MATTHEW 17

Jesu Hme Inthleng

(Mk 9.2–13; Lk 9.28–36)

1Niruk sōa Jesu’n Peter leh anaipa James khana John tlâng inshânga aleiṭhōi hei khana khan anmani rōk leika-om hei.#2 Pe 1.17-18 2Anmani’n khanga anlei enlai Jesu kha ahme hong-inthleng jo: ahmaisō kha kanivâr kapōa hong kavâr, apōnsi kha hongkachek hlak jo. 3Khava sōa sonle 3 hei khan Moses leh Elijah’n Jesu anta’nbekpui kha anleihmu. 4Khavakha Peter in Jesu hneng ahei hri, “Rōngpu, hina eini ni-om hi heituk a akaṭha jo mo! Nang in namadu’n chu rebuk 3, nang sik inkhat, Moses sik inkhat, Elijah sik inkhat et kasak sik.”

5 # Aph 22.2; Hl 2.7; Is 42.1; Mt 3.17; 12.18; Mk 1.11; Lk 3.22; Dân 18.15 #2 Pe 1.17,18Khang’khan ama aṭonglai khan sumtuk kabang hlom inkhat in amakhusi heia khana sumtuk kâra rasa inkhat in, “Ama hi Kasapa marit kae, achunga kamalung katlai, aṭong hri rangei ruh,” ajōng tia kae.

6Sonlehei khan kha anthei pha, kaṭihêr jo heia anhmai raleia andima katlu jo hei. 7Jesu kahonga avasit heia, “Thōi ruh, ṭimak ruh!” ati hei. 8Khana anmani’n an-en pha, Jesu teilo tûte alak hmumak jo hei.

9Tlânga inphut anmani anjōng ṭumsuk lai, Jesu’n anhnenga ṭong aleipek hei, “Mihring Sapa thina athōisōt mak kârseng malârna nantahmu kha tûte hneng hrimak ruh.”

10 # Mic 4.5 Khana Sonlehei khan ahnenga ander, “Heisa mo Dân oja he’n Elijah hma inkeia akajōng sik kae, anta leiti?”

11Jesu’n amasôn hei, “Kadik, hma inkeia Elijah kha kajōng sik, ama’n heirakip amantluk sik kae. 12#Mt 11.14Tâk ke’n kahri pek chei kae, ti chu Elijah kha kajōngdek jo khana mihe’n ama kha leimanhret mak hei, khana achunga antatlo hnōm anleitlo jo. Kha leh in-anghrep a Mihring Sapa kha’m inrimtak a antatlo sik kae.”

13Khava sōa sonlehei khan ama’n Tui Inhlutpa John chungchânga ahri kae tia anleimanhret jo.

Ṭai karôn Naipang Inkhat Amandam

(Mk 9.14–29; Lk 9.37–43a)

14Anmani mipuihei hneng anhong pha, mi inkhat Jesu hneng kahonga, ahnenga inkuna, 15“Apu, kasapa lungset a arôn pek roh! Ama hring-ê araveia hmei chunga leh tui shunga inchôm inthla ria kae. 16Ke’n nasonlehei hneng ama kaleiṭhōi jo, tâk anmani’n mandam tor mak hei,” ati.

17Jesu’n amasôn, “Heituk a taksen kaneimak leh akadik mak mi chei mo! Heitik chenmo ka-ompui sik chei? Heitik chenmo kathōkpui hi sik chei? Naipangpa kha hin kahnenga heiṭhōi ruh!” 18Jesu’n ramṭai kha ṭong apek a ahnenga inphut kasesōt jo, khava phatak a khan naipang kha kadam jo.

19Khana sonlehei kha marûk a anbinga Jesu hneng kahong heia, “Heisa mo keini’n ṭai kha kantahnong sōt tor mak?” anhongti.

20 # Mt 21.21; Mk 11.23; 1 Cor 13.2 Jesu’n amasôn hei, “Taksenna katluk a neimak chei. Kadiktak a kahri pek chei kae, nangni’n anṭamhmu rehrep taksenna nannei inchu nangni’n hiva bung hneng, ‘Hina inphut sonting inthon roh!’ nanti’num khan a’nthon sik kae. Heirakip nantlo tor sik!” 21Derna leh buhngōina rōk in hing hiva hi ahnongsōt tor kae.

Jesu’n Athina sik Ahri nôk

(Mk 9.30–32; Lk 9.43b-45)

22Asonlehei Galileea ankhenga anhong inkhômlai Jesu’n anhnenga, “Mihring Sapa kha mihei kut chunga pek sōt sik kahnai jo, 23anmani’n anthat sik; tâk ni 3 sōa kahringa keimatho sik kae,” atipek hei.

Sonlehei kha anmalung inrim hêr jo.

Bek-inn Sêrṭhei Pek

24 # Sōk 30.13; 38.26 Jesu leh asonlehei Capernauma anhong pha, bek-inn sêr kaṭheihei kha Peter hneng kahong heia ander, “Nan-Oja’n bek-inn sêrṭhei apek mo?”

25Peter in “Ôk apek,” tia amasôn hei.

Peter in innshung ahong hlut pha, Jesu’n hmapena ahei hri, “Heikhong mo namandon, Simon? Tu he’nmo raleichunga renghei hneng pekdôr leh ramsêrṭhei antapek? Ram mihei tapek mo a-emak leh ramlak mihei tapek mo?”

26“Ramlak mihei tapek kae,” tia Peter in amasôn.

Jesu’n ahnenga, “Kaṭha jo khan chu, ramsêrṭhei hi ram a mi he’nchu pemak hei ning tina kae. 27Kha’num eini’n hiva mihei hi makhe hnōm mak hei me. Nang dîra son vase inna khoi vakei roh. Hma inkeipen nga akhit kha keisōt roh, abei shunga kei leh nangnihei sik bek-inn sêrṭhei akatluk hrep sik sêr leika-om sik. Lo inna eini sêrṭhei kha pek jo hei roh,” ati.

Currently Selected:

MATTHEW 17: KOMRBSI

Highlight

Copy