MATTHEW 21

Jerusalema Kalûrtak a Ahlutna

(Mk 11.1–11; Lk 19.28–40; Jn 12.12–19)

1Anmani’n Jerusalem anjōn manhnai joa, Olive Tlânga Bethphage anheiphâk jo. Jesu’n asonle 2 anhma atir heia 2hing’hin amanse hei: “Nanhma khōa son se ruh, nantlung lim leh shakōrtung inkhat asira ate a’nkhitsa nanvahmu sik. Sōt hei ruh khana kahnenga heiṭhōi hei ruh. 3Khana tu mo inkhat in nanhnenga heikhat ahri’nchu, ‘Oja’n ahmang hnōm hei,’ ti ruh; khava pha ama’n ahei tirbât sik hei.”

4Hiva omchen kasōk hi sânkathem taleihri kha hui atlungna sik a kae:

5 # Zec 9.9 “Zion khōpui kha manthei ruh,

Enroh, narengpa kha nahnenga kajōng!

Ama amalung innem khana shakōrtung leh

atere aheichōng, la’nhmangtet lo shakōrtung kae.”

6Khan chu sonlehei kha kase heia khana Jesu ṭongpek kapōa anmani’n anvatlo jo: 7anmani’n shakōrtung apui leh ate kha anheiṭhōi jo hei khana anchunga anpōnhei anpha a khana Jesu kha achunga khan in-ong jo. 8Mipui katamtak in hlamlena khan anpōnhei anpha, khana ahlek he’n thing bâk-hei anvathlâk a hlamlen chunga khan anpha. 9#Hl 118.25,26Mipui ahma kase hei leh akahnung kajui he’n an-ôna, “Hosanna, David Sapa manpâk a om rasoh! Rōngpu rahminga akajōng ama kha amahâm kaṭha! Hosanna, chunghnung pena manpâk rih!” anti.

10Jesu Jerusalem ahlut pha, khōpui pumpui shunga rasa kachōr heia, “Ama hi tu mo?” antia mipui inder jo hei.

11Mipuihei khan, “Ama hi Galilee ram a Nazareth khōa inphut sânkathem Jesu kha kae,” anti.

Jesu Bek-inn Shunga Ahlut

(Mk 11.15–19; Lk 19.45–48; Jn 2.13–22)

12Jesu Bek-inn shunga khan kahlut a, bek-inn shunga neinâk akajōr leh a’nchohei seng kha ahnong sōt jo hei. Sêr kathlenghei leh pherva kajōrhei dokhânghei kha leh in-ongna hei kha amaletpek jo hei, 13#Is 56.7; Jer 7.11khana anhnenga, “Pathen ṭonghri kha ṭong inthenga hing’hin inzet, ‘Kabek-inn kha kamukna inn a’nti sik kae.’ Tâk nangni’n inruhei inthupna inkhat a nansyem jo!” ati.

14Bek-inn shunga khan hmitkachohei leh ke-inkhôihei ahnenga kahong hei, khana amandam hei. 15Jesu ṭōntlo inlak-hei leh naipang he’n Bek-inna, “David Sapa manpâk a om rasoh!” tia anta-ôn kha thempu kalenhei leh dân oja he’n anthei pha, anhnuk kana jo. 16#Hl 8.2Khava jâra Jesu hneng, ‘Hihei hin heimo antahri hi theimak che mo?’ anti.

Jesu’n anhnenga ati, “Ôk kathei, hiva ṭong inthenga a’nzet hi nangni-e teiphung mak chei mo? Hinga hrina hi, ‘Pui katluk a manpâkna pekna sik a naipanghei leh naidônghei nanman themchûk hei.’”

17Jesu’n anmani adahlon heia khōpuia inphut kasōk a Bethany a kasea vakarek jo.

Jesu’n Theichangkung Ahâksêr

(Mk 11.12–14,20–24)

18Jîngkâr hmatak khōpuiting khan Jesu ahon’le nôk pha, avon leikaṭâm jo. 19Khana hlampanga khan ama’n theichangkung inkhat ahmua akunga khan vakase, tâk achunga abō teilo heite leihmu mak. Khava jâra theichangkung hneng, “Avea nang kara nei hêrmak jo tin che!” ati. Khava laitak khan theichangkung kha kachâr jo.

20Khavakha sonlehei khan anhmua anmandon-hla hêr jo. “Theichangkung hi khonga mo inrangtak a akachâr jo?” tia ander.

21 # Mt 17.20; 1 Cor 13.2 Jesu’n amasôn hei, “Kadiktak a kahri pek chei kae, nangni’n nantaksena inkei-chiona nannei mak inchu, hiva theichangkung hnenga katlo kapōa nantlo tor sik. Hiva rōk hi changmak, hiva hmebung hnenga kapha hin, ‘Inlirsōt inna tui-ôngpuia inhlon inhlut roh,’ nanti’num khang’khan a’ntlo sik kae. 22Nantaksen inchu, nantader rakip kha nantahmu sik kae,” ati.

Jesu Ratha neina chunga Ṭongderna

(Mk 11.27–33; Lk 20.1–8)

23Jesu Bek-inna kahong nôk a; ama’n mi amanthei lai hei thempu kalenhei leh upahe’n ahnenga kahong heia anleider, “Hihei tlosōtna sik a heiratha mo nanei? Tu’n mo hiva ratha hi apek che?”

