MATTHEW 22
22
Hmōiṭhōi Revei Tekâk
(Lk 14.15–24)
1Jesu’n mipuihei ahri pekna khan tekâk aleihmang nôk a kae. 2“Marvân Rengram kha hiva kapō kae. Pha khat a reng inkhat in asapa hmōiṭhōina revei inkhat aleimantluk. 3Ama’n revei sâktlânga sik a hmelâk-hei kabek sik asōk atir hei, tâk anmani honghnōm mak hei. 4Khava jâra asōk ahlop atir nôk heia ahmelâk-hei hneng hing’hin ti ruh: ‘Tûn revei thlaithleng kadônsō jo; kase che leh kavei manthai kase terehei kathat a, heirakip mantluksō jo kae. Hmōiṭhōina reveia hong ruh, vati hei ruh!’ ati. 5Tâk hmelâk-hei khan heitea sakmak heia anṭōn et kase jo hei: inkhat in hleia, ahlop inkhat in inveina hmun a andahlon jo, 6alak he’n asōk-hei kha ansur heia, anvōk hei, khana anthat hei. 7Rengpa kha ahnuk kana hranghra jo, mikathat-hei kathat sik leh ankhōpuihei karo inhmang sik a asepei atir jo hei. 8Khava pha ama’n asōk abek heia anhnenga, ‘Hmōiṭhōi revei sâktlâng mantluk jo kae, tâk kahmelâk mihei sik a anrahōi changmak jo. 9Tûn khōpui hlamlen heia son se una nantahmuhmu hei vabe hei ruh,’ ati. 10Sōk-hei kha khōpui hlamlena kase heia akaṭha leh akase antahmu mi rakip anmantûp jo hei, hmōiṭhōina innden kha mipui leikasip jo hei.
11Rengpa kha hmelâk-hei ka-ena hongkahlut, pase inkhat hmōiṭhōi retpōn a’nvonmak ahmu sōt jo. 12Rn khan ahnenga, ‘Ṭhōnpa hmōiṭhōina retpōn invon loa heikhong mo aheikahlut che?’ ati. Tâk mipa kha heite ṭongmak jo. 13#Mt 8.12; 25.30; Lk 13.28Khava sōa rengpa khan asōk-hei hneng, ‘Akut leh ake khit una vângting inthimna hmun a hlonsōt ruh,’ ati hei. Khana khan kaṭap sik khana aha akarôt sik jo,’ ati.”
14Jesu’n achaina ahri, “Mi katamtak inbe hei, tâk akatlômtek indeisōt hei.”
Ramsêrṭhei Pek Chungchânga Ṭongder
(Mk 12.13–17; Lk 20.20–26)
15Pharisee kasesōt heia ṭongderna vâng Jesu kha man-ôkna sik anmantluk jo. 16Anmani’n ansonlehei leh Herod mihei ahnenga antir hei. Anmani’n, “Oja, nang in akadik nahri kanmanhret che. Nang in, tûte lûrna leh lenna chunga kajana neiloa, mihei sik a Pathen lungdo kha kadik a namanthei hei, ajârchu nang in tûte inkhat lulenna kha donmak che. 17Khava jâra, heimo nang in namandon amanthei roh. Rome Rengkalen Caesar hneng ramsêrṭhei pek sik hi nidân kadōi mo, akadōimak mo?” anti.
18Achang ravâng, anṭhatmakna ṭōnmantluk kha Jesu’n amanhret a, “A’nṭhat hlemsak-hei! Heisa mo kei man-ôk sik a a’ntluk chei? 19Ramsêrṭhei pek sik sêr kha eiman hmu ruh!” ati hei.
Anmani’n dangka cheng khat anheichoi, 20ama’n anhnenga ader hei, “Hivahi tu lim leh tu rahming mo?”
21Anmani’n anmasôn, “Rengkalen Caesar ta kae.”
Khava pha Jesu’n ahnenga ati, “Caesar ta kha Caesar pek ruh, Pathen ta kha Pathen pek ruh.”
22Anmani’n kha anthei pha inlak ansak hêra andahlona kasesōt jo hei.
