MATTHEW 23

Jesu’n Dân Ojahei leh Phariseehei Arakôk hei

(Mk 12.38–39; Lk 11.43,46; 20.45–46)

1Khava sōa Jesu’n mipuihei leh asonlehei hneng ahri. 2“Dân ojahei leh Phariseehei Moses Dân kha a’nlesōt sik a manṭhat hei kae. 3Khava jâra tlo sik a antamanthei rakip kha nantajui nger sik kae; tâk anmani ṭōntlo kapōa chu tlomak ruh, ajârchu anmani’n antahri kha ṭōna tlosōt mak hei. 4Anmani’n phur kahrik rôn intak kha mihei khōn chunga ankhitpek hei, tâk anmani’n chu mihei tarôn kha inthōpuina sik ankutpâr vângbek um kalâng hnōm mak hei. 5#Mt 6.1; Dân 6.8; Mj 15.38Anmani’n heirakip kha mi tahmu sik hnâma antlo. Enruh anmachea leh anbâna ṭong intheng thingbôm antamakhei heiso, heituk a akalenhei mo! Anpōn hmor antamakhei mathlak so heituk a akasei hei mo manhretsa ruh!#Mt 6.1; Mj 15.38; Dân 6.8 6Anmani’n revei hmun a in-ongna kaṭhapen khana intûpna inn synagogue a in-ongna apui karônpen anmadu; 7jōrtlâng hmun heia mihei chibei tlo sik leh ‘Oja’ antati sik anmadua kae. 8Nangni chu ‘Oja’, inti mak ruh, ajârchu nangni’n Oja inkhat rōk nannei khana nankhenga innshung inkhat mi chei kae. 9Khana hiva raleichunga hin tûte ‘Apa’, timak ruh, ajârchu marvâna nangni’n Pa inkhat rōk nannei. 10Khana nangni ‘Hlamkakei’ inti mak ruh, ajârchu hlamkakei inkhat rōk nantanei khachu Messiah kae. 11#Mt 20.26,27; Mk 9.35; 10.43,44; Lk 22.26Nankâra akalenpen kha nansōk akachang sik kae. 12#Lk 14.11; 18.14Abinga akalen hnōm khan a’nsinsak sik kae, khana abinga a’nsinsak kha manlen sik kae.

Jesu’n Inṭhat hlemsak-hei Themmô apek

(Mk 12.40; Lk 11.39–42,44,52; 20.47)

13“Nangni Dân ojahei leh Phariseehei heituk a ṭitpek ka-om chei mo! Nangni a’nṭhat hlemsak-hei! Marvân Rengram kot kha mihei hmaikunga nankhârpek hei; nangni nanbinga’m hlutmak chei, akahlut sik a a’ntluk hei um nangni’n nankhâr hei. 14Nangni Dân ojahei leh Phariseehei heituk a ṭitpek ka-om chei mo! Nangni’n renghmeihei chunga hnemna nanjonga an-inn nanchom pek hei, khana mi tahmu sik akasôt tatak derna nannei! Hiva sik jâra hin nanchunga karâkna kha akakhôkdet sik kae.

15“Dân ojahei leh Phariseehei heituk a ṭitpek ka-om chei mo! Nangni a’nṭhat hlemsak-hei! Mi inkhat malung manthlengna sik tui-ôngpui heia intôr chei, rengram pumpui nanrakan; khana hme nansō jo pha, nangnihei kanek a ama kha tehni kakhea hmeikhur hlutna sik rahōi kasōk nanmanchang!

16“Hmitkacho hlamkakeihei, nangni sik heituk a ṭitpek ka-om chei mo! Nangni’n mi nanmanthei hei, ‘Mi inkhat in Bek-inn kapan a ṭong sekamna anei inchu khava khan ama khitmak nanti; tâk ama’n Bek-inn shunga aka-om sana kapan a ṭong asekam inchu akhit a kae,’ nanti. 17Mikamo hmitkachohei! Sana leh khava sana manthengna kanei Bek-inn kha khō kha mo akakhôk jôk? 18Khan hi’m nanmanthei hei, ‘Mi inkhat maichâm kapan a ṭong sekamna anei inchu, khava khan ama khitmak; tâk maichâm chunga neinâk intōk kapan a ṭong sekamna anei inchu, akhit a kae,’ nanti. 19Heituk a hmitkacho chei mo! Neinâk intōk leh khava tōkna inthengsōt maichâm kha khomo akakhôk jôk? 20Khan chu, maichâm kapan a ṭong sekamna anei khan, maichâm leh achunga ka-om rakip kha apan a ṭong sekamna anei kae; 21khana bek-inn kapan a ṭong sekamna anei khan bek-inn leh ashunga ka-om Pathen leh ṭong sekamna anei kae; 22#Is 66.1; Mt 5.34khana marvân kapan a ṭong sekamna anei khan, Pathen len in-ongna leh achunga a’n-ongpa leh ṭong sekamna anei kae.

