MATTHEW 24

Bek-inn Suk manhmang sik Jesu’n Ahri

(Mk 13.1–2; Lk 21.5–6)

1Jesu’n Bek-inn kha adahlona kasesōt jo, khava pha asonle he’n khava innhei chungchânga amandona sik a ahnenga kahong hei. 2Ama’n ati, “Kadik, nangni’n hihei seng hi kaṭha a nanhmu sik hei. Hivahi kahri pek chei kae: hinna hlunghei hi inkhatbek anhmun et a om mak jo hei ning, inkhat et a hlon mathlak sik hei kae.”

Inrengna leh Suk manrimna

(Mk 13.3–13; Lk 21.7–19)

3Olive Tlâng chunga Ama a’n-onglai sonlehei kha anhlop a ahnenga kahong heia, “Khahei kha heitik mo ajōng kasōk sik khana najōngna sik leh pha inchaina mêrchîkna kha heimo akasōk sik amanthei roh,” anti.

4Jesu’n amasôn hei, “Insing thei ruh, tûte’n ahōn makna sik chei tlo ruh. 5Mi katamtak in, kei sik a ṭongkahri ung antia kahong sik hei khana, ‘Kei Messiah eng kae,’ anti sik, mi katamtak anhōn sik hei. 6Nangni’n akahnaia re inhnok rasa khana akahla a reṭong nanthei sik; nanmalung manrim mak ruh. Khahei kha kasōk nger sik, tâk achaina chu lachang mak ning. 7Ram inkhat leh inkhat indōi sik hei, rengram inkhat leh inkhat inbuhlu sik hei. Hmun rakip a sâk kakhôk sik khana lingnu innok sik. 8Hihei rakip hi naiha kaphu nat inphutna kapō kae.

9 # Mt 10.22 “Khan chu nangni karâkna sik leh that sik a mihe’n ansur sik chei khana mikut chunga anpek sōt sik chei. Kei jâra jât rakip in anhōt sik chei. 10Khava pha mi katamtak in taksenna anmasō sik; inkhat in inkhat inhōn inthla sik hei, in-enkada sik hei. 11Sânkathem inhlem katamtak hong kasōk sik hei, khana mi katamtak anhōn mathlâk sik hei. 12Ṭhatmak kapung kha khanga kachang sik a kha, mihring katamtak hei lungsetna hong kabâng sik. 13#Mt 10.22Tâk achaina katlunga kahnet a ka-om mi kha hukmanhring kachang sik. 14Khana hiva Rengram Ṭong kaṭha hi vânhnōi raleia jât rakip hneng sâkhi sik a hrimanthang sō sik kae; khava sō leh a’nchaina kha jōng katlung sik jo.

Ṭit Ka-om Inrengna

(Mk 13.14–23; Lk 21.20–24)

15 # Dn 9.27; 11.31; 12.11 “Sânkathem Daniel taleihri, ‘Ṭit ka-om tak Inrengna’ kha nanheihmu sik. Khava khan hmun inthenga hongkangir sik.” (Akatei hnenga ṭongmanthei: hiva tina hi manhret nger roh!) 16Judea ram a ka-om he’n tlâng ting akatlânsōt nger sik hei kae. 17#Lk 17.31Innchunga ka-om khan inna aneinâk kalo sik jōngṭumna pha lomak hei rasoh. 18Khana hleia ka-om mi khan apōn kalo a-inna he’nle mak rasoh. 19Khava pha nai kavonhei leh naitenuhei heituk a ṭitpek ka-om sik hei mo! 20Phebi lai a-emak leh Châmhngat kani ning nantlânsōt makna sik Pathen hneng inder ruh! 21#Dn 12.1; Ṭph 7.14Ajârchu khava pha inrimna kha ralei insyembia inphut tuning katlunga aleikasōk rakip akakhe chet inrimna kachang sik. Khana khava kapō kha inkhatbek avea sōk mak ning. 22Tâk Pathen in kanihei kha amantlôm jo; amantlôm mak inchu, tûte hring tor mak ning. Hei-achang inum ami kadeisōt hei sik jâra Pathen in kanihei kha asukmanbong pek sik hei.

23“Khana mi inkhat in nanhnenga, ‘Enruh, Messiah hin ka-om!’ a-emak leh ‘Son ka-om!’ anti’num taksen mak ruh. 24Ajârchu Messiah inhlem leh sânkathem inhlem hong kasōk sik hei; khana a-ethei chenna Pathen kadeisōt hei kapha hōn mathlâkna sik det-hla ka-om tak leh ṭōn-inlak antlosōt sik. 25Rangei ruh! Hihei hi apha kha atluk mak hma kahri pek dek chei kae.

26 # Lk 17.23,24 “Achangmak leh, mi’n nanhnenga, ‘Enruh, ama kha nêrdiram thōia ka-om!’ anti’num, vase mak ruh; khana mi’n, ‘Enruh, ama hin inthup!’ anti’num, taksen mak ruh. 27Ajârchu nisōtinga inphut khō ahon’phe khan bōirōk rakip ara-âng kapōa Mihring Sapa ajōng sik kha khanga kati sik.