Thina inphut Thōi nôkna Ṭongder
(Mk 12.18–27; Lk 20.27–40)
23 #
Ṭōn 23.8
Khava ning tak khan Sadduceehei Jesu hneng kahong heia mihei hi thina inphut thōimak hei ning tia anhria kae. 24#Dân 25.5“Oja, Moses’n mi inkhat sa neiloa athi jo’nchu, asōpuipa khan anuhmei kha inlo rasoh, khana akathi jo sōpuipa sa kae tia a’nlo sik nai nei hei rasoh ati. 25Tûnchu, sōpui unai 7 leika-om hei. Upapen khan nuhmei aneia sa neiloa kathi jo, anaipa sik a anuhmei kha adahlon jo. 26A’n-anghrep omchen kha 2 tlukna hnenga, 3 tlukna hnenga, khana achaina unai 7 ankhenga hnenga leikasōk jo. 27Achaina pena anlômnu kha kathi jo. 28Tûnchu, akathihei kahringa thōi nôk ning khan amanu kha tupen nuhmei mo akachang sik jo? Amanu kha ankhenga anleiompui,” anti.
29Jesu’n amasôn hei, “Heituk a nantaṭhe jo mo! Hivahi Ṭong intheng a-emak leh Pathen ratha hratna kha nanmanhret mak jâra kae. 30Ajârchu akathi he’n kahringa anthōisōt ning khan anmani marvân ngeva ka-ang sik jo hei, lu hôngmak jo hei ning. 31Tûnchu, akathihei kahringa anṭhōisōtna chungchânga chu: Pathen in amanthei chei kha teiphung mak chei mo? Ama’n 32#Sōk 3.6‘Kei Abraham Pathen, Isaac Pathen, khana Jacob Pathen eng kae,’ ati. Ama chu akathihei Pathen kha changmak, akahring hei Pathen kae.”
33Mipuihei khan kha anthei pha, aman theinahei chunga khan anmandon-hla hêr joa kae.
Ṭongpek Kalen
(Mk 12.28–34; Lk 10.25–28)
34Jesu’n Sadduceehei amandai hnger jo hei ti ṭong Pharisee he’n anthei pha, hong intûp hei, 35ankâra Dân oja inkhat in ṭongder vâng man-ôk sik a aleitlo.#Lk 10.25-28 36“Oja, kho kha mo Dân shunga ṭongpek kalenpen?” tia ader.
37 #
Dân 6.5
Jesu’n amasôn, “‘Nang in namalung rakip, naratha rakip, khana namandonna rakip vâng Rōngpu na-Pathen kha nalungset sik kae.’ 38Hivahi akarôn pen leh akalenpen ṭongpek kha kae. 39#Lev 19.18Inhni tlukna akakhôk pen khachu: ‘Nang nabinga na’nlungset kapōa nakhō naven lungset roh,’ ti hi kae. 40#Lk 10.25-28Hiva ṭongpek 2 chunga hin Moses Dân pumpui kha leh sânkathemhei mantheina kha a’nhnga kae,” ati.
Messiah chungchânga Ṭongder
(Mk 12.35–37; Lk 20.41–44)
41Pharisee ṭhahrep anho’ntûp jo pha, Jesu’n ader hei, 42“Messiah chungchânga heimo nanmandon? Ama tusa mo?”
Anmani’n ahnenga, “David sapa,” anti.
43Jesu’n, “Khan chu heisik a mo ama kha ‘Rōngpu,’ tia abekna sik Rathla’n David kha amanhlim? David in ati,
44 #
Hl 110.1
‘Rōngpu khan ka-Rōngpu hneng:
Na’ndōipui hei nakethōia kadamak kârseng
kachangting in-ong roh,’ tia aleihri.
45David in ‘Rōngpu’ tia abek inchu, heikhong mo Messiah kha David sapa akachang thei sik?” ati.
46Jesu kha tûte’n masôn tor mak jo hei, khana khava ninga inphut tûte’n ṭong der ngammak jo hei.
Currently Selected:
MATTHEW 22: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