23 # Lev 27.30 “Dân ojahei leh Phariseehei, heituk a ṭitpek ka-om chei mo! Nangni a’nṭhat hlemsak-hei! Nangni’n reihing, patikhôm, khana maru-marâng sem sôm chu nanpek, tâk nangni’n akakhôk pen Dânhei khachu heitea sakmak chei, khahei khachu akadik, lungset leh malung intheng hei hi kae. Alakseng um heisakmak tlo loa hivahei hi nantatlosōt sik kae. 24Hmitkacho hlamkakeihei! Nantui ina thōidi chu nandîpsōt a, sharîngsei chu nanmade manhlut a kae!

25“Dân ojahei leh Phariseehei heituk a ṭitpek ka-om chei mo! Nangni a’nṭhat hlemsak-hei! Nangni’n kōklei leh thleng avângting chu nansôp mantheng, tâk ashungting chu inphâmna leh rumhrat a mi chomna kasiptak a ka-om. 26Hmitkacho Phariseehei! Ahma inkeia kōklei shungting kha mantheng ruh, khan chu avângting kha’m intheng sik!

27 # Ṭōn 23.3 “Dân ojahei leh Phariseehei heituk a ṭitpek ka-om chei mo! Nangni a’nṭhat hlemsak-hei! Nangni akachek inno thlân kapō chei kae, avângting chu en kaṭha, tâk ashungting chu mi kaṭop, kathi ru kasip phet a kae. 28Khava kapōa, nangni’m vângtinga mi rakip hmit-hmua kaṭha chei, tâk ashungting chu inṭhat hlemsakna leh setna kasiptak cheia kae.

Jesu’n Anmani Karâkna Amak hma Ahri pek hei

(Lk 11.47–51)

29“Dân ojahei leh Phariseehei heituk a ṭitpek ka-om chei mo! Nangni a’nṭhat hlemsak-hei! Nangni’n sânkathemhei thlân kaṭhatak a nansyem, khana hringkhō kaṭha aleikahmang hei thlân nanmanret pek hei; 30khana nangni’n nanpuhei phalai khan nanleihring inchu, anmani tatlo kapōa leitlo mak ni’ung khana sânkathemhei leithat mak hei ni’ung nanti. 31Khava jâra nanbinga sânkathem leikathat hei sōn nanchangna sâkhi kha nantatlo jôk kae! 32Khan chu, nanpuhei taleiphut ṭōn kha tlona jui mathlung jo ruh. 33#Mt 3.7; 12.34; Lk 3.7Nangni hrisehei hrise sōnhei! Hmeikhur chen sik a inphut heikhong mo tlânsōt sik a a’nngam chei? 34Khava jâra ke’n kahri pek chei kae sânkathemhei, mikasinghei leh ojahei kajōngtir pek sik chei; ṭhahrep nanthat sik, alak thingrakea nanmakhei sik, ṭhahrep nan-intûpna innpui heia nanrachâk sik, khana khōpui inkhat a inphut inkhat a nanhnong kathek sik hei. 35#Aph 4.8; 2 Th 24.20,21Khava tloman chu, ṭhenakase rakip nanthat hei jâra karâkna kha nanchunga akatlung sik kae, ṭhenakase Abel a inphut Berachiah sapa Zacheriah katlunga maichâm leh hmun intheng kâra nanthat hei. 36Kadiktak a kahri pek chei kae: hiva mithatna rakip jâra karâkna kha tûnlai khang phat shunga mihei chunga ajōng katlung sik kae!

Jerusalem sik a Jesu Lungsetna

(Lk 13.34–35)

37“Jerusalem, Jerusalem! Pathen in nahnenga ajōngtir sânkathemhei nathat hei, ṭongkarônhei hlung vâng nadeng hlon hei! Ârpui in atehei amathla hnōia aka-unsi kapōa, ke’num vōi heija mo namihei kabân vâng kaka-unsi sik a kaleimadu, tâk nang in amantlo mak che! 38#Jer 22.5Khava jâra nabek-inn kha dahlon leh akarōk a aka-om sik kae. 39#Hl 118.26Ke’n kahri pek chei kae, ‘Rōngpu rahminga akajōng ama kha Pathen in mahâmṭhat apek,’ nantimak kârseng tuna inphut ahmu mak jo chei ning,” ati.

Currently Selected:

MATTHEW 23: KOMRBSI

Highlight

Copy