28 # Lk 17.37 “Kathi kalōng omna hmun a, hmuthonghei intûp sik hei.

Mihring Sapa Jōng sik

(Mk 13.24–27; Lk 21.25–28)

29 # Is 13.10; Jl 2.10,31; 3.15; Ṭph 6.12; Is 13.10; Eze 32.7; Jl 2.10; 3.15; Is 34.4; Ṭph 6.13 “Khava khōdeng theina kani a’nchaisōtak leh kani inthim sik, thla vârmak ning, ârsi marvâna inphut katla sik hei, khana bōirōk a ratha hratna hei kha anhlam hroa inphut hnongsōt sik hei kae. 30#Dn 7.13; Zec 12.10-14; Ṭph 1.7Khava pha Mihring Sapa jōngna sik mêrchîkna kha bōirōk a inhmu sik jo; khana Mihring Sapa kha marvân sumtuk chunga aratha neina leh alûrna leh inṭhōia ajōng kha anhmu pha raleichung jât rakip in kaṭap sik hei. 31Pengkun kalen kha antum sik, ama’n angeva ralei rakir manlia atir sik hei, anmani’n akadeisōt seng kekung leh kelera anchom mantûp sik hei.

Theichang kunga Inchûna

(Mk 13.28–31; Lk 21.29–33)

32“Theichangkung in manhretna manthei chei rasoh. Abâk-hei ahong ka-êm heia, hong kadông heia, abō ahongcher jo’nchu khōlum pha kahnai jo ti nangni’n nanmanhret. 33Kha leh in-anghrep a, nangni’n hihei rakip nanhmu pha, apha hong kahnai jo, a’nphut sik a intluk jo ti nanmanhret sik jo. 34Omchen rakip hei hi tuna akahring mihei hi anthisō mak hma akasōksō sik hei kae ti hi mandonsōt ruh. 35Marvân leh ralei chu inhmang sik, tâk kei ṭongrahme hei chu inhmang hêrmak hei ning.

Akani leh Apha Tûte’n Manhret mak

(Mk 13.32–37; Lk 17.26–30,34–36)

36“Khava kani leh pha kha tûte inkhat in manhret mak hei, marvân ngevahei leh Sapa kha’num manhret mak hei; Pa rōk in amanhret kae. 37#Aph 6.5-8Mihring Sapa jōng sik kha Noah phalai aleikasōk kapō kha ka-ang sik. 38Tuishâng alen mak hma Noah kha rakōnga ahlut ning katlung, mihei kha ansâk an-in, nuhmei-pase lu-inhông heia leika-om hei; 39#Aph 7.6-24tuishâng ahong lena, ahong tlenhlon mak hei kârseng anmani’n leimanhret mak hei. Khang’khan Mihring Sapa ajōng sik kha’m akachang sik kae. 40Khava pha hleia ṭōnkatlo 2 leika-om sik hei: inkhat inlo sik inkhat indahlon sik. 41Nuhmei 2 suma sâng anleisuk sik: inkhat inlo sik inkhat indahlon sik.

42“Khava jâra inrin ruh, ajârchu heikania nan-Rōngpu akajōng sik manhret mak chei. 43#Lk 12.39,40Inn kapu khan inru heitik pha ahong sik kha amanhret inchu, ama inrin ṭhak sik a kha a-inna manhlut mak ning ti hi nangni’n nanmanhret. 44Kha achang inchu, nangni’m a’nrinṭhak sik chei kasōk, ajârchu nangni’n nanhlamrin mak phatak a khan Mihring Sapa kha akajōng sik kae.

Taksenthei leh Taksenthei Kachangmak Sōk

(Lk 12.41–48)

45“Khan chu, tu hmen , taksen ka-om leh akasing sōk kha? Khava khachu arōngpu pa’n sōk alak-hei ka-ensuia leh aphahrep a anbu kapek sik a amanṭangpa kha kae. 46Akapupa inna ajōng pha khanga aleikatlo sōk kha heituk a mikahōi mo! 47Kadik, hi kahri pek chei kae, akapu khan khava mi kha anei rakip chunga vaikarôn amanchang sik a kae. 48Tâk sōk kaṭhamak achang inchu, alungria akapu kha lahong vakmak ning atia, 49ju-inruihei leh an-in, ansâk a asōk changpui hei kha vōk aleiphut sik jo. 50Khan chu khava sōk kapu kha ni khat asōkpa’n ataksen mak phatak a leh amanhret mak kani ning tak kajōng sik jo. 51Akapu khan ama kha abong-bonga atan sik khana a’nṭhat hlemsak-hei vângchen kha ama’m amanchen sik. Khana khan kapenga aha akarôt sik jo.

Currently Selected:

MATTHEW 24: KOMRBSI

Highlight

Copy