24Jesu’n amasôn hei, “Ke’n ṭong inkhat rōk der chei rong, nani masôn inchu; ke’num heiratha neina vângmo hihei hi katlo kahri pek sik chei. 25John in tui manhlutna ratha anei kha khonna inphut mo: Pathena inphut mo a-emak leh mihringa inphut mo?”

Anmani anbinga inkhe anphut a, “Heimo niti sik? Eini’n, ‘Pathena inphut’ niti’nchu, ama’n, ‘Khan chu heisa mo John kha nanta taksen mak?’ ati sik me. 26Khana eini’n, ‘Mihringa inphut kae,’ niti’n leh kha mipui in heimo anta hongtlo sik niṭit nôk, ajârchu mi rakip in John chu sânkathem inkhat a antalo kae,” inti jo hei. 27Khava jâra Jesu anmasôn, “Keini’n manhret mak ung.”

Khava pha anhnenga, “Ke’num hihei hi heiratha neina vânga katlo mo ti manthei mak chei ning,” ati hei.

Sapa Inhnihei ṭong Tekâk

28“Tûn heimo nanmandon? Pha khat asapa 2 akanei pase inkhat leika-om. Upapa hneng kasea, ‘Sapa, se roh, vomhrui thei rahōna ṭōn vatlo roh,’ ati. 29Ama’n amasôna, ‘Kei sehnōm mak eng,’ ati, tâk hnunga amalung athlenga kase jo. 30Khana anpa kha asa inkhatpa hneng kasea in-anghrep a avahri. ‘Ôk, apa,’ ati. Tâk ama kha leise mak jo. 31Khahei 2 kâra khō jôk khan mo anpa lungdo atlo?” ati.

Anmani’n, “Upapa kha” anti.

Khava jâra Jesu’n anhnenga, “Kahri pek chei kae: ramsêrṭhei ṭōn katlohei leh noti he’n Pathen Rengram a nanhma ankeia kase sik hei. 32#Lk 3.12; 7.29,30Ajârchu Tui Inhlutpa John kha akadik hlam malârna sik nanhnenga kajōng, khana nangni’n taksen mak chei; tâk ramsêrṭhei ṭōn katlohei leh noti he’nchu ama anleitaksen. Nangni’n hivahi nanhmu jo kapha, hnunga’m nanmalung thlengmak chei khana ama taksen mak chei,” ati.

Vomhrui Thei rahōn Kasânhei Tekâk

(Mk 12.1–12; Lk 20.9–19)

33 # Is 5.1,2 Jesu’n ati, “Tekâk hlop inkhat rangei ruh: Pha khat a ram kapu inkhat in vomhrui alinga, akimvea arahōna atheitui ep-mathlâkna khur inkhat achoa, chung inshâng berte inkhat asak a kae. Khan chu arahōn kha amansân heia, ama kha ram kahlatak a kase jo. 34Akara lōk pha kha ahongtluk jo pha, ama’n asōk-hei avomhrui rahōn kasânhei hnenga hleisân kalo atir jo hei. 35Rahōn kasânhei khan asōk-hei kha anleisur hei, inkhat anvōk a, inkhat anthat a, khana alak inkhat kha hlung vâng andenga kae. 36Mipa khan hma kanek a sōk katam det atir nôk hei khana khahei kha’m in-anghrep a anleitlo nôk heia kae. 37Atorna asapa kha anhnenga aleitir jo. ‘Kasapa chu anleikaja nger sik,’ ati. 38Tâk rahōn kasânhei khan ama anhmu pha, anbinga inbe heia, ‘Ama hi ram kapupa sapa kae. Hong ruh, that rih, a’nlo sik karōihei kha eini’n chen rih!’ inti hei. 39Khan chu ama kha ansura, rahōn vângting anhlonsōt a anthat jo.

40“Tûnchu, hlei kapupa kha kahong jo, khava hlei kasânhei chunga heimo atlo sik jo?” tia Jesu’n ader hei.

41Anmani’n ahnenga, “Ama’n khava mikaṭhamak-hei kha anṭhatmak dungjuia athat sik hei, khana rahōn kha aphahrep a hleisân kapek sik milak hneng apek sōt sik hei,” anti.

42 # Hl 118.22,23 Jesu’n anhnenga, “Ṭong Intheng rabu tahri kha teiphung mak chei mo?

‘Inn kasak he’n antamadumak hlung kha

heirakip a apui karônpen kachang jo.

Hivahi Rōngpu tatlo kae;

hivahi heituk a’nlak manhmuna jo mo!’

43Jesu’n ahrisa, “Khava jâra kahri pek chei kae, Pathen Rengram kha nangnia inphut losōt kachang sik a kha mihlop, kara inpung sik mihei hneng a’npe sik jo kae.” 44Tu achang inum hiva hlung chunga a’npai inthlûk kha ahar-ahak a kakōi sik, khana hlung kha tu inkhat chunga atlâk inchu ravut kapōa asuk manbun dâk sik.

45Jesu ṭong tekâk hri hei hi thempu kalenhei leh Pharisee he’n anthei jo khana anmani chungchânga ahri kae ti ani’nhret jo, 46khava jâra anmani’n asurna sik anjong jo. Tâk mipui in Jesu kha sânkathem inkhat a anlo jâra anmani’n mipuihei kha anṭit heia kae.

Currently Selected:

MATTHEW 21: KOMRBSI

Highlight

Copy