khang’khan anhring pum a kathirama katlasuk jo hei. Ralei khan akamkhum heia anmani inhmu mak jo hei. 34Khava hmun a aleika-om Israel mi rakip ankapeng rasa antheia katlânsōt jo hei. Anmani ka-ông heia anti, “Tlân ruh! Ralei in eini’m amadehlon sik me!”
35Khava sōa, Rōngpu’n hmeimale kasuk ajōng tira bero aleikatōk mi 250 hei kha aro khum jo hei.
Hmei Thlenghei
36Khava sōa Rōngpu’n Moses hneng ahri, 37“Hmeia a’nrokhum mihei akakâng banga inphut sum-êng hmei thlenghei kha losōtna sik leh hmeithlenga hmeira-ê hei kha hmun khat a kathek chai sik a Aaron sapa Eleazar kha manthei roh, ajârchu hmei thlenghei kha a’ntheng hei kae. 38Rōngpu maichâma anpek sōt jo hei kha a’ntheng jo hei kae. Khava jâra ansetna jâra thina kachen jo hei hmei thlenghei kha losōt ina, kheng ina, akhenga maichâm makhuna sik a syem roh. Hivahi Israel mihei sik a maṭhitna akachang sik kae”. 39Khana Eleazar thempu’n hmei thlenghei kha aloheia thleng inpa amankheng heia maichâm makhuna amansyem jo hei. 40Hivahi Israelhei sik maṭhitna kae khachu tu inkhat Aaron sōn leh pâr kachangmak in Rōngpu sik a maichâma bero karo sik akahongmak sik kae. Achangmak inchu Korah leh amihei kapōa ama kha suk manhmang sik kae. Rōngpu’n Moses a inphut Eleazar ṭong aleipek dungjuia heirakip hi le’ntlosōt jo.
Aaron in Mipui Ahuk hei
41Abân kania vaipui mi rakip in Moses leh Aaron chunga ṭong anhri, “Nang in Rōngpu mi ṭhahrep nathat jo hei.” 42Anmani ankhenga Moses leh Aaron hneng inkhepui sik anhong intûpsōa, Pōn-inn langting anhei ena sumtuk in amakhua Rōngpu omna vâr kadi rik-rak a’nlâr kha anhmu jo. 43Moses leh Aaron kha kase heia Pōn-inn hma leikangir hei, 44khana Rōngpu’n Moses hneng ahri, 45“Hiva miheia inphut nakahnung ting intet ina ngir roh, hiva hmun a hin kasuk manhmang sik jo hei kae!”
Anmani 2 inbok heia anhmai raleia andim jo, 46khana Moses’n Aaron hneng ati, “Nahmei thleng kha inlo roh, maichâma inphut hmeira-ê kha ashunga da roh, hmeira-ê chunga khan bero ajing mathlâk roh. Kha choi ina mipuihei hneng inrang roh, inthoi-insân thleng mantheng sōtna tlopek hei roh. Inrang roh! Rōngpu hnuknat kha hong katlung jo, hrise aphut jo.” 47Aaron in ṭong ajuia, ahmeithleng aloa ale’ntûp mipuihei laia katlân inhlut jo. Hrise aleiphut dek jo ti amanhret pha, hmeira-ê chunga bero ajing ada a anmani sik a mantheng sōtna inthoina kha atlo jo. 48Hivahin hrise kha a akhâm jo, khana ama kha kahring leh kathihei laiṭim a leikangira kae. 49Korah dōina chunga akathihei tei loa, khana akathi mija kha 14,700 hei kae. 50Hrise kha ahai jo pha, Aaron kha Pōn-inn hlutna kot a Moses hneng hong inle jo.
Currently Selected:
MIJAHEI 16: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.